ดอ โฆว 35
35
ลอง เฌาพรา กอย รึม โดบ อาโกบ
1วาย อัน ตี เฌาพรา วี กาลาง โฆรห ดี อาโกบ. อัน ต็อห, “แตห แม ยีต ฮาว แคง มืง เบดาเอน, แตห แม กอย ดี ตี, โบง กาโช็ง หลู ดี เฌาพรา. แดง กาโช็ง ตี, แม โลว หลู ดี เฌาพรา อี แฮะ ตัห กาปลูห ดี แม ดอ เตา แม ดี อีกัด แม.”
2ปัน ตี อาโกบ วี กาลาง ดี เฆ ดอน อี, แคะ กอย อึณโฮม อัน. อัน ต็อห, “แตห เบ แวน อารึบ เฌา ปี กรึบ ดูอี โมยว เฮา, ปี อูน เบ ดอ เลห เอ แคง มืง อี เฮา. แตห เบ บอ ตา อึม, ชึบ ครึง กามาย. 3แฮะ ฮอต ปัน ตี เอ ดี บอ ยีต ฮาว โฮะ มืง เบดาเอน. เอ ฮี ฌัม มืง ตี, โอว ดี โบง กาโช็ง หลู ดี เฌาพรา. โอว ดี หลู ดี อัน เฌา อี มูห เฌาพรา อี โทม โฆรห โอว ดอ ฌัม โอว ดูก ตึอน. อัน บอ มูห เฌาพรา อี กอย รึม โดบ โอว ดอ ฮาว โอว แบน โปละ แบน โปละ.” 4อาโกบ ตึอน แฮะ ฮอต กาลาง ปาย ตี เฆ บอ ดึห อารึบ ปี กรึบ เฆ แคง มืง อี เฮา ปี เบลห อูน เฆ ดอน โมยว. เฆ บอ ดึห เบล โหยะ เฆ, ดัว โตต ดี อัน. อัน ยี ดีบ โตต นา ครึม เฮ เทเรบ อี กอย กาตัด มืง เซเคม ตึอน. 5เฆ แฮะ ฮอต โบง ฌึร ตี ดอน โมยว, เฆ วี ยีต ฮาว โดง จืร เบดาเอน. เฌาพรา ยี โบง แตห เฆ อี เฮา วี โยว เฆ. โคว, เฆ ตู วี โดบ, ตู วี ยัะ กาโฆห ดี เฆ ฆอน อาโกบ ตึอน.
6ปัน ตี อาโกบ บอ ฌัม มืง ลูซา. อึณ มูห มืง อี กอย แคง กาดาย มืง อี จืร มืง กานัณ. มืง ลูซา ตี บอ จืร มืง เบดาเอน. บอ อัน, บอ เฆ ดูอี ดอน อี อี ฮาว รึม โดบ อัน, เฆ บอ ตัห ฌัม ดี ตี. 7อัน วี โบง กาโช็ง หลู ดี เฌาพรา. อัน ต็อห “โดง ตี มูห โดง กอย เฌาพรา.” ปาย ตี อัน บอ โหลห ดอ แฮะ กาปลูห เฌาพรา ดี อาโกบ ดอ เตา เลห อัน ดี โดง กอย อีกัด อัน อี จืร อาโซว.
8เฆ แฮะ ฮอต หลู ดี เฌาพรา ดี ตี, อึณ มูห นาง เดโบวรา อี มูห หมาย นาง แบก ตึอน, อัน บอ ยัม ดอ อัน ตี. เฆ วี ดีบ โดว โบ็ง อัน นา เตต มืง เบดาเอน ตึอน. โดง ตี, อึณ มูห ครึม เฮ เทเรบ. ปัน ตี เฆ แตห เฮ ตี จืร ‘เฮ อี มูห โดง ยาม อี.’
9ดอ กอย เฆ ดี ตี, เฌาพรา วี กาปลูห ดี อาโกบ ปอ อู เฌณ. อึณ มูห อา เฌณ เฌาพรา แฮะ กาปลูห ดี อัน วาย เลห อัน แคง มืง พาดานอาราม. เฌาพรา วี ม็องการา ดัว ดี อัน. 10อัน ต็อห, “แม จืร อาโกบ. อู โป็ง อาตึร โอว ตู วี แตห แม จืร อาโกบ. โอว ดี แตห แม จืร อาอีซาเรลัะ.” ปัน ตี เฆ ดอน อี แดะ อัน จืร อาอีซาเรลัะ.
11เฌาพรา วี กาลาง ดี อัน ต็อห, “โอว มูห อัน เฌา อี ตาง หลึอม โตต, อาว มึห อี ตาง หลึอม โอว. โอว ดี แตห แม มึห หลูกหลาน กืน, แตห อาโมยว แม แกร ดี แบน ดูอี กืน. แม ดี แบน ฆูณ ดัง อาโมยว ดูอี แบน โมยว แบน โมยว. เฆ หลูกหลาน แม, เฆ ดี บอ แบน คูนดีคัม อี อึบ อาโมยว ดูอี เฆ ตี. 12มืง แปะ แฮะ ดัว โอว ดี อาบราฮัม บอ อาแซก ตึอน, โอว ดี วี ดัว ดี แม. บอ แม, บอ หลูกหลาน แม, เฆ ดี ปึอน มืง ตี.” 13เฌาพรา แฮะ ฮอต กาลาง โฆรห ตี ดี อาโกบ, อัน วี โฮะ นา แดง, เลห โดง กาลาง อัน โฆรห ดี อาโกบ.
14อาโกบ วี เบลห กาอูน ดี โดง กาลาง เฌาพรา โฆรห ดี อัน. อัน ดึห มาว ตาง เบลห, แตห อึณ แบน กาอูน. แฮะ ฮอต อัน ดึห ปี ดี หลู ดี เดียง, โหลว นา แดง มาว ตี. อัน บอ ดึห นามัน, พ็อห นา แดง, แตห อึณ แบน โดง บอด. 15โดง กาลาง เฌาพรา โฆรห ดี อัน, อัน จืร เบดาเอน.
ลอง นาง ราเอน ฆาย อาแซก แฮะ ยัม
16ปัน ตี เฆ บอ พึง วี เลห โดง จืร เบดาเอน ตึอน, ฮาว ปอ โปละ. ดอ ฌัม เฆ นา กาตัด มืง เอพาราด, นาง ราเอน ตึอน มึห ฆอน ปอ อู วี. 17ดอ ฆึอด ฆอน อัน, อึณ หณาบ กาเซา. นาง ราเอน บอ เซา กาเซา. ดอ อัน ตี อึณ มึห ยา อี ลึมลา อัน, ต็อห ดี อัน, “แตห แม ดาคึย, แกวะ โยว. บอ คา นี แม มึห ฆอน อีมาย.” 18อัน ยี นับ, อัน แฮะ หงา ดี ยัม. โคว, อัน แตห ฆอน อัน ตี จืร อาเบนโอวนี.#35:18 ‘อาเบนโอวนี’ แคง โฆรห แฮแบร, ลอง ดาง อัน มูห ‘ฆอน อี แตห โอว ฌัม ดูก’ ฆูณ อัน ยี แตห อัน จืร อาเบนยาม.#35:18 ‘อาเบนยาม’ แคง โฆรห แฮแบร, ลอง ดาง อัน มูห ‘ฆอน อี แตห ฆาม โอว บอด’
19ปัน ตี นาง ราเอน บอ ยัม. เฆ วี ดีบ โดว โบ็ง อัน ดอ ฮาว เฆ โดบ อึณเตณ อี ฌัม มืง เอพาราด. อึณ บอ จืร เบดแลม. 20อาโกบ ตึอน วี เบลห กาอูน ดี บาเรว อัน. ปาย ตี กอ ฌัม อาตึร แฮะ ปึอน ยึร บาเรว นาง ราเอน ตึอน.
21อาโกบ วี ยีต ฮาว มืง มีกดานเอเด, ฮาว คยัะ เครียะ มืง ตี. 22ดอ กอย อาโกบ ตึอน โคบ มืง ตี, อารูเบน ฮาว ปรา ดี ลาย นาง บีลา, อี มูห อีบึณ เตียะ ฆูณ อัน. อาโกบ บอ นับ ลอง อัน ตี.
23อาโกบ ยี มึห ฆอน อีมาย ฆึร ดี อา วี. เฆ ฆอน นาง เลอา มูห อารูเบน, อี มูห ฆอน ดัง อาโกบ. แฮะ ฮอต อึณ บอ มูห อาซีเมโอน, อาเลวี, อายูดา, อาอีซาคา บอ อาเฌบูโลน.
24ฆอน อีมาย นาง ราเอน มูห อาโยว ฆาย อาเบนยาม.
25ฆอน อีมาย นาง บีลา อี มูห หมาย นาง ราเอน บอ มูห อาดาน ฆาย อานาบทาลี.
26ฆอน อีมาย นาง ซีพา, อี มูห หมาย นาง เลอา บอ มูห อาฆัด ฆาย อาเซน.
อา ตี มูห ฆอน อีมาย อาโกบ ตึอน ดอน อี. เฆ แฮะ ฆึอด แคง มืง พาดานอาราม.
27อาโกบ ตึอน ยี ตัห ฌัม โดง กอย อาแซก อี มูห ฆูณ อัน. โดง กอย อัน ตี, อึณ จืร มัมเร. อึณ บอ จืร กีรียาดอาบา อี มูห มืง เฮโบรว. โดง ตี มูห โดง กอย อาบราฮัม ฆาย อาแซก. 28อาซาก อาแซก ตึอน บอ โนะ อู มาย็อห ดี อา ฆึร ซีนัม. 29แฮะ ฮอต ปัน ตี อัน บอ ยัม, ฮาว กอย รึม ดูอี อาโมยว อัน, อี แฮะ ดึอม กอย ดี อาต อัน. ดอ ยัม อัน, อัน แฮะ กัด. น็อห อัน แฮะ ซีน. ฆอน อัน อาโซว ฆาย อาโกบ, ฆาย บอ ฮาว ดีบ ฆูณ ฆาย.
© 2021, Wycliffe Bible Translator, Inc. All rights reserved.
