Suro 3
3
Peturu hai Yohane mopakaoha hadua topalu
1Tinti talumi kalumba, Peturu hai Yohane laohe i Souna Pue Ala i tempona pekakaeanda to Yahudi. 2I babaka au rahanga Babaka Makara, ara hadua tobalilo au palu hangko i pesupaana. Alo-alona tauna iti raanti lao rapopohuda hungku i babaka iti i Souna Pue Ala bona merapi-rapi i tauna au mesua inditi. 3Kamoitana Peturu hai Yohane mesua, ia liliu merapi ahi irihira. 4Peturu hai Yohane mototoki topalu iti. Naulimi Peturu iria, “Peitangkai mai!” 5Natotoki mpuumohe manaa-naa, lawi naharunga ba ina molambi doi hangko irihira. 6Agaiana nauli Peturu, “Bara ara doi irikami. Agaiana apa au ara irikami, iti au kiweiko: i lalu hangana Yesu Kerisitu to Nasare, peangka hai lumaomoko!” 7Hangko inditi, Peturu mokingki taie koanana topalu iti bona meangka. Unga pea maroho bitina. 8Mesendemi meangka, hai molumao node hou node mai. Roo indo, mesuami i lalu Souna Pue Ala hihimbela hai Peturu hai Yohane, molumao hai melumpa-lumpa motoia Pue Ala. 9Bosa tauna moita topalu iti molumao hai motoia Pue Ala. 10Tingkara mpuuhe hai wuli lalunda moita au mewali iti, lawi raisa tauna iti iami topalu au merapi-rapi alo-alona i Babaka Makara i Souna Pue Ala.
Pololitana Peturu i lalu Souna Pue Ala
11Mewali, topalu au hangko rapakaoha iti meula liliu i Peturu hai Yohane. Kahawenda i tambale Souna Pue Ala au rahanga Tambale Salomo, bosa tauna mogaguhe, lawi tingkarahe. 12Kanaitanda Peturu tauna bosa iti, nauliangaahe, “Halalungku to Yahudi! Moapari hai nipotingkara apa au niita ide? Moapari hai nitotoki liliungkai? Ba niuliri, tauna ide molumao anti kuasangki, ba hangko i kamalelahana lalungki? Bara! 13Pue Ala au rapenombai toiorunta hangkoia, au rapenombai Burahima, Isaki hai Yako, Pue Ala itimi au mopakahile TuduaNa, iami Yesu. Halalu-halalu, Yesu iti au nihuhu i topoparenta, hai au nisapuakami i lindona Pilatu i tempona ina nakabaha. 14Malelaha hai manoto laluNa, agaiana nisapuakari, hai niperapi i Pilatu bona nakabahaakau hadua topepapate. 15Yesu iti au moweike katuwo maroa, nipapatemi. Agaiana Napatuwo hule Pue Ala. Ikami ide sabiNa au moita katuwona hule Yesu. 16Kuasa hangko i Yesu, iti au mopakaroho biti topalu ide. Mewali, anti pepoinalaingki i Yesu pane kibuku mopakaoha tauna ide nodo au niita hai nisabiki.
17Halalu-halalu, ikamu hai tadulakonta au mopapatemokau Yesu. Agaiana kuisa, apa au nibabehi iti, nibabehi anti kadana niisa lempona. 18Agaiana nauri nodo, hangko i apa au nibabehi iti, tepabukeimi apa au nauli Pue Ala hangkoia au rapahawe ope-ope nabi au manguli: Datu Topehompo hangangaa molambi kapari. 19-20Halalu-halalu, ido hai hangangaa menosokau hangko i dosami hai mengkorukau i Pue Ala bona Naampungi dosami. Hangko indo, Pue Ala ina mopakaroho lalumi, hai motudu Yesu mai irikamu. Lawi Iami au napakanoto Pue Ala mewali Datu Topehorema. 21Ide-ide, Yesu maida i suruga, hai batena ara liliu indora duuna hawe tempona Pue Ala mopawou hinangkana, nodo au rapahawe nabiNa au malelaha hangkoia.
22Halalu-halalu, ara lolitana nabi Musa hangkoia kana i Pue Yesu au manguli node:
‘Pue Ala ina moangka hadua hangko i halalumi
bona mewali nabi nodo iko.
Hangangaa nipeulai apa au nauliangaakau Nabi iti.
23Hema au bara mampeulai apa au nauli Nabi iti,
ina ragaaki hangko i taunana Pue Ala,
hai batena rapatuna.’#PM 18:15,18,19; AMp. 23:29
24Nabi-nabi au mopahawe lolitana Pue Ala, mepongka hangko i nabi Semueli hai nabi-nabi ntanina au mehuhu i Semueli, ope-opehe mopahawe apa au mewali i tempo ide. 25Ikamumi halalu au molambi apa au nadandi Pue Ala hangkoia au rapahawe nabi-nabi iti. Ikamumi au molambi pewati hangko i dandina Pue Ala i toiorunta hangkoia. Lawi hangkoia Pue Ala mongkora i Burahima node:
‘Hangko i pemuleamu,
ope-ope tauna i wongko dunia ina molambihe pewati.’#Pew. 22:18
Irikamumi halalu tunggaiana dandi iti! 26Ido hai Pue Ala mopatuwo hule Yesu AnaNa. Nguru-nguruna Yesu Natudu mai irikita to Yahudi bona Nawatike hai Naninike mampenosoi hinangkana babehianta au kadake.”
Currently Selected:
Suro 3: NPY
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo