Mobateli Malamu Ya Ba Mpate | Eteni Ya YamboMwa ndambo

TOTYA MAKANISI NA BISO EPAYI NA KILISTO, MOBATELI YA BA MPATE YA SOLO.

Dawidi azalaki mobateli ya mpate oyo alekaki na nguya na Yisalele. Mbala mibale, atyaki bomoi naye na likama mpo na kobikisa bampate naye na monoko ya nkosi mpe na monoko ya ngombolo. Dawidi ayebaki Nzambe lokola Mobundi, Mosambisi, Mobateli mpe makambo mosusu mingi. Kasi awa azali kolobela Nzambe lokola MOBATELI NAYE. Lokola ye moko azalaki mobateli ya mpate ayebaki malamu mosala ya mobateli ya mpate.

Mobateli ya mpate ayebi ba mposa ya bampate naye koleka bango moko.

Mobateli ya mpate aleisaka, atambwisaka, abateleka mpe akokisaka ba mposa ya ba mpate naye. Mobateli ya mpate azali moninga ya motema ya bampate.

Mobateli mpate azali pene ya kopesa bomoi naye mpo na bampate naye.

Nzambe ayebi ba mposa nayo. Akoki kopesa yo te oyo olingi kasi akopesa yo oyo ozali na yango mposa. Ayebi yo malamu koleka moto mosusu nyonso, ata yo moko. Abatelaka yo malamu koleka moto mosusu nyonso. Alingi yo koleka moto nyonso.

Ata na ntango ya mpasi to ya bisengo okotikala kaka mwana molingami ya Nzambe, Akosondola yo soki moke te. Kokanisa mingi te likolo ya mikakatano nayo, kasi kanisa mingi likolo na mokumba oyo Nzambe azali na yango mpo na yo. Bampate babatelaka mobateli te, kasi mobateli nde abateleka bango. Kotya likebi mingi te na mikumba nayo mpe ndima Yesu Klisto na makambo nyonso, kati na makambo nyonso mpe mpo na makambo nyoso. Tya elikya nayo kati na Yesu okozala molongi.

Tya makanisi nayo epayi ya Klisto, Zala na kondima epayi na ye lokola mobateli na yo mpe okozanga eloko moko te.

Libondeli: Tata Nzambe, natondi yo mpo na litambwisi, libetali mpe lisungi nayo likolo na bomoi na ngai. Zala ntango nyonso motambwisi na ngai, mobateli na ngai mpe mosungi na ngai. Yesu mobateli na ngai malamu nandimi ya motema mobimba, na nyonso mpe mpo na nyonso. Elyka na ngai se nayo mpe makanisi na ngai kaka epai nayo. Na nkombo na Yesu oyo aleki nyonso na motuya nabondeli, AMEN.