Suro 2
2
Pendauluna Inao Malelaha
1Kahawena alo mahilenda to Yahudi au rahanga Alo Pentakosta,#2:1 Pentakosta: Basa i Kamus. ope-ope tauna au mepoinalai i Yesu moguluhe i hambua paidaa. 2Unga peahe mohadi pomoni hangko i langi, nodo pewui himburu au kebuu. Pomoni iti rahadimi i humalele sou poteruhuanda. 3Hai moitamohe rore api au nodo dila, mangulele hai mengkatoa irihira hadua-hadua. 4Roo indo, ope-ope tauna iti nakuasaimohe Inao Malelaha, hai mepongkamohe mololita i lalu ngkaia pakana basa au bara mani raisa, moula apa au napakanotoahe Inao Malelaha.
5Tempo iti, bosahe to Yahudi hangko i humalele dunia au maida i Yerusale. Ope-ope tauna iti mengkoruhe i Pue Ala. 6Karahadina tauna bosa pomoni au nodo himburu inona, teruhumohe hai wulihe, lawi mohadihe surona Pue Yesu mololita i lalu basanda hadua-hadua. 7Tingkara mpuuhe, hai mololitahe, rauli, “Apari au mewali inde? Bara pae topololita iti to Galilea hahahe? 8Noumba hai tahadirihe mololita i lalu basanta? 9Lawi arake hangko i tampo Partia, Media, Elam, hangko i Mesopotamia, Yudea hai Kapadokia. Arake au hangko i Pontus hai Asia, 10hangko i Frigia hai Pampilia, hangko i Masiri hai hangko i tampo Libia au hungku i wanua Kirene. Arake au hangko i wanua Roma. Hantangake to Yahudi, hai ara worihe tauna ntanina au mesua agama Yahudi. 11Arake au mai hangko i tampo Kreta hai tampo Arabia. Ikita ope-ope mohadihe mololita i lalu basanta haduduanta au mampololita tanda kuasa au nababehi Pue Ala.” 12Tingkara hai wulimohe ope-ope, pane mombepekunehe hadua hai hadua, rauli, “Apari wei lempona ide?”
13Agaiana ara worihe tauna au mampopowoo-woo, rauli, “Nalanguihe anggoro!”
Tuntuna Peturu i tauna bosa
14Hangko inditi, Peturu meangkami hihimbela hai rangana au hampulo hai hadua, mololita masisimbuku, nauli, “Halalu-halalu to Yahudi, hai ikamu au maida i Yerusale! Nipehadingi maroa, lawi apa au mewali ide, ina kupakanotoakau. 15Barangkai malangu nodo au niuli. Ide-ide bara mani tempo paenu-enu lawi hangko tinti hahio madondo. 16Agaiana apa au mewali ide iami pobagona Inao Malelaha irikami moula apa au napahawe nabi Yoel hangkoia, node:
17Nauli Pue Ala:
‘I alo-alo kahopoa dunia,
Ope-ope tauna ina Kukiraiahe inaoNgku.
Anami tobalilo hai anami towawine ina mohowara lolitaNgku.
Anantomoanemi ina moita apa au Kupopaitaahe.
Tosaemi ina Kuweihe pangipi.
18Hawe-hawe i hawiNgku tobalilo ba towawine,
ina Kukiraiahe InaoNgku i alo iti,
hai ihira ina mohowara lolitaNgku.
19Ina kupopaitaakau au metingkarai i langi
hai tanda kuasa i dunia,
nodo wahe hai api hai rambu au moramuku.
20Hangko damani hawe alo pebotusina Pue,
alo ina mewali makaindi,
hai wula ina mewali malei nodo wahe.
21I tempo iti, hema-hema au meraroa i Pue
batena tehoremahe hangko i huku dosanda.’ ”#Yl. 2:28-32
22Hai napaliliu mbuli Peturu lolitana, nauli, “Halalungku to Yahudi! Nipehadingi apa au kuuliangaakau ide. Au kutunggai iami Yesu to Nasare. Ia pea au napilei hai napakanoto Pue Ala mewali TopobagoNa au Malelaha. Iti niisa lawi anti kuasana Pue Ala, Pue Yesu mobabehi ngkaia tanda kuasa hai tanda au metingkarai i olomi. 23Hintoto hai tunggaia hai peundeana Pue Ala lawi naisa amimi, rahuhumi Yesu irikamu#2:23 irikamu: Au ratunggai inde iamohe to Yahudi. bona nipapate. Hai nihuhuahe i tauna au kadake#2:23 tauna au kadake: Au ratunggai inde iamohe to Roma. rapapate i kau mombehape. 24Ikamu mopapate Yesu, agaiana Pue Ala mopatuwo hule. Pue Ala mokabaha wataNa hangko i kuasa kapate, lawi Ia hangangaa tuwo hule. 25Lawi arami lolitana Datu Daudi hangkoia kana i Yesu au manguli:
‘Kukatuinao liliu Pue;
Lawi Napohiolaa peamona,
idomi hai maroho liliu lalungku.
26Idomi hai matana lalungku, tanoanangku motoia Pue Ala
hai watangku molambi paidaa au lene.
27Lawi Oio Pue, bara Nupogiangaa watangku
maida i lalu dunia tomate.
TaunaMu au malelaha
bara Nupogiangaa moita kapate.
28Nutudungiana rara au monontohi katuwo
Nuweina katana au mahile i lindoMu.’#Pta. 16:8-11”
29Hangko inditi, napaliliumi Peturu lolitana, nauli, “Halalu-halalu, kuuliangaakau i katou-touana, bara watana haduduana au natunggai Daudi i lolitana iti. Lawi umanta Daudi, matemi hai ratawu. Talumbana taisa mani hawe ide-ide. 30-31Daudi iti, hadua nabi au moisa ami apa au ina nababehi Pue Ala. Naisa kaarana podandina hai posumpana Pue Ala iria au manguli: hadua hangko i pemuleamu ina Kuangka Kupopohuda mewali datu. Mewali, ido hai Daudi mampopaisa ami katuwona hule Datu Topehompo, nauli:
‘Ia bara rapogiangaa i paidaa tomate,
hai wataNa bara rapogiangaa i lalu talumba duuna magoro.’
32Yesumi au natunggai Daudi i lolitana iti. Lawi Iami au napatuwo hule Pue Ala. Ikami ide mewali sabiNa, lawi kiita mata katuwoNa hule. 33Pue Ala mampopohudami Yesu i pohudaa au tebila hai teadai ntanda i koanaNa. Hai hangko indo, Pue Ala Umanta mowei i Yesu Inao Malelaha nodo au Nadandi. Mewali au niita hai au nihadimi inona, mewali anti kuasana Inao Malelaha au naweingkai Yesu.
34Mewali, halalu, bara mpuu watana haduduana au natunggai Daudi hai lolitana. Lawi bara woia Daudi au tuwo hule hai mengkaore lao i suruga. Agaiana nauli Daudi:
Pue mongkora i Ampuku, Nauli,
‘MohudamoKo ntanda i koanaNgku,
35duuna Kupopengkoruhe ope-ope iwaliMu Irio.’ ”#Pta. 110:1
36Hangko inditi, napahopomi Peturu lolitana, nauli, “Mewali, ido hai ikamu to Yahudi, hangangaa nipakanoto i lalumi apa au kuuli ide: Yesu au nipaku i kau mombehape, Iami au napilei Pue Ala mewali Amputa hai Datu Topehompo.”
37Karahadina tauna bosa lolitana Peturu iti, tebalikimi lalunda, hai mekunehe i Peturu hai i surona Pue Yesu au ntanina, rauli, “Halalu-halalu, ane nodo, apami au hangangaa kibabehi?”
38Nahanai Peturu, “Hangangaa menosokau hadua-hadua hangko i dosami, hai hangangaa rariukau i lalu hangana Yesu Kerisitu. Ane nodo, Pue Ala ina moampungi dosami, hai Naweikau Inao Malelaha. 39Lawi dandina Pue Ala ide raweike hai rawei worihe pemuleanta duuna hawe i tauna ntanina au karao.#2:39 Au ratunggai tauna karao inde iami tauna au karao paidaanda hai au bara manihe moisa Pue. Peita wori: Ep. 2:13. Dandina Pue Ala ide, batena mewali kiranda ope-ope tauna au nakakio Amputa Pue Ala mewali taunaNa.”
40Bara iti pea au nauli Peturu, agaiana ngkaia mani au napololita. Ia mopaturohe tauna bosa hai napopaingaahe, nauli, “Menosomokau! Ineekau mampeulai tauna au kadakehe ide bona datikau molambi pehukuna Pue Ala au ina morumpahe!” 41Bosa tauna au mampoinalai lolitana Peturu, pane laomohe rariu. I alo iti, kabosana tauna au mepoinalai i Yesu, tetambaimi ba aramohe pae talu sabuna. 42Roo indo, bosa tauna au hangko mepoinalai i Yesu mampehadingi paturonda surona Pue Yesu, hai teruhu liliuhe. Maande sambelahe, mokira-kirahe roti anti pokatuinaonda Pue Yesu, hai mekakaehe.
Pohintuwunda topepoinalai i Yesu
43Surona Pue Yesu mobabehihe ngkaia tanda kuasa hai tanda au metingkarai. Ido hai tingkara mpuuhe tauna bosa. 44Hintuwumohe ope-ope au mepoinalai i Yesu. Anu-anunda rapoparewa sambela. 45Arahe i olonda au mampobaluhe anu-anunda, hai holona rakira-kira i hangka ranganda au barahe nakaarai. 46Alo-alona teruhuhe i Souna Pue Ala. Mokira-kirahe roti anti pokatuinaonda Pue Yesu, hai maande sambelahe i sounda i lalu katana-tana moula kabulana lalunda. 47Motoia liliuhe Pue Ala, hai rapokatanahe ope-ope tauna. Alo-alona katetetambaiahe, lawi Pue motambaiahe tauna au molambi katuwo maroa.
Currently Selected:
Suro 2: NPY
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo