युहान्ना 2
2
काना लोमॆ हाटाबि लॆःॽमिम्प भ्या
1सिन्डाक्लाम्पॆ गालिलमि काना लोमॆ हाटाबि एक्क भ्या चुआ हाङ् आक्क भ्याबि येसुमि आमा सङ्क चुआ। 2हाङ् आक्क भ्याबि येसु नुङ् खोम् टिङ्खुबाचि सङ्क सेःॽमिम्पा लॆटामि।
3हाङ् आङ्गुरमि डिबु लुक्खॆसॆ खाराहाङ् येसु उम्माऎ लोसु, “टाबाङ्चि पिॽमॆ आङ्गुरमि खॆवा लुक्खारा।” 4येसुऎ खो लोसु, “आमो, ग खानावाँ आनॆ मान्ठा काङा लोःॽङानॆ? हढारि काम् योम्पक् मुमॆ लः मासाप्टिटु।”#२:४ गुबि येसुऎ लोमा यकुवॆ खानावाँ चाइ माङ्भनॆ, गरक्मा मॆटाटि, याॽमिचिऎ खोम् निङ्लावा खाङुकुचि हाङ् खो चाइबान निवाँहाङ्मि पासा कामानुङ् वाबुकुचि लोमॆ यो। 5हाङ् खोमि आमाऎ आक्कुबि योम्पक् मुखुबाचि लोसुचि, “खोसॆ आन्ना माङ् लोकानि मन लॆटानॆ।”
6आक्क कॆक्पिॽन लुङ्कॽवामि ठुक्चि एकग् लिटारार योवा खॆक्खुबा पोरोम् चुआ। आक्खा पोरोम् याहुडिचिऎ टाङ्पा सॆङ्सॆङॆ लिमाम् लागि फॆॽयुक्सुचि। 7हाङ् येसुऎ आक्खा योम्पक् मुखुबाचि लोसुचि, “आक्खा चोब्न पोरोम्पि योवा डॆन्टाम्नॆ।” हाङ् खोचिऎ पोरोम्मि यायाढारि योवा डॆन्टुचि।
8हाङ् खोसॆ आक्खाचि लोसुचि, “ह पोरोम्बाङ् मिःक्म लिगाम्नॆ हाङ् भोजामि टुङ्घङ्पा लाखॆपिट्टाम्नॆ।” हाङ् खोचिऎ येसुऎ लोसिन्टक्न लॆटुचि। 9आक्क टुङ्घङ्पॆ सेबुरग आक्क योवा आङ्गुर्मि खॆवा लिखॆम्पा लॆटा, टर आक्क हाम्पा टाऎ लोमॆ खानावाँ चाइ खोसॆ मालेसु। आक्क खानावाँ चाइ योवा होढिन्खुबा योम्पक् मुखुबाचिऎ लेॽमिम्पा लॆटुचि। हाङ् खोसॆ डाङ्पा सेःरु, 10हाङ् लोसु, “चोब्न याॽमिचिऎ टाबाङ्चि याॽल चिक्खॆम्पा आङ्गुरमि डिबु डुङ्मा पिकुचिमि हाङ् खोचिऎ डिरिक् डुङुकुचि हाङ्टेःॽन माचिक्मिम्पा आङ्गुरमि डिबु पिकुचिमि, टर आनॆ ग हढारि युङ्भुङ्डुना।”
11गरहाङ् येसुऎ गालिलमि काना लोमॆ हाटाबि चोब्बाङ् याॽल आक्खॆॽमॆ योम्पक् यिगु। हाङ् आक्रहाङ् खोसॆ खोम् निङ्लावा खाङ्मिटु हाङ् खोम् टिङ्खुबाचिऎ खो निवाँयुङ् लॆटुचि।
12आक्क डॆङ्पि येसु खोम् आमा, नुसाचि हाङ् खोम् टिङ्खुबाचि नुङ् मिम्मु काफारनुहुम्पि युसामि हाङ् आक्कुबिॽन एक्क हिच्चि डिना पेनामि।
येसुऎ निवाँहाङ्मि खिम् सॆङ्सॆङॆ मुमिम्पा
(मट्टि २१:१२-१३; मारकुस ११:१५-१७; लुका १९:४५-४६)
13हाङ् याहुडिचिम् फाक्मा लोमॆ चाडा टामा परक्मिम्मा लॆटा मसॆ येसु यारुसालेम्पिटु खारा। 14हाङ् खोसॆ निवाँहाङ्मि खिम्मि पालुम्पि याॽमिचिऎ पिक्चि, सामुङ्चि हाङ् उक्खिरिॽवाचि इन्चामॆ योम्पक् यिक्ढाङ्मिम्पा हाङ् याङ् लॆन्खुबाचि खाङुचि। 15मसॆ येसुऎ पाडाक्मि एक्क कोर्रा मुसुहाङ् आक्कुबि चुक्मिहाचि चोब्न यिक्पहाक्सुचि। हाङ् उम्चि पिक्चि हाङ् सामुङ्चि सङ्क यिक्पहाङ्पिट्टुचि हाङ् याङ् लॆन्खुबाचिम् कॽनाम् खोप्लाङ् पिट्टुचि हाङ् युङ्ठाम् कॽनाम् टेराङ्पिट्टुचि। 16हाङ् उक्खिरिॽवा इन्चाखुबाचि लोसुचि, “इघा चोब्न गबाङ् लाखॆइट्टाम्नॆ। काम् आपामि खिम् आन्नॆ बेप्पारा लॆठाम् ठाल मुटकाम्निन्नि।”
17हाङ् खोम् टिङ्खुबाचिऎ निवाँनेन साब्चिराबि “आनाम् खिम्मि लागि काम् निवाँ ऎट्टान मिः रक्न हा” कामानुङ् साप्मिम्पा खानावाँ मिॽलाउचि।#खोम्मिम्पासाम् ६९:९
18टर याहुडिचिम् टुङ्घङ्पाचिऎ खो लोसुचि, “निवाँहाङ्ऎ आना इघा योम्पक् यिक्मॆ ढुप्पाट्ट पिडा लोमॆ खानावाँमि लागि आनॆ काङ्का माङ् आक्खॆॽमाहा खानावाँ खाङ्मिचिमॆ?” 19हाङ् येसुऎ आक्खाचि लोसुचि, “ग निवाँहाङ्मि खिम् योराङ्साम्नॆ हाङ् आक्क काङॆ सुम्चि डिना हङ्सिबि हेप्सिकुङ।” 20हाङ् आक्खा याहुडिचिऎ लोसुचि, “ग निवाँहाङ्मि खिम् हेॽमार रिपङ्ठु निङ् लागालिसा, आनॆ चाइ सुम्चि डिनाबिॽन हेप्सिहिकुनॆ हेम?”
21टर खोसॆ लोमिम्पा निवाँहाङ्मि खिम् चाइ खोम् सालुङ् लॆटा। 22हाङ् येसु सिखॆमिम्पाबाङ् हिङ्पकाहाङ् टिङ्खुबाचिऎ खोसॆ लोमिम्पा खानावाँ मिॽलाउचि। हाङ् खोचिऎ निवाँनॆन् साब्चिरा नुङ् येसुऎ यामुमिम्पा खानावाँ निवाँयुङ् लॆटुचि।
23हाङ् फाक्मॆ चाडामि भोजा लॆटार येसु येरुसालॆमबि चुआ। डिरिक् याॽमिचिऎ खोसॆ यिक्मॆ पाइमिम्पा आक्खॆॽमाहा योम्पक् खाङुचिहाङ् खोबि निवाँयुङ् लॆटुचि। 24टर येसुमि निवाँऎ आक्खा याॽमिचि मर मान्चाउचि, मान्ठाभनॆ खोसॆ याॽमिचि नुःर लेकुचि। 25मान्ठाभनॆ याॽमिमि बारेबि आसॆस खो चिन्मा पाब्नि, हाङ् याॽमि मान्टक्मा लिऎ लोमॆ खानावाँ खोसॆ नुःर लेकु।
Currently Selected:
युहान्ना 2: LBR
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2023, Wycliffe Bible Translators, Inc. and Nepal Bible Society