युहान्ना 1
1
खानावाँ सालुङ् लिबक्मिम्पा
1चोब्बाङ् याॽल खानावाँ चुयुक्सा। आक्क खानावाँ निवाँहाङ् नुङ् चुआ। हाङ् म खानावाँन निवाँहाङ् लॆटा। 2आक्क खानावाँ याॽलऎ बाङ्न निवाँहाङ् नुङ् चुआ। 3निवाँहाङ्ऎ आक्क खानावाँबाङ्न चोब्न ठका मुसु। मुमिम्पा ठकाबि एक्क ठका सङ्क खो मॆड्डिङ् मामुटि। 4खोबि हिङ्खामा चुआ हाङ् आक्क हिङ्खामा याॽमिचिम् लागि ओप्लिङ् लॆटा। 5हाङ् आक्क ओप्लिङ् माॽयाक्टबिहा। माॽयाक्टऎ आक्क हानाम्स मॆसेॽहिसु। 6निवाँहाङ्ऎ पाङ्हाङ्पा एक्क युहान्ना#१:६ ग चाइ बाप्टिस्मा पिक्खुबा युहान्ना यो, खो चाइ ग साब्चिरा साप्खुबाबाङ् होइकन। निङ् लिॽमॆ याॽमि टामिम्पा लॆटा। 7खोबाङ् चोब्न याॽमिचिऎ आक्क ओप्लिङ् निवाँयुङ् लॆटुचिर कामानुङ् आक्कमि चुमॆक्सङ् पिस्सि खो टाआ। 8युहान्ना टाङ्पान चाइ ओप्लिङ् मालॆ, टर आक्क ओप्लिङ्मि बारेबि चुमॆक्सङ् पिस्सि टामिम्पा लॆटा। 9चोब्न याॽमिचि नुऎ लाम् खाङ्मिखुबा चाइबानऎ एक्क याॽमि बाखाटेम्पि टामेपाइटा।
10खो बाखाटेम्पि चुयुङ्सा। बाखाटेम् खोबाङ्न मुबका, हाङ्स बाखाटेम्पिहा याॽमिचिऎ खो सिच्चोउचि। 11खो टाङ्पाम्न याॽमिचिबि टाआ टर खोचिऎ खो कामानुङ् मॆलेसुचि। 12टर खोम् खानावाँबि निवाँ टिखुबाचि हाङ् खोम् निङ्पि निवाँयुङ् लॆखुबा याॽमिचि चाइ खोसॆ निवाँहाङ्मि पासाचि लिमॆ ढुप्पाट्ट पिट्टुचि। 13हाङ् खोचि याॽमिमि हारि, सालुङ् नुङ् निवाँऎ मिॽमिम्पासॆ जान्म लिमिम्पा हॆॽनॆ, टर निवाँहाङ्न खोचिम आपा यो।
14हाङ् खानावाँ चाइ याॽमि लिसा हाङ् नाम्नावाँ नुङ् चाइबानऎ खानावाँऎ चेप्खॆटुहाङ् कानिम् लुम्पि पेना। काङ्कॆ खोम् निङ्लावा खाङुम्का, आक्क निङ्लावा चाइ आपाबाङ् टामिम्पा एक्क टेःॽन पासामि रक्मा लॆटा।
15युहान्नाऎ खोम् बारेबि चुमॆक्सङ् पिॽमानुङ् ढ्या साम्लाबि गरहाङ् कासा, “काङॆ का डॆङ्पि टाखुबा काबाङ् टुङ्घङ्पा लॆ कामानुङ् लोमिम्पा चाइ खोन यो, मान्ठाभनॆ खो का जान्म लिमाबाङ् याॽलन चुआ।”
16हाङ् काङ्कॆ खोम् चॆप्खॆडुवॆ नाम्नावाँबाङ् एक्क नाम्नावाँ सक्पि होइक नाम्नावाँ टक्चाडुङ्का। 17मान्ठाभनॆ यायेॽमा चाइ निवाँहाङ्ऎ मोसाबाङ् पिट्टि। टर नाम्नावाँ नुङ् चाइबानऎ खानावाँ चाइ येसु खिरिस्टबाङ् पिडि। 18आसॆस निवाँहाङ् हानाम्स मॆखाङ्टिटुचि। हाङ् खोम् नेन्टाङ्न पेन्खुबा खोम् एक्क टेःॽन पासा खोन निवाँहाङ् ह खोसॆ कानि निवाँहाङ् लेॽमिडि।
बाप्टिस्मा पिक्खुबा युहान्नामि चुमॆक्सङ्
(मट्टि ३:१-१२; मारकुस १:१-८; लुका ३:१-१८)
19हाङ् याहुडिचिऎ यारुसालेमबाङ् याटाङ्पाचि नुङ् फॆगुवाङ्चि “आना आसानार?” लोमॆ खानावाँ सिम्सि युहान्नाबि पाङ्हाङ्सुचि। 20हाङ् खोसॆ काम्नुःर वाप्मॆ गारि लोसुचि, “काङा चाइ खिरिस्ट हॆॽङानॆ।”
21हाङ् खोचिऎ खो सिमुचि, “आक्रहाङ्ग आना आसानार? माल् एलियाना हॆ?”
खोसॆ लोसुचि, “हॆॽङानॆ।”
“माल आना निवाँहाङ्मि खानावाँ लोखुबाना हॆ?”
खोसॆ लोसुचि, “हॆॽङानॆ।”
22आक्खाचिऎ खो लोसुचि, “मरहाङ्ग आना आसानारोटा? काङ्का लोचिमॆ, हाङ् काङ्का पाङ्हाङ्खुबाचि काङ्कॆ आनामि बारेबि लोहिकुङ्का। आनॆ आनाम् बारेबि माङ् इकुनॆ?”
23युहान्नाऎ लोसुचि, “काङा चाइ आसास पेन्मिनिहा ठालबि ‘पारभु निवाँहाङ्मि लाम्फु मुसाम्नॆ’ कामानुङ् यासाइया लोमॆ निवाँहाङ्मि खानावाँ लोखुबाऎ इमिम्पा एक्क साम्लाङा।”#यासाइया ४०:३१
24आक्खा पाङ्हाङ्मिम्पा याॽमिचिबि एक्क हिप्पा चाइ फारिसिचि सङ्क लॆटामि। 25हाङ् खोचिऎ खो सिमुचि, “आना खिरिस्ट स हॆॽनॆ, एलियास हॆॽनॆ हाङ् निवाँहाङ्मि खानावाँ लोखुबास हॆॽनॆ, हाङ्ग मान्ठा बाप्टिस्मा पिॽमेसिकुचिनॆ टा?” 26युहान्नाऎ लोसुचि, “कॆग योवाऎ बाप्टिस्मा पिकुङ्चि, टर आन्नामि लुम्पि येप्मिम्पा एक्क चु, खो आन्नॆ लेसाम्निनि। 27का डॆङ्पि टाखुबा खोन। काग खोम् ङारिङ्पि माङ्स हॆॽङानॆ।”
28इघा चोब्न खानावाँ यारडान हङ्मा मॆआरॆङ् बेठेनिया लोमॆ ठालबि लिमिम्पा लॆटा। आक्कुबि युहान्नाऎ बाप्टिस्मा पिॽमेसिसुचि।
निवाँहाङ्मि सामुङ्
29हाङ् वेन्डाक् लाम्पॆ युहान्नाऎ येसु खो पोट्टा टामेपाइऎ खाङुहाङ् लोसु, “खाङाम्नॆ, बाखाटेम्पिहा याॽमिचिम् हिङ्वा सःक्खुबा निवाँहाङ्मि सामुङ्!#१:२९ याहुडिचिऎ उम्चि हिङ्वा सःग्माम् लागि निवाँहाङ्बि सामुङ् सङ्टियुक्सुचि। 30कॆ ‘काङा डॆङ्पि टाखुबा काबाङ् टुङ्घङ्पा लॆ कामानुङ् लोमिम्पा चाइ खोन यो, मान्ठाभनॆ खो का जान्म लिमाबाङ् याॽलन चुआ।’ 31खो आसार कामानुङ् काङॆ मालेॽमिम्पा लॆटुङ्, टर खो इस्राएलबि खाङ्मुर कामानुङ् कॆ योवॆ बाप्टिस्मा पिक्कॆटुङ।”
32हाङ् युहान्नाऎ गर कामानुङ् चुमॆक्सङ् पिट्टुचि, “काङॆ पारुबाङ् सॆङ्सॆङॆ लावा उक्खिरिॽवा रक्न उङ्मिम्पा हाङ् खो सक्पि पेन्मिम्पा खाङुङ। 33काङॆ खो मॆलेङा, टर योवाऎ बास्टिस्मा पिट्टॆ कामानुङ् पाङ्हाङ्खुबॆ लोसिङ्, ‘आसाबि चाइ आनॆ सॆङ्सॆङॆ लावा उङ्मिम्पा हाङ् खो सक्पि पेन्मिम्पा खाङ्कुना, खोन सॆङ्सॆङॆ लावाऎ बास्टिस्मा पिक्खुबा यो।’ 34कॆ येसुबि ग लिःमिम्पा खाङुङ् हाङ् चुमॆक्सङ् पिकुङ्, खो चाइ निवाँहाङ्मि पासा यो।”
येसुमि याॽलहा टिङ्खुबाचि
35होइखेपा युहान्ना वेन्डाक् लाम्पॆ आक्क ठालबि खोम् हिप्पा टिङ्खुबाचि नुङ् येप्मेसिसा। 36हाङ् युहान्नाऎ येसु खॆॽमॆ पाइमिम्पा खाङुहाङ् लोसु, “खाङाम्नॆ, निवाँहाङ्मि सामुङ्!” 37युहान्नामि हिप्पाङ् टिङ्खुबाचिऎ खोसॆ लोमिम्पा खानावाँ खेमाचुहाङ् येसु टिङ्पकाचु। 38येसु ऎम्पक्मार आक्खाचिऎ खो टिङ्मिम्पा खाङ्टकु हाङ् सिमुचि, “आन्चिनॆ माङ् यक्मॆ पाइक्चुनॆ?” खोचिऎ लोसाचु, “राब्बि आना हाम्पि पेन्नॆ?” (राब्बि लोमॆ चाइ चिन्खुबा रेम)। 39खोसॆ आक्खाचि लोसुचि, “डाबाचॆ हाङ् खाङ्टक्चुना।” मसॆ खोचि खाराचि हाङ् येसु पेन्मिम्पा ठाल खाङ्टकाचु। आक्रल रिचि बाजे लिखॆम्पा लॆटा। आक्क डिना खोचि येसु नुङ्न पेनाचि।
40हाङ् युहान्नाऎ लोमिम्पा खानावाँ खेम्से येसु टिङ्खुबा हिप्पा हङ्सिबि एक्क चाइ सिमोन पाट्रुसमि नुसा आन्डिरेयास लॆटा। 41हाङ् आन्डेरेयासऎ याॽल उम्बु सिमोन चुबुहाङ् लोसु, “काङकॆ मासिहा चुब्डुङ्का” (गसॆ लोमा यकुवॆ चाइ खिरिस्ट रेम)। 42आन्डिरेयासऎ सिमोन येसुबि लाटॆटु हाङ् येसुऎ नुःर खाङ्मानुङ् लोसु, “आना योआनेसमि पासा सिमोनना। आना कॆफास लोक्” (ग लोमिम्पा चाइ लुङ्कॽवा यो)।
येसुऎ फिलिप नुङ् नाठानेल सेःॽमिम्पा
43येसुऎ वेन्डाक् लाम्पॆ गालिलबि खॆॽमॆ निवाँ मुसु। हाङ् खोसॆ फिलिप चुबुहाङ् लोसु, “काङा टिङ्ङॆ।” 44फिलिप सङ्क आन्डिरेयास नुङ् पाट्रुस रक्न बेठेसेडा हाटाबिऎ याॽमि लॆटा। 45हाङ् फिलिपऎ नाठानेल चुबुहाङ् लोसु, “मोसाऎ यायेॽमाबि साप्मिम्पा हाङ् निवाँहाङ्मि खानावाँ लोखुबाचिऎ साप्मिम्पा योसेफमि पासा नासाराटबिऎ येसु काङ्कॆ चुबुङ्का।”
46हाङ् नाठानेलऎ लोसु, “माल् नासाराटबाङ्स काम्नुऎ खानावाँ टाऎरो?” फिलिपऎ लोसु “डाबॆहाङ् खाङॆ।”
47हाङ् येसुऎ खोबि नाठानेल डाप्मेपाइऎ खाङ्टकुहाङ् लोसु, “खाङाम्नॆ, चाइबानऎ इस्राएलि याॽमि, खोबि बङ्सिॽमॆ लोमॆ खानावाँ माङ्स माआ।”
48हाङ् नाठानेलऎ येसु सिमु, “आनॆ काङा मान्टॽल लेॽङानॆ?” हाङ् येसुऎ खो लोसु, “फिलिपऎ आना सेःॽमाबाङ् याॽलन, छाराक्फुमि सिङ् खुॽमाबि कॆ आना खाङ्मिम्पा लॆटाना।”
49हाङ् नाठानेलऎ येसु लोसु, “चिन्खुबो, आना ग निवाँहाङ्मि पासा लॆःक्ना हाङ् इसराएलमि हाङ्ना!”
50हाङ् येसुऎ लोसु, “माल् कॆ आना छाराक्फुमि खुॽमाबि खाङ्टकाना लोमिम्पासॆ निवाँयुङ् लॆकुनॆ? आनॆ आक्खाबाङ्स डिड्ढा खानावाँ खाङ्टकुना।” 51हाङ् येसुऎ लोसुचि, “चाइबान कॆ आन्ना लोकानि, आन्नॆ पारु हेम्बम्पा हाङ् निवाँहाङ्मि निवाँखाटॆखुबाचि याॽमिम् पासाबि युसे ठाङ्से लॆःॽमिम्पा खाङ्टकाम्नि।”
Currently Selected:
युहान्ना 1: LBR
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2023, Wycliffe Bible Translators, Inc. and Nepal Bible Society