Maariko 14
14
Amiihëëbhö gha komwita Yesu
(Mataayo 26:1–5; Ruuka 22:1–2; Yohana 11:45–53)
1Mbe, ꞉nchisaaghiri chaasiko ibhere hangʼu, anyangi e Bhaasaka ne emighaate ghino ghetaaghotooreru eghetondori ehike. Abhakoro bha bhachaama na abheeghi bha meghiro mbaare bharatabhara anchëra e komughööta Yesu gho kebhisere, kubha bhamwite. 2Amare bhakabhugha, “Ntotighe singa anyangi ehete, niho tomughöötë, abhaato bhataacha kurëëta anyööri.”
Omukari ˆakamuhaka Yesu amaghuta
(Mataayo 26:6–13; Yohana 12:1–8)
3Eriibhagha riyo Yesu naare mo‑kyaro ke Bhetaniya, mo‑nyumba e Simiyooni uno ekimbërë are no obhubhabharu bho mbiti. Hano are mo‑meecha araraaghëra, akaacha omukari umu uno are na achubha e riighori ikoro e arabhaasita. Mo‑chubha iyo ngaare‑mu amaghuta ghano ghaanyi ne ekeneeso na gha riighori ikoro chwee. Omukari uyo akabhuna omonu o chubha, akamohomeerera Yesu a‑mutu. 4Abhaato nyarebhe bhano ꞉bhaare‑ho, bhaghakarara chwee. Bhaghasëëma ghosiikëra abheene kwo bheene bharabhugha, “Kana ngwake aghusari amaghuta amachömu ghano? 5Amaghuta ghayo ngangatoriri ghoghoru ghokera chatinaari amaghana atato#14:5 Chatinaari amaghana atato ꞉nchiirëngʼiine na amareho gha mooto kwo mooka moghima. na kobhaha abhahabhe.” Bhaakabha bharamurëki chwee omukari uyo.
6Amare, Yesu akabhugha, “Momotighe. Ngwake mokomunyaaki? Rino omukari uno aköriri ghokoone n‑ichömu chwee. 7Inyu moonyi haghirohamu na bhahabhe chaasiko choose. Moghotora kobhakörëra amachömu eriibhagha ryoryose rino mosiighiri. Amare, motaakubha haghirohamu na neeni chaasiko choose. 8Omukari uno naköriri rino aghotora. Nakangatiri kuhaka omobhere waane amaghuta gha keneeso ghusëëmi koryeku koone.#14:8 Kuhaka omobhere waane amaghuta gha keneeso ghusëëmi koryeku koone. Neere asughara e Bhayahuuti kuhaka amaghuta erihundughu. Mööhi Maariko 16:1. 9Mahëënë ˆnekabhabhoorera, hohoose hano abhaato bhaakubha bhararaghani Angʼana Anchömu mo‑se ino, mbaakubha bharabhugha rino ꞉anköriire omukari uno, gho komohiita.”
Yuuta Isikariyoote ˆaghiishereri komwigharurani Yesu
(Mataayo 26:14–16; Ruuka 22:3–6)
10Niho Yuuta Isikariyoote, umu o bhaanabheegha bha Yesu bhaare ikomi na bhabhere, aghaye mo‑bhakoro bha bhachaama kubha amwigharurani Yesu, abhëërëki anchëra e komughööta. 11Hano bhooghwire amangʼana ghayo, bhaghachömëru chwee, bhaghiishererani nawe komuha chambiiri. Niho Yuuta aghasëëma ghutabhara omweya omuchömu o komwigharurani Yesu.
Yesu ˆakarë ebhiinyakurë bhe Bhaasaka na abhaanabheegha bhaache
(Mataayo 26:17–25; Ruuka 22:7–14, 22:21–23; Yohana 13:21–30)
12Neere orosiko o rumbërë ro nyangi e mighaate ghino ghetaaghotooreru eghetondori. Orosiko ruyo abhaato mbaare bharasincha omoona o ngʼöndu o Bhaasaka. Abhaanabheegha bhaache bhakamobhoori bhakabhugha, “Hayi okwënda tughëndë toghusëëmërë ebhiinyakurë bhe Bhaasaka?”
13Niho Yesu akabhatoma abhaanabheegha bhabhere, akabhabhoorera akabhugha, “Mughëndë mo‑moghya o Yerusareemu. Moghutëmëërana no omosubhe umu aghëghiri anyongo e manche, momutambane. 14Mo‑nyumba ino aghusöha, moghi momobhoorere omwene anyumba, ‘Omweghi naghusabha otwërëki ekenyumba kino akoreera Abhaasaka haghirohamu na abhaanabheegha bhaache.’ 15Niho omwene anyumba naköbhëërëki ekenyumba ghekoro irëngö, kimariri ghusëëmibhu. Motusëëmërë‑mu, toreere ekiinyakurë ke Bhaasaka.” 16Abhaanabheegha bhayo bhaghatanura, bhaaghaye mo‑moghya uyo, bhakabhöna ghoose ghaanyi kebhuno Yesu abhabhooriire. Bhaghasëëma ebhiinyakurë bhe Bhaasaka.#14:16 Mööhi Kohoroka 12:3–11.
17Hano bhwiriri, Yesu akahika mo‑nyumba iyo haghirohamu na abhaanabheegha bhaache ikomi na bhabhere. 18Hano ꞉bhaare bhararaaghëra, Yesu akabhugha, “Mahëënë ˆnekabhabhoorera, umu ghate yaanyu uno akuraaghëra haghirohamu na neeni hano, nakuucha ahaane mo‑mabhökö gha bhabhisa.” 19Abhaanabheegha bhaache bhaghasëëma kubha na amacheeche. Bhakamobhoori ke umu umu, “Ghasi n‑eni?”
20Yesu akabhabhoorera akabhugha, “N‑umu ghate yaanyu ikomi na bhabhere, uno aghuköri omughaate haghirohamu na neeni mo‑ghetibha. 21Eni Omoona o Mooto neghwitu kinya bhuno yandëkuru mo‑Mandëkö Amatööbhiyu. Amare horeera nakorighi omooto uno akuhaana eni mo‑mabhökö gha bhabhisa. Nengabheere ngʼoni omooto uyo atiibhoru.”
Ekiinyakurë ke Omutëmi
(Mataayo 26:26–30; Ruuka 22:14–23; 1 Abhakorinto 11:23–25)
22Hano ꞉bhaare bhararaaghëra, Yesu akiimoki omughaate, aghiitabheri Eryobha. Akawosuura, akabhaha abhaanabheegha bhaache, akabhugha, “Mwimoki mori, uno niwe omobhere waane.” 23Akamara akiimoki eghisënchö ke divaayi, aghiitabheri Eryobha, akabhaha abhaanabheegha bhaache, bhoose bhakanywera mo‑ghisënchö kiyo. 24Akabhabhoorera akabhugha, “Ghano n‑amasaahë ghaane gha riiraghano, ghano ghaghwitëka gho ghiri e bhaato bhaaru. 25Mahëënë ˆnekabhabhoorera kubha, korwera reero, nteekunyo wiiki adivaayi mbagha mo‑rosiko runo neekunyo ahë mo‑bhutëmi bho Ryobha.” 26Bhakamara bhakeemba emyembo ghe koreghongi Eryobha.#14:26 Abhayahuuti eriibhagha re bhaasaka, mbaare bhanariri kwemba emyembo ghino gheenyi mo‑Sabhuri 113—118. Hano bhamariri kwemba, bhaghatanura hayo, bhaaghaye mo‑gheghoro ke Miseyituuni.
Yesu ˆakamobhoorera Bheetero kubha nakomwanga
(Mataayo 26:31–35; Ruuka 22:31–34; Yohana 13:36–38)
27Hano ꞉bhaare mo‑nchëra, Yesu akabhabhoorera abhaanabheegha bhaache akabhugha, “Inyu bhoose mokuungʼösa gho ghano ghakuucha korwera. Ngaakubha kebhuno Eryobha ꞉reebhughiri mo‑Mandëkö Amatööbhiyu kubha,
‘Nekomutëma omoriishi,
na changʼöndu ncheghusancha.’#14:27 Mööhi Sakariya 13:7.
28“Amare hano nekoryoka, nekobhakangata ghuye Ghariraaya.”
29Niho Bheetero akamobhoorera akabhugha, “Koru nangabha abhaghëndi bhaane bhoose bharaghotigha, eni nteeghoghotigha.” 30Yesu akamobhoorera akabhugha, “Mahëënë ˆneghakobhoorera, obhotiko bho reero, asërëëcha ekeere ghughamba mara e kabhere, nookubha onyangiri ghatato.” 31Amare Bheetero akahënërëra kobhugha, “Koru aribha ekwëndëru kubha neku haghirohamu na niiye, eni nteghokwanga naabha!” Na abhaanabheegha abhande bhoose bhaghasiikëra hangʼu hangʼu.
Yesu ˆaghasabha Eryobha Ghetesemaani
(Mataayo 26:36–46; Ruuka 22:39–46)
32Mbe, bhakahika mo‑kinyaweera kino ghekobherekeru Ghetesemaani. Yesu akabhabhoorera abhaanabheegha bhaache akabhugha, “Mwikare hano, eni motighe neghi ghusabha.” 33Akabhiimoki Bheetero, na Yakobho na Yohana, aghaye nabho kurë hasuuhu, aghasëëma kubha na amacheeche chwee na kunyaaka mo‑körö. 34Akabhabhoorera akabhugha, “Akörö yaane neenyi na amacheeche chwee, ekirëngërë ghe ghoku. Inyu mwikare hano, mutëngë.”
35Yesu aghiishuka ambërë hasuuhu, akiirëkëra haase kebhuuma. Aghasabha arabhugha, “Aribha ekubha, netahetera eriibhagha rino re nyaako.” 36Akabhugha kubha, “Taata, ghokoocho ghoose ngaakubha. ˆNeghaghusabha onduuseri eghisënchö kino ke nyaako. Taanyi kinya eni nekwënda, amare ukörë kinya iye okwënda.”
37Niho Yesu aghagharuka hano abhatighiri abhaanabheegha bhaache na kobhabhöna bhamisiri chandöörö. Akamobhoori Bheetero akabhugha, “Simiyooni, nomisiri chandöörö? Totoriri ghutënga haghirohamu na neeni koru gho sa imu?” 38Niho akabhabhoorera akabhugha, “Mutëngë na ghusabha, motaacha ghusöha mo‑masaki. Akörö nekwënda ghoghumereri amasaki, amare omobhere toonyi na changuru.”
39Wiiki Yesu aghatanura, aghaye ghusabha rubhareka, aghagharukera ghusabha amangʼana ghaare ghaare. 40Hano agharokiri wiiki, akabhabhöna bhamisiri chandöörö, gho kubha chandöörö ncheere chaaru mo‑miisho ghaabho. Hano abhabhookiri, bhataare na re komugharokeri.
41Yesu aghaye wiiki ghusabha, aghagharuka, akabhabhoorera akabhugha, “Kana mokeere momisiri chandöörö na koweera? Eriibhagha riyo reghiisha, eriibhagha re nyaako yaane ndehikiri. Ibheere eni Omoona o Mooto neghotooru mo‑mabhökö gha abhaköri bha masari. 42Mobhooke, tughëndë. Mööhi! Omooto wuure akuhaana mo‑mabhökö gha bhabhisa haghuhe anyi!”
Yesu ˆaghaghöötu
(Mataayo 26:47–56; Ruuka 22:47–53; Yohana 18:3–12)
43Hano Yesu are akeere arasiikëra ghayo, hayo hayo Yuuta wuure, umu o bhaanabheegha ikomi na bhabhere, akaacha haghirohamu ne erikinda ikoro re bhaato rino reere na amashabha na charungu mo‑mabhökö. Abhaato bhayo ꞉mbaatomuru na abhakoro bha bhachaama, na abheeghi bha meghiro na abhagharuka bha Bhayahuuti.#14:43 Abhakoro bha bhachaama, na abheeghi bha meghiro na abhagharuka bha Bhayahuuti. Mbaare abhaato bha riibharacha eriikoro re Abhayahuuti. 44Yuuta uno are araghe komuhaana Yesu mo‑mabhökö gha bhabhisa, naare amariri kobhaha ekyërëkërëri abhaato bhayo, akabhabhoorera akabhugha, “Omooto uno nekomukëëri gho komutahata, niwe uyo. Momughöötë na ghutanura nawe, momochonge bhoheene.”
45Hano Yuuta ahikiri hayo, akamusëëta Yesu kimu kimu, akabhugha, “Omweghi!” Akamutahata. 46Abhaato bhayo bhakamughööta Yesu. 47Niho, omooto umu mo‑bhano ꞉bhaare bhiimeeriire hayo haghirohamu na Yesu, aghasöhöra ekinyamiino keeche, akamunyëra omusësë o Muchaama Omokoro na komonunga oghotu.
48Yesu akabhabhoorera abhaato bhayo akabhugha, “Kana, mwichiri ne emehyo na charungu ghungööta eni kinya erinyangara? 49Chaasiko choose neere haghirohamu na niinyu, nereeghi Mwisëngërö, amare motangöötiri! Amare ghoose ghano ngarweriire kubha ghahikeerane ghano ghaandëkuru mo‑Mandëkö Amatööbhiyu.”#14:49 Mööhi Sakariya 13:7; Maariko 14:27.
50Niho abhaanabheegha bhaache bhoose bhakamotigha Yesu, bhakangʼösa. 51Naare‑ho omobhureni umu uno are ibhishiri ashuuka ayeene, naare aramutambana Yesu. Woose bhaghasaki komughööta, 52amare, iwe akabhatabhaabhuka mo‑mabhökö, aghatigha ashuuka yaache, akayaara anyi kingʼaabhi.
Yesu ambërë e riibharacha
(Mataayo 26:57–68; Ruuka 22:54–55, 22:63–71; Yohana 18:13–14, 18:19–24)
53Niho abhaato bhayo bhakamohira Yesu kwo Muchaama Omokoro o Ryobha. Bhaghiikomana hayo bhoose, abhakoro bha bhachaama, na abhagharuka na abheeghi bha meghiro. 54Eriibhagha riyo, Bheetero naare aramutambana Yesu gho kurë. Aghaye, aghasöha mo‑riigho re nyumba e Muchaama Omokoro. Aghiikara‑mu haghirohamu na abhachongi bhaare bha Muchaama Omokoro, akabha araata omororo.
55Abhakoro bha bhachaama ne eriibharacha ryose eriikoro bhaghasëëma ghutabhara obhwibhateri bho komusëma Yesu, kubha bhamotenere ekiina ghe komwita. Amare, bhataabhwine obhwibhateri bhobhoose. 56Abhaato bhaaru mbaare bhararuusi obhwibhateri bho bhuröngö komusëma Yesu, amare obhwibhateri bhoobho bhotaare bhoroghwana. 57Niho abhaato abhande bhakiimeerera, mbaare bhararuusi obhwibhateri bho bhuröngö, bharabhugha kubha, 58“Itu ntomooghwire omooto uno arabhugha, ‘Eni nekuhaanyura Erisëngërö re Ryobha rino abhaato ꞉bhaabhëkiri. Wiiki, nekwabhëka erende gho chaasiko ishato hangʼu, naryo retaakwabhëku na abhaato.’ ” 59Koru hangʼu, obhwibhateri bhoobho bhotaare bhoroghwana.
60Akamara Omuchaama Omokoro akiimeerera ambërë e riibharacha. Akamobhoori Yesu akabhugha, “Kana, tooghugharokeri koru angʼana yoyoose kurëngʼaana na ghano abhaato bhano bhaghoghusëma?” 61Amare Yesu aghakira, tagharokiiri angʼana yoyoose. Omuchaama Omokoro akëëndërëra komobhoori kubha, “Kana, iye niiye Kirisito, Omoona o Ryobha uno aghoghongibhu?” 62Yesu aghagharokeri akabhugha, “Eni niwe. Wiiki mokondighi eni uno neenyi Omoona o Mooto niikeere mo‑kubhökö gho kwiro kwo Ryobha rino reenyi na changuru choose,#14:62a Mööhi Sabhuri 110:1. neraacha mo‑mashaaro gha mwishaaro.”#14:62b Mööhi Taniyeri 7:13.
63Niho Omuchaama Omokoro aghatandura andachana yaache kwërëki kubha nakariire chwee, akabhugha kubha, “Ngwake toghutabhara wiiki abhiibhateri abhande? 64Mooghwire kebhuno akwirëngʼaani ne Eryobha! Ibheere inyu, nibhu mokobhugha?” Eriibharacha ryose rekabhugha kubha, nakwëndëru itu.
65Niho abhande bhaghasëëma komotwera amatë, komubhöha ne eghitambara mo‑bhosho na komutëma ebhekundi, ino bharamobhoorera kubha, “Nuröötë n‑niwe uno aghutëmiri!” Abhachongi bhano ꞉bhaare hayo, bhakamwimoki, bhakamutëma orohe.
Bheetero ˆakamwanga Yesu
(Mataayo 26:69–75; Ruuka 22:56–62; Yohana 18:15–18, 25–27)
66Eriibhagha riyo ryose, Bheetero naare mo‑riigho, haase e kenyumba kino Yesu are arabhooribhu. Akaacha omukari umu koru mo‑bhatamishi bha ghikari bha Muchaama Omokoro. 67Akamorighi Bheetero araata omororo, akamoomeri amiisho. Akamobhoorera akabhugha, “Na niiye noore haghirohamu no Omunasareeti uyo, Yesu.” 68Amare Bheetero akaanga akabhugha, “Ghayo okobhugha, eni ntegheeche, koru hasuuhu!” Aghaye mo‑kehita ke riigho. Eriibhagha riyo riyo, asërëëcha eghaghamba.
69Omukari uyo wiiki akamorighi Bheetero, aghasëëma kobhabhoorera abhaato bhano ꞉bhaare bhiimeeriire hayo arabhugha, “Omooto uno woose naanyi haghirohamu nabho.” 70Amare, Bheetero akaanga wiiki.
Rekaheta eriibhagha isuuhu, abhaato bhano ꞉bhaare bhiimeeriire hayo bhakamobhoorera Bheetero bhakabhugha, “Mahëënë iye noonyi haghirohamu nabho, gho kubha na niiye m‑Mughariraaya onyi.” 71Amare, Bheetero aghasëëma kwiyiihiima na kuraheri arabhugha, “Aribha nebhughiri obhuröngö, niihiimu! Omooto uno mokobhugha, eni ntemweche!” 72Hayo hayo, asërëëcha eghaghamba mara e kabhere. Eriibhagha riyo, Bheetero akahiita amangʼana ghano Yesu ꞉amobhooriire arabhugha, “Reero asërëëcha akeere ghughamba mara e kabhere, nookubha onyangiri ghatato.” Bheetero hano ihëëbhiri ghayo, akarera chwee, changishori chaaru.
Currently Selected:
Maariko 14: ntk
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2022 Wycliffe Bible Translators, Inc. All rights reserved