ማቶሳ 19

ዬሱሲ ጌሉዋባኔ ኣካባ ታማሪሴዳ

(ማር 10፡1-12)

1ዬሱሲ ሄ ሃሳያ ዉርሶዋፔ ጉዪያን፥ ጋሊላፔ ዴንዲዴ፥ ዮርዳኖሳ ሻፋፔ ሄፊንን ዴዒያ ዪሁዳ ጋዲያ ቤዳ። 2ዳሮ ኣሳይ ኣ ካሊዴ ቤዳዋ ሄዋን ፓዳ።

3ኢቲ ኢቲ ፓሪሳዋቱ ፓጫናው ዬሱሳኮ ዪዴ፥ «ኢቲ ኣሳይ ኣይ ጋሱዋኒኔ፥ ባሬ ማቻቶ ዬዳናው ኑ ሂጊ ኣዛዚ?» ያጊዴ ኣ ኦቼዲኖ።

4ዬሱሲ ዛሪዴ፥ ሃዋዳን ያጌዳ፤ «ፆሳይ ኮይሮ ኡንቱንታ ሜዴ፥ ኣቱማዋኔ ማጫዉኖ ኦዳ። #ዶም 1፡27፤ 5፡2 5ሄዋ ዲራው፥ ‹ኢቲ ኣሳይ ባሬ ኣባኔ ባሬ ዳዮ ኣጊዴ፥ ባሬ ማቻቲና ኢቲፔ ዴዔ፤ ኡንቱንቱ ላዑ ኢቲ ኣሳ ጊዲኖ› ያጊያ ቃላ ናባቢቤይኪቴ? #ዶም 2፡24 6ሄዋ ዲራው፥ ኡንቱንቱ ኢቲ ኣሳ ጊዲያዋፔ ኣቲን፥ ላዑ ኣሳ ጊዲኪኖ፤ ሄዋ ዲራው፥ ፆሳይ ኢቲፔ ዴዓናዳን ጋዋ ኣሳይ ሻኮፖ» ያጌዳ።

7ፓሪሳዋቱ ዬሱሳ፥ «ያቲና፥ ሙሴ ኣያው ኢቲ ኡራይ ባሬ ማቻቶ ፒሪማ ፔዴ ዬዳና ማላ ኣዛዜዴ?» ያጌዲኖ።

8ዬሱሲ ዛሪዴ፥ «ሂንቴንቱ ሂንቴንቱ ማቻቱዋ ዬዳና ማላ፥ ሙሴ ሂንቴንታ ኣዛዜዳዌ፥ ሂንቴንቱ ኦዲና ሲሴና ጉዙማ ጊዶ ዲራፔ ኣቲን፥ ኮይሮ ሄዋ ማላ ጊዴና። 9ታኒ ሂንቴንቶ ኦዳይ፤ ባሬ ማቻቶ ዎሹሜናን ዴዒሺን ዬዲዴ፥ ሃራሮ ኣኪያ ኦኒኔ ዎሹሜ፤ ሃራይ ዬዴዳዉኖ ኣኪያዌካ ዎሹሜ» ያጌዳ።

10ዬሱሳ ካሊያዋንቱ ኣ፥ «ኣሲና ጊዱዋኒኔ ማቻቲ ጊዱዋን ዴዒያ ዎጋይ ሄዋ ማላ ጊዶፔ፥ ኣኬናኒኔ ጌሌናን ዴዒያዌ ሎዓ» ያጌዲኖ።

11ሺን ዬሱሲ ኡንቱንታ ያጌዳ፤ «ሄዋ ማላ ቲሚርቲ ፆሳይ ኢሞዋንቱሳፔ ኣቲን፥ ኣሳ ኡባሳ ጊዴና፤ 12ኣያው ጎፔ፥ ባሬንቱ ዳዪ ኡሉዋፔ ዬሌቲያ ዎዴካ፥ ሹፋ ጊዴዳዋንቱ ዴዒኖ፤ ቃሲ ኣሳይ ቃራቲና ሙሬሳ ጊዴዳዋንቱ ዴዒኖ፤ ቃሲ ሳሉዋ ካዉቴ ዲራው፥ ባሬንታ ሹፋ ኡዴዳዋንቱ ዴዒኖ፤ ሃ ቲሚርቲያ ኣካናው ዳንዳዪያዌ ኦኒኔ ኣኮ» ያጌዳ።

ዬሱሲ ቄሪ ናና ቦላ ባሬ ኩሺያ ዎዳ

(ማር 10፡13-16፤ ሉቅ 18፡15-17)

13ዬሱሲ ሄ ዎዴ ባሬ ኩሺያ ጉ ናና ቦላ ዎዴ፥ ፆሳ ዎሳና ማላ፥ ኢቲ ኢቲ ኣሳይ ናና ኣኮ ኣሄዳ፤ ሺን ዬሱሳ ካሊያዋንቱ ሄ ኣሳ ኣሄና ማላ ሃንቄቴዲኖ። 14ሺን ዬሱሲ፥ «ቄሪ ናናይ ታኮ ዪያዋ ዲጎፒቴ፤ ኣያው ጎፔ፥ ሳሉዋ ካዉቴይ ሄዋንቱ ማላሳ» ያጌዳ።

15ሄዋፔ ሲሚዴ ባሬ ኩሺያ ኡንቱንቱ ቦላ ዎዳዋፔ ጉዪያን፥ ሄዋፔ ባሺ ቤዳ።

ያላጋ፥ ዱሬ ቢታኒያ ኦሻ

(ማር 10፡17-31፤ ሉቅ 18፡18-30)

16ኢቲ ቢታኒ ዬሱሳኮ ዪዴ፥ «ታማሪሲያዎ፥ ታኒ ሜና ዴዑዋ ዴማናው ሎዖባ ኣያ ኦ?» ያጌዳ።

17ዬሱሲ ኣ፥ «ሎዖባይ ኣዬንቶ ታና ኣያው ኦቻይ? ኢቱዋ ፃላላይ ሎዓ፤ ሺን ኔኒ ሜናው ዴዓናው ኮዮፔ፥ ኣዛዛቱዋ ናጋ» ያጌዳ።

18ቢታኒ፥ «ሃቃዋንታ?» ያጊዴ ኦቼዳ።

ዬሱሲ ዛሪዴ፥ «ዎፓ፤ ዎሹሞፓ፤ ዉዖፓ፤ ዎርዱዋ ማርካቶፓ፤ #ኬስ 20፡13-16፤ ዛር 5፡17-20 19ኔ ኣባኔ ኔ ዳዮ ቦንቻ፤ ኔ ሾሩዋካ ኔ ሁጲያዳን ሲቃ» ያጌዳ። #ኬስ 20፡12፤ ዛር 5፡16፤ ዎግ 19፡18

20ሄ ያላጋ ቢታኒ ዬሱሳ፥ «ታኒ ሄዋ ኡባካ ጉቴፔ ዶማዴ ናጋዲ፤ ያቲና፥ ታው ፓጪያዌ ኣዬ?» ያጌዳ።

21ዬሱሲ ቢታኒያ፥ «ኔኒ ፖሎ ኣሳ ጊዳናው ኮዮፔ፥ ባዴ ኔው ዴዒያዋ ዛሊዓዴ፥ ሄ ሚሻ ሂዬሳው ኢማ፤ ኔኒ ሳሉዋን ዱሬታና፤ ያታዴ ያዴ ታና ካላ» ያጌዳ።

22ሺን ሄ ያላጋ ቢታኒ ሄዋ ሲሴዳ ዎዴ፥ ኢ ዳሮ ዱሬ ጊዲያ ዲራው፥ ቃሬቲዴ ባሺ ቤዳ።

23ዬሱሲ ባሬና ካሊያዋንቱሲ፥ «ታኒ ሂንቴንቶ ቱሙዋ ጋይ፤ ዱሬ ኣሳይ ሳሉዋ ካዉቴ ጌላናዌ ዳሮ ሜቶ ጊዳናዋ። 24ታኒ ጉጃዴካ ሂንቴንቶ ኦዳይ፤ ዱሬ ኣሳይ ፆሳ ካዉቴ ጌላናፔ፥ ጋሉ ማርፒያ ሉኩዋና ኣናዌ ማታቴ» ያጌዳ።

25ኣ ካሊያዋንቱ ሄዋ ሲሲ ማላሌቲዴ፥ «ያቲና፥ ኦኒ ኣታናው ዳንዳዪ?» ያጌዲኖ።

26ዬሱሲ ኡንቱንታ ጫዲ ፄሊዴ፥ «ሃዌ ኣሳው ዳንዳዬቴና፤ ሺን ፆሳው ኡባባይ ዳንዳዬቴ» ያጌዳ።

27ጴፂሮሲ ሄ ዎዴ ዛሪዴ ዬሱሳ፥ «ቤዓ፥ ኑኒ ኑሲ ዴዒያ ኡባባ ባሺዴ፥ ኔና ካሌዶ፤ ያቲዴ ኑኒ ኣያ ዴማኔሻ?» ያጌዳ።

28ዬሱሲ ኡንቱንታ ሃዋዳን ያጌዳ፤ «ታኒ ሂንቴንቶ ቱሙዋ ጋይ፤ ታኒ፥ ኣሳ ናዓይ፥ ኦራ ጋዲያን ታ ካዉቴ ኦይዲያን ኡቲያ ዎዴ፥ ታና ካሌዳ ሂንቴንቱካ ታማኔ ላዑ ኢስራዔሊያ ዛራቱዋ ቦላ ፒርዳናው፥ ታማኔ ላዑ ካዉቴ ኦይዲያን ኡታኒታ። 29ታ ሱን ዲራው፥ ጎሊያ ዎይ ኢሻቱዋ ዎይ ሚቻቱዋ፥ ዎይ ኣዉዋ ዎይ ኣቶ ዎይ ማቻቶ፥ ዎይ ናና ዎይ ጋዲያ ኣጌዳ ኦኒኔ፥ ፄቱ ዳኩዋፔ ዳሩዋ ኣካና፤ ቃሲ ሜና ዴዑዋካ ላታና። 30ሺን ጮራቱ ሃዒ ሲንቴዳዋንቱ ጉዬታናዋንታ፤ ቃሲ ጮራቱ ሃዒ ጉዬን ዴዒያዋንቱ ሲንታናዋንታ።

선택된 구절:

ማቶሳ 19: dwrENT

하이라이트

복사