Jɔn 19
19
Ghə tsəʼlə saʼ nə̀ ghə wey Yeso
1Pilato n daŋŋə ney fu ndow Yeso nə ghə vəələ wi nə təkwɔ̀ɔ. 2Sawgoʼ tə n bəghə kɔʼ taŋŋə kə fɔɔ nə təmgbii, dzəŋə tsu n tow kə wi, daŋŋə dzəŋə tsu wi n saŋ i baŋa zə, ndzoʼo saŋ zey də̀ŋ u dzəŋŋə nə. 3Ghə n bə təmi bə n səə wi, dza nə̀, “Mbee! Də̀ŋ kə Təjuu!” Saa wi nə usali n tûm usə̂.
4Pilato n kəm tsəghə shi bə, dza tə̀ ngəd tə Təjuu tey nsə nɔɔ kə aghə̂ key nə̀, “N sa ney shiə bə wi n səə ghaa nə̀ ghaa keeli tsu nə̀ n ka koʼ ghə i loʼ zə tə ghəŋə bəəbənə.” 5Yeso sey shi bənu n taŋŋə kə təmgbii key nə kətow nsə saŋ ə kədə̀ŋ i baŋa zey nə uwû. Pilato n dza tə̀ ghə nə̀, “Koʼo na! Wù tii wən ə!” 6Ambə ghə fɔɔngili a nii ghey nsə bwoli tə ndaw Kəzə̀ tey n Yerosalem koʼ ndow Yeso, ghə n fəd keeli shi kɔʼ n dzə̂ tə taw tə nə̀, “Baa na wi n zat kə fəkaʼ! Baa na wi n zat kə fəkaʼ!”
Pilato n dza tə̀ ghə nə̀, “Ney na wi ghaa ndow baa n zat kə fəkaʼ n nəŋə ghaa, n təŋkey, n ka koʼ dzə ghə i bəbə zey tə ghəŋənə.”
7Ngəd tə Təjuu tey n beeli ndow wi nə̀, “Ghey dzûmə kəlaŋ, laŋ kə tii kə dii nə̀ tə khə ni kpu, n təŋkey, tə ney naŋa kɔʼ wû u wi nə̀ i loʼ Waa Kəzə̀.”
8Nghee tə̀ Pilato zow ndow ghəə a tii ghə, tsəŋ zə n baa kəm kwu tsu wi. 9Tə n nuu nyi ndow ibam nə kəbali, nyi bəb tə Yeso nə̀, “Wə baa nuu bə ghee?” Yeso n ka kee beeli wi. 10Pilato n bəb tə̀ wi nə̀, “Wə beeli way mə ə? Wə khə way nə̀ n khə kədaʼa ni ghəŋə nə̀ ghə zəghə maʼa wɔ wə nuu, khə soʼo kədaʼa ni ghəŋə nə̀ ghə baa wɔ n zat kə fəkaʼ ə?”
11Yeso n beeli ndow wi nə̀, “Wə way ni keeli kədaʼa n kow mə nə̀ kə ka shi tsu bə n wɔ Zə̀ kə idəŋ kə. À kee loʼ nə̀ a dow tsəghə bəb i wù wey tə ney fu shi bə mə tə̀ ghaa.”
12Ambə Pilato zow tsu sey, tə n kaʼ ni kəŋ jìi ni zəghə maʼa Yeso. Ngəd tə Təjuu tə n kee taw shiə kɔʼɔ kə n dzə̂ tə nə̀, “Abə wə zəghə maʼa tsu wù wən, à sey loʼ nə̀ wə ndɔm way dzə fə̂ ə Kaysa tə loʼnə də̀ŋ kə, n təŋkey, wù wey tə dza i loʼ kədə̀ŋ fa inaʼ sey zuulə baalə Kaysa.”
13Nghee Pilato zow ndow ghɔɔmə i tii zə, tə n ney teyyə shi bə Yeso, tsu doʼo tsu n ndaŋ zey tə saʼanə ghə̂ ghə tii, i loʼnə n luʼu key ghə tɔŋŋə nə̀ a loʼ Zeeli kə Atay, (N ghɔɔmə i Hibru ghə tɔŋŋə nə̀ a loʼ Gabada). 14Nəŋə zə n loʼ tə a loʼ n fə̀ŋ ə tsə tə n tsuʼ fey Zə̂ kə taa zaʼa kə bwu bweelinə tii, Pilato n dza tə ghə̂ a Təjuu ghə nə̀, “Koʼo na də̀ŋ kə ghaa kə kənə!” 15Ghə n taw shiə kɔʼɔ kə n dzə̂ tə nə̀, “Wey wi, wey wi, baa wi n zat kə fəkaʼ!”
Pilato n bəb tə̀ ghə nə̀, “Ghaa ləghə nə̀ n baa də̀ŋ kə ghaa n zat kə fəkaʼ a?”
Ghə fɔɔngili a nii ghey n beeli ndow wi nə̀, “Ghey kəm khə way də̀ŋ kə loʼ kə, a may kə Kaysa.”
16Pilato n daŋŋə ney fu tsəghə ndow Yeso nə̀ ghə baa wi n zat kə fəkaʼ. Sey, sawgoʼ tə n ney nuu ndow wi.
Ghə baa Yeso n zat kə fəkaʼ
(Mat 27.32-44; Mak 15.21-32; Luk 23.26-43)
17Sawgoʼ tə n ney shi ndow Yeso nə̀ tə n boʼo keeli zat kə fəkaʼ kə wi kə, ney ndow wi n Luʼu kə kaŋ K-a-tow, ghə tɔŋŋə n ghɔɔmə i Hibru nə a loʼ Gɔgɔta. 18Ghə n baa kɔʼ Yeso n zat kə fəkaʼ fu tii. Baa dzəŋi kɔʼ ghə̂ a tsɔŋɔ a loʼ ghə n tey tə bow tə wi abəghə, umɔʼ n kpi kə wi kə zəə kə, u loʼ wey n kpi kə wi kə kwɔɔ kə. 19Pilato n tɔ̀ɔ tsu soʼo aghəə nə kəbaʼlə nə̀, “Yeso, wù Nazaled, Də̀ŋ kə Təjuu”, baa naŋa kɔʼ n zat kə fəkaʼ kə wi. 20Ndəmə ghə̂ a Təjuu ghə n tsəghə tɔŋŋə daŋŋə tsə ghəə a tii ghə, n təŋkey, ghə â baa wi n zat kə fəkaʼ n səə inaʼ. Ghə n tɔ̀ɔ naŋa soʼo ghəə a tii ghə n ghɔɔmə i Hibru, n ghɔɔmə i Grik nsə n ghɔɔmə i Latən. 21Fɔɔngili tə nii tə ghə̂ a Təjuu ghə n dza tə̀ Pilato nə̀, “Ka tɔ̀ɔ dzə nə̀ a loʼ Də̀ŋ kə Təjuu, fəd tɔ̀ɔ tsu nə̀ tə â dza nə̀ i loʼ Də̀ŋ kə Təjuu.”
22Pilato n dza tə̀ ghə nə̀, “Ghəə zey n tɔ̀ɔnə, i doʼlə kə tə̀ n tɔ̀ɔ dzənə.”
23Ambə sawgoʼ tey baa kɔʼnə Yeso n zat kə fəkaʼ, ghə n ney kɔʼ ndzə tə wi, baalə tsu nə ubad ukaykə, tow ghə ukaykə n ney ndow kəbad kəmɔʼ kəmɔʼ. À n kee doʼo səə tsu kə tə fə̀ŋ tey tə khə way zuŋ kə, nə tə bɔɔmə dab daŋŋə tsu ndow kənu. 24Ghə n dza n wû i ghə nə̀, “Kə̂ saa nə baalə maʼanə tə tən, saa təm tsu mboʼ ni koʼ wù wey tə dza i keeli.” Ghəə ghən â shi ni luulə ghə zey i tɔ̀ɔ doʼo n màʼlə K-a-zə̀ nə̀,
“Ghə n dzawwə tsu ndzə tuŋ n wû i ghə,
Nə̀ ghə təm mboʼ ni keeli wù wey tə dza i ney sàŋ zuŋ.”
À wən bɔɔmə loʼ ghəə zey sawgoʼ tə a ghəŋənə.
25Ambə ghə baa naŋa tsu Yeso sey, ghə̂ ghey ghə â tey n səə zat kə fəkaʼ kə Yeso â loʼ này wi, nsə waazə ə nay wi u zən wə, nsə Maria, tɔŋŋə wey Klopas, nsə Maria Maʼdalen.
26Ambə Yeso koʼ nghee nay wi ghi ngəd ə wi zey tə â ngii ləghənə teynə n səə wi, Tə n dza tə̀ zə nə̀, “Này, koʼo waa wə a wən ə!” 27Tə n dza ndow soʼo tə̀ ngəd zey nə̀, “Koʼo, à wən loʼ này wə.” Ni ney nuu tsu n nəŋə i tii zə, ngəd zey n daŋŋə ney ndow này Yeso n ndaw wi.
Və i Yeso
(Mat 27.45-56; Mak 15.33-41; Luk 23.44-49)
28Ambə ghəə ghən tsəghə tsu, Yeso n khə nə̀ i n mayyə ghəə ghə adzəm. Ni luulə ghɔɔmə i Kəzə̀ zən tûm tə Kəzə̀ tə â tɔ̀ɔ naŋanə, tə n dza nə̀, “Fə̀ŋ ə mmuu zuʼlə mə.” 29Bɔm n loʼ fu i luu doʼo ghi nlə n mgbaŋŋə mə. Sey, ghə n ney kɔʼ usâa, fùu nyi tsu tii, ney duŋ kɔʼ n kpìi kə kaʼ fə loʼ fə ghə tɔŋŋə nə̀ a loʼ hisɔb, ghə n gaʼ kɔʼ ndow n dzuu i Yeso. 30Yeso n sɔɔlə mə̂ kɔʼ nlə n tii mə, daŋŋə dza nə̀, “Zə n may nya.” Tə n kùm tsu kətow, daŋŋə zay may kɔʼ i bə.
Ghə saw teybow i Yeso
31Ghə â baa Yeso n zat kə fəkaʼ n tsuʼ fey tsuʼ inaʼ u ghə̂ a Təjuu u bwu bweelinə tii. Ni ghəŋŋə tsu nə̀ kə vən i loʼ i nə doʼlə səənə n zat kə fəkaʼ n tsuʼ inaʼ u ghə, ngəd tə Təjuu tə n dza tə̀ Pilato nə̀, “Dzɔb loʼ nə a mə khə̂mə tsu fuu i ghə, a ney nuu tsu bə vən a ghə.” Ghə â dza sey, n təŋkey, tsuʼ inaʼ u ghə̂ Təjuu wən wə â bəghənə â loʼ tsuʼ u nii wə. 32Sey, sawgoʼ tə n bə khə̂mə tsu fuu ghə̂ a loʼ ghey abəghə ghə â baa dzəŋi ghə n zat kə fəkaʼ ghi Yeso. 33Tə̀ ghə ni bə n kow Yeso, ghə n koʼ kɔʼ nə̀ tə mâ khə kpu, ghə n ka kəm khə̂mə fuu i wi. 34Sawgoʼ imɔʼ n sawgoʼ tə tii tə n ney kɔʼ ighɔŋ, saw nyi kɔʼ ndow teybow i Yeso tii, mmuu mə n daŋŋə shi tsu bə n kaŋ tə tii n fəŋ i tii zə. 35Wù wey tə â koʼ ghəə ghən, à loʼ wi tə tiilə dza bənə ghəə a tii ghə, ghɔɔmə i wi i loʼ isəŋə. Tə a ndzəm khə soʼo nə̀, ghəə zey tə tiilə dza bənə, loʼ isəŋə, sey nə̀ ghaa loʼ soʼo ni bəghəm fuu tə̀ Zə̀ kə. 36Ghəə ghən â shi sey ni luulə ghɔɔmə i Kəzə̀ zey tûm tə Kəzə̀ tə â tɔ̀ɔ naŋa nə̀,
“Ghə nə khəm way ghəb kə kəmɔʼ n kow wi.”
37Zə â shi sey ni luulə soʼo ghɔɔmə i Kəzə̀ zey i tɔ̀ɔ doʼo soʼonə nə̀,
“Ghə i laalə kɔʼɔ ndow wù wey ghə saw nyi ndow teybow i wi zə.”
Ghə tsələ Yeso
(Mat 27.57-61; Mak 15.42-47; Luk 23.50-56)
38Ambə ghəə ghən tsəghə tsunə, Yosef wù Alimatia â loʼ soʼo dzûmə ə Yeso, à kee loʼ nə̀, tə â dii shiə bə dzə way wû u wi wə, n təŋkey, tə â tsəŋə ngəd tə Təjuu. Tə n ndow nɔɔ ndow tə Pilato nə̀ tə fuu wi n daʼa kə tə̀ tə ndow boʼo nuu vən i Yeso. Pilato n bəghəm nə̀ tə ndow boʼo nuu. Tə n daŋŋə bə boʼo nuu ndow vən i tii zə. 39Yosef â loʼ dzəŋi ghi Nikodemus, wù wey tə â buʼ bə koʼ dzə Yeso n tsuʼu tə. Nikodemus n bə n fəghə n ləmmə n loʼ mə ghə â tɔŋŋə nə̀ a loʼ maya nsə alos nə̀ ghə n nyɔɔmə tən kɔʼ. Fəghə n ləmmə n tii mə â dədlə kùm kɔʼɔ ndownu kilo tə nghəm ntəghə n ghii tə tətəghə. 40Ghə n ney shi tsu bə vən i Yeso tow ghə ubəghə, baŋ kɔʼ wi nə təndzə nə ghə n tsoʼlə fəghə n ləmmə mey n vən i wi, n təŋkey, â loʼ ghəə ghə inaʼ a Təjuu ni tsələ wù sey. 41À n loʼ sey nə̀ sum u loʼ u kuʼlə loʼ n luʼu key ghə â baa Yeso tii n zat kə fəkaʼ. Say zə n loʼ fu nə usum nə̀ ghə ka kam tsələ koʼ wù tii. 42Nghee â tsəm loʼ soʼo tsuʼ fey Zə̂ kə Təjuu kə bwu bweeli tii, say i tii zə ndzɔʼ kuʼlə loʼ soʼo, ghə n tsələ naŋa nyi ndow Yeso fu.
© 2022 CABTAL
