लुका 24
24
येसु सिखॆम्पाबाङ् हिङ्पॽमिम्पा
(मट्टि २८:१-१०; मारकुस १६:१-११; युहान्ना २०:१-१०)
1नाम्लेट्टामि नाम्सङ्माॽनि आक्खा मेॽनुङ्माचि खोचिऎ मुमिम्पा नाम्नुऎ केवा याङ्मानुङ् येसुमि येःॽमाबि खारामि। 2खोचिऎ येःॽमामि या डॆक्मिम्पा लुङ्कॽवा लाराङ्मिम्पा खाङुटकुचि। 3येःॽमा हङ्सि भॆम्मार खोचिऎ पारभु येसुमि सिच्चि माखाङ्टकुचि। 4खोचि आक्खॆॽमानुङ् येप्ढाङ्पा लॆटामि। मरक्लॽन बिॽयाक्ट चे चाङ्मिम्पा हिप्पा याॽमिचि खोचिम् कॆक्पि येॽमिम्पा खाङ्टकुचि। 5मेॽनुङ्माचि किसिमावॆ पोप्ढिङ्खारामि। हाङ् आक्खा हिप्पा याॽमिचिऎ लोसुचि, “हिङ्पखॆडॆ मान्ठा आन्नॆ सिखॆम्पाचिम् लुम्पि यकाम्नॆ? 6खो गुबि माआ, खो सिखॆम्पाबाङ् हिङ्पखॆडा! गालिलबि चुमार आन्ना खोसॆ गर लोमिम्पा खानावाँ मिॽलाआम्नॆ, 7‘काङा याॽमिमि पासा हिङ्वा याॽमिचिम् हुक्पि सिःॽङा हाङ् याॽमिचिऎ कुरुसाबि कॆङ्ढाङ्ङामिहाङ् सेरुॽङामि हाङ् सुम्चि डिना डॆङ्पि सिखॆम्पाबाङ् हिङ्पङा’ लोमिम्पा खानावाँ मिखॆटाम्निहॆ?” 8आक्रल खोचिऎ येसुऎ लोमिम्पा खानावाँ मिट्टकुचि।
9मेॽनुङ्माचि येःॽमाबाङ् ऎम्पकामिहाङ् खोचिऎ खाङ्मिम्पा चोब्न खानावाँ एपङ्ए टिङ्खुबाचि हाङ् होइढा चोब्न याॽमिचि सङ्क खेम्मिटुचि। 10येसुऎ सॆक्मिम्पा सॆक्ढुङ्पाचि चोब्न खानावाँ खेम्मिखुबा मेॽनुङ्माचिबि मारियाम मग्डलिनि, याकुबमि आमा मारियाम, योआन्ना हाङ् होइढा मेॽनुङ्माचिन लॆटामि। 11टर येसुऎ सॆःक्मिम्पा सॆःक्ढुङ्पाचिऎ इघा हुन्नऎ खानावाँये कामानुङ् मेॽनुङ्माचिम् खानावाँबि निवाँयुङ् मालॆटुचि। 12टर पाट्रुस लोमॆ टिङ्खुबा चाइ हिरिरि पिन्से येःॽमाबि खाराहाङ् हुहु पोप्मानुङ् येःॽमा हङ्सि खाङ्मार येसु नॆमिम्पा चे टेःॽन खाङ्टकु। ग खाङ्टकुहाङ् आक्खॆॽमानुङ् खो खिम्पि ऎन्टाआ।
येसु इम्माउसबि
(मारकुस १६:१२-१३)
13आक्रलन येसुमि हिप्पा टिङ्खुबाचि यारुसालेमबाङ् हिच्चि घान्टार लाम्ढुमार टामॆ इम्माउस लोमॆ ठालबि खॆॽमॆ पाइटाचि। 14खोचि आक्खा हहन लिमिम्पा खानावाँमि बारेबि यामुचासे खॆॽमे सिसाचि। 15गरहाङ् खोचि यामुचासे लाम्ढुढाङ्मार येसु सङ्क टाआहाङ् खोचिनुङ्न लाम्ढुम्बक्का। 16टर खोचिऎ येसु मालेॽहिसुचि। 17येसुऎ आक्खाचि सिमुचि, “आन्चिना माङ्मि बारेबि खानावाँ इसे लाम्ढुमे पाइक्चिनाहा?” खोचि येप्टिखाराचि। उम्चि ङाचिक्पि डिरिक् निवाँ टुक्मिम्पार खाङ्ङुम्पा लॆटा। 18आक्खा हिप्पाङ्बाङ् कॆलॆओपास लोमॆ एक्कसॆ खो लोसु, “यारुसालेमबि लिडाहा खानावाँ आखेम्खुबा आना टेःॽन रछ। माल आसेन् सिम्पेरेन यारुसालेमपि लिमिम्पा खानावाँ लेसुनानॆ?” 19येसुऎ आक्खाचि सिमुचि, “मान्टॽमा खानावाँ?” खोचिऎ लोसुचि, “नासरटमि येसुमि बारेबि लिमिम्पा खानावाँ। खो निवाँहाङ्मि खानावाँ लोखुबा लॆटा। हाङ् निवाँहाङ् नुङ् याॽमिचिम् ङारिङ्पि खानावाँ हाङ् योम्पक्ऎ एट्टान चॆक्मावऎ लॆटा। 20टर काङ्कामि मोसामि यायेॽमा चिन्खुबाचि हाङ् टुङ्घङ्पाचिऎ खो कुरुसाबि कॆङ्मिढाङ्सुचिहाङ् सेॽमिटुचि। 21खोन इस्राएलि याॽमिचि फाक्खुबा कामानुङ् मिम्मिम्पा लॆटिङ्का। टर खो कुरुसाबि कॆङ्मिम्पा स आइ सुम्चि डिना याक्खॆटु। 22हाङ् काङ्कामि लुम्पाङ् खो टिङ्खुबा एक्क हिप्पा नाना नुसाचिम् खानावाँऎ काङ्का ग फोफो आक्टिखॆडिङ्का। खोचि आइ नाम्समाङ्माॽनि येःॽमाबि खारामि। 23टर खोचिऎ आक्कुबि पारभुमि सिच्चि मॆखाङ्टकुचि हाङ् खोचिऎ निवाँखाटॆखुबाचिम् सेन्चि खाङ्टकुचिहाङ् गर लोसुचि ‘येसु ग हिङ्पखॆडा।’ 24ग खेमुचिहाङ् काङ्कामि एक्क हिप्पा लाङ्काम्चि सङ्क येःॽमाबि खाङ्सि खारामि, खोचिऎ स आक्खा मेॽनुङ्माचिऎ लोसिन्टॽन खाङ्टकुचि टर पारभुमि सिच्चि चाइ माखाङ्टकुचि।”
25येसुऎ लोसुचि, “आन्ना ग निवाँ माआनिहा याॽमिचिन। निवाँहाङ्मि खानावाँ लोखुबाचिम् खानावाँबि स निवाँयुङ् लॆहिसानिनि। 26माल खोसॆ टाङ्पॆ निङ्लावा टक्माबाङ् याॽल इघा डुखा आङ्मा मालॆटॆहॆ टा?” 27येसुऎ मोसाबाङ् गरक् निवाँहाङ्मि खानावाँ इखुबाचिऎ खोम् बारेबि निवाँहाङ्मि साब्चिराबि साप्मिम्पा खानावाँऎ लोमा यकुवॆ चोब्न खानावाँ इबिटुचि।
28खोचि खॆॽमॆ पाइमिहा इम्माउस लोमॆ गाँवाँ नेन्टाङ् टामार येसु चाइ हस मॆअङ् खॆॽमा यक्पका। 29टर आक्खा हिप्पा टिङ्खुबाचिऎ खो लोसुचि, “आइ नाम् किक्खॆॽमा ठाबका, मसॆ आना काचिगा नुङ्न पेनॆ।” हाङ् येसु खोचिनुङ् बासा पोप्सि खारा। 30येसु आक्खाचिनुङ् चासि पेम्मार चारेपा याङ्मानुङ् निवाँहाङ् ओहाक् पिट्टु हाङ् चारेपा योबुहाङ् आक्खाचि पिट्टुचि। 31आक्रलॽरे खोचिम् मिक् ओबका हाङ् खोचिऎ येसु लेटकुचि। टर मरक्लन येसु माखारा हाङ् खोचि खोचिबि गरहाङ् खानावाँ इसाचि, 32“खोसॆ काचि लाम्फुबि लाम्ढुमार निवाँहाङ्मि साब्चिराऎ लोमा यकुवॆ खानावाँ लोबिॽमार काचिम् निवाँ चेन्चामानुङ् एट्टान हाङ्हाङ् लिमिम्पा लॆटा हॆॽनॆ?”
33आक्क डॆङ्पि खोचि मरक्लॽन यारुसालेम ऎम्पकाचि। आक्कुबि टामार खोचिऎ एपङ्ए टिङ्खुबाचि नुङ् खोम्टि खॆडामिहा होइढा याॽमिचि सङ्क चुबाचु। 34हाङ् आक्खा याॽमिचिऎ आक्खा हिप्पा लोसुचि, “चाइबान पारभु हिङ्पडॆ रछ, हाङ् सिमोनबि खाङ्मुडा।” 35हाङ् आक्खा हिप्पा टिङ्खुबाचिऎ लाम्फुबि लिमिम्पा चोब्न खानावाँ हाङ् येसुऎ चारेपा योप्से पिॽमार मान्टहाङ् खोचिऎ खो लेसुचॆ लोमॆ खानावाँ होइढा टिङ्खुबाचि खेम्मिटुचि।
येसुऎ टिङ्खुबाचि सेन्चि पिॽमिम्पा
(मट्टि २८:१६-२०; मारकुस १६:१४-१८; युहान्ना २०:१९-२३)
36खोचिऎ इघा खानावाँ इमॆ पाइटामिर मरक्लॽन येसु आक्खाचिम् लुम्पि येप्टाआ हाङ् लोसुचि, “आन्नाबि सान्टि लिर।” 37काङ्कॆ चाप्रे खाङ्मॆ पाइकुङ्कॆरु मिम्मानुङ् खोचि एट्टान किसिखारामि। 38टर येसुऎ आक्खाचि लोसुचि, “आन्ना मान्ठा किसिकानिहा? मान्ठा निवाँबि साङ्का मिङ्कानिहा? 39काम् हुक् लाङ् खाङाम्नॆ। चाइबान काङानङाये। डिन्चाङानॆ हाङ् लेसाम्नॆ, काङा चाप् हॆॽनॆ। मान्ठाभनॆ चाप्चिम् ग सॆकॽवा नुङ् सा लिनि टर काम ग चु, म आन्नॆ खाङ्मॆ पाइकाम्नि।” 40गर लोसुचिहाङ् खोसॆ आक्खाचि खोम् हुक् लाङ् खाङ्मिटुचि। 41खोचि गर चेन्चाआमि हाङ् आक्खॆटुचि कि खोचिऎ निवाँयुङ्न लॆःॽमा माहेसुचि। मसॆ येसुऎ आक्खाचि लोसुचि, “आन्नानुङ् मिःक्म चामॆ ठका चुऎ?” 42खोचिऎ खो हिॽमिम्पा ङा पिट्टुचि। 43खोसॆ आक्क ङा आक्खाचिम् ङारिङ्पिॽन चाउ। 44हाङ् खोसॆ आक्खाचि लोसुचि, “काङा आन्नानुङ् चुइङ्र इमिम्पा खानावाँ इघान। मोसामि यायेॽमा, निवाँहाङ्मि खानावाँ इखुबाचिम् साब्चिरा हाङ् खोम्मिम्पासाम्मि साब्चिराबि काङाम् बारेबि साप्मिम्पा चोब्न खानावाँ लिमान लॆ कामानुङ् कॆ लोमिम्पा लॆटानि।”
45हाङ् खोसॆ आक्खाचि निवाँहाङ्मि साब्चिराबि साप्मिम्पा खानावाँ वाप्मॆ निवाँ पिट्टुचि हाङ् लोसुचि, 46“निवाँहाङ्मि साब्चिराबि गरहाङ् साप्डा ‘खिरिस्टऎ ग डुखा आङ्मान लॆ हाङ् सिन्डाक्लाम्पॆ सिखॆॽमिम्पाबाङ् हिङ्पॽमा लॆ। 47टाङ्पाम् हिङ्वा मिॽलासे हिङ्वा लॆःॽमा याइखुबाऎ निवाँहाङ्बाङ् हिङ्वामि यङ्निमा टक्चाकु लोमॆ खानावाँ येसुमि निङ्पि यारुसालेमबाङ् ठाबाक्माहाङ् बाखाटेम्बिहा चोब्न याॽमिचि खेम्मिॽमा लॆःॽमि। 48आन्नॆ इघा लिमिम्पा चोब्न खानावाँ खाङ्मिम्पासॆ याॽमिचि मान्ट हाङ्स लोमा लॆःॽमि। 49हाङ् खेमानॆ, काम आपॆ पिक्खानि कामानुङ् लोमिम्पा खानावाँ कॆ आन्नाबि पाङ्हाङ्कुङ। टर निवाँहाङ्बाङ् आक्क चॆक्माव आन्नाबि मॆटारढारि हुङ्से आन्ना ग हाटाबिॽन पेनानॆ’।”
येसु पारुबि खॆॽमिम्पा
(मारकुस १६:१९-२०; सॆःक्ढुङ्पा १:९-११)
50आक्क डॆङ्पि येसुऎ खोम् टिङ्खुबाचि हाटाबाङ् बेठानिया लोमॆ गाँवाँ पोट्टा चिखॆटुचि हाङ् आक्कुबि टाआमिहाङ् येसुऎ टाङ्पाम् हुक् ठेप्पॽमानुङ् खोचि आसिका पिट्टुचि। 51आसिका पिॽमेसिसुचिर खो आक्खाचिबाङ् फाॽलारा हाङ् पारुबि ठेप्पक्से खाइहाङ्सा। 52आक्खाचिऎ खोम् निङ् ठेरुचि हाङ् एट्टान चेन्चामानुङ् यारुसालेम हाटा ऎम्पकामि। 53खोचि डिनाहुँ निवाँहाङ्मि खिम्पि खोम्युक्सामि हाङ् निवाँहाङ्मि निङ् ठेॽयुक्सुचि।
Currently Selected:
लुका 24: LBR
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2023, Wycliffe Bible Translators, Inc. and Nepal Bible Society