KAWNCAU 3
3
Pai Pui Laux Caong Moi
1Petrux mai Yohan haok hu ka nyiex bwan, bawg yam nari rawg bwan, yam mawh dim nari heue. 2Kix klawm pui hoek tix kaux pa hoik laux caong tom yam ot ka daux vaig miex tix, pa deuh kix dex siviex nyiex bwan ku ngaix pa kok mawh pa “Mhawm grang,” sonsang rawg sang mhaing ka pui pa laig ka nyiex bwan heue. 3Yam nawh yaox Petrux mai Yohan dex sang laig ka daux nyiex bwan, nawh rawg mhaing ka kiex heue. 4Petrux jawg ti jeung ngai tix piang kaw an, tau mai Yohan, ah nin, “Jhak ka yiex heue.” 5Nawh yaog ti jhak kiex, kheu ce ti sang pon tix ceu ceu khaing kiex heue. 6Petrux ah nin, “Aux ang koe mau khri, viang mawh nan, pa koe aux, aux sang tawx ka maix heue. Ka daux ceu kaux Yesux Khrit Pui veng Nazariet, kaoh hu ka caong tix heue.” 7Nawh giex taix khawn dawm kaw an mai yaog nawh kaoh mai dom mawx dom an caong nawh mai ngai liag nawh koe riang heue. 8Nawh jalo ti kaoh cung mai nawh jah ti hu ka caong tix heue. Nawh laig ka daux nyiex bwan tau mai kiex, hu ka caong tix mai jaloh tix mai yaogyaw Siyiex heue. 9Pui khawmuik yaox nawh hu ka caong tix mai yaogyaw Siyiex heue. 10Kix tawng nawh mawh kaw pa ngawm ti caung ka dex Siviex Mhawm grang nyiex bwan mai kix khawmuik daox deng ka ceu pa hoik mawh ka nawh heue.
Petrux Sidiex Pui Yudax
11Yam jhawp kaw an ka Petrux mai Yohan mai pui khawmuik kied daox deng kah mai to hu ka kix, piang grah pa kok mawh “Grah Sawlamon” heue. 12Yam yaox Petrux pa yuh nan, nawh deeh ah nin ka kix, “Pex pa mawh pui Isarelax eue, pex lai daox deng ka pui in yuh ka mawx? Yuh pa tix? pex lai jawg ti jeung ngai pex ka yiex, awm pa hoik mawh sibrawm mai pa rahsee yiex, pa hoik kieh nawh deeh chix hu ka caong tix, 13Siyiex Abraham, Icak mai Yakop. Siyiex tax du ex, hoik yaog min pakngai Kawn Nawh Yesux, pa teei pex ti tawx mai thiang ti tik sivoe Pilat, yam nawh keud ti sang ploi Nawh Cao heue. 14Viang mawh nan, pex thiang ti tik Kaw pa singax singeh, Pa Rahsee mai pex rawg sonsang tawx ka pex, pui tix kaux pa mawh pui pa pah pui yum heue#Mat 27:15-23; Mak 15:6-14; Luk 23:13-23; Yo 19:12-15. 15Pex hoik teei Simiang pa im ju yum, Kaw pa hoik kieh Siyiex nawh deeh kaoh im khaing krax yum mai yiex mawh pa kham mhai rug grawng an heue. 16Mawh kheu krax yum rhawm ka daux ceu kaux Nawh Cao, ceu kaux Nawh hoik kieh pui in koe riang rao, pa yaox mai pa tawng pex heue. Mawh heue, krax yum rhawm ka Nawh Cao, hoik tawx pa grum mhawm ka nawh, sivoe ngai pex khawmuik heue. 17Yam in puxaik khankix eue, aux tawng grawng pex mai simiang pex kawx, hoik yuh nan kheu ang pex tawng. 18Ceu pa hoik grux jhi Siyiex ka jheeh cao jhai khankix, grawng Khrit tak sang kham geu, Nawh hoik kieh naog yuh nan heue. 19Mawh kheu nan doh keud ka phimap tix mai deeh tieh tix, sonsang preet phimap tix, sonsang hoek bawg yam pa kieh nyawm ot, pa kaoh khaing Siyiex heue. 20Kheu sonsang ploi Nawh Khrit pa hoik laug Nawh son pex, pa mawh Yesux heue. 21Kaw pa raoma tak sang rieb ti priex, tom hoek bawg yam pa hoik cox kuceu khawmuik, pa Siyiex hoik krai ka jheeh cao jhai pa singax khankix, jah tom di dix heue. 22Mose hoik ah nin, Siyiex tak sang kieh Cao jhai lih tix kaux, khaing ka daux puxaik pex, pa awm aux heue. Pex tak sang nghiet pa krai Nawh ka pex kuceu khawmuik heue.#Pi 18:15-16 23Pui pa ang nghiet lox Cao jhai an ku kaux daux pui, tak sang kieh nawh laux lak pak leeing khaing sinax pui ceu nawh heue.#Pi 18:19 24Mawh heue, jah ka cao jhai Samoelax mai cao jhai pa koe khaix nawh khawmuik, cao pa krai koe miex kaux ang ah, kix kawx hoik krai grawng bawg yam ngaix in khankix heue. 25Pex mawh kawn praix cao jhai khankix mai mukheu pa hoik yuh Siyiex tau mai tax du pex, pa ah nin ka Abraham, Ka daux ru maix, geh pui piang haktiex khawmuik khawm leeing tak sang pon bwanson heue.#Jah 22:18 26Phaox ka Siyiex hoik ploi Kawn Nawh Yesux lih ka pex, sonsang tawx bwanson ka pex, ka daux pa kieh pex ku kaux, deeh tieh khaing phimap tix heue.”
Wa Common Language Bible © Bible Society of Myanmar, 2012
