युहन्ना 21
21
येसु सात चेलासब लग देखा परलै
1तकरबाद येसु तिबेरियस तालके कातमे चेलासब लग परगट भेलै। उ अनङ भेलै। 2सिमोन पतरुस, जौवा कहाइबला थोमा, गालिलके काना सहरमे रहैबला नथानेल, जब्दियाके दुनु बेटासब आ ओकर औरो दुनु चेलासबसेहो सङे छेलै। 3सिमोन पतरुस ओइसबके कहल्कै, “हम त माछ मारैले जाइचियै।” उसब सिमोनके कहल्कै, “हम्हुसब अहै सङे ज्याब।” उसब ज्याके नाहमे चहरलै महज उसब राइतभरमे एकोटा माछ मारैले नै सक्लै।#लुका ५:५
4बिहान सबेरे येसु तालके कातमे ठारभेल रहै महज चेलासब येसुवे चियै कैहके नै चिन्हल्कै। 5तब येसु ओइसबके चाल करैत कहल्कै, “हौ भाइसब! कि तोरासबके माछ भेटलौ?” उसब ओकरा जबाफ देल्कै, “नै”। 6येसु ओकरासबके कहल्कै, “नाहके देहना कात जाल फेक तब भेटतौ।” येसुके कहल ठामदिसन जब उसब जाल फेकल्कै तब अतहेक नै माछ परलै कि उसब जाल ताने नै सकल्कै।#लुका ५:६ 7तखुन येसुके सबसे बेसी परेम करैबला चेला पतरुसके कहल्कै, “उ त परभु चियै!” पतरुस यि बात सुनते मातर आपन बस्तर डारमे लपेटल्कै (उ काम करैके लेल बस्तर खोल्ने छेलै) आ तालमे झौफ देल्कै। 8ओइ बखत औरो चेलासब नाहेमे रैहके माछसे भरल जालके ताइन्ते-ताइन्ते पखा दिसन आनल्कै। उसब पखासे बेसि दुर त नै, अन्दाजी सय मिटर जतहेक दुर छेलै।
9जब उसब पखामे पुग्लै तब ओते कोइलाके आइग उपरमे पाकैत माछ आ रोटी देखल्कै। 10तब येसु ओइसबके कहल्कै, “तुसब भरखरे मारल कुछ माछ हमरलग आन।” 11सिमोन पतरुस नाहमे चहैरके जालके पखामे ताइनके आनल्कै। जालमे बरका-बरका एकसय तिरपनटा माछ छेलै तैयो जाल नै फाटलै। 12येसु ओइसबके कहल्कै, “आइबके खाइजो।” ओइ बखत कोनो चेलाके “अहाँ के चियै?” कैहके पुछैले हिम्मत नै भेलै कथिलेकी उसब उ परभु चियै कैहके जाइनगेल छेलै। 13येसु रोटी ल्याके ओइसबके देल्कै आ ओहिनङे माछो देल्कै।
14येसु मुरदासे जि गेलाके बाद आपन चेलासबलग परगट भेल यि तेसरबेर छेलै।
येसु आ पतरुस
15उसबके ख्याल भेलाके बाद येसु सिमोन पतरुसके कहल्कै,
“ऐ युहन्नाके बेटा सिमोन, कि तु औरो चेलासबसे बेसी हमरा परेम करैचिही?”
उ कहल्कै, “जि परभु, अहाँ के थाहेछै कि हम अहाँके परेम करैचियै।”
येसु ओकरा कहल्कै, “हमर पठरुसबके चरा।”
16येसु फेनसे ओकरा कहल्कै,
“ऐ युहन्नाके बेटा सिमोन, कि तु हमरा परेम करैचिही?”
उ कहल्कै, “हँ परभु, हम अहाँके परेम करैचियै से त अहाँ जाइन्ते चियै।”
येसु कहल्कै, “हमर भेंरासबके देखभाल कर।”
17येसु फेनसे तेसर बेर पतरुसके पुछल्कै,
“ऐ युहन्नाके बेटा सिमोन, कि तु हमरा परेम करैचिही?” सिमोन पतरुसके मनमे चोट लाग्लै कथिलेकी येसु तिनचोटी “कि तु हमरा परेम करैचिही?” कैहके पुछल्कै। सिमोन ओकरा कहल्कै, “परभु, अहाँ त सब जान्बे करैचियै। अहाँ जानैचियै कि हम अहाँसे परेम करैचियै।” येसु ओकरा कहल्कै, “हमर भेंरासबके चरा।”
18 हम तोरा साँचेके कहैचियौ, जब तु जबान छेल्ही तब तु आपन गम्छा आपनेसे कसै छेल्ही, जते मन लागैछेलौ ओते जाइ छेल्ही। महज जब तु बुढ हेब्ही तब तु आपन हाथ पसारबिही आ दोसरकोइ तोहर डारमे गम्छा बाइन्हदेतौ आ तोरा जते जाइले मन नै लाग्तौ ओते ल्याजेतौ। 19(केहैन मिरतुसे उ परमेस्वरके महिमा करतै कैहके संङकेत करैत येसु यि बात कहल्कै।) अतहेक कहैत उ ओकरा कहल्कै, “हमर पछा चल।”
येसु आ ओकरा परेम करैबला चेलासब
20पतरुस पछा दिसन घुइमके ताकल्कै त येसु जकरा परेम करैछेलै से चेलाके पछा पछा आबैत देखल्कै। (उ उहे चेला छेलै जे राइतके खाइ बखत येसुके छातिमे ओङहैठके, “परभु अहाँके पकराबैबला के चियै” कैहके पुछने छेलै।) #युहन्ना १३:२५ 21ओइ चेलाके देखके पतरुस येसुके पुछल्कै, “परभु, अकरा कि हेतै?” 22येसु पतरुसके कहल्कै, “यदी हम नै आबैतक उ जिबिते रहे कैहके हमर इक्छाछै त तोरा कि हैछौ? तु हमर पछा लाग।”
23येसुके यि बातसे उ चेला नै मरतै कैहके बिस्बासीसबके बिचमे हल्ला फैलगेलै। बास्तममे येसु उ चेला नै मरतै कैहके नै कहने छेलै, महज “यदी हम नै आबैतक उ जिबिते रहे कैहके हमर इक्छाछै त तोरा कि हैछौ?” कैहके कहने छेलै।
24यि ओह्या चेला चियै, जे यि सब बातके बारेमे गबाही द्यारहलछै। ओह्या यि लिखने छै आ ओकर गबाही सत छै कैहके हमसब जानैचियै।
अन्तमे
25औरो बहुतो कामसब येसु करल्कै। यदी ओकर करल सबकाम एक एक कैरके लिख्तै त हमरा लागैये कि ओकर बारेमे लिखल किताब सन्सारेमे नै अटतै।
Currently Selected:
युहन्ना 21: MTH
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2024 (Active), Wycliffe Bible Translators, Inc. All rights reserved.