Genesis 4
4
Da Cain ay Abel
1Ya enelo' Adam hi Eve an ahawana, at nunhabi ta nuntungaw, ya lala'i an nginadnana ta hi Cain.#4:1 Hay pohdonan ibaga ya nitungaw. At inalin Eve di, “Binadangana' ay Apo Dios hi nangidatanah nan lala'in imbaluy'un nitungaw!” 2Ya palpaliwanda ya nunholag goh ta hi Abel.
Ya unat goh immilog ya hay tamuna ya un mumpahtul hi kalnilu. Mu hi Cain ya un munhabal. 3Ya unat goh palpaliwan ya enelgom Cain di innalnah bungan di inhabalna ta e'nongnan Apo Dios. 4Mu hi Abel ya innalnay hopap di imbaluy di kalnilunan mi'id ganitna, ya ene'nongna goh ay Apo Dios. At inabulut Apo Dios nan ene'nong Abel, 5mu agguyna nan ene'nong Cain. At ma'abbungot hi Cain an pinumlang.
6Ya inalin Apo Dios ay Cain di, “Anaad ta ma'abbungot'an pumlang? 7Undan adi' he"a abuluton hi unmu aton di maphod? Mu wa ay ta atom di nappuhi at hiyay nidadaan hi mamalbalin he"a. At mahapul an du'gom ta abakom nan na"appuhi.”
8Ya wa han ohan algaw ya inalin Cain ay aginan hi Abel di, “Umuytah payaw.” At immuyda. Ya hidin awadandah payaw ya pinatoy Cain hi Abel.
9Ya inalin Apo Dios ay Cain di, “Hay wadan agim?”
Ya tembalnan inalinay, “Tagwan! Agguy'u inila! Undan ha"in mangipapto' ay agi'?”
Hay Na'idutan Cain
10Ya inalin Apo Dios di, “Anaad ta inatmuy nappuhi? Nan dalan agim an netmog hitun luta ya paddungnay mun'alin Ha"in ta way ato' an mangibolloh. 11At ad ugwan ya ma'idutan'a, at adi mahkay mabalin an munhabal'ah tun luta ti enetmogna nan dalan agim. 12Ti wa ay ta munhabal'a ya adi malmuy ihabalmu. At mi'id poto' di punhituwam ta un'a buminna'el an lumane'le'od.”
13Ya inalin Cain ay Apo Dios di, “Nidugah ahan di molta' an adia' pa"edpol! 14Ad ugwan ya pakakona' ta adia' punhabalon ay He"a, ya ma'aana' udot ay He"a ta unna' buminna'el an lumane'le'od! Ya wada ay di mangah'up ay ha"in ya patayona'!”
15Mu inalin Apo Dios ay Cain di, “Mi'id mamatoy ay he"a ti nan mamatoy ay he"a ya miyawit hi mumpapitu.” Ya minalkaan Apo Dios hi Cain ta adi patayon nan mangah'up ay hiya. 16At nakak hi Cain hi awadan Apo Dios, ya immuy nunhitud Nod#4:16 Hay pohdonan ibaga ya lumane'le'od. an immapit hi buhu'an di algaw hidih ad Eden.
Hay Holag Cain
17Ya palpaliwan ya nalhin hi Cain#4:17 Hay nangngalan Cain hi ahawana? Nan ohan aginan babai (Gen. 5:3)! Ya gapu ta agguy ni' inyuldin Apo Dios hinan tatagu ta adida ahawaon di agida at mid ah baholna. ta nunhabih ahawana, ya nuntungaw, ya lala'i, ya ngadnanda ta hi Enoch. Nan babluy an nunhituwanda ya numbalin hi siudad, at nginadnan Cain ta ad Enoch an ngadan nan imbaluyna. 18Ya nalhin hi Enoch, at nunholag ta hi Irad. At nunholag hi Irad ta hi Mehujael. Ya nunholag hi Mehujael ta hi Methushael. Ya nunholag hi Methushael ta hi Lamech.
19Ya hi Lamech ya inahawana nan duwan binabain da Adah ay Zillah. 20At nunholag hi Adah ta hi Jabal an hiyay ad holag hinan numpunhituh nan tuldan abung an diday mumpumpahtul hinan a'animal. 21Ya hay ngadan agin Jabal ya hi Jubal an hiyay ommod di nala'eng an mumpagangoh hi alpa ya tungngali. 22Ya nunholag goh hi Zillah ta hi Tubal-Cain an hiyay ad holag hinan mumpumbohal. Ya hay ngadan han aginan babai ya hi Naamah.
23Ya inalin Lamech hinan duwan ahawanan da Adah ay Zillah di,
“Donglonyuh ten alyo':
Wada han pinatoy'u an ungan lala'i,
ya manu ay inat'u ti nahhun an hinugatana'.
24Ya gulat ta pituy awit Cain
at ha"in ya napitu ta pituy awit'u!”
25Ya nunholag goh da Adam ay Eve ta nginadnanda ta hi Seth#4:25 Hay pohdonan ibaga ya nidat. ti inalin Eve di, “Indat Apo Dios han imbaluy'u ta hukat Abel an pinatoy Cain.” 26Ya nunholag hi Seth hi ohah lala'i ta hi Enosh. At hiyah ne nete"an di nundayawan nan tatagun Apo Dios.
Šiuo metu pasirinkta:
Genesis 4: NHAD
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2018, Wycliffe Bible Translators, Inc. All rights reserved.