Jɔn 20
20
Ghə ndow koʼ nə̀ say i Yeso i loʼ i zum zə
(Mat 28.1-8; Mak 16.1-8; Luk 24.1-12)
1Ambə n tsuʼ inaʼ wə nkala, Maria Maʼdalen n kèy kɔʼ utsuʼ ndow nə isay, ndow koʼ ndow nə̀ ghə n bəŋŋə nuu tay zey zə â loʼnə n dzuu zə isay. 2Tə n daŋŋə nuu tsu fu n nyəŋ zə, ndow koʼ ndow Shimun Pita ghi ngəd i loʼ zey Yeso â ngii ləghənə, tə n dza tə̀ ghə nə̀, “Ghə n vən i Mûkəbii i ney nuu shi nə isay, ghey khə way luʼu key ghə ney ndownə wi tii.”
3Pita ghi ngəd i loʼ zey n tsəghə shi bə, nuu ndow fu nə isay. 4Ghə â nyəŋə ndow ndownu, ngəd i loʼ zey n kee nyəŋ tsəghə tsu Pita, ndow nyi ndow fu nə isay isə. 5Nghee tə gham laalə nyi ndow say i tii zə, tə n koʼ nyi ndow kə ndzə tey ghə â baŋnə Yeso tii, tə maʼa doʼonə. Tə n ka kee nyi ndow dzə fu. 6Shimun Pita n daŋŋə ndow bə n baa wi, say nyi daŋŋə ndow kə uwû fu nə isay, nyi koʼ tsu soʼo ndzə tey tə maʼa doʼo. 7Tə n koʼ soʼo bad kə ndzə key ghə â baŋ tow kə Yeso kə tii nə̀ kə n nyoʼlə gɔy doʼo n nəŋ. 8Ngəd zey i mə bənə isə fu nə isay n daŋŋə nyi ndow soʼo, koʼ i tsu, daŋŋə bəghəm fuu nə̀ Yeso n ndzəm zhəm dzəŋŋə. 9Tə ghəə ghən ni shi, ghə â ka kam tɔʼ zowkeeli ghɔɔmə i Kəzə̀ zey i dza nə̀ Yeso khə ni zhəm dzəŋŋə bə nə ivə. 10Ngəd tə tii tə n daŋŋə nuu dzəŋŋə ndow n ndaw tə ghə.
Yeso dìi wû u wi tə Maria Maʼdalen
(Mat 28.9-10; Mak 16.9-11)
11Ambə ngəd tey nuulə ndownə, Maria n kee təmi doʼo tsu fu n səə isay, tə deynə. Nghee tə deynə sey, tə n gham laalə nyi ndow say i tii zə. 12Tə n koʼ nyi ndow tsətəndəghə tə Kəzə̀ təbəghə nə̀ ghə n lab wû zə n ndzə tə fəmə tə. Ghə n doʼ n luʼu key vən i Yeso zə â nyəŋ tii, umɔʼ n luʼu key tow kə wi kə â loʼnə tii, umɔʼ n luʼu key fuu i wi zə â loʼnə tii. 13Tsətəndəghə tə Kəzə̀ tey n bəb tə̀ wi nə̀, “Iwaa, wə tsuulə sə̂ n kee mə ə?”
Tə n dza tə̀ ghə nə̀, “A loʼ n təŋkey ghə n ney nuu vən i Mûkəbii wuŋ zə, mə n khə way luʼu key ghə ney naŋanə wi tii.” 14Ambə tə ghɔɔmə may tsu sey, tə n fəd kɔʼ uwû ni nuu ndow, baŋ koʼ kɔʼ Yeso tə tey, kee khə way nə̀ a loʼ Yeso. 15Yeso n bəb tə̀ wi nə̀, “Iwaa, wə tsuulə sə̂ n kee mə? Wə kəŋə ndee fa a?”
Maria n moʼo kə nə̀ à loʼ wù usum u loʼ wə, tə n dza tə̀ wi nə̀, “Mûkəbii, abə à loʼ nə̀ wə n vən i wi i boʼo nuu, wə tiilə bə luʼu key wə ndow nyəŋi naŋanə wi tii tə̀ n ndow boʼo nuu.”
16Yeso n tɔŋɔ tsu wi nə̀, “Maria.”
Maria n laalə ndow wi, tɔŋɔ ndow wi n ghɔɔmə i Hibru nə̀, “Raboni!” I dii nə̀, “Wù dii.”
17Yeso n dza tə̀ wi nə̀, “Ka mə mɔm, n təŋkey, n ka kam kɔʼ taa dzə n səə Bày. Kee ndow n səə waazə ghuŋ ghə, wə dza tə̀ ghə nə̀ n nya ndow n səə Bày wuŋ, tə wey tə â loʼ soʼonə Bày ghə, tɔŋŋə Zə̀ kuŋ kən kə loʼ soʼonə Zə̀ kə ghə kə.” 18Maria Maʼdalen n ndow koʼ ndow soʼo ngəd tə Yeso, dza tə̀ ghə nə̀, “Mə n koʼ Mûkəbii.” Tə n daŋŋə ney dza ndow ghɔɔmə i Yeso tə̀ ghə.
Yeso bən shi kɔʼ n sə kə ngəd tə wi
(Mat 28.16-20; Mak 16.14-18; Luk 24.36-49)
19N nəŋə i fənə zə n tsuʼ inaʼ wə nkala u mɔʼɔ wey, ngəd tə Yeso tə n dzəŋi loʼ n ndaw nə̀ ghə n fii naŋa baʼ wə, n təŋkey ghə â tsəŋə ngəd tə Təjuu. Nghee ghə loʼnə fu, ghə n maŋ fwey Yeso tə teynə n sə kə ghə. Tə n dza tə̀ ghə nə̀, “Buulə zə loʼ ghi ghaa.” 20Ambə tə dza tsunə sey, tə n dii ndow wɔɔ a wi, nsə teybow i wi zə. Ngəd tə tii tə n ngii duʼlə nghee ghə koʼ kɔʼ Mûkəbii.
21Yeso n dza kpiʼi ndow tə̀ ghə nə̀, “Buulə zə i loʼ ghi ghaa. Nghee Bày â tûm bənə mə, à loʼ soʼo ighələ n tûm shiənə ndow ghaa.” 22Ambə Yeso dza tsunə sey, tə n zày ndow n kow ghə, dza tə̀ ghə nə̀, “Ney na Zay kə Zow kə. 23Abə wù ghaa neyzəənə bəb i wù zə, Zə̀ kə n neyzəə soʼo bəb i wù tii, nə̀ ghaa ka bəb i wù i neyzəə, Zə̀ kə i neyzəə soʼo way bəb i wù tii zə.”
Yeso dii wû u wi tə̀ Tɔmɔs
24À n loʼ sey nə̀ Tɔmɔs wey tə â loʼ soʼo ngəd ə Yeso, (ghə â tɔŋŋə wi nə̀ à loʼ Ngɔŋmbaa), tə n kee way n nəŋə zey Yeso mə bənə tii. 25Nghee tə ndow bənə, ngəd tə loʼ tey sey dzanu tə̀ wi nə̀, “Ghey n Mûkəbii koʼ.”
Tə n dza tə̀ ghə nə̀, “Mə i bəghəm fuu kə nə̀ mə n tɔʼ koʼ nyi tsu, mɔm koʼ tsu zələ a təmbaa ghey n wɔɔ a wi, mɔm ndow soʼo zələ key n teybow i wi.”
26Ambə tsuʼu n tsəghə tsu ifam, ngəd tə Yeso tə n loʼ kpiʼi n ndaw, Tɔmɔs n loʼ ghi ghə. À n loʼ nə̀ baʼ u fii doʼonu, ghə n taa fəmi kɔʼ Yeso nə̀ tə tey n səə ghə, tə n dza tə̀ ghə nə̀, “Buulə zə i loʼ ghi ghaa.” 27Tə n daŋŋə dza tə̀ Tɔmɔs nə̀, “Koʼo wɔɔ ghuŋ ghə, gaʼ bə waa kəwɔɔ wə fa. Naalə shi bə wɔɔ kə kə̀, wə mɔm bə teybow zuŋ. Ka i səmə, keeli tsu bəghəm i fə̀ŋ zə.”
28Tɔmɔs n beeli ndow wi nə̀, “Wə loʼ Mûkəbii wuŋ nsə Zə̀ kuŋ kə.”
29Yeso n dza tə̀ wi nə̀, “Wə n nya bəghəm nghee wə koʼ bənə mə ə? Buulə i loʼ tə̀ ghə̂ ghey ghə bəghəm fuunə nə̀ ghə ka buʼ koʼ.”
Zuŋ key ghə tɔ̀ɔ maʼlə kən tii
30Yeso mâ dii ndəmə tətsəə tə̀ ngəd tə wi tə nə̀ ghə ka tɔ̀ɔ naŋa fa n maʼlə kən. 31A ghən ghə kee tɔ̀ɔ naŋanə fa, loʼ ni ghəŋə tsu nə̀ ghaa i loʼ ni bəghəm fuu nə̀ Yeso loʼ wù wey Zə̀ kə â dza naŋa nə̀ i tûm bənu, Waa Kəzə̀, nsə nə̀, abə ghaa bəghəm tə̀ wi, ghaa loʼ ni keeli imuu nə̀ i way ni may.
© 2022 CABTAL
