Ra Vei Hira Yarisula 28
28
NA SOPENA 28.
1Hisa hire vunuvunu tejolo, tepinisi na hisena ureure, Malta.
2Ra tanoho tetahonai tohova meja: tesusuve na hapu, telavija me na vavana sanu, suria na usa, suria na hamariri.
3Paul movilevile hapu, movatihea, na matahatihati momalua, momahoja suria na hapu motunia, motalihea me na havena.
4Hisa ra tanoho tereni na matahatihati tomoama me na havena tevaravaraira “Na tajua naa inie na tahaveimete na tajua, mojolo me na tasi, maa na Tataholo mojuria morovo pelahi.”
5Maa Paul mojilejilea me na haou, mosahajia.
6Ra tanoho terenia vai mosihi, e mojovi momate vahatea: tau terenia paravu, terenia mosahaji, tetahaperehera lolora, teaso inie na sari.
7Taroroi neeno, na tano hina Varese hina ureure, na hisena Puplius. Molavija me na peana, na pohi tolu morauhaja.
8Imalua, na tamai Puplius morojo, mojaeluluvahi, mojijire jae: Paul moruhusahamai mea, momatapisi, motataa nie, movea momauri.
9Tau, valura mono, hire terojo me na ureure, tesumai, movera temauri.
10Terahu ta meja ra rahuvuso ra tari, terahu naa hanihani tavere hisa tohapani.
11Tau na hapatia motolu, telaho me na ure hi Aleksantria, itoho me na rani hina orua me na ureure, na matamata hina, Kastor me Polluks.
12Tetiahi me Sairakusi, totohoae na pohi tolu.
13Ture neeno, tohasia, tomalua me Rejium. Tau na pohi motea na hajua morovo, tomalua me Puteoli inovi maa.
14Topasuara uluo hi Iesu natuha, temejeija totoho valuira na pohi limaraverua. Tau tovano me Romu.
15Ra uluo hi Iesu natuha teroho surija, tesumai me na vonae hina volivoliahi hi Appius, me Na Pea Motolu: hisa Paul morenira, moaso tahonai me Atua, na lolona mojovi.
16Hisa temalua me Romu, na varese tahajumu morahu ra tajua tahahajiri me na varese hira tajua tahamata: maa tejuri Paul motohotoho hasena, na tajua tahajumu itea momata nie.
17Imalua, tau na pohi tolu, Paul moore ra varese Ju tepasuae: hisa temalua, moaso mera: —“Tajua me Tuahau, asaveioso mera tajua, e me na rio hira tamaja, maa tehajiriau me Jerusalem, telaviau me ra tajua Bomu.
18Hisa tetuhau, temeje juriau alaho suria asavei na sanu hina mate.
19Suria ra Ju teaso tisajuriau, asituha Siser; asameje aso ra tanoho meau teveioso.
20Suria aore amiu, sura reni amiu, sura aso me amiu: suri na Meje hi Israel, aauri naano.”
21Teaso mea, “Tosalayi na pepe me Jutia suriho, saite tajua mopise e moaso ra sanu oso suriho.
22Maa tomeje roho ra sanu oininima; suria teetietira vunuvunu ra uluo naa. 23Natuha teaso na rani motea temalua me na vonae itohoae, hire ra tari: mopisera, molalaa mera suri na vonae hi Atua, movei tapusira tepinisi susuhi suri Iesu, moaso me na Leo hauhaua hi Moses, me ra Provet, me na malaha me na pohi.
24Valura terohoroho ra sanu moaso, valura tesarohoroho.
25Hisa valura tetami, valura tesatami, tevaere laho, Paul, moaso na leo motea,” Motaharahu na aso hina Talume Tapu, na Provet Aisaias moaso me ra tamaja:
26“Oilaho me na tanoho naa, oiaso, Otoroho hira jalihamiu, otosapinisi; otoriova hira matamiu, otosapinisi:
27Suria na lolora tanoho naa teruiha, ra jalihara tepupura, ra matara tepisi: suria tesareni hira matara, tesaroho hira jalihara, tesapinisi hira lolora, tesatahaperehera sura Inau avera tetahonai.
28Suria, otopinisi, Na Jolo hi Atua mosulae mera lolopohitupu, terohoe pa.”
29Tau moaso palea, ra Ju telaho, teasoaso tahajia.
30Paul tomotoho na tauni morua me na peana, movolia, moejieji sura reni ra tajua temalua mea,
31Molalaa na vonae hi Atua, mooipisera sanu hina Moli Iesu Kristo, mosaine, saite mohorohoroe.
Currently Selected:
Ra Vei Hira Yarisula 28: TLM9109
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
This is a historic text maintained by the British and Foreign Bible Society.