लुका 23
23
येसु रोमि टुङ्घङ्पा पिलाटसमि ङारिङ्पि
(मट्टि २७:१-२,११-१४; मारकुस १५:१-५; युहान्ना १८:२८-३८)
1आक्क डॆङ्पि हाङ्डाम्पिऎ टङ्घङ्पाचिऎ खानावाँ इठाम् ठालबिहा चोब्न याॽमिचिऎ येसु रोमि टुङ्घङ्पा पिलाटसबि लाखॆटुचि। 2आक्खाचिऎ खो गर कामानुङ् आब्डिक् टिबकुचि, “गसॆ कानिम् हाङ्डाम्पि ‘काङान याहुडिचिम् हाङ् खिरिस्टङा, हाङ् आन्नॆ रोमि हाङ् यावॆङ्ग फङ्मा पाब्नि’ कामानुङ् चोब्न याॽमिचि ठेप्बक्मिम्पा काङ्कॆ भॆट्टकुङ्का।”
3आक्खाचिम् खानावाँ खेमुहाङ् पिलाटसऎ येसु सिमु, “माल आना याहुडिचिम् हाङ्ना हॆ?” येसुऎ खानावाँ ऎम्पिटु, “आनान आक्र काग्ना।” 4पिलाटस आक्कुबि खोम्डामिहा ढ्या याटाङ्पा हाङ् डिरिक् याॽमिचि पट्टा ऎम्पका हाङ् लोसुचि, “ग याॽमिबि कॆ माङ्स आब्डिक् माखाङ्ङा।” 5टर आक्खाचि डिड्ढा डिड्ढा साम्लाऎ गर कामानुङ् येसु सक्पि आब्डिक् टिसुचि, “गसॆ गालिलबाङ् ग यारुसालेमढारि चोब्न याहुडियाबि टाङ्पाम् खानावाँ फुबक्से याॽमिचि ठेप्बक्मॆ सिकुचि।”
6ग खानावाँ खेमुहाङ् पिलाटसऎ लोसु, “माल ग याॽमि गालिलबिऎ हॆ?”
येसु हेरोड एन्टिपासमि ङारिङ्पि
7येसु हेरोड हाङ्मि ठालबिऎ लोमॆ खानावाँ पिलाटुसऎ लॆटकुहाङ् खोसॆ येसु हेरोड एन्टिपासबि पाङ्हाङ्सु। आक्रल हेरोड यारुसालेमबिॽन चुआ। 8हेरोडऎ येसु खाङ्टकुहाङ् एट्टान चेन्चाआ मान्ठाभनॆ खोसॆ याॽलिन येसुमि बारेबि खानावाँ खेम्मिम्पा लॆटु मसॆ याॽलऎ बाङ्न येसु खाङ्मा मिॽमिम्पा लॆटु। हाङ् खोसॆ येसुऎ लॆःॽमिम्पा आक्खॆमाहा खानावाँ खाङ्मा टकुङॆरु कामानुङ् मिॽमिम्पा लॆटा। 9हाङ् खोसॆ येसु डिरिक् खानावाँ सिमु, टर येसुऎ माङ्स खानावाँ माऎम्पिटु। 10आक्रल ढ्या याटाङ्पाचि हाङ् मोसामि यायेॽमा चिन्खुबाचि येप्पकामिहाङ् येसु सक्पि टिहिर आब्डिक् टिसुचि। 11आक्क डॆङ्पि हेरोड हाङ् नुङ् उम् टिलिङ्गाचिऎ येसु सेम्चासे यिचाबिट्टुचि। खोचिऎ हाङ्ऎ चाङ्मॆ चेः रक्न येसु चाङ्टिटुचिहाङ् पिलाटस बिॽन पाङ्हाङ्सुचि। 12आक्क डिनाबाङ् पिलाटस नुङ् हेरोड हाङ् टङ्पकाचि मान्ठाभनॆ याॽलि खोचि माटङ्युक्साचि।
येसु सेॽमॆ डन्डा पिॽमिम्पा
(मट्टि २७:१५-२६; मारकुस १५:६-१५; युहान्ना १८:३९-१९:१६)
13हाङ् पिलाटसऎ ढ्या याटाङ्पाचि, टुङ्घङ्पाचि हाङ् होइढा याॽमिचि सेःरुचिहाङ् लोसुचि, 14“याॽमिचि काइसॆ खानावाँबि चोम्पकुचि कामानुङ् आन्नॆ ग याॽमि काबि लाटॆटाम्नि। हाङ् कॆ आन्नाम् ङारिङ्पिॽन ग याॽमि डिरिक् खानावाँ सिमुङ्, टर आन्नॆ लाप्टिम्पा माङ्स आब्डिक् काङॆ ग याॽमिबि माभॆटॽङा। 15हेरोडऎ सङ्क ग याॽमिबि माङ्स आब्डिक् माभॆट्टकु हाङ्न काबि ऎहाङ्सु। खाङानॆ, गसॆ सिखॆॽमॆ खालॆ माङ्स योम्पक् मायिक्टिटु। 16ह काङॆ ग कर्रा टिकुङ्हाङ् लेहाङ्कुङ।” 17(आक्कुबिऎ चालाना रक्न फाक्मिम्पामि चाडाबि#२३:१७ ग खानावाँ याॽलऎ साप्मिम्पा साब्चिराबि माआ। टर एक्क हिच्चि साब्चिराबि टेःॽन चु। पिलाटसऎ एक्क सेक्भुङ्पा याॽमि लेॽलाह्ङ्मा लॆयुक्सा)। 18टर चोब्न याॽमिचि ढ्या ढ्या साम्लाऎ गरहाङ् याकाबकामि, “आक्क सेॽमान लॆ हाङ् कानिम् लागि बाराब्बा लॆहाङ्पिच्चिमॆ।” 19बाराब्बा चाइ हाङ्टेम्खिसा लॆटा हाङ् याॽमि सेॽमिम्पासॆ सॆक्चिम्पि सॆक्ढिङ्खॆम्पा लॆटा।
20येसु लेहाङ्मॆ निवाँऎ होइखेपा सङ्क पिलाटसऎ याॽमिचि नुङ् खानावाँ इसु। 21टर आक्खाचि चोब्न ढ्या ढ्या साम्लाबि गरहाङ् याकासामि, “आक्क कुरुसाबि कॆङ्ढाङ्सॆ, आक्क कुरुसाबि कॆङ्ढाङ्सॆ।” 22होइखेपा स पिलाटसऎ आक्खाचि लोसुचि, “मान्ठा कॆङ्मॆ? गसॆ काइर माङ् लॆडुयॆ? कॆग खोबि सेॽमालेऎ आब्डिक् माभॆट्टॽङा। मसॆ ग कर्रा टिकुङ्हाङ् लेहाङ्कुङ।” खो यामुमिम्पा सुम्चि खेपा लिमिम्पा लॆटा। 23टर आक्खाचि झाना ढ्या साम्ला लाबक्से गरहाङ् कासामि, “आक्क कुरुसामि कॆङ्मान लॆ।” गरहाङ् याॽमिचिऎ याकासेॽन हेचाइटुचि। 24हाङ् पिलाटसऎ आक्खाचिऎ लोसिन्टॽन लॆःॽमॆ निवाँ मुसु। 25खोसॆ याॽमि सेक्खुबा हाङ्टेम्खिसा सॆक्चिम्मि चुऎ बाराब्बा लोमॆ याॽमि लेहाङ्सु हाङ् येसु आक्खाचिम् हुक्पि माङ् लॆग लॆटाम्नॆ कामानुङ् पिट्टुचि।
येसु कुरुसाबि
(मट्टि २७:३२-४४; मारकुस १५:२१-३२; युहान्ना १९:१७-२७)
26येसु लाखॆॽमे सिसुचिर खोचिऎ कुरेनि लोमॆ ठालबिऎ सिमोन लोमॆ याॽमि चुबुचि। खो टाङ्पाम् गाँवाँबाङ् हाटापोट्टा डाॽमॆ पाइटा। आक्खाचिऎ खो लाबुचिहाङ् येसुमि कुरुसा खिन्से डॆङ्डॆङ् टिङ्मिटुचि। 27डिरिक् याॽमिचिऎ येसु डॆङ्डॆङ् टिङ्मॆ सिसुचि। आक्कुबि डिरिक् मेॽनुङ्माचि सङ्क निवाँ टुक्मानुङ् हाप्से खो टिङ्मे पाइटुचि। 28टर येसु आक्खाचि पोट्टा ऎम्पकाहाङ् लोसुचि, “ओ यारुसालेम्मि साम्सामाचि, आन्ना काम् लागि हॆॽनॆ टर टाङ्पाम् लागि हाङ् आन्नामि चाचामिम् लागि हाबानॆ। 29खाङानॆ, गरक्मा डिना टा हाङ् याॽमिचि गरहाङ् काक्मि, ‘चाचा ऎटक्खुबा हाङ् चाचाचि डुरु पिॽमा ऎपाप्खुबा मेॽनुङ्माचि एट्टान आसिका टक्चामिम्पाचि यो।’ 30आक्रल याॽमिचिऎ पङ्पङ्मा ‘काङ्का सक्पि हेरे हाङ् पक्लुङ् काङ्का डॆक्चिमॆ’#होसे १०:८ लोकुचि। 31मान्ठाभनॆ हिङ्चाम्पा सिङ्न घाचिऎ गर लॆकुचि हाङ्ग हॆङ्खॆङ्पा ग माङ् लॆकुचिहा?”#२३:३१ ग हिङ्चाम्पा सिङ् लोमिम्पा चाइ काम्नुऎ याॽमि ह हाङ् हॆङ्खॆम्पा लोमॆ चाइ काइसा याॽमिचि रेम। येसु रक्मा काम्नुऎ याॽमि टा गरहाङ् सेरुकुचि भनॆ होइडा काइसा याॽमिचि ग झाना डिरिक् आटिचारा लॆकुचि।
32आक्खाचिऎ हिप्पा हिङ्वा याॽमिचि सङ्क येसु नुङ्न सेॽमाम् लागि लाखॆॽमे सिसुचि। 33आक्खाचि टाक्रक् लोमॆ पङ्पङ्माबि टाआमि। हाङ् येसु कुरुसाबि कॆङुचि हाङ् आक्खा हिप्पा हिङ्वा याॽमिचि सङ्क येसुमि चुप्ठिङ् नुङ् बॆङ्सिङ् पोट्टि कॆङ्ढाङ्सुचि। 34(आक्रल येसुऎ लोसु),#२३:३४ ग खानावाँ याॽलऎ साब्चिराबि माआ। टर एक्क हिच्चि साब्चिराबि टेःॽन चु। “ओ आप्पा, इघा याॽमिचि यङ्मिटॆचॆ मान्ठाभनॆ इघाचिऎ काङ्कॆ माङ् लॆःॽमॆ पाइकुङ्कॆ कामानुङ् खोचिऎन लेसुचिनि।” टिलिङ्गाचिऎ खोम् चे हामाम् लागि सेॽनाम् डॆन्टुचि। 35याॽमिचिऎ येप्मानुङ् खाङ्ढाङ्पा लॆटुचि। हाङ् याहुडि टुङ्घङ्पाचिऎ चाइ येसु इचासे लोसुचि, “गसॆ होइढा याॽमिचि ग हिङ्पॽमिट्टुचि। खो निवाँहाङ्ऎ सॆःक्मिम्पा खिरिस्ट न हाङ्ग टाङ्पा सङ्क हिङ्पकुर।”
36टिलिङ्गाचिऎ खो सिन्टॆ आङ्गुरमि खॆवा पिस्से गर कामानुङ् सेम्चउचि, 37“आना याहुडिचिम् हाङ्ना हाङ्ग टाङ्पा हिङ्पकॆ।” 38खोम् निङ्टवाँमि सङ्पिटु “ग याहुडिचिम् हाङ्” कामानुङ् साॽमिम्पा आब्डिक्मि साब्चिरा एब्मिम्पा लॆटा। 39येसु नुङ् सोरि कुरुसाबि कॆङ्ढाङ्पा एक्कसॆ येसु सेम्से लोसु, “माल आना खिरिस्ट ना हॆॽनॆ? आना खिरिस्ट नान हाङ्ग टाङ्पा स हिङ्पकॆ हाङ् काङ्का स हिङ्पॽमिच्चिमॆ।” 40टर होइकसॆ आक्क वोमानुङ् लोसु, “आना निवाँहाङ् नुङ् किसिनानॆ? आनॆ सङ्क टा खोम् रक्मान डन्डा आङ्मॆ सिकुना। 41काचिऎ ग काइसॆ योम्पक् मुमिम्पासॆ ग डान्डा आङ्मॆ पाइचु, टर खोसॆ ग माङ्स काइसॆ योम्पक् मामुमिम्पा लॆटु।” 42हाङ् खोसॆ लोसु, “येसु, आना आनाम् हाङ्डाम्पि भॆन्नार काङा सङ्क आमिखॆॽङो।” 43येसुऎ आक्क लोसु, “कॆ आना लोक्ना, आइन आना कानुङ् पारुबि लिक्ना।”
येसु सिखॆम्पा
(मट्टि २७:४५-५६; मारकुस १५:३३-४१; युहान्ना १९:२८-३०)
44लेन्टाऎ मढ्ये लिमिम्पा लॆटा। आक्कबाङ् सुम्चि बाजेढारि हाङ्टेम् भोरि माॽयाक्ट लिसा। 45नाम स ङिमा याइटु। आक्रल निवाँहाङ्मि खिम् हङ्सिऎ पार्डा लुम्पाङ् नाक्बकाहाङ् हिच्चि लिसा। 46हाङ् येसु ढ्या साम्लाऎ गरहाङ् याकासा, “ओ आप्पा, कॆ काङाम् सॽमा आनाम् हुक्पिॽन युङ्कुङ।” गर कामानुङ् खोसॆ सक्मा टेरु।
47गरक्मा खानावाँ लिमिम्पा रोमि टिलिङ्गाचिम् टुङ्घङ्पाऎ खाङुहाङ् निवाँहाङ्मि निङ् ठेस्से लोसु, “चाइबान ग याॽमि निवाँनेन् लॆटॆ रछ।” 48इघा चोब्न खानावाँ खाङ्सि टामिम्पा याॽमिचि निवाँ टुक्मानुङ् हाप्से टाङ्पाम् खिम्पि ऎम्पकामि। 49येसु लेक्खुबाचि हाङ् गालिल लोमॆ ठालबाङ् टामिम्पा खो टिङ्खुबा मेॽनुङ्माचिऎ येप्से मिउबाङ् खाङ्मे पाइटुचि।
येसु येःॽमाबि युङ्मिम्पा
(मट्टि २७:५७-६१; मारकुस १५:४२-४७; युहान्ना १९:३८-४२)
50-51हाङ्डाम्बिऎ टुङ्घङ्पाचिऎ खानावाँ इठाम् ठालबि याहुडियामि आरिमाठिया लोमॆ हाटाबाङ् टामिम्पा एक्क योसेफ लोमॆ याॽमि स चुआ। खो स आक्कुबिऎ याॽमि लॆटा। खो नुऎ हाङ् निवाँनेन् लॆटा हाङ् निवाँहाङ्मि हाङ्डाम टा कामानुङ् हुङ्मे पाइटु। येसु सेॽमॆ खानावाँबि खो माखासिमिम्पा लॆटा। 52खो पिलाटसबि खाराहाङ् येसुमि सिच्चि हुम्टॽङार कामानुङ् खानावाँ इसु। 53खोसॆ येसुमि सिच्चि कुरुसाबाङ् लाढिन्टु हाङ् काम्नुऎ चेऎ मोमुहाङ् पक्लुङ्पि हङ्मिम्पा लुङ्कॽवामि येःॽमाबि युङु। आक्क येःॽमाबि याॽल आसाम्स सिच्चि मायुङ्पा लॆटा। 54आक्क डिना चाइ नाचामॆ डिनामि लागि योम्पक् मुमॆ डिना लॆटा, हाङ् नाचामॆ डिना टामा ठाबम्पा लॆटा। 55गालिलबाङ् येसु टिङ्से टाखुबा मेॽनुङ्माचि सङ्क योसेफ नुङ्न खारामिहाङ् येःॽमाबि सिच्चि युङ्मिम्पा खाङुचि। 56आक्क डॆङ्पि खोचि ऎम्पकामिहाङ् सिच्चिबि युङ्मॆ नाम्नुऎ केवा मुसुचि। टर वेन्डाक् लाम्पॆ नाचामॆ डिना लिमिम्पासॆ खोचि याहुडि यायेॽमा रक्न नाचाआमि।
Currently Selected:
लुका 23: LBR
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2023, Wycliffe Bible Translators, Inc. and Nepal Bible Society