GENESIS 8
8
Tuichim Tawpna
1Huan, Pathian in, Noah leh long sung a a kiang a thilhing chiteng leh gan om tengteng a theigige a; Pathian in leitung ah huih a nungsak a, tui a hong dai panta hi. 2Tui thukpi nakte leh van tohlette hong kikhakta ua, van a kipan vuah leng theusak ahita hi. 3Lei a kipan tui a kiam giaigiaita a; ni za leh sawmnga nung in tui a hong tawm deuhta hi. 4A kha sagihna, ni sawmlehsagih ni’n Ararat tang ah long a hong kingata hi. 5Tui, a kha sawmna tan in a kiam giaigiai zel a; a kha sawmna ni khat ni’n mualvumte a kimuta hi.
6Ni sawmli nung in hichi ahi a, Noah in a bawl long tohlet a hongta hi. 7Va-ak khat a khahkhia a, lei a kipan tui a kankhit masiah huai va-ak a vial lenlen hi. 8Leitung ah tui a tawmta hia, tawm nailou, chih theihna ding in vakhu khat a khah khe nawn hi. 9Himahleh vakhu in tukna ding himhim a mu kei a, a kiang ah long ah a kiknawn a, tui lah leitung pumpi ah a omlai ngal a. Pawlam ah a khut a golh khia a, aman long sung ah a kiang ah a lalut nawn hi. 10Ni sagih dang a ngaklai a; vakhu long a kipan a khahkhe nawn hi. 11Vakhu nitaklam in a kiang ah a honglut nawn a; ngai in, a muk in olive nah khat a hontuah hi. Noah in lei ah tui a tawmta, chih a theita hi. 12Ni sagih dang a ngak nawn a; vakhu a khah khe nawn a; a kiang ah a hong kiknawn kei hi.
13Hichi ahi a, a kum za guk leh khatna, a kha khatna, a ni khat ni’n, tui lei a kipan a kangta hi. Noah in long khuhna a koihsuana, a en a; ngai in, leitung a hulta hi. 14A kha nihna, ni sawmnih leh sagih ni’n lei a hulta hi.
15Pathian in Noah kiang ah thu a gen a; 16Long a kipan pawt in, nang pawt inla, na zi leh na tapate leh na tapate zite leng na kiang ah pawt uhen. 17Sa tengteng lak a thilhing chiteng na ompihte, vasate, gante, ganhing leitung a khupboh a pai chitengte toh na kiang ah pikhia in, leitung a chipha tak a chi tampi suang a a hong punna ding un, a chi hi. 18Noah a pawt a, a tapate leh a zi leh a tapate zite leng a kiang ah a pawt uhi. 19Sa chiteng, ganhing chiteng, vasa chiteng, leitung a tangthei peuhmahte amau chi omdan bang chiat in long a kipan a pawtta uhi.
Noah Kithoihna
20Noah in Toupa ading in maitam a bawl a; sa siang chiteng lak leh vasa siang chiteng lak a kipan a la a, maitam ah haltum pumpiaknate a lanta hi. 21Toupa’n huai namtui a za a; Toupa’n a lungsim in, “Mi ziak in leitung ka hamsiat nawn kei ding, mite lungsim ngaihtuahnate lah tuailai a hih a kipan gilou ahi ngal ua. Tua ka gawt bang in thil hing chiteng leng ka gawt nawn kei ding. 22Lei omlai teng buh leh buhlakte, khovot leh kholumte, nipi leh phalbite, sun leh zante a bei kei ding” a chi hi.
Pašlaik izvēlēts:
GENESIS 8: PAITBSI
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.