BOTHUBO 42
42
Joseph Pamu noqo no Egypt lo Wu
1Kughou Jacob no Egypt lo athi je kepu ani pi ithive keno, pa no pa nuliqo vilo pi, “Nongu ye kushiye lakhino lakhi kujukile ani kea?” 2Pa no pi, “Julo, Egypt lo athi je kepu anie pi I no chiluvae. Iqilo eno tilauno ningu ghenguno athi qhülo, tishianguno ningu ye thimo no xülu nani.” 3Ikehu Jacob nuli pano chighi no Egypt lo athi qhüniye iqive. 4Ikemu Jacob no pa nu Benjamin, Joseph thiküzüu ye pamu noqo gholo puwu moe, kughengu pa ghüzave kepu shilu nosa kehu pa ye msaveke. 5Ikehu kütami athi qhüniye wukemi gholono Israel nuliqo ye wuve, kughengu Canaan yeghi lo püqümiye ake.
6Tipa ghuloki lo Joseph ye Egypt yeghi lo angh shiae. Ayeghi lo timi kümtsü lau athi jetsü akeu huye pa ke. Joseph pamu noqo ghi ighi no panongu gi ayeghi lo pishiqho pe pa zülo itsaqi. 7Joseph ye pa mu noqo ithulu no panoqo michiluve, ikemu pa no shoinami toi panoqo peitha eno mkamghai panoqo pütsae. Pa no pi, “Nongu ye khilau no ighi ani kea?” Panongu no pi, “Achuqupu qhüni ye Canaan yeghi lono ighi anie.” 8Joseph ye pa mu noqo michiluve, ikemu panoqo ye pa michimlae. 9Eno Joseph no panoqo pumo keu samo kümsülue. Pa no panoqo vilo pi, “Nongu ye pukujumi; nongu ye ayeghi hipau kümsa shi akeu puju niye ighi anie.” 10Panongu no pa vilo pi, “Moe, I mpeu, o qemiqo ye athi qhüniye ighi ani. 11Ningu kümtsü timi lakhi nuliqo ke. Ningu ye amikuchomi. O qemiqo ye khilemu pukujumi kumoe.”
12Pa no panoqo vilo pi, “Moe, ayeghi hipau kümsa shi akeu puju niye ighi ani.” 13Panongu no pi, “Ningu, o qemiqo ye athiazü chighikini ke, Canaan yeghi lo timi lakhi nuliqo ke, eno lakhi ye kühavae.” 14Ikemu Joseph no panoqo vilo pi, “I no nongu vilo pive ketoi, nongu ye pukujumi ke. 15Hipau vecheo nongu pejuni: Pharaoh küxü vecheo pi ani, nongu thiküzüu ayitiu hile ighi moke kutolo nongu ye hipa-a lono wumo nani. 16Nongu dolo lakhi puwu no pa pelo nongu thiküzüu saighi pelo, eno kütami ye khathave aghini, tishino tsala nongu lolo kuchou ani kemo keno nongu tsa pejuni. Tikumo aye, Pharaoh küxü vecheo pi ani, nongu ye mtsüqheino pukujumi ke.” 17Eno pa no panoqo kümtsü atsala küthü khathape qhive.
18Atsala aküthüni Joseph no panoqo vilo pi, “Hi shilo eno nongu ye xülu nani, kughengu ni ye Alhou sümsa chenie: 19tsala nongu no amikuchomi shi aghi aye, nongu thiküzüu lakhi pelo khile nongu khatha püani keno tile ngo aghi pelo, eno kütamiqo no nongu kibo lo püqümiye akeu ghenguno athi xapusü wolo, 20eno nongu thiküzüu ayitiu I lau saghi lo. Tishino nongu tsa piqhijuni, eno nongu ye thimo nani.” Panongu no tishive. 21Tithiu panongu lakhino lakhi vilo pi, “Kuchou loye ningu ye ni thiküzüu vehu lo akipimi anie, ningu no pa ngulho ghime kitikhi ithulue, pa no ningu vilo qhüiniju kemu ningu no initsü moveke. Tighenguno aghime kitikhi hipau ningu shou ikughi anie.” 22Tile Reuben no panoqo khochile, “Apu shou axine shikelo pi I no nongu vilo pike kumo? Ikemu nongu no I tsa initsü moke. Ikehu itehi ye pa ji no ningu shou ikughi anie.” 23Joseph ye panongu vethalu anie pi panongu ye ithimoe, kughengu panongu dolo atsa pekili kemi ake. 24Tileno pa ye panongu launo tsüghüve no qae. Pa no ideighi no panongu pütsa. Eno pa no panoqo gholono Simeon sünhe luve no pa nhethe lono tsüghave. 25Panoqo pulukho lo athi shepichhi tsü, pütüta pulukho lo pisa süchileve tsü, eno aghüzüla ghenguno achuqupu tsü penike Joseph no azah tsüve. Eno hitoi panoqo lau shivetsü.
26Tithiu panongu no athi pesü panoqow khurha shou puku no wuve. 27Eno aghuno-a tove kelo panongu lakhi no achu khurha tsüniye apulukho khaqhi, ikelo apulukho kichi lo paw pisa aghikeu ithulu. 28Pa no pa thiküzümi vilo pi, “Iw pisa süchile püa tsüae; hi I pulukho kichi lo anie!” Tile panongu mlo ye hauve, eno panongu ye msa khokhoshi lakhino lakhi lau ighowo pi, “Alhou ye ningu lau kiu shivetsü akea?”
29Kughou panongu no Canaan yeghi lo panoqo papu Jacob lau ighi keno, panongu no pa vilo kiu shive keno kümtsü pi, 30“Ayeghi tilehi ampeu, timi huno mkamghai ningu pütsa no ningu ye ayeghi pukujumi kepi pülüpüsae. 31Ikemu nino pa vilo pi, ‘Ningu ye amikuchomi ke; ningu ye khilemu pukujumi shi püamoe. 32Ningu ye athiazümi chighikini, ningu papu nuliqo ke. Lakhi ye kühavae, eno ayitiu ye ishi tsala lo Canaan yeghi lo ningu papu gholo anie.’ 33Tileno ayeghi tile ampeu huno ningu vilo pi, ‘Hipau vecheo nongu ye amikuchomi kepi I no ithiveni: nongu thiküzüu lakhi qhivelo, eno nongu kibo lo püqümiye akeu ghenguno athi xapu wolo. 34Nongu thiküzüu ayitiu I lau saighi lo. Tithiuno nongu ye pukujumi kumono amikuchomi kepi I no ithini, eno I no nongu thiküzüu nongu lau khaqhiphe tsüni, eno nongu ye ayeghi hilehi kilhikishi shilu nani.’”
35Panongu no akho leqhi kelo pütüta pulukho lo pisa kütsa aghi. Kughou panongu eno panongu papu no pisa kütsa ithulu keno, panongu ye msave. 36Panongu papu Jacob no panoqo vilo pi, “Nongu ghenguno I nuliqo pühavae: Joseph kühavae, Simeon kühavae, eno itehi nongu ye Benjamin sawuve niye ani. Hi kümtsü I shou ikughi anie.” 37Tileno Reuben no pa pu vilo pi, “Tsala I no o lau pa sachile ighi move aye, I nu pama pithive lo. Pa pesü I u lo kulhuqhi tsülo, eno I no o lau pa sachile ighini.” 38Ikemu Jacob no pi, “I nu ye nongu gholo iqimo nani, kughengu pa mu ye thivae, eno pa likhive ake. Nongu no kicheghüzü lo wuniye akeu lo tsala pa lau küsakushopu shive aye, nongu no ni asa kümpau pelo amlo ghimeshi Kithigha lo wuve peae.”
The Bible Society of India
© 2023, Used by permission. All rights reserved. More
