Lukas 10
10
Yexus Khaiv Xyaa Caum Ob Leeg Moog Qha Txujmoo Zoo
1Tom qaab ntawd tug Tswv xaiv dlua xyaa caum ob#10.1 xyaa caum ob; tej phoo qub has tas xyaa caum leej. leeg, hab khaiv puab ob leeg moog ib qho, ua Yexus ntej moog rua txhua lub nroog hab txhua lub zog kws Yexus yuav moog. 2Yexus has rua puab tas, “Cov nplej kws zoo hlais lawm muaj ntau, tabsis cov tuabneeg kws hlais muaj tsawg. Mej ca le thov tug tswv teb kuas nwg khaiv dlua ib cov tuabneeg moog paab hlais nwg cov nplej.#Mat 9.37-38 3Mej ca le moog! Kuv khaiv mej moog ib yaam le paab yaaj kws yuav moog rua huv paab maa.#Mat 10.16 4Mej tsi xob nqaa naab nyaj lossis naab thoobpuab lossis khau; Yog mej ntsib leejtwg ntawm kev, mej tsi xob nrug tug ntawd thaam.#Mat 10.7-14; Mak 6.8-11; Luk 9.3-5 5Thaus mej moog rua huv leejtwg tsev, mej yuavtsum xub has tas, ‘Thov Vaajtswv foom koob moov rua mej.’ 6Yog tsev tuabneeg ntawd muaj ib tug xaav tau Vaajtswv txuj koob moov, ces tug ntawd yuav tau lawv le kws mej has. Tabsis yog tsi muaj tug kws xaav tau Vaajtswv txuj koob moov, ces lu lug koob moov ntawd yuav rov lug rua ntawm mej. 7Mej ca le nyob huv lub tsev ntawd, puab pub rua mej noj hab haus le caag, Mej ca le noj hab haus le ntawd. Rua qhov yeej tsimnyog tug kws ua num tau nqe zug. Tsi xob tawm huv lub tsev ntawd moog pw dlua lwm lub tsev.#1 Klt 9.14; 1 Tim 5.18 8Thaus mej moog txug lub nroog twg, yog cov tuabneeg ntawd pub mej su, tej zaub mov kws puab ua rua mej noj, mej ca le noj, 9mej ca le khu tej tuabneeg kws muaj mob huv lub nroog ntawd, hab qha rua puab paub has tas, ‘Vaajtswv lub Tebchaws tub lug ze mej lawm.’ 10Tabsis thaus mej moog txug huv lub nroog twg, yog cov tuabneeg ntawd tsi pub mej su, mej ca le moog rua tom tej kev hab qha has tas, #Ten 13.51 11‘Txawm yog tej nyuas plauv aav huv mej lub nroog kws lu peb kutaw los peb yuav so huv tuabsi, kuas mej paub has tas mej yuav raug kev puamtsuaj. Tabsis kuas mej ncu ntsoov has tas Vaajtswv lub Tebchaws tub lug ze mej lawm!’ 12Kuv has tseeb rua mej has tas, Nub kws Vaajtswv Txav Txim, nwg yuav rau txim rua lub nroog ntawd nyaav dlua le nwg rau txim rua lub nroog Xaudoos! #Chk 19.24-28; Mat 11.24; Mat 10.15
Tej Nroog Kws tsi Tso Kev Txhum Tseg
(Mathais 11.20-24)
13“Lub nroog Khaulaxis, koj yuav raug kev puamtsuaj! lub nroog Npexaidas, koj yuav raug kev puamtsuaj! Tej txujci tseemceeb kws luas tub ua rua meb pum lawm, yog ua tej ntawd rua huv lub nroog Tiles hab lub nroog Xidoos, ces cov tuabneeg kws nyob huv ob lub nroog ntawd, tub xub muab naab tsaaj lug npua, nyob huv qhov tshauv hab tsuab tshauv lug nphoo rua ib ce ntxuv lug lawm. Puab ua le ntawd, kuas suavdlawg paub has tas, puab tub tso puab tej kev txhum tseg lawm! #Yay 23.1-18; Exk 26.1–28.26; Yau 3.4-8; Ama 1.9-10; Xak 9.2-4 14Nub kws Vaajtswv txav txim, nwg yuav rau txim rua meb nyaav dlua le kws nwg rau txim rua lub nroog Tiles hab lub nroog Xidoos. 15Lub nroog Kapena-us, koj yuav tsaav koj lub fwjchim kuas moog txij ntuj los? Kuv yuav muab koj pov moog rua huv ntuj tawg!”#Yay 14.13-15
16Yexus has rua nwg cov thwjtim has tas, “Tug kws noog mej lug, tug ntawd yeej noog kuv lug. Tug kws tsi leeg paub mej, tug ntawd yeej tsi leeg paub kuv; hab tug kws tsi leeg paub kuv, tug ntawd yeej tsi leeg paub tug kws khaiv kuv lug.”#Mat 10.40; Mak 9.37; Luk 9.48; Yhs 13.20
Cov Thwjtim Xyaa Caum Ob Leeg Rov Qaab Lug
17Thaus xyaa caum ob leeg#10.17 xyaa caum ob leeg; tej phoo qub has tas, xyaa caum leej (saib nqai 1). thwjtim rov qaab lug, puab zoo sab kawg le. Puab has rua Yexus has tas, “Tug Tswv, thaus peb tuav koj lub npe ntab dlaab, dlaab kuj noog peb lug hab!”
18Yexus teb puab has tas, “Kuv pum dlaab Ntxwgnyoog poob sau ntuj lug ib yaam le tsaglig xub laim. 19Mej ua tuab zoo noog! Kuv tub pub fwjchim rua mej lawm, mej yuav tsuj tau naab hab raubris teb, hab mej yuav muaj fwjchim kovyeej dlaab Ntxwgnyoog, hab yuav tsi muaj dlaabtsi ua rua mej raug mob.#Pnk 91.13 20Tabsis mej tsi xob zoo sab rua qhov kws dlaab noog mej lug ntawd; mej ca le zoo sab rua qhov kws Vaajtswv tub sau mej lub npe ca rua sau ntuj ceebtsheej lawm.”
Yexus Zoo Sab
21Thaus ntawd Vaaj Ntsujplig tug Dlawbhuv#10.21 Tej phoo qub has tas, Vaaj Ntsujplig; lwm phoo has tas, nwg tug ntsujplig. ua rua Yexus zoo sab kawg le, Yexus has tas, “Kuv Txiv, koj yog tug kws kaav lub ntuj hab lub nplajteb nuav! Kuv ua koj tsaug, rua qhov koj tub muab tej nuav zais ca tsi qha rua cov tuabneeg kws muaj tswvyim hab txawj ntse paub, tabsis koj qha tej ntawd rua cov tuabneeg kws tsi txawj tsi ntse paub xwb. Txiv, koj yeej pum zoo ua le ntawd.
22“Kuv Txiv tub muab ib puas tsaav yaam rua kuv lawm. Tsi muaj leejtwg paub leej Tub, tsuas yog leej Txiv txhaj paub xwb, hab tsi muaj leejtwg paub leej Txiv, tsuas yog leej Tub txhaj paub xwb, tsuas yog leej Tub hab cov kws leej Tub pum zoo qha rua txhaj paub xwb.”#Yhs 3.35; Yhs 10.15
23Yexus txawm tig moog has tuabywv rua cov thwjtim has tas, “Tej kws mej pum nuav, yog mej muaj moo kawg, mej txhaj pum! 24Kuv qha rua mej has tas, ‘Cov kws cev Vaajtswv lug hab cov vaajntxwv ntau leej xaav pum tej kws mej pum, tabsis puab tsi pum, puab xaav nov tej kws mej nov, tabsis puab tsi tau nov.’ ”
Zaaj Lug Pevtxwv Kws Has Txug tug Tuabneeg Xamalis Sab Zoo
25Muaj ib tug xwbfwb qha Vaajtswv txuj Kevcai tuaj nrug Yexus thaam, hab sim saib Yexus yuav teb le caag. Nwg nug Yexus has tas, “Xwbfwb, kuv yuav ua le caag, kuv txhaj tau txujsa ntev dlhawv moog ibtxhis tsi kawg?”#Mat 22.35-40; Mak 12.28-34
26Yexus teb nwg has tas, “Vaajtswv Txujlug qha le caag? Tej kws koj nyeem ntawd koj totaub le caag?”
27Tug txivneej ntawd teb has tas, “Hlub tug Tswv kws yog koj tug Vaajtswv kuas kawg sab kawg ntsws, kawg plaab kawg plawv, hab kawg tug dlaag tug zug. ‘Hab hlub koj tej kwvtij zej zog ib yaam le yug hlub yug lub cev.’ ”#2 Kev 6.5; Lek 19.18
28Yexus teb has tas, “Yog le koj has lawm; koj ca le ua le ntawd, koj txhaj yuav tau txujsa.”#Lek 18.5
29Tabsis tug xwbfwb kws qha Vaajtswv Kevcai khaav has tas, nwg yog tuabneeg ncaaj nceeg, nwg txhaj nug Yexus has tas, “Tug twg txhaj yog kuv tej kwvtij zej zog?”
30Yexus teb has tas, “Muaj ib tug txivneej taug kev ntawm lub nroog Yeluxalees moog rua nraag lub nroog Yelikaus, thaus nwg moog txug ib tog kev, txawm muaj ib paab tubsaab muab nwg tej rig tsho lwg taag, hab muab nwg ntaus yuav laug tuag tso rua ntawm kev. 31Ces muaj ib tug povthawj taug txujkev ntawd tuaj, thaus nwg pum tug ntawd, nwg txawm tshuv kev dlub muag txig moog lawm. 32Tom qaab ntawd muaj ib tug Levis taug kev tuaj txug ntawd hab, nwg moog saib tug ntawd ib muag, nwg txawm tshuv kev dlub muag txig moog lawm hab. 33Tabsis muaj ib tug tuabneeg Xamalis taug kev tuaj txug ntawd, thaus nwg pum tug kws tubsaab ntaus, nwg hlub tug ntawd heev.#2 Xvn 28.15 34Nwg txaav zog moog saib, nwg muab roj hab muab cawv txiv maab laub rua tug mob ntawd tej qhov txhaab hab muab ntaub qhwv; nwg tsaws tug mob ntawd caij nwg tug neeg luav, nwg coj tug mob moog pw tom ib lub tsev su, hab tu tug mob ntawd. 35Thaus kaaj ntug tug tuabneeg Xamalis muab tau ob lub nyaj rua tug tswv tsev ntawd hab has tas, ‘Thov koj paab tu tug tuabneeg mob nuav, yog koj siv tshaaj ob lub nyaj nuav, thaus kuv rov qaab lug, kuv maam le ntxiv rua koj.’ ”
36Yexus nug has tas, “Koj sim xaav saib, peb tug nuav, tug twg yog tug kws tubsaab ntaus ntawd tug kwvtij?”
37Tug xwbfwb kws qha Vaajtswv txuj Kevcai teb has tas, “Tub yog tug kws hlub tug kws tubsaab ntaus ntawd ntaag.”
Yexus has rua nwg tas, “Koj ca le moog ua ib yaam le ntawd.”
Yexus Moog Saib Mathas hab Malis
38Thaus Yexus hab nwg cov thwjtim moog txug huv ib lub zog, muaj ib tug quaspuj hu ua Mathas, txawm hu Yexus moog su huv nwg tsev.#Yhs 11.1 39Mathas muaj ib tug nam hluas hu ua Malis, Malis lug nyob ntawm Yexus kutaw hab noog Yexus qha. 40Mathas ntxhuv sab rua tej num ntau kws nwg kov tsi yeej, nwg lug has rua Yexus has tas, “Tug Tswv, koj tsi paub has tas kuv tug nam hluas ca kuv tuab leeg ua num xwb los? koj has kuas nwg ca le lug paab kuv ua num!”
41Tug Tswv teb has tas, “Mathas, Mathas! Koj txhawj hab ntxhuv sab rua ntau yaam num kawg le, 42tabsis tsuas muaj ib yaam zoo xwb. Malis tub xaiv yaam zoo ntawd lawm, tsi muaj leejtwg yuav txeeb tau yaam kws nwg muaj ntawd moog le.”
Pašlaik izvēlēts:
Lukas 10: HNJ2000
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2000 United Bible Societies. All rights reserved.