Lukas 9
9
Yexus Khaiv Kaum Ob tug Thwjtim Moog Qha Txujmoo Zoo
(Mathais 10.5-15; Malakaus 6.7-13)
1Yexus hu nwg kaum ob tug thwjtim lug, nwg pub fwjchim rua puab ntab tau dlaab hab khu tau mob zoo. 2Tom qaab ntawd, nwg khaiv puab moog qha zaaj kws has txug Vaajtswv lub Tebchaws hab khu tej tuabneeg kws muaj mob. 3Yexus has rua puab tas, “Thaus mej moog, mej tsi xob nqaa ib yaam dlaabtsi moog, txawm yog tug paas nreg, naab thoobpuab, zaub mov, nyaj hab rig tsho hloov los tsi xob nqaa le.#Luk 10.4-11 4Yog yim twg zoo sab hu mej moog huv puab tsev, mej ca le moog su huv yim ntawd moog txug nub kws mej tawm huv lub nroog ntawd moog; 5yog mej moog txug qhov twg, yog tsi muaj leejtwg hu mej moog su huv puab tej tsev, mej ca le tawm huv lub nroog ntawd moog, hab nchus tej moov aav kws lu mej kutaw, mej ua le ntawd kuas puab paub has tas, puab muaj txim.”#Ten 13.51
6Cov thwjtim txawm moog rua txhua lub zog, puab qha Txujmoo Zoo hab khu tej tuabneeg muaj mob kws nyob txhua qhov zoo huv tuabsi.
Helauj Ntxhuv Sab
(Mathais 14.1-12; Malakaus 6.14-29)
7Helauj tug kws ua nom kaav lub xeev Kalilais, thaus nwg nov tej kws Yexus ua ntawd, nwg ntxhuv sab heev; rua qhov muaj tuabneeg has tas, Yauhaas tug kws muab tuabneeg ua kevcai raus dlej sawv huv qhov tuag rov qaab lug lawm, #Mat 16.14; Mak 8.28; Luk 9.19 8Muaj qee leej has tas, yog Eliyas rov qaab lug tshwm rua suavdlawg pum, hab muaj qee leej has tas, yog ib tug cev Vaajtswv lug txheej thaus sawv rov qaab lug. 9Helauj has tas, “Kuv tub muab Yauhaas txav cejdlaab lawm; tug kws kuv nov moo nuav tsua yog leejtwg?” Helauj hajyam xaav pum Yexus heev.
Yexus Muab Mov rua Tsib Txheeb Leej Noj
(Mathais 14.13-21; Malakaus 6.30-44; Yauhaas 6.1-14)
10Thaus cov timthawj rov qaab lug, puab qha txhua yaam kws puab moog ua lawm rua Yexus noog. Yexus coj puab moog rua tim ib lub nroog hu ua Npexaidas. 11Thaus cov tuabneeg nov has tas Yexus hab nwg cov thwjtim moog rua tid lawm. Puab txawm lawv Yexus qaab moog. Yexus zoo sab tog txais puab txhua tug, hab qha zaaj kws has txug Vaajtswv lub Tebchaws rua puab, hab nwg khu txhua tug kws muaj mob zoo huv tuabsi.
12Thaus nub yuav poob qho, kaum ob tug thwjtim lug has rua Yexus has tas, “Koj ca le kuas suavdlawg moog nrhav zaub mov noj, hab chaw pw huv tej zog hab tej teb kws nyob ibncig ze ntawm nuav, rua qhov ntawm nuav nyob dleb nroog.”
13Tabsis Yexus has rua cov thwjtim has tas, “Mej ca le nrhav rua puab noj.”
Cov thwjtim teb has tas, “Peb tsuas muaj tsib lub ncuav hab ob tug ntseg xwb. Koj xaav kuas peb moog yuav mov lug rua suavdlawg noj los?” 14(Cov txivneej kws nyob ntawd muaj kwvlaam le tsib txheeb leej.)
Yexus has rua nwg cov thwjtim has tas, “Mej kuas suavdlawg lug nyob ua tej paab, ib paab twg tsib caug leej.”
15Cov thwjtim kuas suavdlawg nyob lawv le Yexus has. 16Yexus muab tsib lub ncuav hab ob tug ntseg lug, nwg tsaa qhovmuag saib sau ntuj, hab ua Vaajtswv tsaug, nwg muab cov ncuav hab ob tug ntseg ndlais cev rua cov thwjtim nqaa moog faib rua suavdlawg. 17Txhua tug puavleej tau noj tsau huv tuabsi. Cov thwjtim moog sau tej kws suavdlawg noj tsi taag tau kaum ob tawb.
Petus Has Tas Yexus Yog tug Mexiyas
(Mathais 16.13-19; Malakaus 8.27-29)
18Muaj ib zag thaus Yexus tuab leeg taabtom thov Vaajtswv, nwg cov thwjtim lug cuag nwg. Yexus nug puab has tas, “Tej tuabneeg suavdlawg has tas kuv yog leejtwg?”
19Cov thwjtim teb has tas, “Muaj qee leej has tas koj yog Yauhaas tug kws muab tuabneeg ua kevcai raus dlej; muaj qee leej has tas koj yog Eliyas, hab muaj qee leej has tas koj yog ib tug ntawm cov cev Vaajtswv lug txheej thaus sawv rov qaab lug.”#Mat 14.1-2; Mak 6.14-15; Luk 9.7-8
20Yexus nug cov thwjtim has tas, “Mej ne, mej tsua has tas kuv yog leejtwg?”#Yhs 6.68-69
Petus teb has tas, “Koj yog tug Mexiyas kws Vaajtswv khaiv lug.”
Yexus Has Txug Nwg Kev Tuag
(Mathais 16.21-28; Malakaus 8.31–9.1)
21Yexus txwv cov thwjtim tawv tawv has tas, “Mej tsi xob qha zaaj nuav rua leejtwg le.” 22hab nwg has ntxiv rua puab tas, “Tuabneeg Leej Tub yuav raug kev tsimtxom ntau yaam, hab cov txwjlaug, cov thawj ntawm cov povthawj hab cov xwbfwb kws qha Vaajtswv txuj Kevcai, yuav tsi leeg yuav nwg. Puab yuav muab nwg tua povtseg, tabsis tom qaab ntawd peb nub nwg yuav sawv huv qhov tuag rov qaab lug.”
23Hab Yexus has rua puab tas, “Yog leejtwg xaav nrug kuv moog, tug ntawd yuavtsum tswj nwg lub sab, hab naj nub kwv nwg tug ntoo khaublig nrug kuv moog.#Mat 10.38; Luk 14.27 24Rua qhov tug kws khauvxwm nwg txujsa, tug ntawd yuav tsi tau txujsa, tabsis tug kws tsi khauvxwm nwg txujsa, vim nwg ntseeg kuv, tug ntawd yuav tau txujsa.#Mat 10.39; Luk 17.33; Yhs 12.25 25Yog leejtwg tau ib puas tsaav yaam huv nplajteb nuav lug ua nwg tug, tabsis nwg txujsa tu lawm, tej ntawd yuav muaj nqes dlaabtsi rua nwg! 26Yog leejtwg txaajmuag qha kuv lub npe hab kuv tej lug, thaus Tuabneeg Leej Tub tug kws muaj leej Txiv tug tshwjchim kws ci ntsaa ab nrug cov timtswv dlawbhuv lug sau ntuj lug, kuv yuav txaajmuag leeg has tas, tug ntawd yog kuv le. 27Kuv qha tseeb rua mej has tas, cov tuabneeg kws nyob ntawm nuav, muaj qee leej yuav tsi tau tuag ua ntej puab pum Vaajtswv lub Tebchaws.”
Yexus Lub Cev Hloov
(Mathais 17.1-8; Malakaus 9.2-8)
28Yim nub tom qaab kws Yexus qha tej ntawd taag, Yexus coj Petus, Yauhaas hab Yakaunpaus nrug nwg moog thov Vaajtswv peg roob.#2 Pet 1.17-18 29Thaus Yexus taabtom thov Vaajtswv, Yexus lub ntsejmuag txawm hloov hlo, hab nwg cev rig tsho ci ntsaa ab dlawb paug. 30Taamsim ntawd muaj ob tug txivneej lug nrug Yexus thaam. Ob tug ntawd yog Mauxes hab Eliyas. 31Obtug muaj tshwjchim ci ntsaa ab hab obtug nrug Yexus thaam txug teg num kws Vaajtswv kuas Yexus ua, hab yuav tav rua thaus Yexus tuag rua huv lub nroog Yeluxalees. 32Petus hab Petus ob tug phoojywg tsaug zug heev, tabsis puab tsim dlheev lug, puab pum Yexus tug tshwjchim ci ntsaa ab hab muaj obtug txivneej nrug Yexus sawv ntawd. 33Thaus ob tug txivneej ntawd ncaim Yexus moog lawm, Petus has rua Yexus has tas, “Tug Tswv, peb tuaj nyob ntawm nuav zoo kawg le! Peb yuav ua peb lub tsev pheebsuab, ib lub rua koj, ib lub rua Mauxes, hab ib lub rua Eliyas.” (Petus tsi paub sov ua le caag Petus has le ntawd.)
34Thaus Petus tseem taabtom has le ntawd, txawm muaj ib tauv fuab lug roog puab, cov thwjtim ntshai kawg le. 35Hab muaj ib lub suab has huv tauv fuab tuaj has tas, “Tug nuav yog kuv tug Tub kws kuv xaiv ca lawm, mej yuavtsum noog nwg lug!”#Yay 42.1; Mat 3.17; 12.28; Mak 1.11; Luk 3.22
36Thaus lub suab ntawd has xaus lawm, puab pum Yexus tuab leeg nyob ntawd xwb. Peb tug thwjtim npog tej kws puab pum ntawd, tsi qha rua leejtwg paub le.
Yexus Khu tug Tub Kws Raug Dlaab
(Mathais 17.14-18; Malakaus 9.14-27)
37Nub tom qaab thaus Yexus hab nwg peb tug thwjtim nqeg peg roob lug, muaj tuabneeg coob coob tuaj cuag Yexus. 38Muaj ib tug txivneej huv paab tuabneeg ntawd hu Yexus nrov nrov has tas, “Xwbfwb! Kuv thov koj paab kuv tug tub, kuv muaj tuab tug tub nuav xwb! 39Nwg raug dlaab. Thaus dlaab nkaag rua huv nwg, taamsim ntawd nwg qw nrov nrov hab fuam ib thaaj, ua rua nwg npuag ncauj tawm plawg. Dlaab pheej tsimtxom nwg hab tsi kaam tawm huv kuv tug tub moog le! 40Kuv thov koj cov thwjtim ntab dlaab tawm, tabsis puab ntab tsi tau.”
41Yexus teb has tas, “Cov tuabneeg tsi ntseeg hab tsi ncaaj! Kuv tseem yuav nrug mej nyob ntev le caag? Hab kuv yuav ua sab ntev rua mej moog txug thaus twg?” Yexus has rua tug txivneej ntawd has tas, “Ca le coj koj tug tub lug ntawm nuav.”
42Thaus tug mivtub taabtom lug, dlaab ua rua nwg qaug kag rua huv aav, nwg fuam ib thaaj ib thaaj hab nti moog nti lug. Yexus txawm ntab kuas dlaab tawm, Yexus khu tug tub ntawd, hab muab nwg rov rua nwg txiv. 43Cov tuabneeg kws pum Vaajtswv lub fwjchim kws luj kawg nkaus ntawd, puab xaav tsi thoob le.
Yexus Rov Has Txug Nwg Kev Tuag
(Mathais 17.22-23; Malakaus 9.30-32)
Thaus suavdlawg tseem pheej xaav tsi thoob rua txhua yaam kws Yexus ua ntawd, Yexus has rua nwg cov thwjtim has tas, 44“Mej yuavtsum ncu ntsoov tej kws kuv qha rua mej nuav! Luas yuav nteg Tuabneeg Leej Tub coj moog rua tuabneeg tsimtxom.” 45Tabsis cov thwjtim tsi totaub lub ntsab lug kws Yexus has ntawd le. Yexus tsi qha lub ntsab lug rua puab, puab txhaj tsi paub, hab puab ntshai nug Yexus txug zaaj ntawd.
Leejtwg Yuav Tau Ua tug Luj Dlua Ndlais?
(Mathais 18.1-5; Malakaus 9.33-37)
46Cov thwjtim sis caav has tas, leejtwg yuav tau ua tug luj dlua ndlais? #Luk 22.24 47Yexus paub tej kws puab xaav ntawd, nwg txawm coj ib tug mivnyuas yau lug sawv ntawm nwg ib saab, 48hab nwg has rua puab tas, “Tug kws leeg yuav tug mivnyuas yau nuav lug ntawm kuv lub npe, kuj yog nwg leeg yuav kuv; hab tug kws leeg yuav kuv, yog nwg leeg yuav tug kws khaiv kuv lug. Rua qhov tug kws yau dlua ndlais huv mej cov, tug ntawd txhaj yog tug kws luj dlua ndlais.”#Mat 10.40; Luk 10.16; Yhs 13.20
Tug Kws tsi Tawmtsaam Mej, tug ntawd Yog Mej Paab
(Malakaus 9.38-40)
49Yauhaas has tas, “Tug Tswv, peb pum ib tug txivneej tuav koj lub npe ntab dlaab. Peb txwv tsi pub nwg ua le ntawd rua qhov nwg tsi yog peb paab.”
50Yexus has rua Yauhaas hab cov thwjtim has tas, “Mej tsi xob txwv nwg, rua qhov tug kws tsi tawmtsaam mej, tug ntawd yog mej paab.”
Cov Xamalis tsi Pub Yexus Moog huv Puab Lub Zog
51Thaus ze lub sijhawm kws Vaajtswv yuav coj Yexus moog sau ntuj ceebtsheej, Yexus txav txim sab moog nraag lub nroog Yeluxalees. 52Yexus khaiv ib cov tuabneeg ua nwg ntej moog, puab moog rua huv cov Xamalis ib lub zog, hab moog npaaj txhua yaam tog Yexus. 53Tabsis cov tuabneeg Xamalis tsi pub Yexus moog rua huv puab lub zog, rua qhov puab paub has tas Yexus yuav moog nraag lub nroog Yeluxalees. 54Thaus Yakaunpaus hab Yauhaas kws yog Yexus ob tug thwjtim nov le ntawd, obtug has rua Yexus has tas, “Tug Tswv, koj puas kheev wb hu suavtawg poob sau ntuj lug hlawv cov tuabneeg ntawd kuas puamtsuaj?”#9.54 Tej phoo qub has tas, ib yaam le Eliyas tau ua.#2 Vnt 1.9-16
55Yexus tig hlo moog tshev obtug.#9.55 Tej phoo qub has tas, “Mej tsi paub has tas tug ntsujplig twg; yog tug kaav mej lub sab; rua qhov Tuabneeg Leej Tub tsi yog lug rhuav tuabneeg txujsa kuas puamtsuaj, tabsis yog lug cawm kuas puab dlim.” 56Ces Yexus hab cov thwjtim tawm moog dlua lwm lub zog lawm.
Tug Kws Xaav Nrug Yexus Moog
(Mathais 8.19-22)
57Thaus puab taabtom taug kev moog, muaj ib tug txivneej has rua Yexus has tas, “Kuv yuav nrug koj moog. Txawm yog koj moog qhov twg los kuv yuav nrug koj moog.”
58Yexus teb tug ntawd has tas, “Txawm yog maa los muaj qhov nkaum, hab noog los muaj zeg, tabsis Tuabneeg Leej Tub tsi muaj chaw pw.”
59Yexus has rua lwm tug txivneej has tas, “Koj ca le nrug kuv moog.”
Tabsis tug ntawd teb has tas, “Tug Tswv, thov ca kuv moog log kuv txiv tsaiv, kuv maam le nrug koj moog.”
60Yexus teb has tas, “Ca cov tuabneeg tuag log puab tug tuag. Koj ca le moog qha zaaj kws has txug Vaajtswv lub Tebchaws.”
61Muaj dlua ib tug txivneej has tas, “Tug Tswv, kuv yuav nrug koj moog; tabsis ca kuv moog has rua kuv tsev tuabneeg paub tsaiv.”#1 Vnt 19.20
62Yexus has rua tug ntawd tas, “Yog leejtwg taabtom tuav khais laij lag, tabsis nwg pheej tig saib rov tom qaab, tug ntawd tsi tsimnyog rua Vaajtswv lub Tebchaws.”
Pašlaik izvēlēts:
Lukas 9: HNJ2000
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2000 United Bible Societies. All rights reserved.