YOHANA 12
12
Yesu Yavekhwa Makura mu Betsania
(Mat 26:6-13; Mk 14:3-9)
1Matukhu sita nikashili khutukha khu Mulukha kwa Pasaka kuve nu kukholekhanga, Yesu yasimukha natsia mu litaala lia Betsania, ingo wa Lazaro, mundu wa yali niyisimushitsa khurula mu likhutsa. 2Vamulombelayo shiukhulia shia halukolovo, Malita navatenda; Lazaro yali mulala khu vandu valiitsanga shiukhulia halala na Yesu hamesa. 3Mariya yavukula inusu ilita indala ya makura ku khwivekha ku vukuuli vululu kali nikalombwa khu shiraakwa shilahi shialaangwangwa inaridi, nakatsukha khu vilenje via Yesu, khandi namweya ni liswi lielie. Inzu yeneyo yitsula mwayu kwa makura malahi kenako. 4Navutswa Yuda Isikarioti, mulala khu veechi va Yesu, (Wali natsitsanga khumutsama) yareeva, 5“Shichila shina makura ku khwivekha yaka kavuli khukuulitswa tsidinari tsimia tsivaka, ma tsisenti tsiheelwi vandu vamanani?” 6Shikali yavoola ndio, shichila khuheendela mwoyo vandu vamanani tawe; navutswa shichila yali shihuuvi. Yachinganga shisiko shi tsisenti; navutswa yahuuvanga khurula mushio.
7Navutswa Yesu yavoola, “Lekhani naye! Leshi atsililile khuva na makura kali nako khutukha khulitukhu liu khuyeveelwa khu mmbili khwanje mu shilindwa. 8Mulatsililila khumenya na vandu vamanani shia khase khosi; navutswa shiumulatsililila khumenya ninzi shia khase khosi tawe.”
Khuli Valoshitsa Khwiira Lazaro
9Lwa shituma shia vandu vanyishi vahulila ndi Yesu ali mu litaala lia Betsania; vasimukha nivatsiayo, shikali khutsia khulola Yesu wonyene tawe; navutswa khulola khandi Lazaro, wa Yesu yali niyisimushitsa khurula mu likhutsa. 10Khulwa yako, vasalisi vakali valoshitsa khandi khuli vanyala khwiira Lazaro; 11shichila kikholekha khu Lazaro, kachila Vayahudi vanyishi ni va vambakhana, nivasuuvila mu Yesu.
Yesu Yinjila mu Yerusalemi nu Vukhumi
(Mat 21:1-11; Mk 11:1-11; Luka 19:28-40)
12Litukhu lialondakhu, shituma shikali shia vandu, vali nivitsi khwikhoyela Mulukha kwa Pasaka vahulila ndi Yesu ali khunjila yu khwitsa Yerusalemi. 13Vavukula tsisia tsi misala chia mashindu, nivatsia khwakanila Yesu, nivalaanjililanga,
“Hosana! Akasitswi mundu witsanga khuvirila mu lira liu Mwami.
Akasitswi Mwami wa Israeli!”
14Yesu yanyola ipunda nanina khuyo, khuli Mahandiko Matakatifu kavoolanga,
15“Litaala likali lia Sayoni, lekha khuria!
Loli! Mwami wenyu yitsanga,
naye unini khu shimoli shi ipunda.”
16Mumatukhu kenako, veechi va Yesu shivali vamanyi shia kavoolanga tawe; navutswa lwa Yesu yakhuminywa, nalwo lwa vitsushitsa ka Mahandiko Matakatifu kavoolanga khulondokhana khuye, khandi khuli vandu vali nivamukholele.
17Shituma shia vandu vali nivavelenje na Yesu, lwa yalaanga Lazaro khurula mu shilindwa, khandi namwisimushitsa khurula mu likhutsa; vatsililila khulanditsa makhuva khulondokhana khu kali nikakholeshe. 18Lwa vahulila makhuva khulondokhana khu shiloleshitsu shia yali nakholi, vandu vanyishi vasimukha nivatsia khumwakanila. 19Khulwa yako, Vafarisayo vavoolelana vene, “Mulolanga, shindu shivulakhuho shia khutsitsanga khukhola! Loli, vandu voosi vamulondanga!”
Vaguriki Valala Venya Khulola Yesu
20Valala khu Vaguriki vali mu vandu vali nivatsili khusaala mu Yerusalemi khulitukhu liu Mulukha kwa Pasaka; 21vasimukha nivatsia khu Filipu, wi litaala lia Betsesaida mu lusomo lwa Galilaya; nivavoola, “Mwami, khwenyanga khulola Yesu.”
22Filipu yasimukha natsia khuvoolela Andereya, ma vo vavili nivasimukha nivatsia khuvoolela Yesu. 23Yesu yavavoolela, “Isaa yu khuhaana vukhumi khu Mwana wu Mundu imali khutukha. 24Muvoolelanga kilikali ndi lukuutsa lwi inganu nu lushili khukwa hasi mu malova nu khukhutsa, lulatsililila khuva lukuutsa lwi inganu. Niiva lukuutsa lwenolo lulakhutsa, lulama tsimu tsinyishi. 25Mundu wayaanza vulamu vwevwe aliitsa khuvukoritsa; navutswa mundu wakhayaanzakhu vulamu vwevwe mu shivala shinu, aliitsa khunyola vulamu vwi mihika ni mihika. 26Niiva mundu yenyanga khuva murumishi wanje, khutukha anonde; khandi shia havundu hosi hamba nindi, naho ha murumishi wanje aliitsa khuva nali. Mundu uli murumishi wanje, neye wa Tata wanje aliitsa khuha luyali.”
Yesu Yalomoloma khu Likhutsa Lielie
27Yesu yavoola khandi, “Nyakhananga nunundi mu mwoyo kwanje, khu nimbole shina? Mbole, ‘Tata, yikalila isaa yeneyo khuvula khutukha’? Nako kachila ninzitsa mu shivala -- khu mbirili mu isaa yeneyo. 28Tata wanje, khuminya lira liolio!”
Nalwo lwa mwoyo kwarula mwikulu nu kuvoola, “Mali khulikhuminya; niitsa khulikhuminya khandi.”
29Shituma shia vandu vali nivasinjile havundu henaho vahulila mwoyo kwenoko. Valala khuvo vavoola, “Nu khuhilikana khwi likulu.” Vandi nivavoola, “Injelosi ilomolome khu Yesu.”
30Navutswa Yesu yavavoolela, “Mwoyo kwamuhulile kwenoko shiukunyala khuva kuhulilikhane khukhonya inzi mwene tawe; navutswa khukhonya munyi. 31Litukhu liu khukhalachila vandu mu shivala nalio linu; nunundi mwamihi wi shivala shinu, aliitsa khukhunganyinywa. 32Lwa inzi mwene niitsa khuheelwa vukhumi khurula khulilova, niitsa khukhola vandu voosi khwitsa khwinzi.” 33Yesu yavoola ndio khwenya vandu vamanye khuli lwa aliitsa khukhutsa.
34Shituma shia vandu vamuvoolela, “Khwahulila khurula mu malako keru ndi Masiha aliitsa khutsililila khuvaho mihika ni mihika. Wakhavoola munjila shina, ‘Mwana wu Mundu aliitsa khuhilwa mwikulu? Mwana wu Mundu mwenoyo anyala khuva ni viina?’ ”
35Yesu yachipa, “Mulava nu vulavu khumatukhu mati konyene. Chendi lwa muli nu vulavu. Nikakhavele kario, shisuundi shilitsa khumumwamila; shichila mundu uchendanga mu shisuundi wakorwa havundu ha atsitsanga. 36Lwa muli nu vulavu, musuuvile mu vulavu, khu muliva vandu vamenyanga mu vulavu.”
Vayahudi Vambakhana Khusuuvila mu Yesu
Lwa Yesu yavoola ndio, yasimukha natsia khwivisa khurula khuvo. 37Khali niiva Yesu yakhola viloleshitsu vinyishi imbeli wavo, vambakhana khusuuvila muye; 38khu makhuva ku Muprofeti Isaya yali niyavoola karweshitswi,
“Mwami Nyasaye, ni viina wasuuvila likhuva lia khwavoola?
Ni viina wu Mwami Nyasaye yamanyinya tsingulu tsietsie?”
39Khulwa yako, shivali vanyala khusuuvila tawe, shichila Isaya yali wavoola khandi,
40“Navekhulitsa tsimoni tsiavo, khu vavuli khulola,
navikala vwoongo vwavo, khu vavuli khumanya,
khuvula khukalukha khwinzi vahonyinyi.”
41Isaya yavoola makhuva kenako, shichila yalola vukhumi vwa Yesu nalomoloma khulondokhana khuye.
42Khali ndio, vanyishi khu vimilili va Vayahudi vasuuvila mu Yesu. Navutswa shivavoolakhu havulavu vali ni lisuuvila mu Yesu tawe, shichila varia Vafarisayo vanyala khuvakhunga khurula mu lisinagogi. 43Vimilili va Vayahudi vayaanza vandu khuvitsominya khuvira Nyasaye khuvitsominya.
Likhalachilwa Khuvirila mu Makhuva ka Yesu
44Yesu yalaanjila nu mwoyo mukali navoola, “Mundu usuuvilanga mwinzi, shikali asuuvilanga mwinzi wonyene tawe, navutswa asuuvilanga khandi mu woyo wanduma. 45Mundu ulolanga inzi, alolanga khandi woyo wanduma. 46Namala khwitsa mu shivala khuli vulavu, khu mundu nasuuvila mwinzi avuli khutsililila khumenya mu shisuundi. 47Niiva mundu alahulila likhuva lianje khandi avula khulilonda, shinyala khumukhalachila tawe. Shiniitsa khukhalachila vandu mu shivala tawe, navutswa khuvahonyinya. 48Mundu wambakhananga inzi khandi avula khuhuchilila likhuva lianje, ali na woyo uliitsa khumukhalachila. Makhuva ka nomolome nako kaliitsa khumukhalachila khulitukhu liukhumalilikha! 49Shinomolome khuvirila khu vunyali vwanje mwene tawe; navutswa Tata wanduma neye mwene umbolele kambola khandi khuli mbola. 50Manyi ndi lilako lielie lia avoolanga nalio lihaananga vulamu vwi mihika ni mihika. Khulwa yako, shia shindu shiosi shiambola, mbolanga shia Tata wanje ambolelanga mbole.”
© The Bible Society of Kenya, 2013
