Iohane 1
1
Ngkóráꞌna Pueꞌ Ala to mewaliꞌ tauna
1Rungu-runguna, hangko tiꞌara mani duniáꞌ rapopewaliꞌ,
to rapándiriꞌ hai Ngkóráꞌ#1:1 to rapándiriꞌ nodo Ngkóráꞌ: ia miꞌi Pueꞌ Iesu. Hangko i rungu-runguna, Pueꞌ Iesu ara hingkakani hai Pueꞌ Ala, hai Ia to mopatongawaꞌ i tauna kaheánána, pambiárána hai peundeꞌána Pueꞌ Ala. ara miꞌi ami.
Ngkóráꞌ iti, ambiꞌna miꞌi ara hingkakani hai Pueꞌ Ala,
hai Ngkóráꞌ iti ia miꞌi Pueꞌ Ala haduduáNa.
2Rungu-runguna Ia hingkakani hai Pueꞌ Ala.
3Ia miꞌi to napontóáꞌ Pueꞌ Ala mampopewaliꞌ hinángkáꞌna to ara.
Tiꞌara ara hampákáꞌ to mewaliꞌ ane tiꞌarai Ngkóráꞌ.#1:3 Básá Kolose 1:15-20.
4Ia miꞌi ntóáꞌna katueꞌ.
Ia to mampoweꞌi katueꞌ i tauna hai mopamabaa laluraꞌ.
5Ia miꞌi pewangkaꞌ to mewangkaꞌ oaꞌ i lalu duniáꞌ to makáindi deꞌe,
hai Ia tiꞌara haweꞌ hangkani nanangi kamakáindi.
6Hangkani tempó, haweꞌ miꞌi hadua tauna to nahuoꞌ Pueꞌ Ala, hangaꞌna Iohane.#1:6 Iohane deꞌe to rauliꞌ Iohane Toperiu (Matiu 3:1). 7Kamaina Iohane, ia mewaliꞌ hadua sabiꞌ to mopahaweꞌ kana i pewangkaꞌ iti bona upu-upu tauna to mohádi posabikina mepoináláiheꞌ i pewangkaꞌ iti. 8Agáiáná Iohane tiꞌara tauna to rapándiriꞌ hai pewangkaꞌ iti. Ia to mai peá mopahaweꞌ kana i kaꞌina haweꞌNa tauna iti to moánti pewangkaꞌ i upu-upu tauna.
9Ngkóráꞌ iti Topoánti pewangkaꞌ to toꞌu
to mopamabaa laluna upu-upu tauna.
Ia to haweꞌ miꞌi i duniáꞌ.
10Ia miꞌi to napontóáꞌ Pueꞌ Ala mampopewaliꞌ duniáꞌ deꞌe.
Agáiáná i tempóNa ara i duniáꞌ,
tauna tiꞌara moisá kaheánáNa.
11Mogalo riꞌi hangka toSáráeliꞌNa,
handaꞌheꞌ to tiꞌara motarima.
12Agáiáná heáná peá to motarima hai mepoinálái i Hia,
hira miꞌi to Napopewaliꞌ ánáꞌna Pueꞌ Ala.
13Mewaliꞌheꞌ ánáꞌna Pueꞌ Ala
tiꞌara ánti toioruraꞌ,
ba ánti pohambokona tauna,
ba ánti peundeꞌáraꞌ tauna.
Bateꞌna peá Pueꞌ Ala to mampopewaliꞌheꞌ ánáꞌNa.
14Ngkóráꞌ iti mewaliꞌ tauna,
hai toroꞌ i oloꞌtaꞌ i duniáꞌ deꞌe.
Kiꞌita miꞌi kamaróhóna kuasaꞌNa.
KuasaꞌNa iti Natarima hangko i UmáNa,
láwiꞌ Ia miꞌi ÁnáꞌNa to HaduduáNa.
LaluitaNa toꞌu ntepuꞌu,
hai tongawaꞌ upu-upu kabulána laluNa i kitaꞌ.
15Hangkani tempó, Iohane mampopaisá i tauna to handaꞌ kaheánána Ngkóráꞌ iti. Ia molaluita napasimbuku, nauliꞌ, “Ia miꞌi deꞌe to kupakanótóákou hangkoia! Kuꞌuliꞌ: ara to ina mai meusungi hangko i kódóꞌ to melumbuꞌ kamaróhóna kuasaꞌNa hangko i kódóꞌ, láwiꞌ hangko tiꞌara maniaꞌ rapoánáka, Ia ambiꞌna miꞌi ara hangko i rungu-runguna.”#1:15 Iohane towutuꞌ haneꞌi Iesu. Halalunaheꞌ, láwiꞌ Elisabeꞌ pinoinána Maria. Iliꞌna pesupaꞌáraꞌ Iohane hai Iesu, ini wulána. Básá Lukasi 1:26.
16Ánti kabulána laluNa, kitaꞌ upu-upu molámbiꞌkeꞌ pewátiꞌ,
hai pewátiꞌ to talámbiꞌ iti, tiꞌara mokahópóꞌá.
17Musa moweꞌikeꞌ áturá peá.
Agáiáná Iesu Kerisitu mopatongawaꞌákeꞌ
kabulána laluna Pueꞌ Ala,
hai moliu paturoꞌNa to toꞌu,
taisá kaheánána Pueꞌ Ala.
18Tiꞌara ara hadua to moita Pueꞌ Ala,
bateꞌna peá ÁnáꞌNa to Haduduána
to ara hingkakani hai Ia.
Ia miꞌi to mopakanótóákeꞌ heáná katoꞌuána Pueꞌ Ala.
Posabikina Iohane Toperiu
(Mat. 3:1-12; Mrk. 1:1-8; Luk. 3:3-6,15-17)
19Deꞌe miꞌi posabikina Iohane to mopahaweꞌ kaheánána Iesu. Hangkani tempó, tadulakoraꞌ toIahudiꞌ i Ierusale mohuoꞌheꞌ bahangapa tadulako menómbá hai toLewi#1:19 toLewi: pemuleꞌána Lewi ánáꞌna Iako. Mobágóꞌheꞌ i Támbina Pueꞌ Ala. lao i Iohane. Kahaweꞌraꞌ i Iohane, rapekuneꞌ, “Katoꞌuána, heánákoꞌ? Ba Datu Topehómpóꞌ mpuꞌukoꞌ?”
20Nahánikiheꞌ Iohane i katoꞌu-toꞌuána, nauliꞌ, “Kódóꞌ, tiꞌaraꞌaꞌ Datu Topehómpóꞌ.”
21Mekuneꞌ wopaheꞌ, “Ane noꞌonoꞌi, heánákoꞌ? Ba nabiꞌ Eliakoꞌ?”#1:21 nabiꞌ Eliá: nabiꞌ to nadándi Pueꞌ Ala ina haweꞌ mai hangko tiꞌara mani haweꞌ Datu Topehómpóꞌ. Básá Maleaki 4:5.
Nauliꞌ Iohane, “Tiꞌara.”
Mekuneꞌ wopaheꞌ, “Ba io miꞌi nabiꞌ mahile#1:21 nabiꞌ mahile: Rápáꞌna nodo Musa to rahárungá toSáráeliꞌ ina mai ioru hangko i Datu Topehómpóꞌ. Básá Pohuleki 18:15,18. to radándi hangkoia ina mai i duniáꞌ?”
Nauliꞌ Iohane, “Tiꞌara woꞌo.”
22Hangko ionoꞌ, rahángáꞌá, “Ane noꞌonoꞌi, nuhángáꞌáꞌangkaiꞌ ba heánákoꞌ, bona ara hánikina pekuneꞌraꞌ to mohuoꞌangkaiꞌ mai. Apa pehániꞌmu kana i wátámu haduduámu?”
23Nahánikiheꞌ Iohane mouláꞌ laluitana nabiꞌ Iesaia hangkoia:
“Kódóꞌ miꞌi deꞌe ‘tauna to molaluita masimbuku i pádá loriꞌ:
Ina haweꞌ miꞌi Pueꞌ!
Nipatimama ráráNa!’ ” (Iesaia 40:3)
24-25Rauliꞌ wopiꞌi huoꞌáraꞌ toParisi iti, “Ane tiꞌarakoꞌ Datu Topehómpóꞌ, tiꞌarakoꞌ nabiꞌ Eliá, hai tiꞌarakoꞌ woꞌo nabiꞌ to radándi, moapa riꞌi haneꞌi báiꞌkoꞌ moriu tauna?”#1:24 Ádá periu tiꞌara ádá to woꞌu. Ane tauna to tiꞌara toIahudiꞌ mampoinao mesuaꞌ i agama Iahudiꞌ, hangaa-ngaa rariuheꞌ sieruꞌ. Agáiáná tauna to nariu Iohane deꞌe, iamoheꞌ toIahudiꞌ! Mewaliꞌ tingkáráꞌ tauna moita toIahudiꞌ rariu nodoheꞌ to tiꞌara taunána Pueꞌ Ala.
26Nauliꞌ Iohane, “Kódóꞌ moriu tauna hai uwai peá. Deꞌe-deꞌe ara miꞌi hadua i oloꞌmi, agáiáná Ia tiꞌara mani niꞌisá. 27Ia miꞌi to haweꞌ meusungi hangko i kódóꞌ. Mogalo riꞌi mokekehi petakaꞌ sandaleNa, tiꞌaraꞌaꞌ hintotoꞌ.”#1:27 Mokekehi petakaꞌ sandale ia miꞌi bágóꞌna hawiꞌ to i wóiꞌ ntepuꞌu. Mewaliꞌ mouláꞌ Iohane, ia i wóiꞌ mani hangko i hawiꞌ.
28Upu-upu iti mewaliꞌ i wánuá Betania, i periuána Iohane tándáꞌ i mata alo uwai Iarade.
Iesu ia miꞌi Ánáꞌ Dimbá to napatimama Pueꞌ Ala
29Kahalona, Iohane moita Iesu lao i hia, hai nahángáꞌáheꞌ tauna to handaꞌ, “Nipeita! Domi maiꞌo tauna to rapándiriꞌ nodo Ánáꞌ Dimbá#1:29 Ánáꞌ Dimbá: Hangkoia, ane toSáráeliꞌ madósá, hangaa-ngaa moánti hambaꞌa ánáꞌ dimbá ba binataꞌ ntániꞌna i Támbina Pueꞌ Ala bona rasambale mewaliꞌ popenómbá mopaháwángi dósána. I karahádina tauna apa to nauliꞌ Iohane Toperiu, ina mampopambuhinaoáheꞌ laluitana nabiꞌ-nabiꞌ mokana i Datu Topehómpóꞌ to ina haweꞌ. Rápáꞌna Iesaia gáláꞌna ka-53. Básá woꞌo 1 Iohane 4:9-10. to napatimama Pueꞌ Ala. Ia miꞌi to ina mohuhuꞌ wátáNa mosulewátáikeꞌ bona tehómpókikeꞌ hangko i huku dósántaꞌ. 30Ia miꞌi to kuꞌuliꞌ to liu ina haweꞌ meusungi hangko i kódóꞌ, agáiáná melumbuꞌ kamaróhóna kuasaꞌNa hangko i kódóꞌ, láwiꞌ hangko tiꞌara maniaꞌ rapoánáka, Ia ambiꞌna miꞌi ara. 31Rungu-runguna, tiꞌara mani woꞌo kuisá kaꞌIana miꞌi Datu Topehómpóꞌ. Agáiáná deꞌe miꞌi tunggáiángkuꞌ: maiaꞌ moriuheꞌ toSáráeliꞌ hai uwai, bona toSáráeliꞌ moisáheꞌ heáná katoꞌuána Datu Topehómpóꞌ iti.”
32-34Ara woꞌo posabiꞌna Iohane deꞌe, nauliꞌ, “Rungu-runguna tiꞌara mani kuisá kaꞌIesuna Datu Topohómpóꞌ, agáiáná Pueꞌ Ala mohuoꞌaꞌ moriu tauna hai uwai. Nahángáꞌáꞌáꞌaꞌ node: ‘Ane nuita Inao to Magasaꞌ mendáulu hai mengkatóá i hadua tauna, Ia miꞌi to ina mampoweꞌikou Inao to Magasaꞌ bona tebáliki lalumi.’ Mewaliꞌ, kuita mpuꞌu miꞌi Inao to Magasaꞌ mendáulu hangko i surugáꞌ nodo tádáhi manggebodoꞌ hai mengkatóá i wongkona Iesu. Onoꞌ miꞌi haneꞌi kuꞌuliꞌ: Iesu Ia miꞌi Ánáꞌna Pueꞌ Ala.”
Iesu mokióꞌ topeguruNa to rungu-runguna
35Kahalona, Iohane ara woꞌo ionoꞌ hingkakani hai rodua topeguruna.#1:35 rodua topeguruna: ia miꞌi Andaria (básá wátiꞌna ka-40) hai mouláꞌ guru agama hangkoia, to haduána ia miꞌi Iohane to moukiꞌ sura deꞌe. Topegurunaheꞌ Iohane Toperiu hangko tiꞌara maniheꞌ mewaliꞌ topeguruna Iesu. 36Kamoitána Iesu melempó, nauliꞌ, “Peita, domi maiꞌo Ánáꞌ Dimbána Pueꞌ Ala!” 37Karahádina laluitana Iohane, laomoheꞌ meuláꞌ i Iesu.
38Napehaileꞌheꞌ Iesu hai Naitaheꞌ meuláꞌ, mewaliꞌ Nakuneꞌheꞌ, “Apa to nipeliꞌ?”
Rauliꞌ “Guru, iumbá katoroꞌáMu?”
39Nauliꞌ Iesu, “Maimokou, niꞌita peá deiná.” Meuláꞌ mpuꞌumoheꞌ i Hia lao i katoroꞌáNa. Mantepuꞌu tintiꞌ iba duuꞌ káindi, ionoꞌmoheꞌ hingkakani hai Ia.
40Tauna to rodua iti meuláꞌheꞌ i Iesu ánti pohádiraꞌ laluitana Iohane Toperiu. Hadua hangko i hira, hangaꞌna Andaria, ádina Simoꞌ Peturuꞌ. 41Kásáliu lao Andaria mampeliꞌ Simoꞌ, nahángáꞌá, “Kilámbiꞌ miꞌi to rauliꞌ toMásehi.” (Laluita “toMásehi” hibali hai “Kerisitu” i lalu básá Iunani. Lempóna: Datu Topehómpóꞌ.) 42Roo onoꞌ, naꞌánti lao i Iesu.
Iesu motótói Simoꞌ haneꞌi Nahángáꞌá, “Io Simoꞌ ánáꞌna Iohane. Mantepuꞌu deꞌe-deꞌe, ina rahangaꞌkoꞌ Kepas.” (Lempóna “Kepas” i lalu básáraꞌ toIahudiꞌ, hibali hai “Peturuꞌ” i lalu básá Iunani. Lempóna: watu.)
Iesu mokióꞌ Pilipu hai Natanaeli
43Kahalona, Iesu ina lao i tampoꞌ Galilea. Hangko tiꞌara mani pohuꞌ, lao miꞌi mampohidupaꞌá Pilipu hai nahángáꞌá, “Meuláꞌmokoꞌ i Kódóꞌ!” 44Pilipu iti hangko i wánuá Besaida, wánuáraꞌ Andaria hai Peturuꞌ.
45Hangko ionoꞌ, lao miꞌi woꞌo Pilipu mampeliꞌ rángána to rahangaꞌ Natanaeli. Nalámbiꞌ mpuꞌu miꞌi haneꞌi nahángáꞌá, “Kipohidupaꞌá miꞌi do tauna to natunggái Musa i lalu sura Paturoꞌna, hai nabiꞌ-nabiꞌ i lalu suraraꞌ hangkoia! Ia miꞌi Iesu toNasare, ánáꞌna Iusupu.”
46Mehániꞌ Natanaeli, nauliꞌ, “Ara paꞌi woꞌo to maroꞌa to hangko i wánuá Nasare?”
Nauliꞌ Pilipu, “Maimokoꞌ, bona nuita!” Mewaliꞌ lao mpuꞌumoheꞌ i Iesu.
47Kanaitána Iesu Natanaeli mai mampohidupaꞌá, Napolaluita miꞌi kana i hia, Nauliꞌ, “Domi maiꞌo hadua toSáráeliꞌ to manoroꞌ ntepuꞌu laluna. Ia tiꞌara hangkani mobagiuꞌ tauna!”
48Nauliꞌ Natanaeli, “Guru, noumbá riꞌi haneꞌi Nuisá ntepuꞌu pambiárángkuꞌ?”
Nauliꞌ Iesu, “Hangko tiꞌara manikoꞌ nakióꞌ Pilipu, Kuitamokoꞌ i wóiꞌ kau ara.”
49Nauliꞌ Natanaeli, “Guru, Ánáꞌna mpuꞌuKoꞌ Pueꞌ Ala! Io mpuꞌu miꞌi Datungkiꞌ toSáráeliꞌ!”
50Nauliꞌ Iesu, “Ba nupoinálái láwiꞌ Kuꞌuliꞌ kaKuitamu i wóiꞌ kau ara? Ina nuita wopiꞌi tandaꞌ kuasaꞌ to melumbuꞌ kamahilena hangko i to pewaliꞌ deꞌe.” 51Roo onoꞌ, nauliꞌ wopiꞌi Iesu, “Toꞌu ntepuꞌu laluitaNgkuꞌ deꞌe: ina niꞌita langiꞌ tebungkáhi hai malaꞌekana Pueꞌ Ala mengkaheꞌ hai mendáulu mai i Ánáꞌ Mánusiá.”#1:51 Hangkoia, Iako moita malaꞌekana Pueꞌ Ala mengkaheꞌ hai mendáulu i tukaꞌ hangko i langiꞌ. Básá Pewaliꞌána 28:12,13.
Currently Selected:
Iohane 1: NTBEP
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bahasa Behoa Shorter Bible © Indonesian Bible Society, 2015.