ማቶሳ 20
20
ዎዪኒያ ቱራ ጊዶን ኦያ ኦሳንቻቱዋ ሌሚሱዋ
1«ሳሉዋ ካዉቴይ ዎዪኒያ ጌቴቲያ ቱራ ጊዱዋ ኦያዋንታ ኡኒያ ኦሲሳናው፥ ዎንታ ጉራን ኬሴዳ ዎዪኒያ ቱራ ጎዳ ቤሴ። 2ኢ ሄ ኦሳንቻቶ ሃቼ ሃቼ ኦዳዋ ዎልቃ ጋቲያ ጪጋናው ኡንቱንቱና ጊጊዴ፥ ባሬ ዎዪኒያ ቱራ ጊዱዋ ኦሲሳናው ኡንቱንታ ዬዴዳ።
3«ቃሲ ሄዙ ሳቲያ ጊዶዴ ኬሲዴ፥ ኦሱ ባይናን ቆጫን ኤቄዳ ሃራ ኣሳቱዋ ቤዒዴ፥ 4ኡንቱንታ፥ ‹ሂንቴንቱካ ቃሲ ታ ዎዪኒያ ቱራ ጊዱዋ ኦናው ቢቴ፤ ታኒ ሂንቴንቶ ቤሲያ ጋቲያ ጪጋና› ያጌዳ፤ ሄዋፔ ጉዪያን ኡንቱንቱ ቤዲኖ። 5ላዔዋካ ኡሱፑን ሳቲያኒኔ ኡዱፑ ሳቲያን ኬሲዴ፥ ሄዋዳን ኦዳ። 6ታማኔ ኢቲ ሳቲያ ሄራን ኢ ኬሲያ ዎዴ፥ ሃራንቱ ሄዋን ኤቄዳዋንታ ዴሚዴ፥ ‹ኦሱዋ ኦናን ኩሜን ጋላሳ ሃዋን ኣያው ኤቂ ፔሼዲቴ?› ያጌዳ።
7«ኡንቱንቱ፥ ‹ኑና ኦሲሲያ ኣሳይ ዬዳ ዲራው ኤቂ ፔሼዶ› ያጌዲኖ።
«ኢ፥ ‹ሂንቱንቱካ ቃሲ ታ ዎዪኒያ ቱራ ጊዱዋ ኦናው ቢቴ› ያጌዳ።
8«ሳዓይ ኦማርሲያ ዎዴ፥ ዎዪኒያ ቱራ ጎዳይ ኦያዋንቱ ካፑዋ፥ ‹ኦሳንቻቱዋ ፄሳዴ፥ ዉርሴን ኦሱዋን ጌሌዳዋንቱፔ ዶማዴ ኮይሮ ጌሌዳዋንታ ጋካናው፥ ኡንቱንቱ ኦሱዋ ዲርጉዋ ጪጋ› ያጌዳ። #ዎግ 19፡13፤ ዛር 24፡15
9«ታማኔ ኢቲ ሳቲያ ሄራን ኦሱዋ ዶሜዳዋንቱ ዪዴ፥ ሁጲያን ሁጲያን ኦዴ ፔሼዳ ዎልቃ ጋቲያ ኣኬዲኖ። 10ኮይሮ ኦሱዋ ዶሜዳ ኣሳይ ዬዳ ዎዴ፥ ዳሩዋ ኣካናው ቆፔዲኖ፤ ሺን ኡንቱንቱካ ሁጲያን ሁጲያን ባሬንቱ ኦሱዋ ዎልቃ ጋቲያ ኣኬዲኖ። 11-12ሄዋፔ ጉዪያን፥ ‹ሃ ጉዬፔ ዬዳዋንቱ ኢቲ ሳቲያ ፃላላ ኦዲኖ፤ ኩሜን ጋላሳ ዳቡሪዴ ጫዎቴዳ ኑዋና ኡንቱንቱ ኦሱዋ ዲርጉዋ ቃራ ኦዳ› ያጊዴ ባሬንታ ኦሱዋን ጌሊሴዳዋ ቦላ ዙዙሜዲኖ።
13«ሺን ኢ ኡንቱንቱፔ ኢቱዋ ሃዋዳን ያጌዳ፤ ‹ታ ላጌው፥ ታኒ ኔና ናቃቤይኪ፤ ኦዴ ፔሼዳ ዎልቃ ጋቲያ ታናና ጊጋቤይኪዬ? 14ኔዋ ኣካዴ ባ፤ ታኒ ሃዒ ዉርሴን ኦሱዋን ጌሌዳዎካ ኔዋ ኬና ኢማናው ኮያይ። 15ታኒ ታ ሚሻን ታ ኮዬዳዋዳን ኦናው ታው ማታይ ባዌ? ዎይ ታኒ ሎዓ ጊዴዳ ዲራው፥ ኔኒ ቃናታይ?› ያጌዳ።
16«ሄዋዳንካ፥ ቃሲ ጉዬቴዳዋንቱ ሲንታናዋንታ፤ ሲንቴዳዋንቱ ቃይ ጉዬታናዋንታ፤ ኣያው ጎፔ፥ ፄሴቴዳዋንቱ ጮራ፤ ሺን ዶሬቴዳዋንቱ ጉ» ያጌዳ።
ዬሱሲ ባሬ ሃይቁዋባ ሄዜንዋ ኦዴዳ
(ማር 10፡32-34፤ ሉቅ 18፡31-34)
17ዬሱሲ ዬሩሳላሜ ቢዴ፥ ኦጊያን ባሬናና ቢያ ታማኔ ላዑ ባሬና ካሊያዋንታ ጋፃ ኬሲዴ፥ ዱማ ኡንቱንቱሲ ያጌዳ። 18«ቤዒቴ፥ ኑኒ ዬሩሳላሜ ሃዒ ኬሴቶ። ያኒ ታና፥ ኣሳ ናዓ ቄሳቱዋ ካፓቱዋሲኔ ሂጊያ ታማሪሲያዋንቱሲ ኣዴ ኢማናዋንታ፤ ኡንቱንቱ ታ ቦላ ሃይቁዋ ፒርዳ ፒርዳናዋንታ። 19ቃሲ ኣዪሁዳ ጊዴና ኣሳሲካ ታና ኣዴ ኢማናዋንታ፤ ሄ ኣዪሁዳ ጊዴና ኣሳይ ታ ቦላ ቂሊጫናዋንታኔ ታና ሊሱዋን ሾጫናዋንታ፤ ያቲዴ ማስቃሊያ ቦላ ሚሲማሪያን ሺዴ፥ ታና ካቃናዋንታ፤ ታኒ ሄዜንያ ጋላሲ ሃይቁዋፔ ዴንዳና» ያጌዳ።
ዛቢዲዮሳ ናና ዳዪ ዎሳ
(ማር 10፡35-45)
20ሄ ዎዴ ዛቢዲዮሳ ናና ዳያ ባሬ ናናና ዬሱሳኮ ያዱ፤ ኣ ሲንን ጉልባታዴ ኢቲባ ኣ ዎሳዱ።
21ዬሱሲ ኢዞ፥ «ኣያ ኮያይ?» ያጊዴ ኦቼዳ።
ኢዛ ዛራዴ፥ «ሃ ታ ላዑ ናናይ ኔ ካዉቴን ኢቱ ኔፔ ኡሼቻ ባጋና፥ ቃሲ ኢቱ ኔፔ ሃዲርሳ ባጋና ኡቲኖ ያጋሪኪ» ያጋዴ ዎሳዱ።
22ሺን ዬሱሲ ዛሪዴ ናና፥ «ሂንቴንቱ ኣያ ዎሳናው ቤሲንቶ ኤሪኪታ። ታና ጋኪያ ዎሊቃማ ሜቱዋ ሜቶታኒቴ? ታኒ ፃማቄታና ፂንቃታ ፃማቄታናው ዳንዳዪቴ?» ያጌዳ።
ኡንቱንቱ፥ «ኤ ዳንዳያና» ያጌዲኖ።
23ዬሱሲ፥ «ታና ጋኪያ ዎሊቃማ ሜቱዋ ቱማካ ሂንቴንቱ ሜቶታኒታ፤ ሺን ታፔ ኡሼቻ ባጋናኔ ሃዲርሳ ባጋና ኡታናዋንታ ዶራናው ታው ማታይ ባዋ፤ ሺን ሄ ሳዓይ ታ ኣቡ ኢማናው ጊጊሲ ዎዳዋንቱሳ» ያጌዳ።
24ዮኮ ታሙ ዬሱሳ ካሊያዋንቱ ሄዋ ሲሴዳ ዎዴ፥ ሄ ላዑ ኢሻቱዋሲ ሃንቄቴዲኖ። 25ሺን ዬሱሲ ኡንቱንቱ ኡባቱዋካ ባሬኮ ፄሲዴ፥ ሃዋዳን ያጌዳ፤ «ኣሂዛቤ ኣሳቱዋ ካፓቱኔ ሃዋንታ ካሌያ ኣሳቱ ባሬንቱ ኣሳ ኣዪሲያዋ ኤሪታ። 26ሂንቴንቱ ጊዱዋን ሄዋ ማላ ጊዴና፤ ሺን ሂንቴንቱ ጊዱዋን ቃቴ ኮዪያ ኦኒኔ ሂንቴንቶ ቆማ ጊዳናው ቤሴ። 27ቃሲ ሂንቴንቱ ጊዱዋን ኡባፔ ቦላ ጊዳናው ኮዪያዌ ኦኒኔ ሂንቴንቶ ኣይሌ ጊዳናው ቤሴ። 28ሄዋዳን ታኒ፥ ኣሳ ናዓይ፥ ኣሳው ኦናዉኔ ዳሮ ኣሳ ዎዛናው ታ ሼምፑዋ ኢማናው ዬዳዋፔ ኣቲን፥ ኣሳይ ታው ኦና ማላ ያቤይኬ» ያጌዳ።
ዬሱሲ ላዑ ቆቃቱዋ ፓዳ
(ማር 10፡46-52፤ ሉቅ 18፡35-43)
29ዬሱሲኔ ኣ ካሊያዋንቱ ኢያርኮፔ ኬሲሺን፥ ዳሮ ኣሳይ ኡንቱንታ ካሌዳ። 30ላዑ ቆቃ ኣሳቱ ኦጊያ ዶናን ኡቴዳዋንቱ ዬሱሲ ሄዋና ኣያዋ ሲሲዴ፥ ባሬንቱ ኮሻ ቁ ኦዴ፥ «ጎዳው፥ ዳዊታ ናዓው፥ ኑሲ ቃሬታሪኪ» ያጌዲኖ።
31ዳሮ ኣሳይ ኡንቱንታ፥ «ሃይዚቴ» ጊዴ ሃንቄቴዳ፤ ሺን ኡንቱንቱ ባሬንቱ ኮሻ ዳሪ ቁ ኦዴ፥ «ጎዳው፥ ዳዊታ ናዓው፥ ኑና ማራሪኪ!» ያጌዲኖ።
32ዬሱሲ ኦጊያን ኤቂዴ፥ ኡንቱንታ ፄሲዴ፥ «ታኒ ሂንቴንቶ ኣያ ኦና ማላ ኮዪቴ?» ያጌዳ።
33ቆቃቱ፥ «ጎዳው፥ ኑ ኣይፊያ ፓሪኪ» ያጌዲኖ።
34ዬሱሲ ኡንቱንቶ ቃሬቲዴ፥ ኡንቱንቱ ኣይፊያ ቦቼዳ፤ ኤሌካ ኡንቱንቱ ኣይፊ ፄሊ ኣጊና፥ ኣ ካሊ ኣጌዲኖ።
© 2011, Wycliffe Bible Translators, Inc. All rights reserved.
Ooratha Caaquwaa - 더 알아보기
