Mateus 15
15
Yeesus un te yute sayn tratitsioone
Markus 7.1-13
1Too, sin phaar fariseyer un phaar Kesets mayster fon Yeruusalëm khom fer mit Yeesus se xpreche un hon tëm kefroot:
2— Warom tuun tayn tisiple ese oone ti hënt se wexe, soo am neewe lose ti unterichte woo mer fon foerkhomer kriit hon?
3Yeesus hot keantwort:
— Un warom tuut teyer em Hërkot sayn kepoote net aan heere un keet ayre aychne unterichte noo? 4Wayl Hërkot saat: “Rexpekteyer tayne papa un tayn mama!” Un saat aach: “Sol toot kemach kewe tee woo sayne papa ore sayn mama ferfluuche tuut!” 5Awer teyer untericht tas, wën yemant etwas hot woo khënt penutst kewe fer sayn eltre helfe, in en sinaal fon rexpekt, awer saat: “Ich hon tas fer Hërkot hiin keopfert”, 6tan prauch eyer net sayn eltre helfe. Soo kept teyer khee acht fer em Hërkot sayn mensaaj fer ayer aychne untericht noo keen. 7Xaynhayliche! Isaiias waar richtich wii eyer iwer aych tas saat:
8“Hërkot saat: Tas folek mit sayn munt saat tas se mich rexpekteere,
awer in te woerheet is tëne sayn hërts wayt wech fon mich.
9Tëm folek sayn aan peetung is unnutslich,
wayl tii unterichte ti mënxliche kesetse
wii wën tas mayn kepoote weere.”
Yeesus xprecht iwer ti unraynichkheet
Markus 7.14-23
10Yeesus hot tas folek keruuf un saat:
— Heyert un ferxteet! 11Is net was torich es maul rin khomt woo macht tas yemant net en sauwere mënx is. Kraat es keeche teel, was aus em maul raus khomt is was khan mache tas en person net sauwer is.
12Tan sin ti tisiple tichter khom un saate:
— Weest teyer tas ti fariseyer skantaliseyert kep sin mit was teyer kesaat hat?
13Yeesus hot keantwort:
— Yeete plans woo mayne Fater, woo im himel is, net keplanst hot, kept aus keropt. 14Khimert aych net mit te fariseyer. Sin plinte fiirer. Un, wën en plinte anere plinte fiert, wërt paesere tas ti tswaay ins loch fale.
15Tan hot Pheeter ferlangt:
— Tuu mool ausleye tas was teyer tefoer kesaat het.
16Yeesus saat:
— Het teyer tas aach noch net ferxtan? 17Was rin keet torich em maul keet an te maache un tëm noo keet tas aus em khërwer. 18Awer, was aus em maul khomt, khomt fom hërts. Is tas woo macht tas en person net sauwer playpt. 19Wayl is fom hërts woo ti xlechte ketanke khome, ti toot krimes, ti eepruche, ti seksual imoraliteet, tas xteele, tas liye un tas xlecht xpreche fon te anere. 20Is tas tings woo macht tas yemant net sauwer is. Awer ese oone ti hënt wexe lost nimant trekich.
Ti auslëner fraa
Markus 7.24-30
21Yeesus is fon too fort kang un is pis an ti rechioon fon te xtet fon Tiiro un Sitoom kang. 22Selich kananeyx fraa, woo in tëm lant kewoont hot, is ticht khom un xraayt:
— Hër, Soon fon Dawii, petauer mich! Mayn meetche is krislich tomineyert fon en temoon!
23Awer Yeesus hot niks keantwort. Tan sin ti tisiple ticht pay em khom un saate:
— Xik ti fraa fort, wayl tii is uns noo am khome, imer am xraaye!
24Yeesus antwort:
— Ich sin kexikt kep ploos fer ti ferloerne xoofe fom folek fon Israel.
25Tan is se khom, hot sich an Yeesus sayn fiis kekniit un saat:
— Hër, helef mich!
26Yeesus saat:
— Is net richtich es proot fon sayn khiner wech hoole un te hunt hiin xmayse.
Ti fraa hot keantwort:
27— Yio, Hër, awer sokaar ti huntcher frese ti krimle woo fom tix fon sayne hër runer fale.
28Yeesus saat:
— Fraa, tuu host fiil klaawe! Tas es kemach kept was tuu wilst!
Un in tëm momënt is tëm sayn tochter keehelt kep.
Yeesus kuriert fiil layt
29Yeesus is fon too fort kang pis an ti Kalilëya lakoo. Tëm noo is eyer en përich ruf kang un hot sich too hiin kesetst. 30Un kroose foleke sin pis pay Yeesus khom am pringe laame, plinte, xprooch loose un fiile anere kranke, woo foer sayn fiis hiin ketuun kep waare. Un eyer hot se al kuriert. 31Tas folek hot sich ferwuneert wii se kesiin hon tas ti xprooch loose am xpreche waare, ti laame waare kuriert un sin kang, un ti plinte waare am siin. Un tas kanse folek hot Israël sayne Hërkot keloopt.
Yeesus tuut en aner kroos folek neere
Markus 8.1-10
32Yeesus hot sayn tisiple keruuf un saat:
— Ich taure ti layt wayl tas sin xon tray taache woo ti pay mich sin un hon niks fer se ese. Ich wil se net fort xike mit hunger, wayl ti khënte um fale fon xwachheet iwer te weech.
33Ti tisiple hon kefroot:
— Wii sole meyer uf tëm unpewoont plats ese fine fer tas kanse folek se neere?
34Yeesus hot kefroot:
— Wii fiil proote het teyer?
Tii hon keantwort:
— Siwe proote un phaar fix.
35Tan hot Yeesus tas folek kexikt sich uf te potem setse. 36Tëm noo, hot eyer ti siwe proote kehool un ti fix un hot Hërkot ketankt. Tan hot eyer se keteelt un hot se ap kep fer ti tisiple, un tii hon se ferteelt fer tas folek. 37Al hon kes un sin sat kep; un ti tisiple hon noch siwe khërep kefilt mit te xtiker woo iwerich keplip sin. 38Tii woo kes hon waare fier tausent mëner, oone ti fraae un ti khiner se tseele.
39Tan hot Yeesus tas folek fort kexikt, is uf en poot kextii un is noo te rechioon Makatan kefaar.
2022 Sociedade Bíblica do Brasil
