SEEMTIRNAK 7
7
Tilik
1Noah hnenah Bawipa in, “Nan sungte in lawng sungah lut uh; ziangahtile leilung mi hmuahhmuah lakah nangmah pakhat lawng ka mithmuh ah a dingmi na si. 2Saram thiang ei ṭha phunkim in phunkhat ah khuah sarih ciar keng aw; asinain a thiang lo ramsa cu phunkhat ah a nu le a pa khuah khat ciar lawng la aw. 3Vate khal a phunkim in phunkhat ah khuah sarih ciar in keng aw. Himi pawl cu leilung ih cithlah saaltu dingah an si. 4Tuih hnu ni sarih ah leilung parah ni sawmli le zan sawmli sung ruah ka surter ding ih ka tuah cia a nungmi hmuahhmuah a siatsuah thluh ding a si,” ti ah a ti. 5Cule Bawipa ih thupekmi vek cekci in Noah cun a tuah ṭheh.
6Tilik a thawh tikah Noah cu kum zaruk a si. 7A nupi le a fapa pawl le an nupi pawl thawn tilik ihsin him dingah lawng sungah an lut. 8Ramsa le vate a thiang siseh thiang lo siseh a phunkim in a nu pakhat le a pa pakhat ciar, 9Pathian ih thupek vekin Noah thawn lawng sungah an lut. 10Ni sarih hnuah leilung tlunah tilik a tlung.
11Noah kum zaruk a kim hnu thla hnihnak#7.11 Thla hnihnak: cu ‘Ziv’ thla an ti ih April le May thla hrawng hi a si. ni hleisarih ni ah, leilung hnuai ih tipi cu hmunkip in an put ciamco; cun van tukvirh hmuahhmuah a ong-aw ih ruah a thlet in a thle aw; 12cuticun leilung parah ni sawmli le zan sawmli ruah cat loin a sur thlurthlo.
13Cuih ni ah Noah le a nupi, a fapa pathum Shem, Ham le Jafet le an nupi pawl cu lawng sungah an lut. 14Anmah thawn hmun khatah hramlak ramsa siseh, innzuat ṭilva siseh, a vak thiammi hmuahhmuah le vate a phunphun tla an lut. 15Ramsa a phunkim in, a nu le a pa ciar in, Noah thawn lawng sungah Pathian ih thupekmi vekin an lut. 16Cule Noah a luh ngah in Bawipa in sangka a khar.
17Ni sawmli ti a lik hnu ah tidai a tam dutdo deuhdeuh ih an lawng cu tidai in a phuanter. 18Tidai a thuk deuhdeuh ih tidai parah lawng cu a phuan. 19Tilik cu a thuk sinsin ih tlang saangbik pawl khal a khuh thluh. 20Cuih tlunah tidai cu tlangzim tlunah pi kul hluannga a kai. 21Leilung parih a nungmi hmuahhmuah, minung siseh, ramsa le vate siseh, cucik kharbok tiangin an thi thluh. 22Leilung parih nunnak a neimi hmuahhmuah in an thi thluh. 23Leilung parih a vak thiammi hmuahhmuah - minung le ramsa le vate a fate bik tiangin Bawipa in a thihter thluh. Siatsuah lomi cu Noah le amah thawn lawng sungih a ummi lawng an si. 24Tidai cu lei parah ni za le ni sawmnga sung ṭum loin a um.
Falam Bible Revision © Bible Society of Myanmar, 2002.