Romanos 3
3
1Sayno kaptinqa Israel runa kashqanpis y señalash kashqanpis ¿alisuraq kaykan? 2Aw, alimi kaykan. Sayno ali kaykan Israel runakunata Tayta Dios wilakuyninta puntata musyasish kaptinmi.#Sal. 147.19.
3Musyaykarpis manami lapansu Tayta Dios nishqanta cumpliyarqan. ¿Paykuna mana cumpliyaptinsuraq Tayta Diospis promitishqankunata cumplinqasu? 4Ama sayno yarpäshunsu. Runakuna lula kayaptinpis Tayta Diosqa lapan promitishqankunata cumplinmi. Tayta Diospa palabranchöpis kaynömi qelqaraykan: <<Nishqaykita cumplirmi conviëniqcho juzgaykämanki. Juzgamaptiki imano sapakuytapis manami kamäpaküsu>>.#3.4 Kay textucho nikan juzgarpis promitishqankunata Tayta Dios cumplishqantami.#Sal. 51.4.
5Sayno kaptinpis wakin runakunaqa mana tantiyarmi niyan: <<Jusalikushqäpita Tayta Dios perdonamar alitami ruraykan. Castigamarmi isanqa mana alita ruraykan>>.
6Runakuna sayno niyaptinpis manami saynösu kaykan. Runakunata juzgananpaq kashqanta musyaykarqa ¿imanirtaq tantiyayankisu castigarpis alita rurashqanta?
7Saynölami wakin runakunapis lutanta yarpar niyan: <<Tayta Diosta promitishqäta mana cumpliptïpis perdonamaptinmi runakuna tantiyayan kuyapäkuq kashqanta. Sayno kaykaptinqa ¿imanirtaq jusalikushqäpita Tayta Dios juzgamanqa?>>
8Say runakuna yarpäyashqanno rasunpaypa kaptinqa jusalikushun Tayta Dios kuyapäkuq kashqanta tantiyayänanpaq. Sayno yarparqa upa yarpaytami yarpäyan. Sayno yachasir purishqäta wakin runakuna niyaptinpis manami saynösu yachaykäsï. Sayno niq runakunataqa Tayta Dios juzgar mana kuyapaypami castiganqa.
Lapan runakuna jusayuq kayashqan
9¿Wakin runakunapita mas jusaynaqsuraq Israel runakuna kaykäyan? Manami. Kay cartacho nishqänöpis Israel runapis mana Israel runapis jusayuqmi kaykäyan. 10Tayta Diospa palabranchöpis kaynömi qelqaraykan:
<<Manami juklaylapis jusaynaqqa kansu.
11Pipis manami tantiyakunsu.
Pipis manami Tayta Diosta ashinsu.
12Lapanmi jusalikuyan.
Lapanpis lutantami ruraykäyan.
Pipis manami kansu alita ruraqqa.
Ni juklaylapis manami kansu.#Sal. 14.1-3; 53.1-3.
13Shiminkunapis kicharaykaq sepultüranömi kaykan.#Sal. 5.9.
Lulakuypaqqa mamalan wachashqami kaykäyan.#Sal. 140.3.
Parlayashqanpis culebrapa venënunnömi kaykan.
14Runa mayintapis maldicionarmi ashliyan.#Sal. 10.7.
15Runa mayinta wanusiyänanpaqpis shiwyaraylami aywayan.
16Maypa aywarpis lutankunata rurarmi runa mayinkunata lakikasiyan.
17Ali kaway imano kashqantapis manami musyayansu.#Isa. 59.7-8.
18Tayta Diosta mansapakuyänanpaq manami ichiklatapis yarpäyansu>>.#Sal. 36.1.
19Tayta Diospa palabrancho sayno niptinmi musyansi leyninkunata musyaq runakunapis jusayuq kayashqanta. Saymi runakunata Tayta Dios juzgaptin pipis sapakuyta kamäpakunqasu. 20Tayta Diospa leyninkunata cumplishqanwanqa manami pipis jusankunapita perdonashsu kanqa. Tayta Diospa leyninkunaqa manami salvamänansipaqsu kaykan, saypa trukanqa jusayuq kashqansita tantiyasimänansipaqmi.#Gál. 2.16.
Jesucristuman yärakush Tayta Dios salvamashqansi
21Kananmi isanqa Tayta Dios musyasimashkansi leyninkunata cumpliyta mana kamäpakushqapis imanöpa salvamänansipaq kashqanta. Saytami Moisés y profëtakuna qelqayashqankunachöpis musyasimansi. 22Jesucristuman yärakushqami Tayta Dios perdonamashpansi pï kaptinsipis salvamansi.#Gál. 2.16.
23Lapan runakuna jusayuq karmi Tayta Diospa nawpanman chayta kamäpakuyansu. 24Sayno kaykashqapis Jesucristo rantimashqami Tayta Dios kuyapäkuq kashpan perdonamansi. 25Sayno perdonamansi Jesucristuman yärakuptinsimi. Paymi noqansi rayku sacrificiu kar yawarninta jicharqan. Saynöpami Tayta Dios musyasimansi ali juzgaq juez kashqanta#3.25 Ali juzgaq juez karqa jusayuq runata karpis o paypa trukanta karpis castiganmi. Saymi jusalikushqansipita Jesucristuta trukansi castigarqa ali juzgaq juez Tayta Dios kaykan. Mana ali juzgaq juez karqa runatapis ni trukantapis manami castiganmansu.. Unaypitana runakuna jusayuq kayaptinpis Tayta Dios manami castigarqansu. 26Sayno castigarqansu runakunapa trukan Jesucristuta cruzcho castigananpaq karmi. Saynöpami tantiyasimansi ali juzgaq juez kashqanta y Jesucristuman yärakuqkunata perdonashqanta.
27Sayno kaykaptinqa ama alabakur nishunsu: <<Alikunata ruraptïmi Tayta Dios salvamash>>.
Manami alikunata rurashqansipitasu Tayta Dios salvamashkansi, saypa trukanqa Jesucristuman yärakushqansipitami. 28Saymi nï: Manami leyninkunata cumplishqansipitasu Tayta Dios salvamashkansi, saypa trukanqa Jesucristuman yärakushqansipitami.
29¿Tayta Diosqa Israel runakunalapasuraq Diosnin? ¿Manasuraq mana Israel runakunapapis Diosnin? Payqa mana Israel runapapis Diosninmi. 30Tayta Diosqa juklaylami.#Deut. 6.4. Saymi Israel runatapis mana Israel runatapis Jesucristuman yärakuyaptin salvaykan.
31Jesucristuman yärakuylapa salvacionta tarirqa ¿manakaqmansuraq Diospa leyninkunata churaykansi? Manami manakaqmansu churaykansi, saypa trukanqa Jesucristuman yärakushqami say leykunata cumpliqtano Tayta Dios chaskimansi.
© 2003, Wycliffe Bible Translators, Inc. All rights reserved.
