ดอ โฆว 47
47
ลอง เฆ ดูอี อีซาเรลัะ กอย แคง มืง แอฆึบ
1วาย อัน ตี อาโยว ตึอน วี ฮาว กาลาง ดี คูนดีคัม ต็อห, “ฆูณ เฆ อูกัด อูวา โอว แฮะ ตัห ฌัม มืง แอฆึบ. เฆ บอ ดึห โดว ซัดดาวา เฆ บอ โกรวกราม โตต ดอน โมยว แคะ ปี มึห เฆ. แฮะ ฮอต เฆ แฮะ กอย แคง มืง โฆวเซน.” 2อัน มืร แฮะ แดะ อีกัด อัน มัง อี, แตห เฆ โดบ อัน, ฮาว ฌัม ดี อาต คูนดีคัม.
3คูนดีคัม วี ต็อห ดี เฆ, “ฆาน ปี โบง เบ, มาเซ อึณ มูห?”
เฆ วี ต็อห ดี อัน, “เย หมาย แม มูห ดา อี เฮียง มาบู. บอ ฆูณ เย แฮะ ดึอม โบง ปาย ตี. 4เย แฮะ ตัห ฌัม แคง มืง แม, แตห เย แบน แคต แคง มืง แม. อาคราว เอต ปี ดี โฮม, อึณ หณาบ กาเซา แคง มืง กานัณ ตึอน. อาว ฮู มึห เปต อี ลัต. เย หมาณ, แตห แม เฌา ควาง เย กอย แคง โดง จืร โฆวเซน ตึอน.”
5คูนดีคัม วี ต็อห ดี อาโยว ตึอน, “ฆูณ เฆ อูกัด อูวา แม แฮะ ตัห ฌัม โดง กอย แม. แม บอ อึบ มืง บอ มืง. แตห แม แตห เฆ กอย แคง โดง อี หมึอม หลึอม ดอน โปละ. 6แตห เฆ กอย โดง จืร โฆวเซน. เซ อึณ บอ มึห อี นับ ดี เฮียง ซีคยา โดว ซัด อัน, แตห แม แตห อัน เฮียง บอ โดว ซัดดาวา โอว.”
7ปัน ตี อาโยว ตึอน วี ตึย ฆูณ อัน อี มูห อาโกบ ตึอน, แตห อัน ตัห ฌัม ดี อาต คูนดีคัม. อาโกบ วี โฆม ดี อาต คูนดีคัม. 8คูนดีคัม ดีหมอด อัน ต็อห, “อาซาก แม, หนาง ซีนัม แฮะ โนะ?”
9อาโกบ วี ต็อห, “เฌาพรา แฮะ แตห โอว กอย อาดา อู มาย็อห ดี โอย ฆึร ซีนัม. ซีนัม อัน ตี อาว กืน. อาซาก โอว มืร อาว โต็ง ปี ฆูณ ฆาย ดา โอว.” 10แฮะ ฮอต ปัน ตี อาโกบ วี ม็องการา แตห ดี คูนดีคัม ตึอน บอ วี เลห ตัะ โดง กอย อัน.
11อาโยว ตึอน แตห ฆูณ อัน บอ เฆ อูกัด อูวา อัน กอย แคง มืง แอฆึบ โดง อี หมึอม หลึอม ดอน โปละ, แตห อึณ แบน กาดาย เฆ บอ โดง นา เฆ. อึณ มูห โดง อี กอย กาตัด มืง ราเมเซด. ปาย ตี อึณ ปี ปี จัร คูนดีคัม. 12อาโยว วี เฮียง ฆูณ อัน บอ เฆ อูกัด อูวา อัน ดอน อึณโฮม. อัน ดัว เฆ มึห ปี ดี โฮม แคะ ปี โลว เฆ, แตห อึณ โดบ แคะ กืน ฆอน เฆ.
ลอง ฆาน อาโยว
13ดอ อัน ตี อาว ปึอน เหรต ปี ดี โฮม แคง มืง กานัณ ตึอน บอ แคง มืง แอฆึบ บอ มืง. อาคราว เอต ปี ดี โฮม แฮะ หณาบ กาเซา. เฆ ดอน อี แฮะ ฌัม ดูก. 14อาโยว ยี ดี โบม รึอน แคะ มึห แคง มืง แอฆึบ บอ แคง มืง กานัณ. เฆ ดอน อี แคง มืง เฆ ตี แฮะ ตัห ดี อัน, จึห ปี ดี โฮม. อัน วี เบลห อูน รึอน ปี ปึอน อัน แคง โฮว คูนดีคัม. 15แฮะ ฮอต ปัน ตี รึอน เฆ ดูอี อี กอย แคง มืง เฆ ตี แฮะ โตต. เฆ วี ตัห ดี อัน, วี หมาณ ปี ดี โฮม ปอ อึณ ปัว. เฆ ต็อห, “รึอน เย แฮะ โตต, แตห แม ยี ดัว ปี ดี โฮม ดี เย. เย โยว เย ดี ยัม ดี ตี.”
16อัน วี ต็อห, “เซ เบ ตู มึห รึอน, แตห เบ ดัว โดว ซัดดาวา เบ ดี โอว, แตห โอว วี ดัว ปี ดี โฮม ดี เบ.” 17ปัน ตี เฆ วี ตัห ตึย โดว ซัดดาวา เฆ, ลาย การ็อห ฆาย ปี ดี โฮม. ปาย ตี อาโยว บอ ปึอน มังปร็อง เฆ มาบู, มามัก บอ มาลา เฆ. ปาย ตี อาดา อู ซีนัม, อัน ดัว เฆ ดอน อี มึห ปี ดี โฮม. เฆ ยี โลว ดัว โดว ซัดดาวา เฆ ดี อัน.
18ซีนัม ตี กอ โตต, ปอ อู ซีนัม เฆ วี ตัห ฌัม โดง กอย อาโยว ตึอน ต็อห, “แม ดา กาณา, แม แฮะ นับ, เย ตู มึห มาเซ ปี ปึอน ดัว เย ดี แม, แตห แม ดัว ปี ดี โฮม ดี เย. อึณ ฆีด โดว เย เฆ โดง นา เย, ปี ปึอน ดัว เย ดี แม. 19เซ เย ยัม, โดง นา เย อาว ฮู โลว. โคว, เย หมาณ, แตห แม ดึห บอ เย, บอ โดง นา เย, แตห เย แบน หมาย แม. แตห แม ยี ดัว โหงว ดี เย, แกวะ แตห บอ เย บอ โดง นา เย ชึม.”
20ปาย ตี อาโยว ตึอน บอ ปึอน กาดาย อี มูห โดง นา ดอน โปละ แคง มืง แอฆึบ บอ มืง. เฆ ดูอี ย็อง กาดาย เฆ. โคว, เฆ เอต โบม. คูนดีคัม ยี ปึอน โตต กาดาย ตี. 21แคง มืง บอ มืง อาโยว แฮะ โบง แตห ดอน อี แบน หมาย คูนดีคัม. 22อึณ ฆีด มี โดง นา เฆ ดา อี หลู ดี เฌา ปี กรึบ เฆ, ปี ตู ดึห อัน. กาดาย ตี มูห กาดาย ปี ดึอม ดัว คูนดีคัม ดี เฆ. โคว, อัน ตู ปึอน วี ดึห. เฆ มืร ตู ปึอน วี ย็อง.
23ปัน ตี อาโยว ตึอน วี ต็อห ดี ดูอี ดอน อี, “โอว แฮะ ฮอต ดึห บอ เบ บอ กาดาย เบ, แตห คูนดีคัม แบน ดา อี ปึอน โตต. ดอ ตี นี โอว ดี วี ดัว ซีมา โหงว ดี เบ, แตห เบ วี ซัม ดอน โปละ. 24เบ แฮะ ฮอต โซะ, เบ โลว วี ดัว พัน บูน อู บูน ดี คูนดีคัม. อาดา พวน บูน, อึณ มูห กานาย เบ. เบ ปึอน ดี วี ซัม บอ ปึอน ดี โฮม, แตห บอ เบ บอ ฆอน เบ มึห ปี ดี โฮม.”
25เฆ ดูอี วี ต็อห, “แม แฮะ คยอด อาซาก เย. เย ดาง ฆูง เฆฌู ดี แม, แตห เย แบน หมาย คูนดีคัม.”
26อาโยว ตึอน ยี โบง แตห อึณ แบน ดารา กามาย, แตห ดอน อี ดัว พัน บูน อู บูน ดี คูนดีคัม. ดารา ตี เฆ โลว โดบ กอ ฌัม อาตึร. อึณ ฆีด มี กาดาย อี มูห โดง นา เฆ ดา อี หลู ดี เฌา ปี กรึบ เฆ, อี ตู มูห กาดาย คูนดีคัม.
27ปาย ตี อาโกบ ตึอน วี กอย แคง มืง โฆวเซน อี กอย แคง กาดาย มืง แอฆึบ. เฆ ดูอี อาโมยว อัน, เฆ วี ปึอน กาดาย แคง มืง ตี. เฆ บอ แบร บอ แกร ดี กืน.
28อาดา ฆึร ดี บู ซีนัม อาโกบ ตึอน วี กอย แคง มืง แอฆึบ. ปัน ตี อาซาก อัน บอ โนะ อู มาย็อห ดี พวน ฆึร ดี บู ซีนัม. 29ปัน ดี ฌัม อาคราว อัน, อาโกบ ตึอน แฮะ กาตัด ดี ยัม, อัน วี แดะ ฆอน อัน อี จืร อาโยว ต็อห, “เซ อึณ หมาน แม ซี โบง ปี อึง โอว, แตห แม เบลห แด แม ดี ฆึม โอว, แตห แม ดัว กาดีก ซัดฌา ดี โอว. แกวะ แตห แม ดีบ โดว โบ็ง โอว แคง มืง แอฆึบ. ปาย ตี โอว ดี บอ นับ, แม แฮะ ร็อก โอว, บอ โทม โฆรห โอว เซเซ. 30เซ โอว แฮะ ยัม, แตห แม ดึห โดว โบ็ง โอว แคง โดง กอย ดูอี อาโมยว เอ, อี แฮะ ยัม ดี อาต.”
อาโยว ตึอน วี ต็อห, “โอว ดี โบง โตต ดอน โมยว ปี จัร แม ดี โอว.”
31ฆูณ อัน วี ต็อห, “แตห แม ดัว กาดีก ซัดฌา ดี โอว.” แฮะ ฮอต, อาโยว บอ ดัว กาดีก ซัดฌา ดี ฆูณ อัน. ปัน ตี อาโกบ วี กรึบ เฌาพรา แดง กาโช็ง อีด อัน.
© 2021, Wycliffe Bible Translator, Inc. All rights reserved.
