Mateus 16
16
En wuner ferlange
Markus 8.11-13; Lukas 12.54-56
1Phaar fariseyer un phaar satuseyer sin mit Yeesus xpreche kang. Tii wolte en proop xteele keeche iim un, tesweche, hon se ferlangt eyer solt en wuner mache fer se tsayche tas sayn macht wërklich fon Hërkot kheemt. 2Awer Yeesus antwort:
— Foer nacht, saat teyer: “Meyer kriin kuut weter wayl te himel root is.” 3Un, moynts frii, saat teyer: “Es kept reen wayl te himel tunkel root is.” Te himel am kuke, wist teyer wii tas weter khomt. Un wii soo wist teyer net aus leye was ti sinaale fon tëne tsayte saan wole? 4Tas folek fon hayt tsuu taach is mool xlecht un oone klaawe! Teyer sayt mich en wuner am ferlange, awer em Yoonas sayne wuner is te eensichste sinaal woo fer aych kep wërt.
Tan is eyer too raus un is fort kang.
Te fariseyer un te satuseyer sayne heep
Markus 8.14-21
5Wii ti tisiple pis an ti aner sayt fon te lakoo iwer kefaar sin, hon se ferkes proot mit nëme. 6Yeesus saat:
— Playpt in acht un past uf mit te fariseyer un te satuseyer sayne heep.
7Tan hon ti tisiple aan kefang se saan eene fer te anere:
— Tee saat tas wayl meyer khee proot mit keprung hon.
8Yeesus hot keheyert was tii am saan waare un hot kefroot:
— Warom sayt teyer am xpreche wayl khee proot is? Wii kleen is te klaawe woo teyer het! 9Het teyer tas imer noch net ferxtan? Tënkt teyer nime traan an ti finef proote woo ich ferteelt hon fer finef tausent mëner? Wii fiil khërep het teyer kefilt? 10Un ti siwe proote fer fier tausent mëner? Wii fiil khërep het teyer kefilt? 11Ferxteet teyer net tas ich net iwer proot am xpreche sin? Past uf mit em heep fon te fariseyer un fon te satuseyer!
12Tan hon ti tisiple ferxtan tas eyer net am saan waar tas se uf pase solte mit tëm heep woo fer proot mache penutst kept, awer mit te unterichte fon te fariseyer un fon te satuseyer.
Pheeter saat weyer Yeesus is
Markus 8.27-30; Lukas 9.18-21
13Yeesus is noo te rechioon kang woo ticht an te xtat Sesarëa fon Filip playpt. Too hot eyer fer ti tisiple kefroot:
— Weyer saat tas folek tas te Soon fom Man weyer?
14Tii hon keantwort:
— Phaar saan tas teyer Yohan Te Taafer, sayt; anere saan tas teyer Eliias sayt; un anere saan tas teyer Jeremias sayt ore en anere profët.
15Yeesus hot kefroot:
— Un teyer? Weyer saat teyer tas ich sin?
16Simon Pheeter antwort:
— Teyer sayt te Kristus, te Soon fom leewente Hërkot.
17Yeesus saat sicher:
— Simon, soon fon Yohan, tuu pist kliklich wayl tii woerheet tich net reweleyert kep is pay khee ëne mënx, awer is khom tirekt fon mayne Fater, woo im himel is. 18Also, ich saan tich: tuu pist Pheeter, un uf tëm xteen paue ich mayn Khërich, un net mool te toot khan se phake. 19Ich kewe tich ti xlisle fom Himels Raych; was tuu tsuu mache tuust uf te eyert kept im himel tsuu kemach, un was tuu uf machst uf te eyert, wërt uf kemach im himel.
20Tan, hot Yeesus keortnet tas ti tisiple fer nimant fertseele solte tas eyer te Kristus weyer.
Yeesus xprecht iwich sayne toot un sayn peelepung
Markus 8.31—9.1; Lukas 9.22-27
21Fon too aan foran, hot Yeesus aan kefang kans klaar se saan fer sayn tisiple:
— Ich mus noo Yeruusalëm keen un too mache ti yute fiirer, ti xëfe fon te priister un ti Kesets leerer tas ich fiil layte mit mache. Ich kewe umkeprung un, am trite taach, wëre ich peleept.
22Tan hot Pheeter Yeesus pisye neewe kenom un hot aankefang em se xteere, am saan:
— Tas Hërkot soo was net in kept! Tas tuut nii mit aych paseere!
23Yeesus hot sich rom kewënt un saat fer Pheeter:
— Kee foer mich wech, Satanaas! Tuu pist wii en xteen in mayne weech fer mich xtërtse mache, wayl tuu tënskt wii en mënx un net wii Hërkot tënkt.
24Un Yeesus saat fer ti tisiple:
— Wën yemant mayn aanhënger sin wil, ferkes sayn aychne interese, playp fërtich fer se xtërwe soo wii ich xtërwe tuun un khom mit mich. 25Also, weyer sayn aychne interese foer tsiit wërt nii es echte leewe kriin; awer, weyer sich selepst ferkest weche mich wërt es echte leewe hon. 26Was nutst yemant ti kans welt fertiine, awer tas echte leewe ferleere? Wayl es kept niks woo petsaalt kewe khan fer tas leewe tsurik hon. 27Also, te Soon fom Man wil khome im kloor fon sayne Fater mit tëm sayn ëngle un tan tuut eyer yeete ëne peloone tëm noo was tee fërtich keprung hot. 28Ich fersichere aych tas tas woer is: too hier sin phaar persoone woo net xtërwe tuun eep se te Soon fom Man siin khome als Kheenich.
2022 Sociedade Bíblica do Brasil
