ดอ โฆว 48
48
ลอง อาโกบ ม็องการา ดัว ดี ฆอน อาโยว
1วาย อัน ตี อาว เหลณ เฆ วี ตัห ดี อาโยว ตึอน ต็อห, “ฆูณ แม แฮะ กาตัด ดี ยัม.” ปัน ตี อาโยว วี แดะ ฆอน อีมาย อัน อา วี, อี จืร อามานาเซ ฆาย อาเอพารีม. อัน บอ แตห ฆาย โดบ อัน, ฮาว โดง กอย ฆูณ อัน. 2เฆ วี ต็อห ดี อาโกบ ตึอน, “ฆอน แม อี จืร อาโยว แฮะ ตัห.” อัน วี รีน กาเซา, แตห อัน ปึอน ดี ยีต ตูต ดี กาโช็ง อีด อัน.
3อาโกบ วี ต็อห ดี อาโยว, “เฌาพรา อี มูห อัน เฌา อี อึบ โตต ดอน โมยว, อัน แฮะ กาปลูห ดี โอว ดอ กอย โอว แคง มืง กานัณ ตึอน. อัน เฌา แฮะ ม็องการา ดัว ดี โอว. 4อัน แฮะ ต็อห, ‘โอว ดี แตห แม มึห หลูกหลาน กืน, แตห อาโมยว แม กืน, แตห แม แบน ฆูณ ดัง เฆ อาโมยว ดูอี กืน. กาดาย โดง กอย แม ดอ ตี นี, โอว ดี ดัว ดี หลูกหลาน แม, แตห อึณ แบน กาดาย เฆ เซเซ.’
5อู โป็ง อาตึร โอว ต็อห, ฆอน แม อี ฆึอด แคง มืง แอฆึบ นี อาต ตัห ฌัม โอว ดี นี, โอว ดี แตห ฆาย แบน ฆอน โอว. ฆาย ดี แบน ฆอน โอว ปี อารูเบน ฆาย อาซีเมโอน มูห ฆอน โอว. 6เซ แม บอ วี มึห ฆอน ปอ อึณปัว, เฆ ดี วี แบน ฆอน แม. เฆ ดี วี ปลูะ อีกัด เฆ. 7โอว ซี โบง ปาย ตี โกบ แฮะ โหลห โอว มา แม. ดอ ตัห เอ เลห แคง มืง พาดาน ตึอน, มา แม แฮะ ยัม, แตห โอว กลึร กาเซา. ดอ อัน ตี เอ ฮาว โดบ อึณเตณ อี ฌัม มืง กานัณ อี มูห โดง กาตัด มืง เอพาราด ตึอน. โอว มืร แฮะ ดีบ อัน ดี ตี อี กอย โคบ มืง เบดแลม.”
8ดอ ต็อห อัน ปาย ตี อัน บอ ยึร ฆอน อีมาย อาโยว ตึอน, อัน ดีหมอด, “ฆาย อา วี ตี, อาเซ ฆาย มูห?”
9อาโยว วี ต็อห, “ฆาย มูห ฆอน อีมาย โอว อี มูห ปี ดัว เฌาพรา ดี โอว.” อัน วี ต็อห, “แตห แม ตึย ฆาย ตัห ดี โคบ โอว, แตห โอว ม็องการา ดัว ดี ฆาย.”
10อาโกบ ยี กัด กาเซา. งาย อัน แฮะ กาปยอย, อาว ฮู ลึห ซีคยา. โคว, อาโยว แตห ฆอน อัน ตัห กาตัด ดี อาต ดา ฆาย. อัน วี เงียม ฆาย, วี อูห ฆาย.
11ปัน ตี อาโกบ ตึอน วี ต็อห ดี อาโยว, “โอว ตู ดึอม ทาง โอว ดี วี ยึร แม ปอ อู เฌณ. ดอ ตี นี เฌาพรา แตห โอว วี ยึร บอ ฆอน แม.”
12ปัน ตี อาโยว วี แตห ฆาย เลห แดง บึม ฆูณ อัน. อัน วี โฆม ดี อาต อัน, ครึบเครา. 13แฮะ ฮอต, อาโยว ตึอน บอ ดึห แด อาอัห อัน, ปา อาเอพารีม, ตึย อัน กอย ดี โคบ แด อาฆัะ อาโกบ. อัน บอ ดึห แด อาฆัะ อัน ปา อามานาเซ, ตึย อัน กอย ดี โคบ แด อาอัห อาโกบ. 14อาโกบ ตึอน ยี เบลห แด อาอัห อัน แดง ฆีณ อาเอพารีม ตึอน อี มูห วี เตียะ. อัน วี เบลห แด อาฆัะ อัน แดง ฆีณ อามานาเซ ตึอน อี มูห วี ตาง. ปาย ตี อัน กาแวะ แด อัน.
15ปัน ตี อัน ม็องการา ดัว ดี ฆาย. อัน ต็อห, “เฌาพรา ปี โดบ ฆูณ ดัง โอว, อี จืร อาบราฮัม บอ ฆูณ โอว, อี จืร อาแซก, เฌาพรา ตี ปี ดา อี เฮียง มาบู. อัน แฮะ บัร โอว อู ซีณ ดอ ฆึอด โอว, กอ ฌัม อาตึร. 16บอ อามู อามาด เฌาพรา อี แฮะ บัร โอว, แกวะ แตห โอว ฌัม ดูก มาเซ, แตห อัน เฌา ตี ม็องการา ดัว ฆอน อีมาย อา วี นี, แตห ฆาย วี โหลห บอ อาบราฮัม ตึอน บอ อาแซก อี มูห ฆูณ โอว. แตห หลูกหลาน ฆาย วี แบน ดูอี อาโมยว กืน, วี แบร แดง กาดาย ดอน โปละ.”
17อาโยว ตึอน บอ ยึร ฆูณ อัน แฮะ เบลห แด อาอัห อัน แดง ฆีณ อาเอพารีม, อัน ทาง อึณ ตู หมาน. โคว, อัน วี ดึห แด อาอัห ฆูณ อัน, ต็อห ดี เบลห แดง ฆีณ อามานาเซ ตึอน. 18อัน บอ ต็อห ดี ฆูณ อัน, “ฆูณ, แกวะ แตห แม โบง ปาย ตี. วี ตี แฮะ มูห ฆอน ฆีณ. แตห แม เบลห แด อาอัห แม แดง ฆีณ อัน.”
19ฆูณ อัน ยี ตู ซี โบง ปาย ตี. อัน วี ต็อห, “อึย ฆอน โอว, โอว แฮะ นับ. ฆอน วี ตาง ดี แบน อาโมยว ดูอี กืน, บอ วา อัน ดี แบน ดูอี กืน. วา ยี ดี ตาง หลึอม อีกัด อัน. เฆ หลูกหลาน อัน ดี แบน อาโมยว ดูอี แบน โมยว แบน โมยว.” 20ดอ อัน ตี อาโกบ วี ม็องการา ดัว ดี ฆาย. อัน ต็อห,
“เฆ ดูอี อีซาเรลัะ เฆ ดี ลาย ม็องการา ดัว, เฆ ดี ต็อห, ‘แตห เฌาพรา แตห แม ปี อาเอพารีม ฆาย อามานาเซ ตึอน.’”
ปาย ตี อัน โบง แตห อาเอพารีม ตาง หลึอม อามานาเซ.
21วาย อัน ตี อาโกบ วี ต็อห ดี อาโยว, “โอว แฮะ กาตัด ดี ยัม. เฌาพรา ยี ดี กอย รึม โดบ แม. อัน ดี วี แตห เบ วี ตัห ฌัม มืง ปี ดึอม กอย ฆูณ ดัง เบ. 22โอว ดี แตห แม มึห กาดาย อู โปละ, แตห อึณ กืน หลึอม ปี ปึอน อูกัด อูวา แม. โอว ดี ดัว ดี แม มืง เซเคม แปะ แฮะ แป โอว ดอ กาโฆห โอว ดี เฆ ดูอี อาโมยว อาโมวรีด ตึอน. ดอ ลาย กาโฆห เย, โอว แฮะ ตา มาปัวะ ลาง บอ อัะ.”
© 2021, Wycliffe Bible Translator, Inc. All rights reserved.
