Etinda Monene Eteni 2Mwa ndambo

BIMA LIBANDA YA BISIKA NA YO OSI OMESANA

Etinda monene ezali ba biteni misato ya minene: Kokende, Koteya mpe Kozwa batisimo. Liloba “KENDE” ezali verbe oyo esengaka kosala likambo moko, elingi koloba kolongwa na esika A, kokende na esika B, C mpo bongo. Na likambo yango, ekoki mpe kotalelama lokola etinda. Yesu azali kotuna makanisi ya bayekoli na ye te, kasi azali nde kopesa bango mitindo, mpe ndenge oyebi yango mobeko moko te ekoki kotyama pembeni mpe esengeli kotosa yango na mobimba na yango. Koyebisa ba Yuda bakende epai ya bato ya bikolo mosusu ezalaki likambo ya petee te. Ya liboso, Yelusaleme ezalaki mboka monene ya mokili mobimba, na yango Bayuda bamesanaki komona bikolo mosusu koya epai na bango, kasi Bayuda kokende epai bikolo mosusu te. Koyebisa Bayuda ete bakende koteya bato ya bikolo mosusu ezalaki lokola koyebisa bango ete basangana elongo na bato pagano, engebene Bayuda, Nzambe azali bobele mpo na bango, kasi mpo na bikolo mosusu te. Kasi lokola ezalaki mobeko, bakokaki kosala eloko mosusu te bobele kotosa, lelo oyo nsango malamu ekomi epai na biso mpo na bayekoli 12 oyo Batosaki mitindo ya Yesu.

Ozali na ntina moko teya koboya kokokisa etinda monene oyo mondimi nyonso asengeli kokokisa. Na matondi na Nzambe mpo na tekinoloji ya sika, lelo ozali na ntina te ya kokende na esika mosusu, okoki kosakwela bato oyo nsango malamu ekoma nano te na nzela ya basite ndenge na ndenge ya kosolola na bato na internet ekokomela bato mingi koleka kutu na mayangani ya croisades. Nazali koloba te ete tosengeli kotika kosala ba croisades, Te. Tosengeli kosala ba croisade mpe mayangani na biso ya lomingo nyonso elekaka na radio, mpe na ba reso socio nyonso mpo na kokomela bato ebele. Okoki kozala mopalanganisi ya nsango malamu na kosunga ba misionere ba biloko to na misolo, tosengeli te kozala bateyi na esika ya kosakola biso nyonso kasi tokoki kozala bateyi na lolenge ya mitindo na biso moko.

Koteya elimboli koteya mpe kokamba bayekoli ya sika na banzela ya Klisto, kosalisa bango bakanga ntina ya solo ya Bibilia mpe basalela yango na bomoi na bango ya mokolo na mokolo. Batisimo ezali mosala ya kozindisa bandimi ya sika na nkombo ya Tata, ya Mwana, mpe ya Molimo Mosantu, komonisaka bomoko na bango elongo na Klisto mpe bomoi na bango ya sika kati na Ye. Etinda monene ezali libyangi mpo kosakola nsango malamu ya lobiko epai ya bato nyonso, kozanga kotalela ezalela na bango, mimeseno na bango to esika bafandi. Mokano na yango ya libosoliboso ezali ya kobimisa bayekoli ya Klisto oyo bakomeli, oyo na nsima bakokomisa bato mosusu bayekoli, mpe na ndenge yango, bokoli mpe bokoli ya molimo ekosalema na molongo. Etinda monene ezali komonisa botosi na malako ya nsuka oyo Yesu apesaki liboso ya komata na likolo, mpe ezali komonisa été bayekoli na ye bamipesi mpo na kokokisa etinda na ye. Na kokokisaka Etinda Monene, bandimi bakomaka batatoli epai na mokili, kotatola bomoi, liwa, mpe lisekwa ya Yesu Klisto, mpe nguya ya kobongola ya nsango malamu.

Libondeli: Na nkombo na Yesu, nazali kokata mpe kosakola été nakozala te Moklisto oyo azali kosala eloko te kasi na komipesa na kopalanganisa nsango malamu ya Klisto na lolenge nyonso oyo nakoki kosala. Nazali kotika ezaleli na ngai ya nsonisoni mpo na kosolola na bato mosusu na ntina na Yesu, bongo Molimo Mosantu salisa ngai. AMEN.

Botangi mosusu: Malako16:14-18 | Luka 24:44-49 | Tito 2:11-14 | Baloma 6:3-4 |Ba Galatia 3:27 |