Ra Vei Hira Yarisula 27
27
NA SOPENA 27.
1Teaso sori tohapani me Itali, telavi Paul me valura tajua-hajiri me na tajua Julius, na varese tahajumu hi Siser.
2Tosalesahe me na ure hi Atramittium, tovaere sura vano mera ureure hi Esia; Aristarkus, na tajua hi Masitonia me Tessalonaika movano valuija.
3Inovi maa totieli Saiton Julius motahonai me Paul, mojuria sura reni ra tuana, sura lalaa, sura hani mera.
4Tolaho, tohapani taroroi me na pararana Saiprus ture na lahi, suria na lahi motara.
5Tau tolaho tali na tasi hi Silisia me Pamvilia, tomalua me Maira, na vanuai Laisia.
6Natuha na varese tahajumu mopasuae na ure hi Aleksantria mohapani me Itali, tosalesaheae.
7Tohapani tamautu ra pohi tari, mohauhaua sura lavi Knitus, suria na lahi motara tohapani me na pararana Krete ture na lahi taroroi me na jihoi Samon;
8Mohauhaua, tohapani taroroi me na ulu, tolavi na vanua motea, tejuria Palihuna tasi, motaroroi me na vanua Lasea.
9Tau na rani ra tari, moso sura hapani, suria na sahanihani mosori, Paul movaraira,
10“Tuau,” moaso, “Apinisi me na laho naa ra sanu tari timote, ra sanu tari tepelahi, ra rou, na ure, ra seja mauri mono.”
11Maa na varese tahajumu Julius morohoroho me na varese me na varese-hina-ure ljivi ra sanu Paul moaso.
12Suria na palihuna moso sura tohoae me na rani hina orua, taroroi hije vunuvunu tomeje na hapani paravu sura lavi Venise, sura tohoae me na rani hina orua. Venise mopalihuna Krete movavaha me na hapuara me na juiliu.
13Hisa na hajua molahi tamautu, teninima telavi na lahi temejeia, tenuneia, tetivano taroroi me Krete, taroroi me na ulu.
14Taroroi na lahi-losu momalua meja ture na ulu, na Hapuara tijuria.
15Motipae na ure, na jihona mosapinisi na toho me na lahi, tosiperehea tojuria moraveia.
16Torovo me na pararana ureure taiti, na hisena Klauta, ture na lahi, tovarao tahajia sura lavi na ovo hina ure:
17Tau teaurahae, telavi na asi tahajia sura hajiri na ure mohauhaua; maa teine motipae me na oni hi Sirtis, tejura hapani, telaho me na aru hasa.
18Suria na lahi-losu mohisihisija tahajia, inovi maa tovaere na putuhe na rou;
19Me na pohi vahatoluna toputuhe ra sanu hina ure hira haveja.
20Suria tosareni na maso, ra vitiu me na rani ra tari, na lahi itoho tahajia, toninima tosalavija tojolo.
21Tau tesahani minemine, Paul momaraha, moaso:
22“Tuau, motahonai otorohoau mine, moso otohapani me Krete, suria na pelahi me na mote momalua. Maa paleeno, atuhamiu ototena ine, suria saite seja mauri mopelahi, saite sanu, na ure hasa.
23Na pohi hina novi na enjel hi Atua, inau apilana, avarao suria, momalua moturi valuiau, moaso,
24“Oitena ine Paul; tesilaviho pa me Siser; me Atua morahu meho ra mauri hira tajua valuiho.”
25Suria, tuau, ototena ine, arohoroho me Atua ra sanu tepala moaso meau.
26Maa na pohi vaha-havulatea vana movate, moraveija nesahe, neesivo me na tasi Aionia, me na livuhana pohi ra tajua hina ure teninima tenumai me na ulu.
28Tetapusahe na tasi, tepasu ra seahi vaha-havularua: telaho taiti, tetapusahe vahatea maa, tepasu ra seahi vaha-havulatea vana molima.
29Natuha teninima tojovi me na malo, suria teputuhe na eli movate me na erena ure, temeje na rani momalua.
30Ra tahavarao hina ure temeje na jurituhe na ure, suria tenunejuri na ovo, tejihajiha tejuri ra jihitatani morua me na jihona ure, natuha Paul moaso me Varese tahajumu Julius me ra tajua hina:
31“Vai ra tahavarao hina ure tesatoho me na ure, tesajolo.”
32Natuha ra tahajumu tepahitusi ra asi tehajitoho na ovo, tevea mojovi.
33Mine na rani momalua, Paul motuhara vunuvunu tehani hara. “Na pohi havulatea, vana movate na havui,” moaso, “otomamahanu, otosahani hamiu.”
34“Suria atuhamiu otohani suna otohauhaua: saite vulumiu mojovi me ra remiu.”
35Hisa moaso palea, molavi na hanihani, moaso tahonai me Atua suria me na pahora vunuvunu: tau motopeia, movaere hania.
36Natuha na lolora vunuvunu tejovi, hire mono tehani hara.
37Hije vunuvunu to-havulalima raverua vana molimarave.
38Tau tehanihani tahajia, tevei na ure momararaha, teputuhe na oni me na tasi.
39Hisa na rani momalua, tesapinisi na ulu: maa tereni na papahana taiti moonioni, temeje tipae na ure ta mea, vai tepinisia.
40Tau tepahitusi ra jihitatani, tenuni ra asi hina vosi, teaurahai na hapani hina jihona ovo, telaho tataholo me na oni.
41Maa terarave me na rio ta pelu, tevei na ure morovo me na oni. Na jihona momaheli, tesapinisi na hilae, maa na erena movaere maala suria ra suhusuhu tehauhaua.
42Ra tajua tahajumu temeje losimete ra tajua tahahajiri, suria saite moolo, morovo pelahi,
43Maa na varese tahajumu momeje jolo Paul, mohorohorora: moaso, hire vunuvunu tepinisi na olo, tetapura-tivu majiha me na tasi, telavi na ulu.
44Ra valura me ra vusuhana hau, valura me ra tavijana ure. Palea momalua hire vunuvunu telavi na ulu, tejolo.
Currently Selected:
Ra Vei Hira Yarisula 27: TLM9109
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
This is a historic text maintained by the British and Foreign Bible Society.