VIKHOLWA 1
1
1Amwiru Theofilo:
Mu shitabu shianje shiukhuraanga, nahandika makhuva khulondokhana khu shia shindu shiosi shia Yesu yakhola, khandi niyechitsa khurula khulitukhu lia yaraanga muhinzilu kwekwe, 2khutukha khulitukhu lia yahilwa mwikulu. Yesu nashili khuhilwa mwikulu, yavoolela varumwa va yali niyarovola mivaalo khuvirila mu tsingulu tsia Roho Mutakatifu. 3Khumatukhu makhomi kane khurula Yesu niyakhutsa, yalolekha hali khanyishi khuvo, khuvamanyinya ndi ni kilikali yali nashili mwoyo. Vamulola, naye yalomoloma navo khulondokhana khu Vwami vwa Nyasaye. 4Lwa yali nali navo,#1:4Lwa yali nali navo: inoho naliitsanga shiukhulia navo inoho namenyanga navo. yavavoolela, “Muvuli khurula mu Yerusalemi; navutswa mulindilile shihanwa shia Tata wanje yalaaka; shichila nako makhuva ka mwahulila nimbolanga khulondokhanakhu. 5Yohana yabatisa na matsi, navutswa lwa matukhu mati kaliitsa khuvira, muliitsa khubatiswa na Roho Mutakatifu.”
Yesu Yahilwa Mwikulu
6Lwa varumwa vakana na Yesu, vamureeva, “Mwami, yaka nako matukhu ka uliitsa khukalushitsa vwami khu Israeli?”
7Yesu yavavoolela, “Shikali ni vanga munyi vamutushili khumanya matukhu inoho tsinyinga tsia Tata wanje yaviritsa vindu vienevo vikholeshe khuvirila mu vunyali vwevwe mwene tawe. 8Navutswa muliitsa khunyola tsingulu, lwa muliitsa khunyola Roho Mutakatifu. Muliitsa khuva vashiahidi vaanje mu Yerusalemi, shia havundu hosi mu tsisomo tsia Yudeya nende Samaria, khandi shia havundu hosi khulilova.” 9Lwa Yesu namali khuvoola kenako, yahilwa mwikulu, nivamurelekhu tsimoni; ma malesi nikavakhunikha khuvula khumulola.
10Lwa varumwa vali nivashiheenzanga mu malesi, Yesu nahilwangwa mwikulu, nonoho vandu vavili nivifwali tsinguvu tsindavu vasinjilaho navo; 11nivareeva, “Munyi Vagalilaya, shichila shina musinjile yaho numuheenza mu malesi? Yesu uyu, warulitswa khu munyi nahilwa mwikulu, aliitsa khukalukha munjila indala yene khuli lwa mumuloli nahilwangwa mwikulu.”
Mundu Wakalukha mu Vwiyangu vwa Yuda
12Nalwo lwa varumwa vakalukha Yerusalemi nivakharula khu Shikulu shia Misayituni, luchendo luvukulanga himbi ikilomita indala khurula mu litaala likali lia Yerusalemi. 13Vinjila mu litaala likali nivatsia munzu yikolofa mwa Petro nende Yohana, Yakobo nende Andereya, Filipu nende Tomasi, Batsolomeyo nende Matayo, Yakobo mwana wa Alufayo nende Simoni wakwanilanga shivala shieshie, nende Yuda mwana wa Yakobo vali nivamenya. 14Shia khase khosi voosi vali vamenya nivakananga halala khwitsa khusaala, halala na vakhali vandi, khali khumeetakhu Mariya mama wa Yesu nende vamwavo va Yesu.
15Mumatukhu kenako, khwaliho ni shikhaalo shia vasuuvili, voosi himbi imia indala na makhomi kavili; Petro yasinjila 16navoola, “Vasuuvili vashianje, Mahandiko Matakatifu, ka Roho Mutakatifu yalomoloma khuvirila khu Daudi khulondokhana khu Yuda wimilila vandu khukumila Yesu khutukha kaliitsa khurweshitswa. 17Yuda mwenoyo yali mulala khu vandu vi shituma shieru, shichila yali warovolwa khukhola muhinzilu kwa khwali nu khwaheelwa.”
18(Yuda yarumishila tsisenti tsia yali nanyoli munjila indamanu khukuula shitonye shiu mulimi, ha yakhutsila. Mmbili kwekwe kwarulikha, mala nikasuundukha ilwanyi. 19Shia mundu wosi mu Yerusalemi yamanya namanya makhuva kenako, khali nivalaanga mulimi kwenoko lira mululomolomo lwavo Hakelidama, nakhwo khuvoola, “Mulimi kwa Masahi.”)
20Petro yavoola, “Shichila kahandikwa mu Shitabu shi Tsitsabuli,
‘Leshi vwiyangu vwevwe vurikale vwele;
mundu avuli khuvuvukula.’
Kahandikwa khandi,
‘Leshi mundu wundi avukule muhinzilu kwali kwekwe kwa yakholanga.’
21“Khulwa yako, nu vulahi nu khurovole mulala khurula mu vandu vamenyanga na khutsi, khumatukhu koosi ku Mwami Yesu yachendanga na khutsi; 22khuraanjila khulitukhu lia Yohana yabatisa khutukha khulitukhu lia Yesu yarulitswa mu khutsi nahilwa mwikulu. Mulala khu vandu venavo khutukha aliitsa khuva mushiahidi na khutsi khulondokhana khuli Yesu yisimushitswa khurula mu likhutsa.”
23Vavoola mira ka vandu vavili, mulala khuvo yali Yosefu (walaangwangwa Barasaba, wali ni lira lindi Yusita), na wundi nalaangwa Matiyasi. 24Vasaala nivavoola, “Yivi mwami, wamanya shia shindu shiosi shili mu mwoyo ku mundu. Khumanyinyi khu vandu vavili yava mundu wa yivi mwene urovole 25khuvukula vwiyangu vu khukhola muhinzilu yuku, khandi khurumikha khuli murumwa, nukuli muhinzilu kwa Yuda yalekha khukhola, nakhola ka mwene yenyi.” 26Khulwa yako, vakhuva ikura, ma ikura nikwila Matiyasi. Matiyasi yameetwa khu varumwa likhomi na mulala.
© The Bible Society of Kenya, 2013
