GENESIS 9
9
Noah Toh Pathian Thukhun
1Huan, Pathian in Noah leh a tapate a vualzawl a, a kiang uah, “Chi tampi suang in hongpung unla, lei luahdim un. 2Nou kihtakna leh lauhna lei a sa chiteng leh tung a leng vasa chiteng in a nei ding uh. Hiaite leh lei a khupboh a pai tengteng leh tuipi a ngasa tengteng na khut ua piak ahita uhi. 3Thilhing tangthei chitengte nou ading in nekding ahi ding ua; anteh hing k’on piak bang in bangkim k’on pevek hi. 4Himahleh sa, a hinna sisan toh na nekhawm ding uh ahi kei. 5Na hinna sisan phu ka la ngeingei ding. Sa chiteng lak ah ka la dia, mi lak ah leng. Michih a unaute uh lak ah, mite hinna phu ka la chiat ding. 6Kuapeuh mi sisan suahmi, mi mah in amah sisan a suah ding ahi. Pathian batpih a mi bawl ahi ngal a.
7Nou chi tampi suang in hong pung unla, ta leh nau tampi nei unla, leitung ah hongpung un” a chi hi.
8Pathian in, Noah kiang leh a kiang a om, a tate kiang ah, 9“Ngai un, kei mahmah in na kiang uah leh nanung ua na suante uh kiang ah leng ka thukhun ka hihkip hi. 10Na kiang ua om thilhing chiteng, na ompih uh vasate, gante, na ompih uh lei a sa chitengte kiang ah leng; long a kipan hongpawt tengteng, lei a sa chiteng kiang na ngawn ah. 11Na kiang uah ka thukhun ka hihkip ding; sa tengteng leng tuichim a hihman in a om nawn kei ding uh. Lei hihse ding in tuichim a tung nawn kei ding” a chi hi. 12Pathian mah in, “Kei leh nou leh na kiang ua thil hing chiteng omte kal a , suan tawp neilou a omte ading in, hiai ka thukhun chiamtehna ahi ding hi. 13Meipi ah ka sakhituihup ka zam sak a, huai kei leh lei kal a thukhun chiamtehna ding ahi. 14Hichi ahi ding a, leitung a meipi ka kaisak in sakhituihup meipi ah a kimu ding hi. 15Kei leh nou leh sa tengteng lak a thilhing chitengte kal a , ka thukhun om ka theigige ding. Sa tengteng hihmang ding in tui a letnawn kei ding hi. 16Sakhituihup meipi ah a zam zel ding. Pathian leh leitung a sa om tengteng lak a thilhing chiteng kal a tangtawn thukhun om ka theihgige theihna ding in ka en zel ding” a chi hi. 17Pathian mah in, Noah kiang ah, “Hiai kei leh leitung a sa om tengteng kal a ka thukhun hihkip chiamtehna ahi” a chi nawn hi.
Noah Leh A Tapate
18Noah tapa long a kipan pawtte Shem, Ham leh Japheth ahi uh. Ham Kanaan Pa ahi. 19Huai mi thumte Noah tapate ahi ua, amau a kipan pawtte’n leitung pumpi a zelsuak uhi. 20Noah louneimi in a hongom pan a, grephuan a bawl hi. 21Uain a dawn a, a kham a; a puanin ah a lumkhialta hi. 22Ham, Kanaan pa’n a pa lumkhial a mu a, inn pua a om a naute nih a hilh hi. 23Shem leh Japheth in puan a la ua, a liang ua kizawn in a nung pai ua, a pa uh lumkhial a khuhta uh. A mai uh lehlam nga in a pa uh lumkhial a mu kei uhi. 24Noah uain kham a honghalh a, a tapa naupangpen in a tung a a hih dan a hon theita hi.
25“Kanaan hamsiat in om hen.
A unaute sikhate sikha
ahi ding” a chi hi.
26“Shem Toupa
Pathian phat in om hen.
Kanaan a sikha in om hen.
27Pathian in Japheth hihlian henla,
Kanaan a sikha in om hen,” a chilai hi.
28Noah tuichim tun nung in kum za thum leh sawmnga a dam hi. 29Noah damsung tengteng kum za kua leh sawmnga ahi a; huchi in a sita hi.
Pašlaik izvēlēts:
GENESIS 9: PAITBSI
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.