Maariko 13
13
Yesu ˆakarööta kuhaanyoru kwo Risëngërö re Ryobha
(Mataayo 24:1–2; Ruuka 21:5–6)
1Hano Yesu are araru mo‑Risëngërö re Ryobha haghirohamu na abhaanabheegha bhaache, omoonamwegha waache umu akamobhoorera Yesu akabhugha, “Omweghi, mööhi amabhohe ghano kebhuno ghaanyi amakoro na chanyumba chino kebhuno cheenyi inkoro che koroghoori!” 2Yesu aghagharokeri akabhugha, “Nokoroghoorera chanyumba chino kebhuno cheenyi inkoro? Choose chino nchekuhaanyuru, retaaghusaagha eriibhohe ryoryose ighoro e riibhohe erende!”
Anyaako ankoro ino ekuucha
(Mataayo 24:3–14; Ruuka 21:7–19)
3Hano Yesu are ikeere mo‑gheghoro ke Miseyituuni, amohëriiri Erisëngërö re Ryobha, Bheetero, na Yakobho, na Yohana na Andereya bhakamusëëta. Bhakamobhoori kibhacho bhakabhugha, 4“Ntoghusabha otobhoorere, ghano okobhugha nyingake ghakorwera? N‑ekyërëkërëri ke kino ghekuucha kwërëki kubha ghayo ghoose haghuhe ghaanyi korwera?”
5Niho Yesu aghasëëma kobhabhoorera arabhugha, “Mubhe miisho, omooto wowoose ataacha kobhangʼiina! 6Abhaato bhaaru mbakuucha kwo riina reene, bharabhugha kubha, ‘Eni neeni Kirisito,’ na mbakobhangʼiina abhaato bhaaru. 7Hano inyu mokooghu ighoro e amangʼana gha mahë na nyughunyughu e riihë, motatiina. Ghayo ngakwëndëru korwera, amare antenero neekubha ekeere.#13:7 Antenero neekubha ekeere. Egheteemoro ekende ngeghotora kubha, antenero e se, hamu antenero e Risëngërö. 8Ase imu nekurööna na ase ayende, obhutëmi bhumu mbokurööna no obhutëmi obhonde. Aghëëcha ne emerighito ghe se ngekorwera mo‑chaase chaaru. Ghayo ngaakubha kinya ghusëëma kwo bhosongo hano omukari ahëënda kwibhora.
9“Amare inyu, mubhe miisho chwee. Abhaato mbakobhahira mo‑mabharacha na kobhatëma kobhe mo‑masinaghooghi ghaabho. Mbakobhahira mo‑bhakangati bha se na mo‑bhatëmi, gho kubha monsongʼaaniri eni. Riyo ndeekubha eriibhagha re ghughambera Angʼana Anchömu ghokoobho. 10Angʼana Anchömu nekwëndëru kuraghanu singa mo‑bhaato bha chaase choose. 11Hano abhaato bhayo bhakobhaghööta na kobhahira mo‑mabharacha na ghoteneru ekiina, motiinyaaki ighoro e ghano moghosiikëra. Mosiikërë ryoryose rino mokuhaabhu ne Eryobha eriibhagha riyo riyo. Taanyi inyu abheene moghosiikëra, amare n‑Akörö Ahörëëru ino enyi moose yaanyu niyo eghosiikëra.
12“Kwo riibhagha riyo, omohiiri nakomwigharurani omohiiri waache na komuhaana mo‑mabhökö gha bhabhisa, kubha itu. Wiiki, omwibhori nakomuhaana omoona waache mo‑mabhökö gha bhabhisa kubha itu. Abhaana nabho mbakobhiigharurani abhiibhori bhaabho na ghughëri bhiitu. 13Abhaato bhaaru mbakobharëgha inyu, gho kubha moghuntambana eni.#13:13 Gho kubha moghuntambana eni. Ekeyunaani ngekobhugha, ighoro e riina reene. Amare, wuure aghoghumereri mbagha antenero, uyo niwe aghotooribhu.
Chaasiko che nyaako inkoro
(Mataayo 24:15–35; Ruuka 21:20–33)
14“Kwo riibhagha riyo mokorighi ‘egheghiro kino kehaaghonchi na ghusari,’#13:14 Egheghiro kino kehaaghonchi na ghusari. Egheteemoro ekende ngeghotora kubha, obhusari bhuno bhokurëëta obhoghonchu. Mööhi Taniyeri 9:27, 11:31, 12:11. kimeeriire Ahaghiro Ahatööbhiyu mo‑Risëngërö re Ryobha, hano ghetaakwëndëru kubha‑ho. Omooto wowoose uno aghusöma amangʼana ghano, amënyë kebhuno ghakobhugha. Hayo niho abhaato bhano bhaanyi Yuteya, bhangʼösërë mo‑bheghoro! 15Omooto uno akubha atiiriri irëngö, ike angʼösë, atasöha mo‑nyumba kwimoki egheghiro ghyokyose! 16Hangʼu hangʼu omooto uno anyi a‑moghondo angʼösë, atagharuka anyuma kwimoki erighööti reeche! 17Amare, horeera mbakorighi abhakari bhano bhaanyi inda na bhano bhaakubha bharaghööki mo‑chaasiko chiyo. 18Musabhe kubha, chaasiko chiyo chetarwera eriibhagha re nyighita. 19Nekobhabhoorera hangʼu gho kubha, mo‑chaasiko chiyo abhaato mbakubhöna anyaako ihaari chwee ino etaamara irwera korwera hano Eryobha ritëëmiri ase mbagha reero. Wiiki anyaako iyo tekorwera naabha. 20Wiiki, aribha Omutëmi atangatoriri ghoghuheehi eriibhagha riyo re nyaako, mbe, taanyi‑ho omooto uno angahöniri. Amare gho ghiri e bhaahöru bhaache, naghochiköra chibhe inguhe chaasiko chiyo.
21“Eriibhagha riyo, aribha omooto arabhabhoorera arabhugha, ‘Mööhi, Kirisito hano anyi!’ hamu ‘N‑iyo anyi!’, motaacha ghokumi. 22Mbakuucha abharööti bha bhuröngö na abhaato bhano bhakwibherekera Kirisito. Mbaakubha bharaköra ebhyërëkërëri ne ebhiraghe, kubha bhasaki kobhangʼiina bhano bhaahwiru ne Eryobha. 23Mbe, inyu, mubhe miisho! Eni ˆnekabhabhoorera ghayo ghoose ghakeere korwera.
24“Mbe, mo‑chaasiko chiire, anyaako iyo eramara koheta,
‘Eryobha ndeghotooru ekengʼuuri,
omwëri tokoruusi emirëngaari gheeche,#13:24 Mööhi Isaaya 13:10.
25na chanchöta ncheekubha cheragho haase koru mwishaaro.
Niho, ebheghiro bhyose bhe mwishaaro bheghosingisu.’#13:25 Mööhi Isaaya 34:4.
26“Niho abhaato bhoose mbakondighi Omoona o Mooto neraacha mo‑mashaaro gho changuru chaaru no obhokumi obhokoro.#13:26 Mööhi Taniyeri 7:13; Obhohunyurëru 1:7. 27Nekobhatoma bhamarayika bhaane bhabhakome abhaahöru bhoose bha Ryobha koru chambaara choose che se, korwera hano ase irëngiire, mbagha hano esiriire.
28“Mweghe eghetuubhaani koru mo‑mote o motiini. Hano mokorighi chaasa cheghasebhoka na kubhari, niho mokumënya kubha ambura ˆeghatingʼi ghutëëka. 29Hangʼu hangʼu, na niinyu hano mokorighi amangʼana ghayo ghararwera, mumënyë kubha okuucha koone ghoghatingʼi. 30Mahëënë ˆnekabhabhoorera, orwibhoro runo rotaakoheta, amangʼana ghano ghoose ghakeere kohikeerana. 31Erishaaro na ase mbekoheta, amare amangʼana ghaane ghataakoheta naabha.
Eryobha eryene niryo ryeche orosiko ro ghugharuka kwo Yesu
(Mataayo 24:36–44)
32“Amare, ighoro e rosiko ne eriibhagha re kuucha koone, taanyi‑ho omooto uno eche, koru bhamarayika bha Mwishaaro hamu Omoona o Ryobha, bhoose bhateeche. Amare Taata waane omwene niwe eche. 33Mbe, mubhe amiisho! Mwisëëmi, [mubhe morasabha] gho kubha moteeche kubha, eriibhagha riyo ndekohika nyingake.
34“Kuucha kooche ngotuubhiine no omooto uno aghuköra orughëndö. Akabha abhatighiri abhasësë bhaache bhamumööhëri aka yaache bhoheene. Akabhahööhi mooto woose omoremo o ghuköra. Akamara omochongi o mo‑kehita akamuraghereri akabhugha, atenge.”
35Yesu akëëndërëra kobhugha, “Inyu bhoose, mubhe miisho, gho kubha moteeche kubha omwene anyumba naghugharuka nyingake. Moteeche aribha aghugharuka omughörööbha, hamu obhotiko bhooghate, hamu mo‑rungʼöörö, hamu atabhoori. 36Mutëngë, kubha hano akuucha gho ghutakani, atabhöna momisiri chandöörö. 37Riyo nekobhabhoorera inyu, ˆnekabhabhoorera abhaato bhoose, bhatëngë.”
Currently Selected:
Maariko 13: ntk
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2022 Wycliffe Bible Translators, Inc. All rights reserved