GENESIS 7
7
Tuichim
1Huan, Toupa’n, Noah kiang ah, nang leh na inkuanpih tengteng long ah lut un. Nang zaw hiai khang a ka ma ah mi diktat na hih k’on mu hi. 2Sa siang chiteng lak ah a pa leh a nu, kop sagih zel; sa sianglou lak ah a pa leh a nu chiat toh kop nih zel, na kiang ah na pi ding ahi. 3Tung a leng vasa lak ah leng, a nu leh a pa chiat, kop sagih zel in, leitung a chi khah dia hinsak ding in. 4Ni sagih in a samlai a, huaikhit chiang in leitung ah ni sawmli leh zan sawmli sung vuah ka zu sak ding. Ka bawl thil hing chiteng leitung a kipan ka hihmang ding, a chi hi. 5Noah in Toupa’n a kiang a thu a piak tengteng bang in a hihta hi.
6Leitung a tuichim a hongtun lai in, Noah kum za guk a upa ahita hi. 7Tuichim a tun ding ziak in Noah long ah a lut a, a tapate leh a zi leh a tapate zite leng a kiang ah a lut uhi. 8Sa siang lak ah leng, sa sianglou lak ah leng, vasa lak ah leng, leitung a khupboh a pai chiteng lak ah leng, 9Pathian in Noah kiang a thu a piak bang in, a nu leh a pa chiat, a kopkop in, Noah kiang ah long ah a lutta uhi. 10Ni sagih nung in leitung ah tuichim a tungta hi.
11Noah kum za guk a hih in a kha nihna, ni sawmlehsagih ni’n, huai ni mah in tui thuk zapi nak tengteng a hong puakzak a, van tohlette leng a hong kihongta uhi. 12Ni sawmli leh zan sawmli sung teng leitung ah vuahpi a zuta hi. 13Huai ni mah in Noah, Noah tapate Shem, Ham, Japheth leh Noah zi long ah a lutta ua, a tapate zi thumte leng a kiang ah a lut uhi. 14Amaute a lut ua, sa chiteng amau chi omdan bang chiat in, ganhing leitung a khupboh a pai chiteng amau chi omdan bang chiat in, vasa chiteng, amau chi omdan bang chiat in, vasa chiteng, kha nei chiteng leng a lut uhi. 15Sa tengteng hinna hatna pai him himte, a kopkop in Noah kiang ah long ah a lutta uhi. 16A lutte Pathian in a kiang a thu a piak bang in, sa tengteng lak a a nu leh a pa zel in a lut uhi. Huchi in Toupa’n amah a khak khumta hi.
17Tuichim leitung ah ni sawmli sung teng a tung a; tui a hong khang a, long a lam a, leitung ah a domkangta hi. 18Tui a hongom zuazua a, leitung ah a khan in a hong khangta hi, long tui tung ah a kilam hi. 19Leitung ah tui nakpi’n a hongom zuazuata a; van nuai a tang sang tengteng a tumkhin vekta hi. 20Tong sawmlehnga hial a sang in tui a hongom a; tangte tupmang in a omta uhi. 21Sa lei a tangthei tengteng, vasate, gante, gamsate, ganhing lei a khupboh a pai chitengte, michih tengte toh a si khin vekta uhi. 22A nak ua hinna kha hatna omna tengteng, gam a om tengteng a sikhin vekta uhi. 23Lei a thil hing chiteng omte, mite, gante, ganhingte, tung a leng vasate toh hihmang in a om ua; lei a kipan hihman in a omta uh. Long sung a om Noah leh a kiang a omte kia hawi in a om uhi. 24Tui ni za leh sawmnga sung teng leitung ah a om hi.
Pašlaik izvēlēts:
GENESIS 7: PAITBSI
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.