BOTHUBO 43
43
Joseph Pamu noqo no Egypt lo Ideighi
1Tipa ghuloki lo püqümiye aghakhu lo ihulove. 2Eno kughou panongu no Egypt lono athi peighi keu chukhave keno, panongu papu no panoqo vilo pi, “Itaghi wuno ningu ghenguno achuqupu kitila qhüsüghi lo.” 3Ikemu Judah no pa vilo pi, “Timi huno akumto shi ningu ghutu no pi püani, ‘Nongu thiküzüu nongu gholo saghi move aye, nongu ye I gi ithulumo nani.’ 4Tsala nono ni thiküzüu ningu gholo puwu aye, nino wuni eno achuqupu o ghenguno qhüpe ighini. 5Ikemu nono ni thiküzüu puwu move aye, ningu ye iqimoe, kughengu timi huno ningu vilo pike, ‘Nongu thiküzüu nongu gholo saghi move aye, nongu ye I gi ithulumo nani.’” 6Israel no pi, “Kushiye nongu ye timi tipau vilo athiküzüu kütau anie pikeu lono I peitha püsa ani kea?” 7Panongu no khochile, “Timi huno tsaqüi ningu eno ni sholokumi ghili ighiju no pi, ‘Nongu papu ye xüaphi kemo? Nongu ye athiküzüu kütau anima?’ Nino pa vilo kiu pi keno ti ye ighikuju khochile tsükeu ke. Pa ye ningu vilo, ‘Nongu thiküzüu saiqighi lo’ ipi nanie pi ningu ye ithi akeshea?” 8Eno Judah no pa pu Israel vilo pi, “Apu I gholo puwulo, nino itehi chewuni, tishianguno no ghi, ningu ghi eno ni tianuliqo ghi thimo no xülu penie. 9Pa sükushopu ghenguno I no ashoqhi lakhiae. I küxü no pa züqhu shini. Tsala I no o lau pa saighi no o zülo qhimove aye, I no pülhapuju atiche xapuni. 10Tsala ningu no munumo aye, ningu ye ghuthu kini idechile ighive kepu shivae.”
11Tileno panongu papu Israel no panongu vilo pi, “Tsala tishi kepu shi aye, hi shilo: aghakhu lo xathi akiviu hami, nukümtshau kitila, akhingozü kitila, ata, axokütsüngü, pistachio eno almond lothi ishi nonguw süqhu lo süpe no agho shi pewo timi hu tsülo. 12Nongu u lo pisa püzüu jehi kini küghüsü no pewulo. Nongu pulukho kichi lo süchile püaghi keu pisa nongu gholo pechile wulo. Ti ye juzüve keu shi aghiluvi ke. 13Ithulo, eno nongu thiküzüu ghi sawulo, timi lau itaghi wulo. 14Akughushu Lhou pelo timi hupau zülo küpükini nongu tsü peniu, eno pa pelo nongu thiküzüu lakhiu ngo Benjamin kighide puwo peniu. I ghengu ye, tsala I no I tianuli pühave kepu shive namu pühave niae.”
15Ikehu panongu no agho eno pisa püzüu jehi kini pesü Benjamin sasü Egypt lo iqive eno Joseph zülo puthughoe.
16Kughou Joseph no panoqo gholo Benjamin ithulu keno, pa no pa kilo aghini kishiu vilo pi, “Timiqo I kilo sailoghi lo, eno lhoxü lakhi heqhi no aghulhu kutolo, kughengu puchomghü lo panongu ye I gholo chusho nani.” 17Timi huno Joseph no pi ketoi shi eno panoqo Joseph kilo sailoghi. 18Panongu ye msave kughengu panoqo sasü Joseph kilo iloghive ke, eno panongu no pi, “Hi ye pisa, khikhi atüghüu lo ningu kho lo süpüaghi keno tipau ghenguno ningu sailoghi ani, tipau ghenguno ningu ghimeqhi no pa qemi shivepe eno niw khurhaqo küghaluve niye shi anie.” 19Tighenguno panongu no Joseph kilo aghini kishiu lau wuno ahukikha lono pa pütsa, 20eno pi, “O I mpeu, ningu no achuqupu qhüniye atüghüu lo ighie. 21Eno kughou nino aghuno-a lo apulukho kuqho keno pütütaw pisa kuchopu apulukho kichi lo aghi. Tighenguno ningu no itaghi tipau peighi ani, 22eno ningu ye achuqupu qhüniye pisa kütau ghi peighi ani.” 23Pa no khochile, “Nongu ye msa kevino aloino lo. Nongu Lhou eno nongu papu Lhou no nongu ghenguno akinibo nongu pulukho lo süve tsüae. Nonguw pisa ye I no ithulu ke.” Tithiu pa no panongu lau Simeon saipeghi. 24Timi huno Joseph kilo panoqo sailoghi no azü panoqo tsü, panongu no apukhu qhuve, eno kughou pa no panoqow khurha achuqupu tsüve keno, 25panongu no puchomghü lo Joseph ighini keu ghenguno aghochhe kuto, kughengu panongu ye tilehi achuqupu chu nanie pi chilu ke.
26Kughou Joseph no aki lo ighi keno, panongu no pa lau agho peighi akeu süghi no pa zülo ayeghi lo pishiqhoe. 27Eno pa no panongu ye kishi ani keno ighiju no pi, “Nongu papu, kitemi hu, khuu ghili nongu no pi keno, pa ye akivishi anima? Pa ye xüaphi kea?” 28Panongu no pi, “O qeu, ningu papu ye akivishi ani; pa ye xü aphie.” Eno panongu no pano kütsü pishiqho no qhoqhünhe. 29Pa no pa nhethi tsüpuku kelo pa thiküzüu Benjamin, paza nu ithulu no pi, “Hi ye nongu thiküzüu ayitiu, khuu nongu no I vilo pi akeno, pa keshea? Alhou pelo o lau küpüqhiyi tsü peniu, I nu!” 30Tishino Joseph ye mtazü khalau ipeve, kughengu pa thiküzüu ghenguno pa mlo ighiqhiyive, eno pa ye qa kepu-a phusü wuve. Pa no pa chebo lo ilove no tilau no qae. 31Tithiu pa no agi müzüve no ipeghi. Pa likhi pa ghasü ghi pi, “Achuqupu peighi lo.” 32Panongu no Joseph kütashi kutotsü, eno pa thiküzümi ghenguno kütau lo kutotsü eno Egyptmi pa gholo chuche keqo kütashi kütau lo kutotsüe, kughengu Egyptmi ye Hebrewmi gholo chusho chemoe, kughengu ti ye Egyptmi ghenguno aphikümqhüpu ke. 33Panongu dolo anoghiu no pa punuchipiu kiqi lono eno ayitiu no pa lhothe kiqi lono pa zülo iqae. Eno panongu no akichiqhiyi lakhino lakhi jukile. 34Achuqupu saje hami Joseph ghulhu-a lono pewo panongu tsü, ikemu Benjamin saje ye kütami nguno ghuthu pungu no alaushi tsüe. Panongu no chusho eno pa gholo aloino luve.
The Bible Society of India
© 2023, Used by permission. All rights reserved. More
