Luqaasa Mishiraachcho 20
20
Yesusa Wolqqa Paaccana Shiiqida Oysha
(Mato 21:23-27; Mar 11:27-33)
1Issi gallas Yesusi asaa Xoossa Keeththan tamaarsishininne Mishiraachcho qaala sabbakishin qeese halaqati, xaafetinne dere Cimati shiiqettidi izakko yida. 2«Hayssa ne ooththizay oona shenenee? Nees shene immiday oonee?» giidi iza oychchida.
3Izikka isttas, «Tanikka inttena issi oysho oychchays; ane taas zaarite. 4Yohannisa xinqatay saloppeyee? Asappee?» gides.
5Isttika ba giddon issoy issaara, «Nu, ‹Yohannisa xinqatay saloppe› giikko izi nuna, ‹Histtiin aazas ammanibeekketii?› gaana. 6‹Asappe› giikko asay wuri Yohannisi nabe gididayssa ammaniza gishshas nuna shuchchara caddana» gi zorettida.
7Hessa gishshas, «Izi awappeko nu erokko» giidi zaarida.
8Yesusikka histtiko, «Tanikka aaza wolqqan ooththizaakko inttes yootikke» gides.
Woyne Atakilte Goshshanchchata Leemiso
(Mato 21:33-46; Mar 12:1-12)
9Qasseka Yesusi asaas leemisora, «Issaadey woyne mith tokkides; gade goyizaytas kira immidi hara dere biidi heen gam7ides.#Isa 5:1 10Kaxxiza bone wode kaththaafe ekki yaana mala ba ashkaratappe issaade gadeza goyida asataakko yeddiin gadaa goyizayti kiitetti bidayssa qoxxidi mela kushe yeddida. 11Kaaleththidikka hara ashkara yeddiin goshshanchchati ha7ikka oykki qoxxidinne kawushshidi mela yeddida. 12Ha7ikka kaaleththidi heedzdzanththo ashkaraa yeddiin goshshanchchati izakka qoxereththi madunththidi kare kessi yeggida.
13«Woyne miththaa goday, ‹Ha7i ay ooththoo? Oonee erizay ta keeha siiqiza ta naaza yeddidaakko iza bonchchandettoshaa?› gides.
14«Gido attiin biitta goyizayti naaza be7ida mala ba giddon, ‹Hayssi iza laattana naaza gidennee? Haa yiite; iza wodhidi biittaa laattoos› giidi zorettida. 15Woyne miththaa tokkidasoppe kare kessidi naaza wodhida. Histtiko ha7i woyne miththaa goday ha asata wosttanee? 16Yiidinne he goshshanchchata dhayssana; woyne mith tokkizasohoza haratas immana» gides; dereykka hessa izi gidayssa siyidi, «Hayssa malay hanoppo» gides.
17Yesusikka, «Isttako xeellidi, ‹Histtiin shuchchan keeththe keexxiza asati leqqi aggida shuchchay keeththas waanna hu7e gidana geetettidi xaafettida leemisozas birsheththay aazee?›#Maza 118:22 18Ha shuchchaa bolla kundiday wuri shuchchaan qoxettana; shuchchayka iza bolla wodhdhidaadey wurikka liiqana» gides.
Giira Qanxxo Gishshas Shiiqida Oysha
19Xaafetinne qeeseta halaqati hessi leemisozi istta bolla haasayettidayssa eridi heerakka iza oykkanaas koyida shin derezas babbida. 20Yesusa wolqqara haarizaytas aaththi immanaas iza doonappe keziza bala qaala demmidi oykkanaas kaalli kaalli naagidanne xillo asa misatidi iza kaalli iza doonappe yo7o naagiza asata izakko yeddida. 21Iza doonappe yo7o koyza asati Yesusa, «Astamaaree! Neni tumaa haasayzayssanne tumaa tamaarsizayssa; qasseka Xoossa oge ne tumu tamaarsizayssanne oonakka shaakka maaddonttayssa nu eroos. 22Gido attiin Qeesaares giira giiranaas bessizee? Bessennee?» giidi oychchida.
23Izikka isttas diza gene qofaa eridi, 24«Ane issi dinaare tana bessite, hayssi iza bolla diza medhazinne xaafettoyssi oonayssee?» gides. Isttika, «Qeesaareyssa» gida.
25Izikka zaaridi isttas, «Qeesaareyssa Qeesaares, Xoossayssa Xoossas immite» gides.
26Hessa gishshas izi haasayda qaalappe ekkidi asaa sinththan iza qaxxanaas dandaybeettenna; izi immida qaalan malalettidi co7u gida.
Hayqqidayta Denththa Gishshas
(Mato 22:23-33; Mar 12:18-27)
27Hayqqidayta denththi baa giza Saduqaawetappe issi issi asati Yesusaakko yiidi oysha shiishshida.#Hawa 23:8 28«Godoo! ‹Issaadey machcho ekkidi naa yelontta hayqqiko he hayqqidayssa machcheyo iza ishay ekkidi ba ishaa laattana naa izas yelo› giidi Musey nuus xaafides.#Zaare 25:5 29Histtiin laappun ishati deettes shin isttafe bayrazi machchidi naa yelontta hayqqides. 30Iza kaalozikka izaththo hayqqides; 31heedzdzanththozikka izo ekkides; laappunati wurikka he maccassayo ekkidi wurikka naa yelontta hayqqida. 32Wurseththan maccassaya hayqqadus. 33Laappunatikka ha maccassayo ekkidashin ha maccassaya wurseththan hayqqidayti dendiza wode iza awayssa machcho gidanee?»
34Yesusi isttas, «Ha alame nayti geleettessinne ekkeettes. 35Buro yaana alamen hayqqidayta denththaa demmanaas bessizayti gidikko gelettenanne ekkettenna. 36Istti kiitanchchata mala gidana gishshas hessafe guye hayqqettennanne hayqoppe denththa nayta gidida gishshas istti Xoossa nayta. 37Musey qeeri wora gishshas xaafettida taarikezan Godaa, ‹Abrahaame Xoossaa, Yisaaqa Xoossaa Yaaqoobe Xoossaa› guussan hayqqidayti dendanayssa bessees.#Kessa 3:6 38Wurikka izas de7oy diza gishshas izi paxata Xoossafe attiin hayqeththata Xoos gidenna» gides.
39Issi issi xaafeti, «Astamaaree! Lo7o gadasa» gida. 40Hessafe guye ay asikka iza oychchanaas xalibeenna.
Xoossay Tiydayssa Gishshas Shiiqida Oysha
(Mato 22:41-46; Mar 12:35-37)
41Hessafe guye Yesusi, «Asay Masihe waanidi izi Dawite naa gizee? 42-43Gaasoykka Dawiti ba xaafida mazamure maxaafatan, ‹Ta ne morkketa ne toho gars aaththana gakkanaas Goday ta Godaa, ne ta ushachchan utta› waanidi gidee?#Maza 110:1 44Histtiko Dawiti iza, ‹Godaa› gi xeygishe waani izas naa gidanee?» gides.
45Derey wuri siyishin bana kaallizaytas, 46«Gooshettiza adussa qamisa may7idi yuushshe dosizaytappe giyay dizason saroketeth koyzaytappenne Ayhuda Woosa Keeththan dhoqqa oydenne diggisason bonchchoso koyza xaafetappe naagettite. 47Haytanti am7eta keeth kallosizayta; asi istta beyana mala woosa adusseettes; heytantta iita pirday naagees» gides.
The Word for the World International
