Genesis 3
3
Hay Numbaholan di Tagu
1Nan ulog di na'alla'eng an bumalbali ya un an amin di udumnan limmun Apo Dios. At inalin nan ulog hinan babaiy, “Undan inalin Apo Dios di adiyu onon di bungan nan malgom an ayiw hitun galden?”
2Ya tembal nan babai, ya inalinay, “Mabalin an mangan amih bungan nan ayiw. 3Mu nan bungan di ayiw an wadah gagwan di galden ya inalin Apo Dios di, Adiyu onon, ya adiyu goh dinihon. Ti atonyu ay ya matoy ayu.”
4Ya inalin nan ulog di, “Adi ayu ahan matoy! 5Ya manu ay inalin Apo Dios di adiyu onon ti luma'eng ayu, at mipaddung ayun Hiyan manginnilah maphod ya nappuhi!”
6At unat goh tinnig han babaih den bungan nan ayiw, ya maphod di tigawna, ya maphod hi onon, ya luma'eng di mangan, at innalna, ya inana. Ya indatna goh ay ahawana, ya inana goh. 7Ya unat goh inanda ya ay paddungnay nadiat di matada, at iniladan numbobolladda. At dina"ida"itday tubun di ayiw an fig ta nanophopdah odolda.
8Ya wan mapuyaw ya dengngolday demog Apo Dios an umali, at immuyda nipo"oy. 9Mu inayagan Apo Dios nan lala'in inalinay, “Hay wadam?”
10Ya tembalnan inalinay, “Dengngol'uy umaliam, ya timma'ota' ya ten numbobollada', at nipo"oya'.”
11Ya tembal Apo Dios, ya inalinay, “Hay nangalin he"ah un'a numbobollad? Unmu dan inan nan bungan nen ayiw an inali' hi adiyu onon?”
12Ya tembal nan lala'i, ya inalinay, “Nan babain indatmuh ibba' di nangidat hi bungan nen ayiw! At inan'u.”
13Ya inalin Apo Dios hinan babaiy, “Anaad ta umat hinay inatmu?”
Ya inalin nan babaiy, “Oo ti nan ulog di namalbalin ha"in, at hiyanan inan'u!”
14Ya inalin Apo Dios hinan ulog di,
“Dumalat nan inatmu ya he"ay nidugdugah an ma'idutan an animal,
at mete"ad ugwan ya mihagad di putum hi un'a umadap,
ya hay hupu' di itanudmuh engganay apogpogam.
15Ya dumalat nan inatmu ya pumbohholo' da'yuh nan babai,
ya pumbohholo' goh nan holagyu.
At igatinay ulum ta magmi',
ya hobatom di mu'udna.”
16Ya inalin Apo Dios hinan babaiy,
“He"a ya udma' ta nidugah di holtapom hinan punhabiyam ya nan puntungawam.
Ya ta"on un umat hinay holtapom ya amnawam mahkay nan ahawam,#3:16 Hay kulugon di udum hi aat ten amnawan nan babai ya pohpohdonan hiyay mumpapto' hi ahawana ta nan ahawanan lala'iy mangunud ay hiya.
ya munnanong damdamay ahawam an mangipapto' ay he"a.”
17Ya inyewel Apo Dios hinan lala'i, ya inalinay, “Dumalat nan agguymu nangunudan hinan inali' an adiyu onon nan bungan di ayiw ta hi ahawam di inunudmu ta inanyu nan bungan di ayiw
ya ma'idutan tun luta.
At munligat'an muntamuh tanudmuh pi'taguam hitun luta.
18Ya humangaw di holo' ya nan udumnan humangaw an waday hubitna.
19Ya gahin un'a malengot hi puntamuam hitun luta
ya un waday malmuh itanudyuh engganay un'a mumbangngad hi luta
ti hay pito' di nalpuwam,
at mumbangngad'a damdamah pito'.”
20Ya nginadnan Adam nan ahawana ta hi Eve#3:20 Hay pohdonan ibaga ya matagu. ta hiyay hi inan an amin di matagu an umat ay hiya.
21Ya hay inyamman Apo Dios hi lubung da Adam ay Eve ya nan up'up di animal ta indatnan dida ta inlubungda.
22Ya nalpah hene ya inalin Apo Dios di, “Nan tagu ya umat ay ditu'u ti inilada mahkay di maphod ya nappuhi. Ya gulat ta alana goh di ohah nan bungan nan ayiw an mangidat hi pi'taguan hi mid pogpogna, ya inana, at mabalin nan nabaholan hi mi'taguh munnanannong!” 23At hay inat Apo Dios ya pinakakna didah nan Galden an Eden ta umuyda muntamuh nan lutan nalmuwanda. 24Ya nalpah an pinakak Apo Dios dida at pungguwalyaona nan anghel an ma'alih cherubim hinan way owon hinan appit di buhu'an di algaw. Ya wada goh di adu"oy an hanggap an umela'elat ya timmelotelon an mihawan hinan way owon an umuy hinan ayiw an mangidat hi pi'taguan.
Šiuo metu pasirinkta:
Genesis 3: NHAD
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2018, Wycliffe Bible Translators, Inc. All rights reserved.