ማቶሳ 18

ኡባፔ ኣያዌ ኦኔ?

(ማር 9፡33-37፤ ሉቅ 9፡46-48)

1ኣ ካሊያዋንቱ ዬሱሳኮ ሄ ዎዴ ዪዴ፥ «ሳሉዋ ካዉቴን ኡባፔ ኣያዌ ኦኔ?» ያጌዲኖ።

2ዬሱሲ ኢቲ ጉ ናዓ ፄሲ ኡንቱንቱ ጊዶን ኤሲዴ፥ ሃዋዳን ያጌዳ፤ 3«ታኒ ሂንቴንቶ ቱሙዋ ኦዳይ፤ ፆሳኮ ሂንቴንቱ ሲሚዴ፥ ጉ ናናዳን ሃናና ዮፔ፥ ሳሉዋ ካዉቴ ኡባካ ጌላናው ዳንዳዪኪታ። 4ሲሚ ሃ ጉ ናዓዳን፥ ባሬና ካዉሺያ ኦኒኔ ሳሉዋ ካዉቴን ኡባፔ ኣያዋ። 5ቃሲ ሃዋ ማላ ናዓ ታ ሱንን ሞኪያ ኦኒኔ ታና ሞኬ። 6ሺን ታና ኣማኒያ ሃ ጉ ናናፔ ኢቱዋ ባሌያ ኦኒኔ፥ ጋጪያ ዎጋ ዎፃ ባሬ ቆያን ቃቺዴ፥ ኣባ ጪሙዋን ሚቴቲያዌ ኣው ሎዓ።

ቡዋሲ ጋሶ ጊዲያዋ

(ማር 9፡42-48፤ ሉቅ 17፡1-2)

7«ኣላሚ ኣሳ ቢያ ዲራው፥ ሳዓው ኣዬሮ፤ ኣዪሲ ጎፔ፥ ቢያባይ ዩሳ ኣጌና፤ ሺን ቡ ኣ ጋሶታን ዪያ ኡራው ኣዬሮ።

8«ኔና ኩሺ ዎይ ኔ ጌዲ ኔና ባሌፔ፥ ኔፔ ቃንፃ ኦላ፤ ኔኒ ላዑ ኩሺያናኔ ላዑ ጌዲያና ሜና ታማን ኦሌቲያዋፔ ዎባ ዎይ ዱፃ ኩሺያና ሜና ዴዑዋ ጌሊያዌ ኔው ሎዓ። 9ቃሲ ኔ ኣይፊ ኔና ባሌፔ፥ ኔፔ ዎጫ ኬሳ ኦላ፤ ኔኒ ላዑ ኣዪፊያና ጋናሚያ ታማን ኦሌቲያዋፔ ኢቲ ኣዪፊያና ሜና ዴዑዋ ጌሊያዌ ኔው ሎዓ።

10«ሂንቴንቱ ሃ ጉቱዋፔ ኢቱዋኔ ካና ማላ፥ ሂንቴንታ ናጊቴ፤ ኣዪሲ ጎፔ፥ ታኒ ሂንቴንቶ ኦዳይ፤ ሳሉዋን ኡንቱንቱ ኪታንቻቱ ኡባ ዎዴ፥ ሳሉዋን ዴዒያ ታ ኣቡ ሲንን ዴዒኖ። 11ኣዪሲ ጎፔ፥ ታኒ፥ ኣሳ ናዓይ፥ ባዬዳዋ ኣሻናው ያዲ።

ባዬዳ ዶርሳ ሌሚሱዋ

(ሉቅ 15፡3-7)

12«ኢቲ ኣሳው ፄቱ ዶርሳቱ ዴዒያዋንቱፔ ኢቱ ባዮፔ፥ ኡዱፑ ታማኔ ኡዱፑኑዋ ዴሪያን ኣጊዴ፥ ሄ ባዬዳዋ ኮያናው ቤኔ? ሂንቴንቱ ዋጊቴ? 13ታኒ ሂንቴንቶ ቱሙዋ ጋይ፤ ኢ ዴሞፔ፥ ባዪቤና ኡዱፑ ታማኔ ኡዱፑ ዶርሳቱዋፔ ኣዴ፥ ሄ ኢቲ ዶርሳን ናሼቴ። 14ሄዋዳንካ፥ ሳሉዋን ዴዒያ ሂንቴንቱ ኣቡ ሃ ጉቱዋፔ ኢቱ ባያናዋካ ኮዬና።

ባይዜዳ ኣሳሲ ኦናው ቤሲያባ

15«ኔ ኢሻይ ኔና ናቆፔ፥ ኔሬካ ኣኮ ባዴ፥ ኣ ናቁዋ ኣው ኦዳ፤ ኢ ኔዋ ሲሶፔ፥ ኔ ኢሻ ባላፔ ዛራዳ። 16ሺን ኢ ኔዋ ሲሴናን ኢፆፔ፥ ላዑ ዎይ ሄዙ ማርካይ ማርካቶዋን ዬዉ ኡባይ ቱማቲያ ዲራው፥ ሃራ ኢቲ ዎይ ላዑ ኣሳ ኔናና ኢቲፔ ኣፋ። 17ኢ ኡንቱንቱባ ሲሴናን ኢፆፔ፥ ኡባባ ኣማኒያ ኣሳው ኦዳ፤ ቃሲ ኣማኒያ ኣሳይ ጊያዋካ ኢ ሲሴናን ኢፆፔ፥ ኣማኔና ኣሳዳኒኔ ቃራፃ ሺሺያ ኣሳዳን ኣ ፓይዳ።

18«ታኒ ሂንቴንቶ ቱሙዋ ጋይ፤ ኔኒ ሳዓን ሃኖ ጎዌ ኡባይ ሳሉዋን ፆሳ ሲንን ሃናና፤ ሺን ኔኒ ሳዓን ሃኖፖ ጌዳዌ ሳሉዋንካ ሃኔና።

19«ቃሲካ ታኒ ሂንቴንቶ ኦዳይ፤ ሂንቴፔ ላዑ ኡራይ ሳዓን ፆሳ ዎሲያዋን ኣይ ዬዉዋኒኔ ኢቲ ዎዛና ጊዶፔ፥ ሳሉዋን ዴዒያ ታ ኣቡ ሄዋ ሂንቴንቶ ኢማና። 20ኣዪሲ ጎፔ፥ ላዑ ኡራይ ዎይ ሄዙ ኡራይ ታ ሱንን ሺቂያሳን፥ ታኒ ሄዋን ኡንቱንቱ ጊዱዋን ዴዓይ» ያጌዳ።

ኣቶ ጊያዋ

21ጴፂሮሲ ሄ ዎዴ ዬሱሳኮ ዪዴ፥ «ጎዳው፥ ታ ኢሻይ ታና ኣፑ ካላ ናቆፔ ታኒ ኣው ኣቶ ጋናው ቤሲ? ላፑኑዋ ጋካናው ናቂኔዬ?» ያጊዴ ኣ ኦቼዳ።

22ዬሱሲ ዛሪዴ ኣ፥ «ጊዴና፥ ታኒ ኔና ላፑን ታሙ ካላ ላፑኑዋ ጋዪፔ ኣቲን፥ ላፑኑዋ ፃላላ ጊኬ። #ዶም 4፡24

23«ኣዪሲ ጎፔ፥ ሳሉዋ ካዉቴይ ባሬ ቆማቱዋና ሚሻ ሄቴታናው ቆፔዳ ካቲያ ቤሴ። 24ሄ ካቲ ሚሻ ሄቴታናው ዶሜዳ ዎዴ፥ ዳሮ ሚሎኔ ቢራ ኣጩ ዴዒያ ኢቲ ቢታኒያ ኣኮ ኣሄዲኖ። 25ሺን ሄ ቆማው ኣጩዋ ጪጊያዌ ዪና፥ ኣ ጎዳይ ሄ ኣጩዋ ጪጋናው፥ ኣ ማቻታኔ ኢኔ ኣ ናናይ፥ ቃሲ ኣው ዴዒያ ኡባባይ ዛሊዔታና ማላ፥ ኣ ኣዛዜዳ። 26ሄዋ ዲራው፥ ቆማይ ባሬ ጎዳ ሲንን ጉልባቲዴ፥ ‹ታ ጎዳው፥ ሃያጎዶ ጉ ዎዲያ ናጋሪኪ፤ ታኒ ኔው ኡባባካ ጪጋና ያጊዴ ኣ ዎሴዳ። 27ኣ ጎዳይ ኣው ቃሬቲዴ፥ ኣ ዬዲ ኣጌዳ፤ ኣ ኣጩዋካ ኣው ማሪ ኣጌዳ።

28«ሺን ሄ ቆማይ ኬሲዴ፥ ባሬ ላጌ ቆማቱዋፔ ኢቱ ባሬፔ ፄቱ ቢራ ሳንቲሚያ ታልዔዳዋና ጋኬቲዴ፥ ‹ኔ ቦላ ዴዒያ ታ ሚሻ ጪጋ› ያጊ ኦይቂዴ፥ ኣ ጩሌዳ።

29«ያቲና ሄ ኣ ላጌ ቆማይ ኣ ሲንን ጉልባቲዴ፥ ‹ሃዒ ታዒሻይ ጉ ዎዲያ ናጋሪኪ፤ ታኒ ኔው ኡባባካ ጪጋና› ያጊዴ ኣ ዎሴዳ።

30«ሺን ኢፂ ኣኪ ቢዴ፥ ኣ ላጌይ ሄ ኣጩዋ ቃንፃና ጋካናው፥ ቃሾ ጎሌ ጌሊሴዳ። 31ሄዋ ዲራው፥ ኣ ላጌ ቆማቱ ሄዋ ቤዒዴ፥ ዳሮ ዪሎቴዲኖ፤ ባሬንቱ ጎዳኮ ቢዴ፥ ኢ ኦዳ ኡባባ ኣው ኦዴዲኖ።

32«ሄዋፔ ጉዪያን፥ ጎዳይ ሄ ቆማ ፄሲዴ፥ ‹ሃ ኢታ ቆማው፥ ኔኒ ታና ዎሴዳ ዲራው፥ ታኒ ሄ ኣጩዋ ኡባ ኔው ማራ ኣጋዲ። 33ታኒ ኔው ሄ ኣጩዋ ማሬዳዋዳን፥ ኔኒካ ኔ ላጌ ቆማው ማራናው ቤሴኔ?› ያጌዳ። 34ሄዋፔ ሲሚዴ ኣው ዳሮ ሃንቄቲዴ፥ ባሬ ኣጩዋ ኡባ ኢ ጪጊ ዉርሳና ጋካናው፥ ፓፃ ካዔታና ማላ፥ ቃሾ ጎሌ ጌሊሴዳ።

35«ሂንቴንቱ ሁጲያን ሁጲያን ሂንቴንቱ ኢሻው ዎዛናፔ ኣቶ ጋና ዮፔ፥ ሄ ጎዳይ ባሬ ቆማ ኦዳዋዳን፥ ሳሉዋን ዴዒያ ታ ኣቡካ ሂንቴንታ ሄዋዳን ኦና» ያጌዳ።

선택된 구절:

ማቶሳ 18: dwrENT

하이라이트

복사