Romanos 2
2
Tayta Dios juzgananpaq nishqan
1Israel runa, qampis jusayuq kaykar ¿imanirtaq runa mayikita juzgaykanki? Sayno juzgayaptikiqa pï kaptikipis Tayta Dios juzgashushpayki castigashunkimi.#Mat. 7.1; Luc. 6.37.
2Musyansimi pitapis jusalikuq kaqtaqa jusalikushqanman tupu Tayta Dios castigananpaq kashqanta. 3Sayno kaykaptinqa ¿Tayta Diospa castïgunpita qeshpiyankisuraq? 4Tayta Dios jukla mana castigayäshuptiki ama yarpäyaysu mana castigayäshunaykipaq kashqanta. Pay kuyapäkuq, pacienciakuq y perdonakuq karmi jusaykikunata wanakuyänaykita shuyaraykan. 5Sayno kaptinpis rumi shonqu karmi jusaykikunata kachariyankisu. Saymi juzganan junaqcho Tayta Dios fiyupa rabyar castigayäshunki.
6Say junaqqa imanöpis kawayashqanman tupumi lapan runakunata juzganqa.#Prov. 24.12; Jer. 17.10; Eze. 18.30; 33.20; Mat. 16.27. 7Tayta Diospa nawpancho kawayta munar alilata ruraqkunataqa imayyaqpis kawayänanpaqmi gloriaman pushanqa. 8Tayta Diosta mana cäsukur jusalikuqkunatami isanqa rabyashpan mana kuyapaypa castiganqa.
9Fiyupa castigaptinmi lapanpis jusalikuqkuna nakar lakikuyanqa. Puntata Israel runakunami nakayanqa y saypitanami mana Israel runakunapis. 10Alilata ruraqkunami isanqa Diospa nawpancho ali kawayta chaskiyanqa. Puntata Israel runakunami chaskiyanqa y saypitanami mana Israel runakunapis.
11Runakunata Tayta Dios sayno juzganqa pitapis mana jananpaylapami.#Deut. 10.17. 12Saymi leyninkunata musyaqkunatapis y mana musyaqkunatapis jusalikuyashqanpita Tayta Dios ushakäsinqa. Leyninkunata musyaqkunataqa say leykuna nishqanmanmi juzganqa. 13Manami leyninkunata musyayashlanpitasu Tayta Dios pitapis salvanqa, sinöqa leyninkunata cäsukuyashqanpitami.
14Mana Israel runakuna Diospa leyninkunata mana musyarpis alita rurarqa say leykunata musyaqnömi kaykäyan. 15Jusalikur lakikuyaptin y alita rurar kushikuyaptinmi musyansi runakunapa shonqunkunacho Diospa leyninkuna qelqaraykashqanta. 16Saymi pakaylapa jusalikuyashqanpitapis juzganan junaqcho Tayta Dios pïmaytapis juzganqa. Sayno juzgananpaqmi Jesucristuta Tayta Dios churash. Sayno kananpaq kaqtami ali wilakuyta wilakur pitapis tantiyasï.
Diospa leyninkunata Israel runakuna mana cäsukuyashqan
17Israel runakuna, tantiyakuyay. Qamkuna yarpäyanki Diospa leyninkunata yachayashqaykipita mana juzgayäshunaykipaq kashqantami. Saynöpis kushikuyanki Tayta Dios akrayäshushqaykipitami. 18Tayta Diospa leyninkunata yacharmi pay munashqanno kawayänaykipaqpis musyayanki. Saymi ali kashqanta y mana ali kashqantapis tantiyayanki. 19Qaprano kaqkunata pusharaqno y sakaychöno kawaqkunata aksipaqno kayashqaykitami yarpäyanki. 20Mana yachaqkunata y wamrakunata ali yachasiq kayashqaykitami yarpäyanki. Sayno yarpäyanki Diospa leyninkunata yachakush karmi.
21Wakin runakunata sayno yachaykäsirqa ¿imanirtaq kikikikuna cäsukuyankisu? Mana suwakuyänanpaq yachaykäsirqa ¿imanirtaq kikikikuna suwakuyanki? 22Majanta mana jarukuyänanpaq yachaykäsirqa ¿imanirtaq kikikikuna majaykikunata jarukuyanki? Ïdulukunata rikaytapis mana munaykarqa ¿imanirtaq ïdulukunapa adornunkunata suwakuyanki? 23Diospa leyninkunata yachashqaykipita alabakuykarqa ¿imanirtaq say leykunata mana cumplir Tayta Diosta manakaqman churaykäyanki? 24Sayno kawayaptiki rasuntachir Tayta Diospa palabrancho kayno qelqaraykan: <<Qamkuna lutanta rurar kawayaptikimi mana criyiq runakuna Tayta Diosta manakaqman churayan>>.#Isa. 52.5; Eze. 36.22.
Señalakuypita yachasishqan
25Tayta Diospa leyninkunata cumpliyaptikiqa señalakuyashqaykipis alimi kaykan. Leyninkunata mana cumpliyaptikimi isanqa señalakuyashqaykipis manakaqlapaq kaykan. 26Mana señalakushkunapis Diospa leyninkunata cumpliyaptinqa ¿manasuraq señalakushtano Tayta Dios chaskinqa? 27Saymi mana señalakush karpis Diospa leyninkunata cumpliqkuna juiciu finalcho niyäshunki: <<Señalakush kaykar y Diospa leyninkunata shumaq yachaykarqa ¿imanirtaq Tayta Diosta cäsukuyarqaykisu?>>
28Manami maman o taytan Israel runa kashlanpitasu pipis rasunpaypa Israel runa kaykan. Saynöpis manami señalakush kashlanpitasu pipis rasunpaypa señalakush kaykan. 29Saypa trukanqa rasunpaypa señalakush kaykan shonqunta Espíritu Santu señalaptinmi.#2.29 Cuerpunta señalar chiwlakunanpa puntan qaranta kusurir jorquqnömi shonqunkunata señalar jusalikuyta kachariyänanpaq tantiyasin.#Deut. 10.16; 30.6; Jer. 4.4. Runakuna chikiyaptinpis paykunataqa Tayta Dios kuyanmi.
© 2003, Wycliffe Bible Translators, Inc. All rights reserved.
