Makanisi Ya Mpongo | Eteni 1Mwa ndambo

NALEMBI KASI NAZALI NA MAKASI

Ezali mabe te mpe emonanaki polele ete tobombaka bolembu na biso ntango tozali kokende na esika moko mpo na koluka mosala mpe na ntango tokutani na bato mpo na mbala ya liboso. Tolukaka ntango nyonso komonisa makasi na biso na esika ya komonisa bolembu na biso. Kanisa ete ozali kosolola na Mokonzi koluka mosala ya bokengeli kasi olobi ete okokaka kofanda ekenge na butu te mpe na mbala moko olingi ete azwa yo lokola mobateli na ye ya butu!!! Akozwa yo na mosala wana te. Lelo oyo, koleka na ntango ya kala, bato bazali kosenga biso botosi mibeko ya kokoba, yango ezali kotinda biso tobomba bolembu na biso mpe toyebisa moto moko te mabunga to bolembu na biso. Tolukaka komimonisa ete tozali makasi, kasi tokoki te kobatela yango libela na libela.

Soki bolembu ezali mpenza mabe, mpo na nini Paulo alobi ete tosengeli komikumisa mpo na yango? Kati na 2 Bakolinto 12, Paulo azongeli maloba ya Yesu oyo alobaki ete, 2Ngolu na ngai ekoki na yo, Mpo ete nguya na ngia ezali kokokisama kati na bolembu”. Nzambe azali moto ya kokoka na makambo nyonso, yango wana akoki kosalisa biso na bolembu na biso nyonso. Mpe tozali na yango mingi. Paulo alobi ete mpo na yango, akoyeba lisusu malamu bolembu na ye mpe akoyebisa yango polele mpo ete Nzambe akoka kokotela ya mpe kosunga ye. Nguya na Nzambe ezali kobongisa mingi koleka oyo tokokaki kosala na makasi na biso moko. Na verse 10, Paulo alobi lisusu boye: “Yango wana, mpo na Klisto, nazali kosepela na bolembu, na kofingama, na minyoko, na mikakatano. Mpo ntango nazali na bolembu, na ntango yango nde nazali na nguya ».

Ntango tozali na bolembu, tofingami, tozali kokutana na mikakatano, tozali konyokwama yango ezali libaku oyo Nzambe azali kopesa biso mpo na kopesa biso nguya. Atako yango ekoki komonana lokola likambo ya kolembisa to ya nsomo na ntango wana, tosengeli kotya motema epai na Nzambe ete akoya mpe akolendisa biso. Na mabaku mingi kati na Biblia, tozali komona été Nzambe azali kosalela bolembu ya moto mpo na kosalisa Bokonzi na Ye. Na ndakisa, Nzambe atindaki Mose akende na Ezipito mpe aloba na Falo mpe Mose ayanolaki été, Lokola nalobaka na bibebu oyo ezali kolemba, ndenge nini Falo akoyokela ngai ? Bolembu ya Mose ezalaki nde likukuma, ayebaki koloba malamu te liboso ya ebele ya bato, nzokande yango nde Nzambe azali kobyanga ye été asala.

Nzambe azali kosenga Mose asala likambo oyo ayebi yango malamu te mpo na komonisa ye nguya na Ye. Bobele na nguya ya Nzambe nde Mose mpe ndeko na ye Alona bakokaki kosolola na Falo. Yango ezalaki likambo oyo Mose akoki kosala na nguya na ye moko te. Nguya oyo Nzambe apesaka biso na bolembu na biso eleki makasi nyonso oyo biso moko tokoki kopesa. Na Yango, tosengeli te kobomba bolembu na biso to kokima yango, kasi tosengeli nde kondima yango, kotika ete Nzambe alendisa[h1] biso na ndenge oyo tokanisaki te.

Libondeli: Tata Nzambe na nkombo na Yesu motema na ngai ezali polele liboso na yo. Oyebi ngai malamu nakoki kobomba bolembu na ngai liboso na yo te. Naza na mposa ya makasi na yo ekomisa ngai makasi kati na bolembu na ngai. Tika été ngolu na yo ezala lisungi ya kokoka epai na ngai, AMEN.

Botangi mosusu: Kobima 6:30, 2 Bakolinto 12:9-11, Ba Efeso 6:10, Joele 3:10