Iohane 2
2
Iesu mobáliki uwai mewaliꞌ anggoroꞌ
1Liu rongalo hangko ionoꞌ, ara posusa petauna i wánuá Kana i tampoꞌ Galilea. Inána Iesu ara woꞌo i posusaꞌá iti. 2Iesu hai topegurunaheꞌ rakióꞌ woꞌo lao i posusaꞌá iti. 3Tangaꞌraꞌ mosusa, upu miꞌi anggoroꞌ, mewaliꞌ inána Iesu lao membiáꞌ tulungi i Hia, nauliꞌ, “Upu miꞌi anggoroꞌ.”
4Nahániki Iesu, “Inaꞌ, apa tunggáiámu haneꞌiAꞌ nuhángáꞌá noꞌonoꞌ? Tiꞌara mani haweꞌ tempóna#2:4 Tiꞌara mani haweꞌ tempóna: Bahangapa kánina Iesu manguliꞌ noꞌonoꞌ (básá Iohane 7:6,8,30; 8:20). Hungkuꞌ miꞌi tempóNa ina mate hangko haweꞌ miꞌi tempóNa (básá Iohane 12:23,27; 13:1; 16:32; 17:1). Kupatongawaꞌ kuasaꞌKuꞌ.”
5Agáiáná inána Iesu mohángáꞌáheꞌ topobágóꞌ i posusaꞌá iti, nauliꞌ, “Apa peá to ina Nahuoꞌákou, hangaa-ngaa nipeuláꞌi!”
6I posusaꞌá iti, ara ini wuaꞌna gumbaꞌ to mahile to rabábehi hangko i watu. Gumbaꞌ iti raóntóki uwai to ina rapakeꞌ membahoꞌ mouláꞌ ádáraꞌ toIahudiꞌ. Kahandaꞌna óntóꞌna gumbaꞌ iti, i laluna hambuaꞌ, peisá haweꞌ hangatu rompuloꞌ lite. 7Iesu mohángáꞌáheꞌ topobágóꞌ iti, “Nióntóki gumbaꞌ iti hai uwai.” Raóntóki mpuꞌu miꞌi haweꞌ bukeꞌ. 8Roo onoꞌ, Nahángáꞌáheꞌ, “Hámbuꞌ hantóiꞌ, hai lao niántiá topokádipurá posusa.” Rahámbuꞌ mpuꞌu miꞌi haneꞌi raꞌánti lao i topokádipurá posusa.
9Topokádipurá susa iti mampemina uwai to raꞌántiá. Tiꞌara piꞌi matáweá nodo uwai ntooꞌ, tebáliki miꞌi mewaliꞌ anggoroꞌ. Agáiáná tiꞌara naisá kahangko iumbáꞌána mai anggoroꞌ iti, to moisá bateꞌraꞌ peá topobágóꞌ. Kaupuna mampemina anggoroꞌ iti, ia mokióꞌ miꞌi tobaleilo to ratauna, 10nahángáꞌá, “Matamaꞌ ntepuꞌu anggoroꞌ deꞌe. Biásána mouláꞌ ádántaꞌ, anggoroꞌ to maroꞌa hangaa-ngaa rakándó ioru i toposusa. Ane rahádiá miꞌi mainu, hangko rakándó riꞌi to tiꞌara gaga maroꞌa. Agáiáná io, nupaibókóꞌ riꞌi anggoroꞌ to matamaꞌ ntepuꞌu.”
11Iesu mobábehi tandaꞌ kuasaꞌ to rungu-runguna iti i wánuá Kana i tampoꞌ Galilea. Moliu tandaꞌ kuasaꞌ iti, Ia mopatongawaꞌ peawaꞌNa, hai topeguruNa mampoináláiheꞌ kuasaꞌNa iti hangko i Pueꞌ Ala.
12Roo posusa iti, upu-upuheꞌ topeguruNa, inána hai ádinaheꞌ Iesu,#2:12 ádiNaheꞌ: Básá Matiu 12:46; 13:55; Marakusi 6:3. hingkakaniheꞌ hai Iesu, laoheꞌ i wánuá Kapenau, haneꞌi toroꞌheꞌ ionoꞌ bahangapa wengina.
Iesu mowura topobaluꞌ-baluꞌ hangko i Támbina Pueꞌ Ala
(Mat. 21:12-13; Mrk. 11:15-17; Luk. 19:45-46)
13Ina haweꞌ miꞌi tempóna alo mahile agama Iahudiꞌ to rauliꞌ Alo Posusa Paska, onoꞌ miꞌi haneꞌi lao miꞌi Iesu i kótá Ierusale. 14I kahaweꞌNa i tangabaa Támbina Pueꞌ Ala, Ia moitaheꞌ tauna to mampobaluꞌ binataꞌ to ina rasambale, iamoheꞌ gapiꞌ, dimbá hai tádáhi manggebodoꞌ. Araheꞌ woꞌo toposuláꞌ dóiꞌ to mehoda ionoꞌ.#2:14 Mosulákiheꞌ dóiꞌ Roma mewaliꞌ dóiꞌ to peisá rapakeꞌ mobaiari ásele i Támbina Pueꞌ Ala, hai handaꞌ rasiꞌraꞌ to ralámbiꞌ hangko i dóiꞌ to rasuláki iti. 15Kanaitána Iesu upu-upu iti, Ia mobábehi miꞌi pehepe hangko i gulaꞌ haneꞌi mowura upu-upu gapiꞌraꞌ hai dimbáraꞌ hangko i Támbina Pueꞌ Ala. Ia modungká-dungká mejáraꞌ toposuláꞌ dóiꞌ, álána tekámburá dóiꞌraꞌ. 16Roo onoꞌ, Nahángáꞌáheꞌ topobaluꞌ-baluꞌ tádáhi manggebodoꞌ, “Pohuꞌmokou! Niánti upu-upu iti lao i rawa! Ineeꞌ nihuleꞌ-huleꞌ mai mobaluꞌ-baluꞌ i Támbina UmáNgkuꞌ. Támbi deꞌe tiꞌara pobaluꞌ-baluꞌá!”
17Topegurunaheꞌ mobuhinao apa to teukiꞌ i lalu Sura Magasaꞌ to manguliꞌ node:
“Rumihi peundeꞌáNgkuꞌ bona TámbiMu Pueꞌ ina rabiláꞌ.
Iti miꞌi to mopamaꞌamuꞌ laluNgkuꞌ.” (Sura Petóiá 69:10)
18Hangko ionoꞌ, hadua hangko i tadulakoraꞌ toIahudiꞌ mohángáꞌá Iesu, nauliꞌ, “Heáná to mampoweꞌiKoꞌ kuasaꞌ mobábehi iti? Ane ara mpuꞌu kuasaꞌMu, Nupopaitaꞌangkaiꞌ hambuaꞌ tandaꞌ kuasaꞌ!”
19Nahániki Iesu, “Ane kómu mogero Támbina Pueꞌ Ala deꞌe, i lalu tálu alona ina Kuaró huleꞌ.”#2:19 Lempóna: “Ane nipapateAꞌ, ina tueꞌAꞌ huleꞌ i lalu tálu alona.”
20Rauliꞌ tadulakoraꞌ toIahudiꞌ, “Nupanoumbá miꞌi paꞌi? Mogalo ripaꞌi iba puloꞌna hai ini parena tiꞌara mani wali Támbina Pueꞌ Ala deꞌe raꞌaró,#2:20 Támbina Pueꞌ Ala iti mababe ntepuꞌu. Mantepuꞌu napopearó Datu Herode Mahile rekeꞌ-rekeꞌna pare rompuloꞌ hangko tiꞌara mani Iesu rapoánáka, hai wali pare ini puloꞌna hai iba roo karapoánákana Iesu (64M). noumbá riꞌi haneꞌi Nuꞌuliꞌ ina Nuaró huleꞌ i lalu tálu peá alona!”
21Katoꞌuána, wátáNa haduduáNa to natunggái Iesu i tempóna mokábelái Támbina Pueꞌ Ala. 22I katueꞌNa huleꞌ hangko rabuhinao riꞌi topeguruNa laluitaNa iti, haneꞌi mampoináláimoheꞌ apa to teukiꞌ hangkoia i lalu Sura Magasaꞌ,#2:22 Básá Sura Petóiá 16:10. hai apa to nauliꞌ Iesu.
Iesu moisá laluraꞌ upu-upu tauna
23Tangaꞌna Iesu i Ierusale mouláꞌ alo Posusa Paska, handaꞌ tauna mampoinálái kaꞌIana miꞌi Datu Topehómpóꞌ, láwiꞌ moitaheꞌ tandaꞌ-tandaꞌ kuasaꞌ to Nabábehi. 24Agáiáná Iesu haduduáNa, tiꞌaraheꞌ Napoinálái, láwiꞌ Naisá aha apa to i laluraꞌ upu-upu tauna. 25Tiꞌaranto paraluu tauna mopahaweꞌ pekiriraꞌ, láwiꞌ Naisá miꞌi ami apa to i laluraꞌ tauna.
Currently Selected:
Iohane 2: NTBEP
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bahasa Behoa Shorter Bible © Indonesian Bible Society, 2015.