Mobateli Malamu Ya Ba Mpate | Eteni Ya MibaleMwa ndambo

BOLINGO YA NZAMBE OYO ELEKI NYONSO

Bolamu: Nzambe apesaka biso biloko malamu oyo ebongi na biso te.

Mawa: Nzambe aboyaka kopesa biso etumbu oyo ebongi na biso.

Mokolo na mokolo ntango ozali kolamuka na ntongo yeba ete Nzambe azali kopesa yo biloko malamu oyo obongi na yango te mpe na ntango yango azali koboya kopesa yo etumbu oyo obongi na yango. Bolingo ya motindo nini oyo? Bolingo oyo Nzambe azali na yango mpona yo ezali na nsuka te, ezangi nsuka, ekokani te mpe ekoki kotyelama ntembe te. Mokolo na mokolo Nzambe amonisaka biso bolingo na ye.

Lolenge ya biso koyanola na bolingo monene ya Nzambe ezali ya kolinga ye mpe ko ngumbamela ye libela na libela. Kolinga mapamboli koleka mopesi mapamboli te. Moto moko aloba boye: “Ntango nyonso ozali komela mayi, kanisa liziba”.

Nzembo 23 ezali esakweli oyo ezali na Yoane 10. Dawidi oyo azalaki mobateli ya mpate oyo aleki malamu na Yisalele, asakolaki ete mobateli ya mpate oyo aleki ye moko azali Yesu Klisto oyo apesaki bomoi naye mpo na biso. Nyonso oyo Nzambe asalaki, azali kosala mpe akosala mpo na biso ezali mpo na nkombo naye. Nkombo ya Nzambe ezali nani? Nkombo ya Nzambe ezali Bolingo. 1 Yoane 4:16. NZAMBE AZALI BOLINGO. Mpo ete Nzambe alingaka mokili mingi… Yoane 3:16.

Libondeli: Tata Nzambe, natondi yo mpona bolingo nayo oyo eleki nyonso. Natondi yo mpo ozali kobatela bomoi na ngai mokolo na mokolo, ozali kopesa ngai oyo nabongi nango te mpe koboya kopesa ngai etumbu oyo na ngai. Osaleli ngai oyo moto mosusu akoki kosalela ngai te, nakolinga yo mpe nakokumisa yo libela na libela. Na nkombo na Yesu nabondeli mpe nandimi, AMEN.