ಲುಕ್ 21
21
ಎಕ್ ಘೊಮರಲ್ಲ್ಯಾ ಬಾಯ್ಕೊಮನ್ಸಿಚಿ ಕಾನಿಕ್
ಮಾರ್ಕ್ 12:41-44
1ಜೆಜುನ್ ಭೊತ್ಯಾನಿ ಬಗಟ್ಲ್ಯಾನ್, ತನ್ನಾ ಸಾವ್ಕಾರ್ ಲೊಕಾ ಅಪ್ನಾಚಿ ಕಾನಿಕ್ ದೆವಾಚ್ಯಾ ಗುಡಿಚ್ಯಾ ಕಾನಿಕಾಚ್ಯಾ ಡಬ್ಬ್ಯಾತ್ ಘಾಲುಲಾಗಲ್ಲಿ . 2ಅನಿ ಎಕ್ ಗರಿಬ್ ಘೊಮರಲ್ಲಿ ಬಾಯ್ಕೊ ಮಾನುಸ್ ಅಪ್ನಾಕ್ಡೆ ಹೊತ್ತೆ ದೊನ್ ಬಾರಿಕ್ಲೆ ತಾಂಬ್ಯಾಚೆ ಪೈಸೆ ಕಾನಿಕಾಚ್ಯಾ ಡಬ್ಬ್ಯಾತ್, ಘಾಲ್ತಲೆಬಿ ಜೆಜುನ್ ಬಗಟ್ಲ್ಯಾನ್. 3ತನ್ನಾ ತೆನಿ “ಮಿಯಾ ತುಮ್ಕಾ ಖರೆಚ್ ಸಾಂಗ್ತಾ, ಹ್ಯಾ ಗರಿಬ್ ಘೊಮರಲ್ಲ್ಯಾ ಬಾಯ್ಕೊಮನ್ಸಿನ್,ಸಗ್ಳ್ಯಾಂಚ್ಯಾನ್ಕಿ ಜಾಸ್ತಿ ಕಾನಿಕಾಚ್ಯಾ ಡಬ್ಬ್ಯಾತ್ ಘಾಟ್ಲಿನ್. 4ಹುರಲ್ಲ್ಯಾ ಸಗ್ಳ್ಯಾನಿ ಅಪ್ನಾಕ್ ಫಿರೆ ಹೊವ್ನ್ ಹುರಲ್ಲೆ ಲೈ ಲೈ ಪೈಸೆ ಘಾಟ್ಲ್ಯಾನಿ, ಖರೆ ಹಿನಿ ಅಪ್ನಾಚ್ಯಾ ಗರಿಬ್ಕಿತ್ , ಅಪ್ನಾಚೆ ಜಿವನ್ ಚಾಲ್ವುಕ್ ಮನುನ್ ಹೊತ್ತೆ ದೊನುಚ್ ದೊನ್ ಪಯ್ಸೆಬಿ ಅಪ್ನಾಕ್ ಕಾಯ್ಬಿ ಥವ್ನ್ ಘೆಯ್ನಸ್ತಾನಾ, ತೆನಿ ದಿಲಿನ್” ಮಟ್ಲ್ಯಾನ್.
ಜೆಜು ದೆವಾಚ್ಯಾ ಗುಡಿಚ್ಯಾ ನಾಸಾಚ್ಯಾ ವಿಶಯಾತ್ ಬೊಲ್ತಾ.
ಮಾತೆವ್ 24:1-2; ಮಾರ್ಕ್ 13:1-2
5ಎಕ್ ಉಲ್ಲಿ ಶಿಸಾ ದೆವಾಚ್ಯಾ ಗುಡಿಚ್ಯಾ ವಿಶಯಾತ್ ಬೊಲುಲಾಗಲ್ಲಿ, ಬರ್‍ಯಾ-ಬರ್‍ಯಾ ಗುಂಡ್ಯಾನ್ ಭಾಂದಲ್ಲೆ ಹೆ ಭಾಂದಾಪ್ ಕವ್ಡೆ ಬರೆ ದಿಸ್ತಾ, ಅನಿ ದೆವಾಕ್ ಭೆಟ್ಟಲ್ಲಿ ಕಾನಿಕಾ ಬಗಟ್ಲ್ಯಾರ್ ಬರೆ ದಿಸ್ತಾ ಮನುನ್ ತೆನಿ ಬೊಲುಲಾಗಲ್ಲೆ. ತನ್ನಾ ಜೆಜುನ್ ತೆಂಕಾ. 6ಎಕ್ ಎಳ್ ಯೆತಾ, ಅನಿ ಹೆ ತುಮಿ ಬಗುಲ್ಯಾಸಿ ತೆ ಎಕ್ ಸೈತ್ ಗುಂಡೊ ಥೈ ನಸ್ತಾನಾ, ಸಗ್ಳೆ ಕೊಸ್ಳುನ್ ಘಾಲುನ್ ಹೊತಾ, ಮಟ್ಲ್ಯಾನ್.
ಕಸ್ಟಾ ಅನಿ ತರಾಸಾ
ಮಾತೆವ್ 24:3-34; ಮಾರ್ಕ್ 13:3-13
7ತನ್ನಾ ಶಿಸಾನಿ “ಗುರುಜಿ, ಹೆ ಕನ್ನಾ ಘಡ್ತಾ, ಅನಿ ಹೆ ಸಗ್ಳೆ ಹೊನಾರ್ ಹಾಯ್ ,ಮನುನ್ ದಾಕ್ವುಕ್ ಹೆಚ್ಯಾ ಅದ್ದಿ ಕಾಯ್- ಕಾಯ್ ಹೊತಾ?” ಮನುನ್ ಇಚಾರ್‍ಲ್ಯಾನಿ.
8ತನ್ನಾ ಜೆಜುನ್ ತೆಂಕಾ “ಉಶಾರ್ಕಿನ್ ರ್‍ಹಾವಾ; ಮೊಸಾತ್ ಪಡ್ಸಿಲಾ, ಲೈ ಘೊಮನ್ಸಾ ಮಾಜ್ಯಾ ವಿಶಯಾತ್, ಬೊಲುಕ್ ಮನುನ್ ಯೆತ್ಯಾತ್, ಅನಿ ತೆನಿ ಮಿಯಾ ತೊ! ಅನಿ ಎಳ್ ಯೆವ್ನ್ ಪಾವ್ಲೊ ಅತ್ತಾ” ಮನುನ್ ಸಾಂಗ್ತ್ಯಾತ್, ಖರೆ, ತುಮಿ ತೆಂಚ್ಯಾ ಫಾಟ್ನಾ ಜಾವ್ನಕಾಶಿ. 9ಝಗ್ಡ್ಯಾಂಚ್ಯಾ ವಿಶಯಾತ್, ಹರ್‍ತಾಳಾಂಚ್ಯಾ ವಿಶಯಾತ್ ಆಯ್ಕುನ್ “ತುಮಿ ಭಿಂವ್ನಕಾಸಿ, ಹೆ ಸಗ್ಳೆ ಘಡುಕುಚ್ ಪಾಜೆ ತಸೆಮನುನ್ ಸರ್‍ತೊ ಕಾಲ್ ಜಗ್ಗೊಳ್ ಯೆಲಾ ಮನುಕ್ ಹೊಯ್ನಾ”, ಮನುನ್ ಸಾಂಗಟ್ಲ್ಯಾನ್.
10ಅನಿ ಫಿಡೆ ಜೆಜುನ್, “ದೊನ್ ದೆಶಾ ಎಕೆಮೆಕಾಚ್ಯಾ ವಾಂಗ್ಡಾ ಝಗಡ್ತ್ಯಾತ್; ಎಕ್ ರಾಜ್, ಅನಿ ಎಕ್ ರಾಜಾಚ್ಯಾ ವಾಂಗ್ಡಾ ಮಾರಾಮಾರಿಕ್ ಉಟ್ತಾ. 11ಎಗ್ದಮ್ ಭಯಾನಕ್ ಭುಕಂಪ್ ಹೊತಾ, ಬರಗಾಲ್ ಪಡ್ತಾ, ಅನಿ ಸಗ್ಳ್ಯಾಕ್ಡೆ ಲೈ ತರಾಸ್ ಹೊತಲೊ ರೊಗ್‍ ಯೆವ್ಕ್ ಸುರು ಹೊತಾ. ಬಗಿನಸಲ್ಲಿ ಅನಿ ಭಯಾನಕ್ ಸಂಗ್ತಿಯಾ ಮಳ್ಬಾ ವರ್‍ತಿ ದಿಸುಕ್ ಲಾಗ್ತ್ಯಾತ್. 12ಹೆ ಸಗ್ಳೆ ಘಡುಚ್ಯಾ ಅದ್ದಿ ತುಮ್ಕಾ ಧರುನ್ ಘೆವ್ನ್ ಜಾವ್ನ್ ಹೊತಾ, ಅನಿ ತರಾಸ್ ದಿವ್ನ್ ಹೊತಾ; ತುಮ್ಕಾ ಸಿನಾಗೊಗಾತ್ನಿ ನ್ಹೆವ್ನ್ ತುಮ್ಚಿ ಪರಿಕ್ಷಾ ಕರುನ್ ಹೊತಾ, ಅನಿ ತುಮ್ಕಾ ಬಂದಿಖಾನ್ಯಾತ್ ಘಾಲುನ್ ಹೊತಾ: ಮಾಜೆಸಾಟಿ ತುಮ್ಕಾ ರಾಜಾಂಚ್ಯಾ, ಅನಿ ಅದಿಕಾರ್‍ಯಾಂಚ್ಯಾ ಇದ್ರಾಕ್ ವೊಡುನ್ ಹಾನುನ್ ಹೊತಾ. 13ಹ್ಯೊ ತುಮ್ಕಾ ಬರಿ ಖಬರ್ ಸಾಂಗುಕ್ ಎಕ್ ಬರೊ ಅವ್ಕಾಸ್. 14ತುಮ್ಕಾ ಇಚಾರ್‍ನಿ ಕರುಕ್ ಘೆವ್ನ್ ಗೆಲ್ಲ್ಯಾ ತನ್ನಾ, ಕಾಯ್ ಸಾಂಗುನ್ ಅನಿ ಕಶೆ ಕರುನ್ ತುಮ್ಕಾಚ್ ತುಮಿ ರಾಕುನ್ ಘೆತಲೆ -ಮನುನ್ ಯವ್ಜುನಕಾಶಿ, 15ಕಶ್ಯಾಕ್ ಮಟ್ಲ್ಯಾರ್ ಮಿಯಾ ತುಮ್ಕಾ ,ಶಾನ್‍ಪಾನಾಚ್ಯಾ ಗೊಸ್ಟಿಯಾ ದಿತಾ, ಅನಿ ತುಮಿ ಬೊಲಲ್ಲ್ಯಾಕ್, ದುಸ್ಮಾನಾನಿ ಕೊನ್ಬಿ ಹುರ್‍ಪಾಟಿ ಬೊಲುಕುಚ್ ವಾಟ್ ರ್‍ಹಾಯ್ನಾ. 16ತುಮ್ಚ್ಯಾತ್ಲ್ಯಾ ಉಲ್ಲ್ಯಾಕ್ನಿ, ತುಮ್ಚೆ ಬಾಯ್-ಬಾಬಾ, ತುಮ್ಚಿ ಭಾವಾ, ತುಮ್ಚೆ ಸೊಯ್ರೆ, ಅನಿ ತುಮ್ಚಿ ದೊಸ್ತಾಚ್ ಧರುನ್ ದಿತ್ಯಾತ್, ಅನಿ ತುಮ್ಚ್ಯಾತ್ಲ್ಯಾ ಉಲ್ಲ್ಯಾತ್ನಿ ಜಿವಾನಿ ಮಾರ್‍ತ್ಯಾತ್. 17ಮಾಕಾ ಲಾಗುನ್ ಸಗ್ಳೆ ಜಾನಾ ತುಮ್ಕಾ ಧುರ್ ಕರ್‍ತ್ಯಾತ್. 18ಖರೆ ತುಮ್ಚ್ಯಾ ಟಕ್ಲ್ಯಾಚ್ಯಾ ಎಕ್ ಕೆಸಾಕ್ ಸೈತ್ ಧಕ್ಕೊ ಹೊಯ್ನಾ. 19ಧೈರ್ಯಾನ್ ಇಬೆ ರ್‍ಹಾವಾ, ಅನಿ ತುಮ್ಚ್ಯಾ ಎವ್ಡ್ಯಾಕ್ ತುಮಿಚ್ ಬಚಾವ್ ಹೊತ್ಯಾಶಿ”, ಮನುನ್ ಸಾಂಗಟ್ಲ್ಯಾನ್.
ಜೆಜು ಜೆರುಜಲೆಮಾಚ್ಯಾ ನಾಸಾಚ್ಯಾ ವಿಶಯಾತ್ ಬೊಲ್ತಾ.
ಮಾತೆವ್ 24:29-31; ಮಾರ್ಕ್ 13:24-27
20“ಜೆರುಜಲೆಮಾಚ್ಯಾ ಭೊತ್ಯಾನಿ ಸೈನಿಕಾ ಯೆವ್ನ್ ಇಬೆ ಹೊತ್ತ್ಯಾ ತನ್ನಾ, ತೆ, ಲಗ್ಗುನಾಚ್ ನಾಸ್ ಹೊತಾ ಮನುನ್ ತುಮ್ಕಾ ಕಳ್ತಾ. 21ತನ್ನಾ ಜೆ ಕೊನ್-ಕೊನ್ ಜುದೆಯಾತ್ ಹಾತ್ ತೆನಿ ಮಡ್ಡಿಯಾ ವೈನಿ ಪಳುನ್ ಜಾವ್ಚೆ; ಜೆ ಕೊನ್ ಶಾರಾತ್ ಭುತ್ತುರ್ ಹಾತ್ ತೆನಿ ಶಾರ್ ಸೊಡುನ್ ಪಳುಚೆ, ಅನಿ ಜೆ ಕೊನ್ ಖೆಡ್ಯಾತ್ನಿ ಹಾತ್, ತೆನಿ ಶಾರಾಚ್ಯಾ ಭುತ್ತುರ್ ಜಾಯ್‌ನಸ್ತಾನಾ ರ್‍ಹಾವ್ಚೆ. 22ತಿ, ದಿಸಾ, ಶಿಕ್ಷೆಚಿ ದಿಸಾ ಮನುನ್ ಬಲ್ವುನ್ ಹೊತ್ಯಾತ್, ಅಶೆ ಹೆ ಸಗ್ಳೆ ಪ್ರವಾದ್ಯಾನಿ ಸಾಂಗಲ್ಲೆ ಖರೆ ಮನುನ್ ದಾಕ್ವುಸಾಟ್ನಿ ಹೊತಾ. 23ತ್ಯಾ ದಿಸಾತ್ನಿ ಗರ್‍ವಾರ್ ಹೊತ್ತ್ಯಾ ಬಾಯ್ಕೊಮನ್ಸಿಂಚಿ, ಅನಿ ಬಾರಿಕ್ಲಿ ಪೊರಾ ಹೊತ್ತ್ಯಾ ಬಾಯ್ಕೊಮನ್ಸಿಂಚಿ ಗತ್ ಕಾಯ್ ಸಾಂಗು! ಹ್ಯಾ ಜಿಮ್ನಿರ್ ಲೈ ಮೊಟೊ ಸಂಕಟ್ ಯೆವ್ನ್ ಪಾವ್ತಾ, ಅನಿ ದೆವಾಚಿ ಶಿಕ್ಷಾ ಹ್ಯಾ ಲೊಕಾಂಚ್ಯಾ ವರ್‍ತಿ ಯೆವ್ನ್ ಪಡ್ತಾ. 24ಉಲ್ಲ್ಯಾಸ್ಯಾಕ್ನಿ ಚಾಕ್ವಾನಿ ತೊಡುನ್ ಮಾರುನ್ ಹೊತಾ, ಅನಿ ಹುರಲ್ಲ್ಯಾಕ್ನಿ , ಗುಲಾಮ್ ಕರುನ್ ದುಸ್ರ್ಯಾ-ದುಸ್ರ್ಯಾ ದೆಸಾಕ್ನಿ ಘೆವ್ನ್ ಜಾವ್ನ್ ಹೊತಾ, ಅನಿ ತೆಂಚೊ ಎಳ್ ರ್‍ಹಾಯ್ ಪತರ್ ಮಟ್ಲ್ಯಾರ್, ಜುದೆವ್ ನ್ಹಯ್ ಹೊತ್ತಿ ಲೊಕಾ ಜೆರುಜಲೆಮಾಚೆ ತುಕ್ಡೆ-ತುಕ್ಡೆ ಕರುನ್ ಟಾಕ್ತ್ಯಾತ್”.
ಮಾನ್ಸಾಚೊ ಲೆಕ್ ಯೆತಲೆ
ಮಾತೆವ್ 24:29-31; ಮಾರ್ಕ್ 13:24-27
25“ದಿಸ್, ಚಂದ್ರಾಮ್, ಅನಿ ಚಿಕ್ಕಿಯಾಂಚ್ಯಾ ವೈನಿ ಬಗುನಸಲ್ಲಿ ಅವ್ತಾರಾ ದಿಸುಕ್ ಲಾಗ್ತ್ಯಾತ್, ಅನಿ ಜಿಮ್ನಿರ್ ಸಮುಂದರಾಚ್ಯಾ ಅವಾಜಾಕ್, ಅನಿ ವೊವ್ತಲ್ಯಾ ಹೊವಾರ್‍ಯಾಂಚ್ಯಾ ಆವಾಜಾಕ್ ಜಿಮ್ನಿ ವೈಲಿ ಸಗ್ಳಿ ಲೊಕಾ ಕಂಗಾಲ್ ಹೊವ್ನ್ ಜಾತ್ಯಾತ್. 26ಮಳ್ಬಾತ್ಲಿ ತಾಕ್ತಿಯಾ ತೆಂಚೊ-ತೆಂಚೊ ಜಾಗೊ ಸೊಡುನ್ ಹಾಲ್ತ್ಯಾತ್ ಸಗ್ಳ್ಯಾ ಜಿಮ್ನಿರ್ ಕಸ್ಲೊ ಸಂಕಟ್ ಯೆವ್ಲಾ ತೆ ಬಗುನ್ ಸಗ್ಳಿ ಲೊಕಾ ಘಾಬ್ರುನ್ ಜಾತ್ಯಾತ್. 27ತನ್ನಾ ಮಾನ್ಸಾಚೊ ಲೆಕ್ ಎಕ್ ಮೊಡಾ ವೈನಾ, ಮೊಟ್ಯಾ ಪದ್ವಿನ್,ಅನಿ ಮಹಿಮೆನ್ ಭರುನ್ ಯೆತಲೊ ತೆಂಕಾ ದಿಸ್ತಾ. 28ಹೆ ಸಗ್ಳೆ ಹೊವ್ಕ್ ಸುರು ಹೊತಾನಾ, ಉಟುನ್ ಇಬೆ ರ್‍ಹಾವಾ, ಅನಿ ಟಕ್ಲಿ ವೈರ್ ಕರಾ, ಕಶ್ಯಾಕ್ ಮಟ್ಲ್ಯಾರ್ ತುಮ್ಚಿ ಸುಟ್ಕಾ ಜಗ್ಗೊಳ್ ಯೆಲಾ” ಮನುನ್ ಸಾಂಗಟ್ಲ್ಯಾನ್.
ಅಂಜುರಾಚ್ಯಾ ಝಾಡಾಚಿ ಕಾನಿ
ಮಾತೆವ್ 24:32-35; ಮಾರ್ಕ್ 13:28-31
29ತನ್ನಾ ಜೆಜುನ್ ತೆಂಕಾ ಹಿ ಕಾನಿ ಸಾಂಗಟ್ಲ್ಯಾನ್ “ಎಕ್ ಅಂಜುರಾಚ್ಯಾ ಝಡಾ ವಿಶಯಾತ್, ಅನಿ ಹುರಲ್ಲ್ಯಾ ದುಸ್ರ್ಯಾ ಝಾಡಾಂಚ್ಯಾ ವಿಶಯಾತ್ ಯವ್ಜುನ್ ಬಗಾ. 30ತೆಂಚಿ ಪಾನಾ ಚಿಗ್ರುಕ್ ಸುರು ಹೊಲಿ ಮನ್ತಾನಾ, ತುಮ್ಕಾ ನಿಂಬ್ರಾಚಿ ದಿಸಾ ಜಗ್ಗೊಳ್ ಯೆಲಿ ಮನುನ್ ಕಳ್ತಾ. 31ತಸೆಚ್ ಹೆ ಸಗ್ಳೆ ಹೊತಾನಾ, ದೆವಾಚೆ ರಾಜ್ ಯೆನಾರ್ ಹಾಯ್, ಮನುನ್ ತುಮ್ಕಾ ಕಳುನ್ ಯೆತಾ”.
32“ಯಾದ್ ಥವ್ನ್ ಘೆವಾ, ಅತ್ತಾ ಜಿವನ್ ಕರುನ್ಗೆತ್ ಹೊತ್ತ್ಯಾ ಲೊಕಾನಿತ್ಲಿ ಉಲ್ಲಿ ಲೊಕಾ ಝಿತ್ತಿ ರ್‍ಹಾತಾನಾಚ್ ಹೆ ಸಗ್ಳೆ ಘಡ್ತಾ. 33ಮಳಬ್ ಅನಿ ಹ್ಯೊ ಜಗ್ ಸರುನ್ ಜಾಯ್ಲ್, ಖರೆ ಮಿಯಾ ಸಾಂಗಟಲ್ಲಿ ಗೊಸ್ಟಿಯಾ ಕನ್ನಾಚ್ ಉಸಿ ಹೊಯ್‍ನ್ಯಾತ್”.
ಉಶಾರ್ಕಿನ್ ರ್‍ಹಾತಲೆ
34“ಉಶಾರ್ಕಿ ರ್‍ಹಾವಾ! ಸನಾ ಕರ್‍ತಲ್ಯಾತ್, ಅನಿ ನಿಶೆತ್, ಅನಿ ಹ್ಯಾ ಬಾಳ್ವಿಚ್ಯಾ ಯವ್ಜನ್ಯಾತ್ನಿಚ್ ರ್‍ಹಾವ್ನಕಾಶಿ, ತೊ ದಿಸ್ ಎಗ್ದಮ್ ಅಚಾನಕ್ ತುಮ್ಚೆ ವರ್‍ತಿ ಯೆಯ್ಲ್. 35ಪಾಸೊ ಪಡಲ್ಲ್ಯಾ ಸರ್ಕೊ ತೊ ದಿಸಾ ಹ್ಯಾ ಜಗಾತ್ ಹೊತ್ತ್ಯಾ ಸಗ್ಳ್ಯಾಂಚ್ಯಾ ವರ್‍ತಿ ಯೆತಾ. 36ಉಶಾರ್ ರ್‍ಹಾವಾ, ಅನಿ , ಹೆ ಸಗ್ಳೆ ಘಡ್ತಾನಾ ತುಮ್ಕಾ ಹ್ಯಾತುರ್‍ನಾ ಹುರ್ವುನ್ ಘೆವ್‍ಸಾಟ್ನಿ, ಅನಿ ಮಾನ್ಸಾಚ್ಯಾ ಲೆಕಾಚ್ಯಾ ಇದ್ರಾಕ್ ಧೈರ್ಯಾನ್ ಇಬೆ ರಾವಸಾಟಿ ಮಾಗ್ನಿ ಕರುನ್ಗೆಗೆತ್ ರ್‍ಹಾವಾ”, ಮಟ್ಲ್ಯಾನ್.
37ತ್ಯಾ ದಿಸಾತ್ನಿ ಜೆಜು ದಿಸ್‍ಬರ್ ದೆವಾಚ್ಯಾ ಗುಡಿತ್ ಲೊಕಾಕ್ನಿ ಶಿಕ್ವುನ್ಗೆತುಚ್ ರ್‍ಹಾಲೊ, ಅನಿ ಸಾಂಜ್ ಹೊಲ್ಲ್ಯಾ ತನ್ನಾ, ತೊ ಭಾಯ್ರ್ ಒಲಿವ್ ಮಡ್ಡಿ ವರ್‍ತಿ ಗೆಲೊ, ಅನಿ ಪುರಾ ರಾತ್ ತೊ ಥೈಚ್ ರ್‍ಹಾಲೊ. 38ಸದ್ದಿ ಸಕ್ಕಾಳಿ ಫಿಡೆ ಲೊಕಾ ಜೆಜುನ್ ಸಾಂಗಟಲ್ಲೆ ಆಯ್ಕುಕ್ ಮನುನ್ ದೆವಾಚ್ಯಾ ಗುಡಿಕ್ ಜಾಯ್ತ್.
The New Testament in Siddi Language © The Word for the World International and Siddi Translation Samithi, Mundgod, Uttara Kannada, 2024.
