KAWNCAU 4
4
Viex Petrux mai Yohan Hu
1Yam sidiex gau kiex ka pui khankix, cao giex kaing li khankix, cao giex kaing nyiex bwan mai Sadukie khankix hoek ka kiex, 2Kix sung sang rhawm kheu sidiex gau kiex pui khankix, ka grawng pa deeh kaoh im pui khaing krax yum ka daux Yesux heue. 3Kix giex ti sau kiex daux thawng tom hoek pasax, kheu hoik mawh yam ponbo heue. 4Viang mawh nan pui pa mhong gumlox an tom nie yum rhawm ka mai simex giex dex koe phwan rheng heue. 5Ngaix pasax simiang kix khankix mai kuad song khankix mai pui tiiem lai khankix khrawm paox tix ka daux veng Yerusaliem, 6mai Anax cao giex kaing li pa ting mai Kayaphax mai Yohan mai Alezandru mai can pa mawh paox ru cao giex kaing li pa ting khawmuik ot tan heue. 7Yam hoik deuh kix kiex ka sinax, kix chawk kiex ah nin, “Pax teei sibrawm pa yuh ka mawx, phan ang mawh nan, pax hoik yuh ceu in ka daux ceu kaux pui mawx?” 8Yam an Petrux naog ka Khuan Singax Singeh mai ah nin ka kix, “Pex pa mawh simiang giex kaing pui khankix mai kuad song khankix eue, 9Phan chawk cheng yiex ka daux singaix in, ka grawng ceu pa mhawm pa hoik yuh ka pui pa laux maung mai pui in pon ti deeh moi ka pa yuh ka mawx, 10Kieh pex khawmuik mai pui Isarelax khawmuik een ti tawng, grawng mawh ka daux ceu kaux Yesux Khrit Pui veng Nazariet, Kaw pa hoik tawk pex piang khaox lhak, pa Siyiex hoik deeh kieh kaoh im khaing krax yum, mawh ka daux ceu kaux Nawh, kaw in tom moi mai cung sivoe pex heue. 11Kaw in mawh simaox, pa hoik tik pex pa mawh cao yuh nyiex, pa hoik kieh mawh kaing ka daog heue.#Yaog 118:22 12Ang koe ceu pa taoh ka daux tang kaux tix kaux kawx, mawh kheu ang koe ceu kaux tang kaux greem raoma, pa hoik tawx ka sinax kawn pui, ka daux dee sang hoek ex krax taoh heue.” 13Yam yaox kix grawng ceu pa kwa rhawm Petrux mai Yohan mai tawng grawng kiex ang tie tawng lai mai mawh pui pheem, kix daox deng kah mai kix doh rhawm ka, grawng mawh kiex pa hoik ot tau mai Yesux heue. 14Mawh kheu kix yaox kaw pa hoik cox moi cung tau mai kiex, kix ang nieb pon ah tidtix heue. 15Viang mawh nan khaix hoik nhie kix kiex lih hu plak praix, khaing cub kuad pa prawng see, kix kum kawng paox tix, 16Ah nin, “Ex tak sang yuh ka mawx ka pui in kiex? Mawh kheu kiex hoik yuh mhai pa daox deng pa koe cee mai hoik sidawng ka pui pa ot ka daux veng Yerusaliem khawmuik mai ex ang pon thiang ka grawng an heue. 17Son ang sang nie baox tah ka sinax pui khankix, ex ghlat kiex ka lox, yuh ka mawx, khaix in, son ang kiex sang baox sidiex ka pui tix kaux kawx, ka daux ceu kaux in heue.” 18Kix kok kiex mai tawm lox ka kiex, son ang sang baox sidiex gau ka daux ceu kaux Yesux, ceeix kawx heue. 19Viang mawh nan Petrux mai Yohan pawk lox mai ah nin ka kix, “Pex keud ti yaox, mawh pa yuh ka mawx lheu khaw ka sivoe ngai Siyiex, ceu pa nghiet lox pex khaing lox Siyiex lie? 20Mawh kheu grawng ceu pa hoik yaox hoik mhong yiex, phan ang krai ang doh pon heue.” 21Khaix kix hoik baox ghlat kiex, kix ploi kiex hu, kheu kix ang yaox tidtix grawng sang pon ti ciyang kiex, mawh kheu pui khankix heue. Kheu pui khawmuik yaogyaw Siyiex, son grawng ceu pa hoik mawh an heue. 22Mawh kheu pui pa kiex hoik yuh mhai pa daox deng, ceu pa kieh moi an ka, hoik koe tixpon num haoh heue.
Rawg Bwan Koe Rhawm Kwa
23Yam hoik ploi kiex hu, kiex hoek ka paox cub kiex mai krai grawh grawng ceu pa hoik ah cao giex kaing li pa ting khankix mai kuad song khankix ka kiex khawmuik heue. 24Yam hoik mhong kix grawng an, kix yuh lox tix gum cum tix dah, pa sinum ka Siyiex ah nin, “Simiang eue, Maix hoik yuh raoma mai haktiex mai rawm sigrit sigra mai can pa koe ka daux khankix khawmuik.#Lih 20:11; Yaog 146:6 25Kaw pa hoik krai ka daux Khuan Singax Singeh, ka jheeh keeing ex Davit pa mawh kawncau Maix ah nin, Pui tang ceu cong rhawm ka grawng pa yuh ka mawx? Ceu pui khankix nieb keud grawng pa giex going yuh ka mawx? 26Laux simiang haktiex in khankix bre tokaux tix mai cao giex kaing khankix khrawm paox tix, tiex cha ka Siyiex mai Khrit cie Nawh heue.#Yaog 2:1-2 27Grawh grawng nawh, ka daux veng inkix hoik tiex cha ti yuh ka Kawn Maix Yesux, pa singax singeh tete heue. Kaw pa hoik groi Maix rawm bee kah, khawm Herut#Luk 23:7-11 mai Pawnti Pilat,#Mat 27:1-2; Mak 15:1; Luk 23:1; Yo 18:28-29 tau mai pui tang ceu khankix mai pui Isarelax khrawm paox tix, 28ti yuh awm taix Maix mai pa keud Maix hoik grux ciak ti kieh mawh heue. 29Yam in, Siyiex eue, jhak piang pa ghlat kix liak mai tawx kawncau Maix khankix, rhawm pa cong pa kwa ti sidiex gau lox bwan Maix. 30Yam nyeu Maix taix tix, ti cox moi heue. Yuh ka mawx sonsang pon yuh mhai mai ceu pa daox deng, ka daux ceu kaux pa singax singeh Kawn Maix Yesux heue.” 31Khaix hoik rawg kix bwan, dee khrawm kix paox tix yung yiang mai kix khawmuik naog ka Khuan Singax Singeh mai kix kwa ti sidiex gumlox Siyiex heue.
Rom Ti Shiao Tau
32Cub pui hun pa yum rhawm, mawh rhawm tix mu khaing mai tix kaux kawx, ang ah kraung ceu pa koe ti mawh cie tix, viang mawh nan kix rom paox tix shiao ceu pa koe khawmuik heue.#Cau 2:44-45 33Kawncau pa ting khankix kham mhai rug ka daux sibrawm pa ting grawng pa deeh kaoh im Simiang Yesux mai bwanson pa ting koe piang kix khawmuik heue. 34Ka daux kix pa ang kub ang koe tix kaux kawx, mawh kheu kix pa koe haktiex, phan ang mawh nan pa koe nyiex, coh khankix mai viex ngawh can pa hoik coh kix hoek, 35mai deuh ka caong kawncau pa ting khankix mai kix gwieh ka ku kaux awm pa lo nawh heue.#Mat 19:21; Mak 10:21; Luk 12:33, 18:22 36Yosiep kaw pa tawx kawncau pa ting khankix ceu kaux nawh mawh Banabax, phan toe lox an dee bleeh mawh, “Kawn simex pa khu rhawm” heue. Nawh mawh pui Lewix, ceu pui meung Kuparux, 37pa hoik coh haktiex pa koe nawh tix dah mai viex mau ngawh mai deuh ka caong kawncau pa ting khankix heue.
Wa Common Language Bible © Bible Society of Myanmar, 2012
