Suro 4
4
Peturu hai Yohane i lindona tadulako agama
1Tanganda mani Peturu hai Yohane mepaturo i Souna Pue Ala, maimohe rapohidupaa bahangkia tadulako mpenomba hai toSaduki hai tadulakonda topokampai Souna Pue Ala. 2Rumpu mpuuhe i Peturu hai Yohane, lawi mobambariahe tauna bosa katuwona hule Yesu hangko i kapate. Hai paturonda iti, mopakanoto wori katuwonda hule tomate. 3Ido hai suro au rodua iti rahakahe hai rapopesua i lalu tarunggu. Ratahahe indo hawe madondo lawi ina kaindimi. 4Agaiana tauna au mampehadingi paturonda Peturu hai Yohane i Souna Pue Ala, bosamohe au mepoinalai i Yesu, alana tetambai kabosanda tauna au mepoinalai duuna handahe lima sabuna tobalilo.
5Kahalona, tadulako agama, tadulakonda to Yahudi hai guru-guru agama teruhumohe mogombo i Yerusale. 6Ara worihe i pogombo iti Tadulako Mpenomba Mahile Hanas, Kayapas, Yohane, Aleksander hai halaluna Tadulako Mpenomba Mahile. 7Teruhu hahamohe, motudumohe tauna lao moala Peturu hai Yohane raanti i lindonda. Kahawenda, mekunemohe tadulako iti i Peturu hai Yohane, rauli, “Noumba pane nibuku mopakaoha topalu iti? Hangko iumba mai rohomi, hai hema au moweikau kuasa mobabehi iti?”
8I tempo iti, Peturu nakuasai Inao Malelaha, hai mololitami, nauli, “Uma-uma, tadulakonda tauna bosa hai tadulako agama! 9Anti popakaohangki tauna au palu, ido hai niparesangkai i alo ide, hai nipeinao wori niisa noumba pepakaohangki. 10Mewali bona niisa, hai bona raisa wori ope-ope halalunta to Yahudi, tauna ide maoha hai nabuku meangka inde anti kuasana Yesu Kerisitu to Nasare. Yesu iti nipaku i kau mombehape, agaiana Pue Ala mopatuwo hule. 11Iami au natunggai lolitana Sura Malelaha au manguli node:
‘Watu au nitende ikamu topoaro sou,
watu iti au mewali pohudaa sou.’ ”#Pta. 118:22
12Hangko inditi, nauli mbulimi Peturu, “Bara ara rara ntani molambi katuwo maroa hangko i Pue Ala, batena pea Yesu. Lawi i humalele dunia ide, bara ara tauna ntanina, batena pea Yesu au natudu mai Pue Ala i manusia, hai Ia pea au Nabuku mohoremake hangko i huku dosanta.”
13Tingkara mpuumohe tadulako iti moita kapebainda Peturu hai Yohane mololita. Apa mani Peturu hai Yohane, tauna biasa peahe au barahe mosikola. Raisa wori ihirami au hihimbela hai Yesu. 14Agaiana tadulako iti, barahe bai mehana, lawi topalu au rapakaoha iti, ara wori inditi meangka i holanda Peturu hai Yohane. 15Ido hai motudu pearaihe rodua surona Pue Yesu iti padu hangko i peparesaanda, hai mogombo hulehe, 16rauli, “Apa au ina tababehi i tauna au rodua iti? Lawi ope-ope tauna i Yerusale moisa kaihirana au mobabehi tanda kuasa au mahile iti. Bara wori peisa tasapuaka. 17Agaiana bona dati rahadi humalele tauna, agina tapopalangahe hai takontohe bona ineehe mololita i hema pea kana i Yesu.”
18Mewali, roo indo, mokakio hulehe Peturu hai Yohane, rauli, “Ineemokau mepaturo ba mokabelai hangana Yesu.”
19Mehana Peturu hai Yohane, rauli, “Nipekiri umba au naunde Pue Ala: mampeulaingkai hawami ba mampeulaingkai hawana Pue Ala! 20Lawi barapi peisa kipengkaroongaa mampololita apa au kiita hai au kihadimi.” 21Hangko indo, rumihimi karumpunda tadulako iti, pane mampopalangahe Peturu hai Yohane. Kahopoana rakabahamohe. Bara ara rara mohukuhe lawi ope-ope tauna motoia Pue Ala anti tanda kuasa au rababehi iti. 22Topalu au rapakaohami iti, tinuwuna labimi iba pulona parena.
Topepoinalai i Yesu merapi roho hangko i Pue Ala
23Karakabahanda Peturu hai Yohane, laomohe mampohidupaa ranganda, hai rapololita apa au rauliangaahe kapala-kapala tadulako mpenomba hai totosaenda to Yahudi. 24Karahadina ranganda lolitanda iti, mekakae sambelamohe i Pue Ala, rauli, “Pue, Oiomi au mampopewali langi hai tampo, tahi hai hinangka ihina. 25Oio au mongkora i Datu Daudi, toiorungki hangkoia, lawi iami hawiMu. Hai tangana Daudi nakuasai Inao Malelaha, ia mololita nauli,
‘Moapari pane ope-ope ngamba mohiho-hihohe,
hai tina-tina mampepekiri tunggaia au mbero-mbero?
26Ope-ope datu hai tadulako i dunia
mopahintuwuhe pekirinda
moewa Pue hai Datu au napilei Pue.’#Pta. 2:1-2
27O Pue, tepabukei mpuumi lolitana Daudi iti. Lawi tou-tou mpuu mewalimi i lalu wanua ide, Datu Herode hai Pontiu Pilatu hintuwuhe hihimbela hai to Yahudi hai tauna au barahe to Yahudi. I lalu kahintuwunda iti, mampeinaohe moewa Yesu, AnaMu au Malelaha au Nupileimi mewali Datu Topehompo. 28Rabotusimi bona mopapatehe Yesu. Agaiana au rababehi iti mopabukei apa au Nupakanoto amimi alana ope-ope mewali moula kuasaMu hai peundeaMu.
29Pue, ide-ide Nuhadimi lolitanda tauna au mampopalangangkai! Ido hai kiperapi Irio bona ikami hawiMungkai ide, Nuweingkai roho lalu datingkai langa mopahawe NgkoraMu. 30Nupopaitaahe kuasaMu Pue. Nuweingkai kuasa hangko i Yesu, tuduaMu au Malelaha bona kibuku mopakaoha tauna au mahai hai mobabehi tanda au metingkarai.”
31Karoonda mekakae, modua-duami sou au rapaidai, hai nakuasaimohe Inao Malelaha. Ido hai bai mpuumohe mopahawe Ngkorana Pue Ala i tauna bosa.
Topepoinalai i Yesu mohintuwu
32Ope-ope tauna au mepoinalai i Yesu, mohintuwu hai hampepekirihe. Bara ara hadua au manguli, “Ide, iko ampuna,” agaiana ope-ope au ara irihira rapoanu sambela. 33I tempo iti surona Pue Yesu molambihe kuasa au mahile bona mopahawehe katuwona hule Pue Yesu. Hai molambihe ope-ope pewati au mahile ntepuu hangko i Pue Ala. 34Bara mpuu huba hadua i olonda au ara kamakurana. Lawi hema pea au ara tampona ba souna hai napobalu, 35holona naanti lao rahuhu i surona Pue Yesu bona rakira-kiraahe tauna au bilala.
36-37Nodo wori au nababehi Yusupu. I pampobaluna tampona, holona nahuhuahe surona Pue Yesu. Yusupu iti iami hadua pemuleana Lewi au maida i lewuto Siprus. Suronahe Pue Yesu mohanga wori Yusupu iti, Baranaba, lempona topepalindo.
Currently Selected:
Suro 4: NPY
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo