Baverset oyo Eyebani Mpenza ewuti na Maariko 13

Kabola

Abhaato bhaaru mbakobharëgha inyu, gho kubha moghuntambana eni. Amare, wuure aghoghumereri mbagha antenero, uyo niwe aghotooribhu.

Mbe, mubhe amiisho! Mwisëëmi, [mubhe morasabha] gho kubha moteeche kubha, eriibhagha riyo ndekohika nyingake.

Hano abhaato bhayo bhakobhaghööta na kobhahira mo‑mabharacha na ghoteneru ekiina, motiinyaaki ighoro e ghano moghosiikëra. Mosiikërë ryoryose rino mokuhaabhu ne Eryobha eriibhagha riyo riyo. Taanyi inyu abheene moghosiikëra, amare n‑Akörö Ahörëëru ino enyi moose yaanyu niyo eghosiikëra.

Erishaaro na ase mbekoheta, amare amangʼana ghaane ghataakoheta naabha.

“Amare, ighoro e rosiko ne eriibhagha re kuucha koone, taanyi‑ho omooto uno eche, koru bhamarayika bha Mwishaaro hamu Omoona o Ryobha, bhoose bhateeche. Amare Taata waane omwene niwe eche.

Hano inyu mokooghu ighoro e amangʼana gha mahë na nyughunyughu e riihë, motatiina. Ghayo ngakwëndëru korwera, amare antenero neekubha ekeere.

Yesu akëëndërëra kobhugha, “Inyu bhoose, mubhe miisho, gho kubha moteeche kubha omwene anyumba naghugharuka nyingake. Moteeche aribha aghugharuka omughörööbha, hamu obhotiko bhooghate, hamu mo‑rungʼöörö, hamu atabhoori. Mutëngë, kubha hano akuucha gho ghutakani, atabhöna momisiri chandöörö. Riyo nekobhabhoorera inyu, ˆnekabhabhoorera abhaato bhoose, bhatëngë.”

Ase imu nekurööna na ase ayende, obhutëmi bhumu mbokurööna no obhutëmi obhonde. Aghëëcha ne emerighito ghe se ngekorwera mo‑chaase chaaru. Ghayo ngaakubha kinya ghusëëma kwo bhosongo hano omukari ahëënda kwibhora.

Angʼana Anchömu nekwëndëru kuraghanu singa mo‑bhaato bha chaase choose.

Abhaato bhaaru mbakuucha kwo riina reene, bharabhugha kubha, ‘Eni neeni Kirisito,’ na mbakobhangʼiina abhaato bhaaru.

“Amare inyu, mubhe miisho chwee. Abhaato mbakobhahira mo‑mabharacha na kobhatëma kobhe mo‑masinaghooghi ghaabho. Mbakobhahira mo‑bhakangati bha se na mo‑bhatëmi, gho kubha monsongʼaaniri eni. Riyo ndeekubha eriibhagha re ghughambera Angʼana Anchömu ghokoobho.

Mbakuucha abharööti bha bhuröngö na abhaato bhano bhakwibherekera Kirisito. Mbaakubha bharaköra ebhyërëkërëri ne ebhiraghe, kubha bhasaki kobhangʼiina bhano bhaahwiru ne Eryobha.

“Mbe, mo‑chaasiko chiire, anyaako iyo eramara koheta, ‘Eryobha ndeghotooru ekengʼuuri, omwëri tokoruusi emirëngaari gheeche, na chanchöta ncheekubha cheragho haase koru mwishaaro. Niho, ebheghiro bhyose bhe mwishaaro bheghosingisu.’