SEEMTIRNAK 8
8
Tilik Cemnak
1Pathian cun Noah le amah thawn lawng sungih a ummi ramsa tinkim cu a thei ringring. Curuangah leilung tlunah thli a hranter ih tidai cu a kang vivo. 2Leilung hnuai ih tipi ihsin a hung putmi tidai pawl le van ihsin ruah a rung surnak van tukvirh pawl cu an kharphit aw thluh. Vanruah a han ih, 3tidai cu a kang vivo. Ni za le sawmnga hnuah tidai a ṭum deuhdeuh ih, 4thla sarihnak#8.4 Thla sarihnak timi cu ‘Tishri’ an ti ih September le October thla hrawng hi a si. ni hleisarih ni ah, lawng cu Ararat ram ih tlangpar ah a taang. 5Tidai cu a ṭum deuh vivo ih thla hranak#8.5 Thla hranak timi cu ‘Tebeth’ an ti ih December le January thla hrawng a si. ni khat ni ah tlangzim pawl an lang.
6Ni sawmli hnuah Noah cun lawng ih tukvirh a ong ih, 7tlang-ak pakhat a thlah. Tlang-ak cu a ra kir lo, leilung parih tidai a kaan thluh hlan lo a suk le a so ah a zam rero. 8Cule Noah in tidai a kang ngaingai maw ti thei dingah thuro pakhat a thlah. 9Asinain tidai in leilung a khuh thluh lai thotho ruangah thuro cu futnak a hmu thei lo. Cutikah Noah cun a kut a hei suah ih thuro cu lawng sungah a lak sal. 10Ni sarih a hngah hnu ah thuro cu a thlah sal. 11A cuih zanlam ah thuro cu a ra kir ih a hmur in Oliv thinghnah hring a rak thiar kha Noah in a hmu. Cutikah tidai a kang ngaingai zo ti ah Noah in a thei. 12Cun Noah in ni sarih a hngak sal ih thuro cu a thlah sal lala. Cuih ṭum cu a ra kir sal nawn lo.
13Noah kum zaruk le kum khat a ti kum, thla hmaisa bik,#8.13 Thla hmaisa bik: timi hi ‘Nisan’ an ti ih March le April thla hrawng hi a si. ni khatnak ni ah leilung parih tidai cu a kang thluh. A lawngkhuh a ong ih a zoh tikah leilung a ro thluh kha a hmu. 14A thla hnihnak, ni kul hluansarih ni ah leilung cu a ro ngah thluh.
15Cutikah Pathian in Noah hnenah, 16“Na nupi, na fapa pawl le an nupi pawl thawn lawng sung ihsin suak uh. 17Ramsa hmuahhmuah, vate, innzuat sumhnam le a vak theimi hmuahhmuah tiangin hruai thluh awla, leilung parah an ci zaih in pungzai hai seh,” ti ah a ti. 18Cuticun Noah cu a nupi le a fapa le an nupi pawl thawn lawng sung ihsin an suak. 19Cun hramlak ramsa siseh, innzuat sumhnam siseh, vate le a vak theimi hmuahhmuah tiangin, anmah an phun ciar a burbur in lawng sung ihsin an suak.
Noah In Thawinak A Pek
20Cule Noah cun Bawipa ih hrangah biakṭheng a don ih a thiangmi ramsa le vate tla phunkhat in pakhat ciar a lak ih meisa biakṭheng parah Pathian hrangah mei-ur thawinak a pek. 21Noah ih pekmi rimthaw cu Bawipa in a theih tikah a thinlung in, “Minung ih thiltuahmi ruangah leilung cu siat ka serh nawn lo pei. Minung cu an no lai ihsin ṭhatlonak lawnglawng an ruat ti ka thei. Sikhalsehla atuih ṭum bangtuk in ziangtik hmanah a nungmi pawl ka siatsuah nawn lo pei.
22Leilung a him sung hmuahhmuah,
Thlaici tuh caan le
rawl lak caan a um ding;
Khawsik le khuahlum,
fur le ṭhal caan a um ding;
Sun le zan a um ding ih,
A cem nawn lo pei,” ti ah a ti.
Falam Bible Revision © Bible Society of Myanmar, 2002.