Luqaasa Mishiraachcho 19
19
Yesusanne Zekkiyoosa
1Yesusi Iyarkko geetettizasora aadhdhi bishin, 2Zekkiyoosa geetettiza issi asi heen Yesusi biza oge bolla dees. Izikka qaraxa qanxxisizaytas halaqanne keehi dure asa. 3Izi Yesusa geetettizayssi awayssako beyanaas koyishin qaanththa asa gidida gishshassinne daro derey Yesusa kaalliza gishshas Yesusa beyanaas dandaybeenna. 4Yesusi he ogera aadhdhishin sinththe aadhdhidi oge bolla diza issi eththa miththa bolla kezides.#19:4 Issi issi bagga Gamoththo qaalan eththa mith gizayssa boobba geettes.
5Yesusi eththaa gars gakkidi dhoqqu histti xeellidi, «Zekkiyoosaa! Hach ta ne keeththan pe7anaas bessees; elela wodhdha» gides.
6Izikka eleli wodhdhidi ufayssan mokki ekkides. 7He wode heen izara diza asay hessa be7idi, «Nagaranchcha keeththan imato maana gees» giidi wurikka ba giddon zuuzumettida.
8Gido attiin Zekkiyoosi eqqidi, «Godoo! Tani taas diza miishshe ubbaafe bagga shaakkada manqotas immana; tani oonappeka wordora bonqqa ekkidaazi diikko oyddu kushe gujjada izaades immana» gides.
9Yesusikka, «Ha addezi Abrahaame naa gidida gishshas hach ha keeththaas paxateththi yides» gides.
10Hayssas gaasoykka Asa Nay haa yiday dhaydayssa koyanaassinne ashshanaassa.#Mato 18:11 11Asay hayssa siyishin leemisora haasaya oykkides; gaasoykka izi Yerusalaame gakkanaas matida gishshassinne asatas Xoossa Kawoteththi qonccana haniza misatida gishshassa.#Mato 25:14-30 12Hessa gishshas, «Issi kawoy ba kawoteththa shuumeteth ekki yaanaas haaho biitta bides. 13Ba ashkarata giddofe tammata xeygidi tammu minaane#19:13 Minaane: Minaaney miishshati ay lagge deexxizaakko eranaas maaddiza miishsha; qasseka miish gididi zal7eska maaddees; issi minaaney he wode issaades heedzdzu gallassas ooso damoza likke gidana. isttas immidi, ‹Ta simmada yaana gakkanaas hayssa miishshaan zal7ite› gides.
14«He dere asati qasse iza ixxida gishshas, ‹Hayssi addezi nu bolla kawotana mala koyokko› giidi as iza geedora kiita aaththi yeddida.
15«Gido attiin ha kawo naazi kawo gididi guye ba dere simmides. Kase bishe tammu minaane immida tammu ashkarati izi immida biraan zal7idi ay keena tirfisidaakko eranaas istta xeygides.
16«Isttafe koyrozi shiiqidi, ‹Godoo! Ne taas immida tammu minaaney hara tammu yelides› gides.
17«Godazikka iza, ‹Ne ammanettida ashkara; lo7o ooththadasa. Guuththa miishshan ne ammanettida gishshas tammu katamata ne haarana mala nees immadis› gides.
18«Nam7anththozikka izakko shiiqidi, ‹Godoo! Ne taas immida minaaneppe hara ichchashu minaaney wodhdhides› gides.
19«Iza godazi izas zaaridi, ‹Neni ayssana mala tammu katamati nees imettida› gides.
20-21«Qasseka hankko oosanchchay shiiqidi, ‹Godoo! Neni woththonttasoppe ekkizaade; zeronttasoppe maxizaadenne menxe iita as gidida gishshas ta nees babbada carqqan xaaxa woththida ne minaaneyo hey ekka› gides.
22-23«Iza godazi zaaridi izas, ‹Haysso iita oosanchchazoo! Ta ne qaalan nena zaara pirdays. Tani woththonttasoppe ekkizaadenne zeronttasoppe maxiza menxe iita as gididayssa eraasashin tani ta miishshaa yelora ekkana mala he miishshaan ooththana asatas aazas immabeekkii?› gides.
24«Iza godazikka heen eqqida asata, ‹Iza kusheppe minaaneza ekkidinne tammu minaaney dizayssas immite› gides.
25«Isttika zaaridi, ‹Godoo! Izas tammu minaaney deesko› gida.
26-27«Izikka, ‹Dizaades ubbaas haray gujettana; bayndaades kase dizayssi izappe ekettichchana.#Mato 13:12; Mar 4:25; Luqa 8:18 Gido attiin tani istta bolla kawotontta mala koyidayta hayta ta morkketa taakko haa ehidi ta sinththan shukkite› gi zaarides» gides.
28Hessa haasayi simmidi Yesusi Yerusalaame kezanaas isttafe sinththati bides. 29-31Dabrazayte geetettiza zumaa bolla diza Betefaagenne Bitaaniya geetettiza katamatakko matida wode bana kaallizaytappe nam7ata, «Heen intte sinththan diza qeeri katamayo biite; biidi katamayo intte gelishin oonikka toggi erontta issi qashetti diza hare gutte intte demmana; iza birshidi haa taas ekki yiite; inttena oonikka, ‹Aazas birsheetii?› giidi oychchiko, ‹Godaas koshshees giite› » gi kiittides.
32Kiitettidaytikka biidi izi isttas yootida mala hare gutteza demmida. 33Istti gutteza birshiin gutteza godati be7idi, «Aazas birsheetii?» giidi oychchida.
34Isttika, «Godaas koshshees» gida. 35Hare gutteza Yesusaakko ehidi ba may7o ubbaa gutteza bolla yeggidi hare gutteza bolla Yesusa togisida. 36Asay wurikka ba afala Yesusi biza oge bolla miccides.
37-38Dabrazayte zumaa bollara duge woththiza ogezakko matida wode qooday baynda derey ba be7ida malaata gishshas wurikka ufayssara ba qaala dhoqqu histtidi, «Godaa sunththan yiza kawoy anjjettidayssa; saroy salon, bonchchoy saloppe bolla salon gido» gides.#Maza 118:26
39Deraappe issi issi Farsaaweti Yesusa, «Astamaaree! Ha nena kaalliza asay gizayssa gontta mala hanqa» gides.
40Izikka isttas zaaridi, «Hayti co7u gidaakko shuchchatikka waassana» gides.
41-43Yesusi Yerusalaame matishe katamayo be7idi izis yeekkides. «Nees saro gidizaaz hach ne eridaakko aazee dizay? Ha7i ne ayfeppe qotettida gishshas ne morkketi heera haara nena giddoththidi un7eththana wodey yaana. 44Nenanne ne gibbe giddon nenara diza ne nayta ubbaa biitta kessana; shuchchaaka shuchcha bollafe laallontta aggettenna. Hessi wurikka Xoossi nena koyishin neni erontta aggida gishshassa» gides.
45Hessafe kaallidi Yesusi Xoossa Keeththe gelidi Xoossa Keeththa giddon zal7izayta kessides. 46Qasseka, «Ta keeththay Woosa Keeth gidana geetetti xaafettides; intte gidikko pangay diza gongolo histtideta» gides.#Isa 56:7; Er 7:11
47Wontiin wontiin Xoossa Keeththan izi tamaarsishin xaafetinne dere halaqati iza wodhanaas koyida.#Luqa 21:37 48Gido attiin derey wurikka izara oykettidi izi tamaarsizayssa kaalliza gishshas ooththanaazi isttas kirqi gides.
The Word for the World International
