Mateus 17
17
Yeesus, Mooses un Eliias
Markus 9.2-13; Lukas 9.28-36
1Seks taache tëm noo, is Yeesus uf en hooche përich kang, un hot ploos Pheeter un ti priiter Tiaako un Yohan mit sich kehool. 2Too, hon tii kesiin an Yeesus en xayn ferënerung paseere: sayn kesicht is klënsich kep wii ti sun, un sayn tsaych is ways kep wii es licht. 3Un ti tray tisiple hon Mooses un Eliias kesiin am fertseele mit Yeesus. 4Tan, saat Pheeter fer Yeesus:
— Wii kuut tas meyer too sin, Hër! Wëns tuu wilst, xtele ich tray hite uf too uf tëm plats: een fer tich, aner fer Mooses un en aner fer Eliias.
5Wii Pheeter noch am xpreche waar, hot en klënsich wolek se ketëkt, un fon tëm is en xtim khom, woo saat:
— Tas is mayne liipe Soon, woo mich fiil frayt kept. Heyert was tee saat!
6Wii ti tisiple ti xtim keheyert hon, hon se soo en pang kriit, tas se sich kekniit hon un sayn kesicht pis an te potem niter kehal. 7Yeesus is khom, hot se aan kethupt un saat:
— Xtayt uf un praycht khee pang hon!
8Tan hon se um sich rom kekukt un hon nimant kesiin, sonst Yeesus.
9Wii se te përich runer am keen waare, hot eyer tii ortnung kep:
— Tuut fer nimant fertseele was teyer kesiin hot pis te Soon fom Man noch mool peleept kept.
10Tan hon ti tisiple kefroot:
— Warom saan ti Kesets mayster tas Eliias eyerxt khome mus?
11Yeesus hot keantwort:
— Is woer tas Eliias khomt fer ales prepareere. 12Awer, ich fersichere aych tas Eliias xon khom is, un hon em net erkhënt, awer hon em kekweelt wii se wolte. Soo tuun se aach te Soon fom Man kweele.
13Tan hon ti tisiple ferxtan tas Yeesus iwer Yohan Te Taafer, am xpreche waar.
En puupche kept kuriert
Markus 9.14-29; Lukas 9.37-43a
14Wii se ticht an tas kroos folek khom sin, is en man ticht pay Yeesus khom, hot sich foer iim kekniit 15un saat:
— Hër, petauer mayne soon! Tee is epilëptik un kriit soo xtarke atake aan, tas eyer fiil mools ins fayer falt ore ins waser. 16Ich hon em keprung fer tayn tisiple tas tii em kuriere solte, awer tii hon tas net kemach kriit.
17Yeesus hot keantwort:
— Xlechte layt un oone klaawe! Pis wan sin ich pay aych? Pis wan mus ich aych aus hale? Pring tas puupche heyer!
18Tan hot eyer en ortnung kep, te temoon is raus kang, un im selwiche momënt is tas puupche kuriert kep.
19Tëm noo, sin ti tisiple ticht pay Yeesus khom, in priwaat, un hon kefroot:
— Warom hon meyer tee temoon net raus kextoost kriit?
20Yeesus hot keantwort:
— Waar wayl teyer net kenuuch klaawe hat. Ich fersichere aych tas tas woer is: wën teyer klaawe hët, wen tas aach soo kleen weyer wii en mustart soome weyer, khënt teyer saan fer tee përich: “Kee too wech un kee too riwer”, un tee teet keen. Un teyer het tan ti macht fer aler tings se tuun! 21[Awer tii sort teemon khan ploos aus kextoost kewe mit kepeet un faste.]
Yeesus xprecht noch mool iwer sayne toot un sayn peleepung
Markus 9.30-32; Lukas 9.43b-45
22Eene taach waare ti tisiple fersamelt in Kalilëya, un Yeesus saat tëne:
— Te Soon fom Man wërt ap kep in te mënxe sayn hënt, 23un tii tuun iim umpringe; awer, tray taache tëm noo kept eyer witer peleept.
Un ti tisiple sin aarich traurich kep.
Ti xtayer fom Thëmpel
24Wii Yeesus un sayn tisiple an ti xtat Kafarnaum aan khom sin, sin ti xtayer kaseerer fer Pheeter frooe kang:
— Tuut ayre mayster net ti xtayer fom Thëmpel petsaale?
25Pheeter hot keantwort:
— Toch, eyer petsaalt tas!
Tëm noo is Pheeter in tas haus kang, awer, eep eyer etwas kesaat hot, saat Yeesus:
— Simon, was mënst tuu? Weyer petsaalt ti xtayer fer ti kheeniche fon tee welt? Sin tas ti layt fom lant ore sin tas ti auslëner?
26Pheeter hot keantwort:
— Sin ti auslëner.
Yesus saat:
— Richtich. Tas petayt tas ti inwooner khee xtayer petsaale prayche. 27Awer, meyer wole ti layt net pelaytiche. Tesweche, kee pis an ti lakoo, xmays ti angel un tsii te eyerxte fix woos tuu fangst. In tëm sayn maul finst tuu en nikel. Tan, kee un petsaal mit tëm mayn xtayer un tayn.
2022 Sociedade Bíblica do Brasil
